DON, me wia emen Sounkadehdehn Siohwa nan Canada, kin nantihong koasoiong aramas akan me kin kousoan limwahn ahl kan. Don koasoiahki emen irail: “Peter iei emen ohl me I kilang me uhdahn samin. Sohte imwe oh e kin mihseli pohn kisin ahl akan me mi nanpwungen de ni tihnsewen ihmw laud kan. E kin lemei oh esehla kahrehiong aramas akan en dehr karanih ih. Pak tohto e kin pwurepwurehng soikala aramas akan ar kin kadekohng ih.” Ahpw daulih sounpar 14, mie ahnsou kan me Don kin ni kanengamah kasalehda kadek ong ohl menet.

Ehu rahn, Peter idek rehn Don: “Ia kahrepen ke kin kedirepwe ie? Aramas teikan koaros kin piseksang ie. Dahme kahrehda ke nsenohkin ie?” Ni kadek Don doadoahngki iren Paipel siluh pwehn nantihong en sair mohngiong en Peter. Keieu, e idek rehn Peter ma e ese me mie mwaren Koht oh peki reh en wadek Melkahka 83:18 sang nan Paipel. Mwuri, pwehn kasalehiong ih dahme kahrehda e nsenohkin ih, Don peki Peter en wadek Rom 10:13, 14, me kawehwehda me “koaros me kin likweriong mwaren Kaun-o pahn mourla.” Mwurin mwo, Don wadek Madiu 9:36 oh peki rehn Peter en pein wadek ireo. Ireo koasoia: “Ni eh [Sises] kin mahsanihada pokon en aramas akan, e kin kupwureirailla, pwehki ar pwunod akan oh sohte epwelparail, pwe re rasehng sihpw kei me sohte silepahr.” Ni Peter eh rong met, pilen meseo kohda oh e idek: “I iang emen sihpw pwukat?”

Peter tepida wiahda wekidekla kan. E duhdu, sehkla eh aliso pwehn soandi mwahu, oh doadoahngki likou mwahu kan me Don kihong ih. Peter pousehlahte wia mwomwen aramas mwakelekel men.

Peter naineki pwuhk ehu me e kin ntingihediong eh madamadau kan loale. Soahng kan me e tepin ntingihedi nan nah pwuhko kin kansensuwed, ahpw kerendo, dahme e ntingihedi weksang mwoweo. Ehu wasa e ntingihedi: “I esehla mwaren Koht rahnwet. Eri met ni ei kin kapakap, I kak kapakap ong Siohwa. E uhdahn kaperen ei esehla mwareo. Don nda me Siohwa kak ketin  wiahla Kompoakepahi, emen me kin ahnsou koaros ketin karonge ie, sohte lipilipil iahd de dahieu.”

Kaimwiseklahng soahng kan me Peter ntingihedi iei ong rie ko. E ntingihedi:

“I soansuwed rahnwet. I leme I mahlahr. Ahpw mendahki ma ih imwiseklahn ei mour rahnwet, I ese me I pahn pwurehng kilang kompoakepahio [Don] nan Paradais. Ma kumwa wadewadek met, wehwehki I solahr mie. Ma kumwa kilang ohl emen kohdo iang rong padahk en ei mehlao, me mwomweo weksang meteikan, kumwa koasoiong ih, oh menlau wadek kisin pwuhk wet [e koasoakoasoia duwen pwuhken onop “Padahk Mehlel me Kahluwahlahng Mour Soutuk” me e ale sounpar kei mwoweo]. * Pwuhko koasoia me I pahn kak pwurehng tuhwong kompoakepahio nan Paradais. I kamehlele met nan ei mohngiong unsek. Riamwa ohl, Peter.”

Mwurin padahk en mehlao, rien Peter serepeino Ummi nda: “Sounpar riau samwalahro Peter tuhwong ie. Edin ei tuhwong ih mwurin sounpar kei, e mwomwen nsenamwahu. E pil pohkomwokomw.” Ummi ndaiong Don: “I pahn wadek pwuhko pwehki sohte lipilipil dah me kak sair mohngiong en riei ohlo uhdahn wia mehkot kesempwal.” Ummi pil pwungkihda en onopki pwuhk kapw wet Dahme Paipel Uhdahn Padahngki? rehn emen Sounkadehdehn Siohwa.

Kitail pil kak kilang kaidehn ihte mwomwen aramas, kasalehda limpoak mehlel, oh kanengamahiong soangen aramas koaros. (1 Tim. 2:3, 4) Ni atail wia met, ele kitail kak kamwakid aramas akan me duwehte Peter, me ele sohte mwohmw mwahu rehn aramas akan ahpw ahneki mohngiong mehlel. Kitail kak kamehlele me Koht, me kin ketin “kasawih nan mohngiong en aramas akan,” pahn ketin kakairada padahk mehlel nan mohngiong en me pwung kan.​—1 Sam. 16:7; Sohn 6:44.