Me Melahr akan Kak Sewese me Momour kan?

MWAHNAKAPW men nan Aperika me adaneki Tamba kereniong pahn ale des nan sukuhl. * Eh nohno ngihtehtehki me e anahne sawas sang ara peneinei me melahr akan. Nan kahnimw en Palermo nan Italy, aramas akan kin mwemweitla nan wasahn sousou kan me kin nekidala paliweren aramas epwiki kei pwe aramas akan en kohdo oh kilang. Ekei kin kamehlele me paliweren aramas pwukat kak kihong me momour kan pereparail sang rehn Koht. Ehuehu sounpar, aramas kin mwemweitla nan kahnimw en Lily Dale nan New York pwehki sounkapwour eni tohto kin mi wasao. Aramas pwukat kin koapworopworki me re kak tuhwong arail peneinei kan de kompoakparail kan me melahr pwehn ale sawas.

Nan sampah pwon, aramas tohto kin kamehlele me me melahr akan kak sewese me momour kan. Ia omw madamadau? Ele ke kin rong soangen padahk wet de karanih emen me kin kamehlele met. Kitail kin ahneki pepehm en men pwurehng tuhwong kompoakepatail me melahr. Sounkapwour eni kan kin nda me re kak sawas. Ehu makasihn koasoia me emen sounkapwour eni kin nda me ngehn akan “kak sawas ahnsou koaros.” (Time magazine) Met mehlel? Ia duwe, me melahr akan kak uhdahn sewese me momour kan? Paipel sapengla peidek pwukat ni sansal oh ele ke pahn pwuriamweikihla pasapeng pwukat.

Me Melahr akan Kin Momour Wasakis?

Paipel kin kawehwehda ni mengei ia irair en me melahr akan. Tehk dahme Eklesiasdes 9:5 mahsanih: “Me momour kan ese me re pahn mehla, ahpw me melahr akan sohte ese mehkot.” Ia duwe, me melahr akan kin kak pehm mehkot? Iretikitik 6 mahsanih: “Arail limpoak, kailok, oh ineng en nan kapehdirail, iang irail mehla. Re solahr pahn iang wia mehkot nin sampah.” Pil kilang iretikitik 10 en irelaudohte me mahsanih: “E sohte pahn mie wiewia, de lamalam, de loalokong, de erpit, nan wasahn me melahr akan​—oh iei wasa me ke pahn kohla ie.” Wiewia 2:31 kin kasalehda me Sises Krais pil ketila nan wasaote erein ahnsoukis mwurin eh pwoula.

Sises ketin sewese me tohto ni ahnsou me e ketin momour, ahpw e pil mwahngih me e pahn anahne pwoula. Ia duwe, e ketin kasik me e pahn kak ketin sewese aramas akan erein e pahn pwoula nan sousou? Soh. E ketin karasahda me sapwellime pwoula pahn duwehte nipwong ni ahnsou me aramas sohte kak doadoahk. (Sohn 9:4) Sises mwahngih me ni ahnsou me aramas akan mehla, re solahr kak wia mehkot.​—Aiseia 38:18.

Sises ketin doadoahngki pil ehu karasaras duwen me melahr akan. Ni ahnsou me kompoakepah Lasarus melahr, Sises ketin karasahiong eh mehla duwehte ni ahnsou emen kin meir. (Sohn 11:11-13) Kitail kin kasik emen me memeir en sewese kitail? Soh. E sohte kin pehm mehkot oh sohte kak sewese emen.

Mie Mehkot me Kin Momour Mwurin Aramas Mehla?

Me tohto kin rong me mie mehkot kin momour mwurin paliwar mehla. Ahpw dahme Paipel padahngki weksang met. Melkahka 146:4 mahsanih me ni ahnsou me aramas akan kin mehla, “ar koasoandi kan kin imwisekla.” Ihme kahrehda, sohte mehkot me kin momour mwurin kitail kin mehla.

 Ekei ele pahn idek, ‘Ahpw ia duwen koasoi kan me aramas kin tuhwong me melahr akan, rong ngilarail, de kilang irail?’ Soangen koasoi pwukat kin kalapw wiawi nan wasa tohto nin sampah. Koasoi pwukat kin kihong koapworopwor ong irail kan me arail peneinei de kompoakparail melahr. Met kin kahrehiong me tohto en rapahki sounkapwour eni kan me kin kose me re kak kapwourda me melahr akan.

Ia duwe, soangen koasoi pwukat mehlel? Ma ei, met sou pahn uhwong dahme Paipel kin padahngki? Sises Krais mahsanih me Mahsen en Koht iei me mehlel. (Sohn 17:17) Padahk mehlel sohte kin audaudki padahk kan me kin uhpene. Ni mehlel, mie kaweid sansal nan Paipel duwen atail pahn kilangwohng koasoi kan me dene me melahr akan kak sewese me momour kan. Paipel kin padahkihong kitail duwen emen me song en ale sawas sang rehn me melahr. Ni omw pahn wadek kanaiehng ire wet, e pahn kasalehda dahme mehlel.

Nanmwarki Men Pek Sawas Sang Rehn me Melahr

Nanmwarki Sohl oh nah sounpei kan tuhwong sounpei kommwad kan en Pilisdia nan paliepeng en Israel. Ni ahnsou me Sohl kilangada mehn Pilisdia kan, “e inenen masepwehkada.” Ni ahnsowo Sohl keselahr kaudok mehlel. Ihme kahrehda Siohwa sohte ketin sapeng eh pek sawas kan. Ia wasa Sohl pahn ale sawas ie? Sapwellimen Koht soukohp Samuel melahr.​—1 Samuel 28:3, 5, 6.

Sohl rapahki sawas sang rehn sounkapwour eni men nan Endor. E peki rehn sounkapwour enio en kapwourda Samuel sang mehla. Sounkapwour enio likwerihda mehkot me mwomwen aramas. Ape wet me mwomwen Samuel, ndaiong Sohl me mehn Pilisdia kan pahn kalowehdi oh me Sohl oh nah pwutak kan pahn mehla nan mahwen. (1 Samuel 28:7-19) Ia duwe, uhdahn Samuel me pwurodohsang mehla?

Nna medewehla. Paipel mahsanih me ni ahnsou me aramas mehla, “ar koasoandi kan kin imwisekla.” (Melkahka 146:4) Sohl oh Samuel koaros ese me Koht ketin keinepwihsang irail en tuhwong sounkapwour eni kan. Mwohn mwo, Sohl tiengla mwowe en kihsang tiahk en wunahni nan sahpwo.​—Lipai 19:31.

Medewe duwen ireo. Ia duwe, ma ohl lelepek Samuel momourte nin duwen ngehn emen, e pahn kauwehla sapwellimen Koht kosonned oh ehuiong sounkapwour enio pwehn tuhwong Sohl? Siohwa solahr kupwurki mahseniong Sohl. Eri ia duwe, sounkapwour eni men kak iding Koht Wasa Lapalahpie en mahseniong Sohl ni eh ketin doadoahngki Samuel me melahr? Soh. Sansal me ape wet me mwomwen Samuel kaidehn uhdahn sapwellimen Koht soukohp lelepeko. Ih ngehn saut men me mwomwehda wia Samuel me melahr.

Ngehn saut akan iei tohnleng kan me uhwongada sapwellimen Koht kaunda ni tepin poadopoad en aramas. (Senesis 6:1-4; Sud 6) Ngehn saut pwukat kak kasawih aramas akan ni ahnsou me re kin momour. Irail ese ia duwen emenemen aramas eh kin koasoi, mwomwarail, oh eh wiewia kan. Irail kin ngoangki kalaudehla madamadau me Paipel sohte mehlel. Ihme kahrehda Paipel kin kaweidkin kitail en dehr ehuiong soangen ngehn pwukat. (Deuderonomi 18:10-12) Ngehn saut pwukat kin wie doadoahk laudte nan atail ahnsou.

 Met kitail kak wehwehki dahme kahrehda me tohto kin koasoia me re “rong” de “kilang” kompoakparail me melahr. Mendahki dahme re kin kilang mwomwen mwahu, ngehn saut kan kin nantihong en pitihdi aramas akan. * (Episos 6:12) Pil medewe duwen met: Siohwa iei Koht limpoak men me kin ketin nsenohkin kitail. Ma me melahr akan wie momour wasakis oh irail kak sewese kompoakparail kan oh arail peneinei, atail Sounkapikada limpoak pahn keinepwihsang kitail en ehuiong irail oh mahsanih me e ketin “kalahdeki” wiewia wet? Uhdahn soh! (1 Piter 5:7) Eri, mie me kak uhdahn sewese kitail?

Sawas ong me Momour oh me Melahr

Sang dahme kitail koasoiahier, kitail wehwehki me me melahr akan sohte kak wia mehkot pwehn sewese me momour kan. Ahpw laudsang met, en song en rapahki sawas sang rehn me melahr akan uhdahn keper. Met pahn kauwehla sapwellimen Koht kosonned oh kahrehiong kitail en mihla pahn manaman en ngehn saut akan.

Paipel kin kasalehiong kitail me Utupen sawas me keieu mwahu iei Sounkapikpatail, Siohwa. E kak ketin kapitkitailsang mehla. (Melkahka 33:19, 20) E kak ketin sewese kitail ahnsou koaros. Eri e kak ketikihda koapworopwor mehlel me weksang koapworopwor likamw akan me kohsang sounkapwour eni kan.

Tamba me kitail koasoiahier mwowe, esehda wekpeseng en koapworopwor likamw me kohsang sounkapwour eni kan oh padahk mehlel me Siohwa kin ketikihong kitail. Sounkapwour eni kan nda me ma e sohte wiahda meirong ong eh peneinei kan me melahr, e sohte pahn pweida nan deso. Tamba tepida onop Paipel rehn Sounkadehdehn Siohwa kan. E sukuhlki duwen uhdahn irair en me melahr akan oh pil ihs me kin mwomwehda wia peneinei en me melahr akan. Mendahki eh nohno iding ih en ale sawas sang rehn sounkapwour eni men, Tamba sohte ale sawas wet oh ndaiong eh nohno, “Ma I sohte pweida, I pahn nannanti pwe I en pweida nan pahr kohkohdo.”

Ia imwilahn met? Tamba me keieu nan deso! Eh nohno pwuriamweikihla met oh solahr kamehlele sounkapwour eni kan, oh sohla pwurehng koasoia soangen meirong pwukat. Tamba sukuhlki me Siohwa ketin kaweidki kitail en dehr “ale kaweid rehn me melahr akan pwehn sewese me momour.” (Aiseia 8:19) Onop Paipel kahrehiong Tamba en kamehlele me ma e pahn perenki sapwellimen Koht kosonned, e pahn pweida mwahu.​—Melkahka 1:1-3.

Ahpw ia duwen kompoakepatail me melahr kan? Mie koapworopwor ong irail? Patehng en Siohwa eh kin ketin sewese me momour kan, e ketin inoukihda me e pahn ketin sewese irail kan me mi nan sousou. Mwurin soukohp Aiseia eh kasalehda me me melahr akan sohte kak wia mehkot, e kasalehda met nan irelaud 26, iretikitik 19: “Irail kan sang rehn at tungoal aramas akan me melahr pahn pwurehng mourda! . . . Koaros me memeir nan ar sousou pahn pwourda oh koulki koulen peren.” Kokohp wet pil kasalehda me “KAUN-O eh pahn ketin kamourada me melahr akan.”

Medewehla met! Irail me rar kei me memeir nan sousou pahn pwurehng mourda! Ni mehlel Paipel kin kasalehda me Siohwa ‘kupwurperenki’ ketikihong mour ong irail me melahr akan. (Sohp 14:14, 15) Ia duwe, inou pwukat mwomwen sohte kak pweida? Sises Krais kin ketin uhdahn kamehlele duwen koapworopwor wet kahrehda e mahsanih me me melahr akan kin wia momour mwohn silangin Koht.​—Luk 20:37, 38.

Ke men ahneki koapworopwor wet? * Eri, pousehla sukuhlki duwen padahk mehlel en Paipel. Ni omw kin onop Paipel, ke pahn kak kamehlele me Siohwa kak ketin sewese me momour kan oh me melahr akan oh sapwellime inou kan “me mehlel oh likilik.”​—Kaudiahl 21:4, 5.

[Nting tikitik kan me mi pah]

[Blurb nan pali 25]

Kitail kin men pwurehng tuhwong koampokpatail me melahr

[Kilel nan pali 26]

Soukohp Samuel pwurodo sang mehla oh koasoiong Nanmwarki Sohl?