NIEHD, September 1, 1919, wia rahn ehu me ketipin oh sohte nohn lemwulemwur mwurin rahn kei me kisinieng oh keteu. Mwurin souwas en rahno, aramas malaulau sang 1,000 pokonpene nan wasa ehu me aramas 2,500 kak mwohd ie ong tepidahn prokram en mihting tohrohro me wiawi Cedar Point, Ohio, U.S.A. Ni soutiklahn rahno, aramas daulih 2,000 pil lella wasao iangodo pwoht, sidohsa oh kisa kan. Niare, pokono uhdahn laudla kahrehda luhwen prokram en mihting tohrohro anahne wiawi likio pahn tuhke lingan kan.

Pahn tehn tuhke ko, marain en ketipino daker ahn ohl akan sekid ko kahrehda en duwehte mwomwen suwain. Engitik sang lepin leh Lake Erie ipido oh ipir ahn lih ako lisoarop kan me kapwatki wunen menpihr. Emen brother nda me ni mihting tohrohro, soahng kan me kapilpene wasao inenen kaselel, meleilei, oh riatail Kristian ko koaros ehupene tohrohrasang sampah wet, eri e mwomwen me re mi nan paradais.

Soahng kaselel kan me kapilpene wasao sohte nohn kaselel duwehte peren laud me mi pohn mesen irail kan me towehda mihting tohrohro. Ehu doaropwehn nuhs en wasao koasoia: “Koaros mwomwen poadidiong arail kaudok ahpw wia aramas kei me inenen peren.” Tohnsukuhl en Paipel kan perenki ar ehuong riarail Kristian kan, ahpw keieu pwehki mwurin kahpwal laud kan me wiawi sounpar kei mwoweo, duwehte mahwen; mwomwohdiso kan ar sohte kin pwungkipene soahng kan; Brooklyn Bethel eh sohla doadoahk; me tohto selidi pwehki Wehio, iangahki brother welimen ko me kin tiengla mwowe ar pahn selikihdi sounpar 20. *

Ekei Tohnsukuhl en Paipel kan uhdihsang arail doadoahk en kalohk pwehki re mworusala oh pwonopwonkihda dahme wiawi erein ahnsou apwal ako. Ahpw me tohto wia uwen arail kak en wonlahte nan kahpwal kan me kohsang koperment. Nan ehu irair ko, emen pilismen ripohtki me mendahki re aleier mehn kataman lemei kan, Tohnsukuhl en Paipel ko me e kapeidakih ngihtehtehki me re pahn “pousehlahte kalohki mahsen en Koht lao lel imwio.”

Erein ahnsoun kasongosongo, Tohnsukuhl en Paipel lelepek kan kin “tetehk sapwellimen Kauno eh ketin kahluwa irail, . . . kapakapki ahnsou koaros sapwellimen Sahmo kaweid kan.” Met re ehupenehier ni mihting tohrohr kapereno nan Cedar Point. Emen sister ndahla pepehm en me tohto me men ese ia duwen arail pahn “pwurehng tapiada doadoahk en kalohk.” Laudsang mehkoaros, re men tepida doadoahk!

Erein wihko pwon, irail me towehda mihting tohrohro pwonopwonki mesen nting kan “GA” me nting pohn doaropwehn prokram en mihting tohrohro, doaropwehn kasamwo aramas akan, oh sain kan me kapilpene likin wasao. Nialem, ni rahn me re kahdaneki “Co-Laborers’ Day,” Joseph F. Rutherford kasalehda ia wehwehn mesen nting pwukat ong irail meh 6,000 me towehda mihting tohrohro. Mesen nting ko “GA” kin wehwehki The Golden Age​—kisin pwuhk kapw ehu me wiawihda ong kalohk. *

Brother Rutherford ndahki ienge Kristian keidi kan: “Pwehki re ahneki pwoson re kilang ahnsou kaselelo me Mesaiao pahn kaunda. . . . Re kin medewe me iei arail pwukoa oh pwais kesempwal en padahkihong tohnsampah duwen ahnsou kaselel wet me kohkohdo. E wia kisehn arail pwukoa me Koht ketikihong irail.”

The Golden Age, “Pwuhken Ire Mehlel, Koapworopwor, oh Dahme Aramas Uhdahn Kamehlele,” pahn kadoadoahk ni ahl kapw ehu ong kalohki padahk mehlel​—doadoahk tohrohr ehu en kalohk ihmw lel ihmw. Ni me wia padahko idek ihs me men iang wia doadoahk wet, koaros me mi wasao mwadangete kesihnenda. Mwuhr, “ni soangen ngoang me irail kante me kin idawehn Sises ese duwe,” re koulki: “Kamarainihkin kiht sapwellimomwi marain oh mehlel, Maing Kaun.” J. M. Norris nda me e sohte pahn manokehla uwen laud en arail koulo, mwomwen me tuhke ko itikekda.

Mwurin prokramo, irail kan me iang mihting tohrohro kesihnen ni lain erein ahnsou werei pwehn iang irail kan me tepin oahte neirail makasihn. Me tohto ahneki pepehm en Mabel Philbrick me nda: “Ia uwen kaperen en ese me mie doadoahk me se pahn pwurehng wia!”

Mpen Tohnsukuhl en Paipel 7,000 kaunopadahr en mwekid. Doaropweo me oaralape Organization Method (lokaiahn wai) oh kisin pwuhk me oaralape To Whom the Work Is Entrusted (lokaiahn wai) kawehwehda soahng kan ni oaritik, duwehte met: Wasahn Apwalih Palien Kalohk ni poasen kaun en Sounkadehdehn Siohwa kan pahn kaweid doadoahko. Pwihn me Kin Apwalih Palien Kalohk anahne wiawihda nan mwomwohdiso oh sounapwalih men en idihdida pwehn kawehwehda kaweid kan. Wasahn kalohk kan pahn kohpeseng, ihmw 150 lel 200 nan ehuehu wasahn kalohk. Mihting en Kalohk pahn wiawi ni soutik en Niepeng pwe brother ko en ehukihong riarail kan dahme wiawiong irail oh pwehn kihlong ripoht en kalohk.

Herman Philbrick nda: “Ni at pwurodo ni imwat ako, kiht koaros soupisengkihla doadoahk tohrohr en kihla oaht ong makasihn ko.” Wasa koaros re diarada aramas akan me men rong irail. Beulah Covey nda me mwomwen mwurin mahwen oh pahtou laud, aramas koaros pil perenki rong padahk duwen ahnsou me kahpwal koaros pahn mwahula oh aramas koaros pahn ahneki mour nsenamwahu. Arthur Claus ntingihedi: “Mwomwohdiso pwon inenen pwuriamweikihla uwen tohtohn oaht ong makasihn ko me re alehdi.” Erein sounpwong riau me tepin makasihno (The Golden Age) kohda, kereniong aramas limelopw (500,000) alehdi, oh irail kan me pahn kin oaht makasihno lella meh limenen (50,000).

Oaralap me kohda nan Kahn Iroir en July 1, 1920 iei “Rongamwahu en Wehio.” Brother A. H. Macmillan koasoia me oaralapo kasalehda tepin ahnsou me sapwellimen Siohwa pwihn kangoange riatail Kristian koaros en kalohki duwen Wehin Koht ong aramas koaros nin sampah. Oaralapo kangoange Kristian keidi koaros en “kalohkihong tohnsampah me wehio nanleng kerendohr.” Rahnwet, rien Krais kan me “doadoahko kohwong” oh aramas rar rar kei me iang irail me kin kalohki mahseno ni ngoang awiawih kaundahn Mesaiao me pahn ketido.