Siohwa ketin kupwurki pwopwoud ehu en peren oh ahneki nanpwungmwahu keren me pahn poatopoat. (Mad. 19:4-6) Ma ke men pwopwoudla, ia duwen omw kak diarada omw pwoud me mwahu? Pwehki Siohwa iei Sounkapikpatail, e ketin mwahngih dahme kitail anahne pwe kitail en kak ahneki mouren pwopwoud nsenamwahu. Eri ma ke kapwaiada kaweid kan me e ketikihong kitail, ke pahn ahneki peren mehlel. Kitail pahn kilangpene ekei kaweid kan.

Keieu, kitail anahne wehwehki duwen pein kitail: “Ihs me kak wehwehki audepen mohngiong en aramas? Sohte mehkot me duwehte me diren piht; sohte kamwahupe ieu kak dierekda.” (Ser. 17:9) Ni aramas riemen men pwopwoudla, tuhpene oh tepida date, ara pepehm ong emenemen kak uhdahn kehlailla. Ma met wiawi, e pahn apwal ong ira en wiahda pilipil mwahu kan. Ni aramas akan ar pilada en pwopwoudla ihte pwehki arail ineng, irail kin kalapw nsensuwedkihla mwuhr. (Lep. Pad. 28:26) Ihme kahrehda e sohte wia elen loalokong ong meh riemen en ndapene ara pepehm de wiahda inou mwohn ara uhdahn esehla emenemen.

Lepin Padahk 22:3 mahsanih: “Aramas me eh lamalam mie kak kilangada kahpwal me kohkohdo oh wetsang; ahpw aramas tohto kin inenwohngete, ahpw nsensuwedkihla mwuhr.” Ia keperpen en doadoahngki website kan pwehn diarada omw pwoud? E kansensuwed me ekei aramas diarada emen nan Internet oh tepida date oh mwuhr esehda me aramaso pitihiraildi. Pil ehu, aramas mwersuwed kan kin mwomwehda ekei aramas pwehn pitihdi aramas oh pirapahsang neirail mwohni. Ekei pak, irail me mwersuwed pwukat kin nda me irail Sounkadehde kei.

Pil tehk ehu keperpen met. Ekei website kan kin doadoahngki nempe (algorithms) pwehn diarada ihs me pahn date ih ihs. Ahpw, sohte mehn kadehde me wiepe wet kak pweida. E pahn wia mehkot pweipwei en likih computer prokram ehu me aramas wiahda pwehn wiahda pilipil ong ihs me ke pahn pwoudiki. Computer prokram kan sohte kak pahrekiong kaweid en Paipel kan me uhdahn likilik.​—Lep. Pad. 1:7; 3:5-7.

Ehu kaweid kileldi nan Lepin Padahk 14:15 mahsanih: “Aramas pweipwei kin kamehlele mehkoaros; aramas loalokong kin kanahieng  arail kahk koaros.” Mwohn omw pahn pilada ihs me pahn wia omw pwoud mwahu, ke anahne esehla mwahu ih. Ahpw en wia met nan Internet pahn apwal. Mehnda ma kumwa kadarpene kilelomwa oh soahng kan me pid duwen kumwa de ma kumwa doadoahngki ahnsou laud pwehn koasoakoasoipene nan Internet, ia duwe, ke kak uhdahn nda me ke ese duwen aramaso? Ekei me medewe me irail diaradahr arail mwohn limpoak kin pwuriamweikihla dahme re diarada ahnsou me re tuhpene.

Sounmelkahkao mahsanih: “I sohte kin patehng aramas soh-katepe kan; sohte ahiong me liksansalamwahu kan.” (Mel. 26:4) Me tohto medewe me e sohte wiahda mehkot laud en likamwkihda soahng kan duwen pein ih nan Internet pwehn kahrehiong meteikan en mwahuki ih. Ele irail pahn ekihla arail irair suwed kan de arail irair suwed kan sohte kin sansal nan neirail text kan me re kin kadar ong meteikan. E kesempwal en medemedewe pasapengpen peidek pwukat: Mendahki ekei aramas kin nda me irail Sounkadehdehn Siohwa kan, ia duwe, irail uhdahn Kristian kei me papidaislahr? Irail ahneki nanpwungmwahu rehn Siohwa? Mwomwohdiso kin wauneki irail? De irail kin wia mehn kahlemeng suwed de “werek suwed.” (1 Kor. 15:33; 2 Tim. 2:20, 21) Irail kak pwopwouda nin duwen me pahrekiong kaweid en Paipel? Ke anahne esehda pasapengpen peidek pwukat, ahpw e kak apwal en diarada pasapeng kan ma ke sohte koasoiong Sounkadehde teikan me uhdahn ese aramaso. (Lep. Pad. 15:22) Oh pil sapwellimen Siohwa ladu loalopwoat men sohte pahn pil medewe en pwoudikihda emen me seupwoson de pil “patehng.”​—2 Kor. 6:14; 1 Kor. 7:39.

Pwehki e keper en doadoahngki website en dating, mie ahl mwahu teikan en rapahki oh esehla emen me ele ke kak pwoudiki. Ia wasa ke kak diar omw pwoud me mwahu? Ni ahnsou me kitail kak tuhpene kitail kak esehla meteikan ni mihting en mwomwohdiso kan, mihting tohrohr kan, oh ni atail kin patpene mwemweit.

Ma soangen ahnsou pwukat sohte kak wiawi pwehki soumwahu lusulus en COVID-19, kitail kak doadoahngki neitail sehlpwohn de tablet ape pwehn iang towehda mihting kan en mwomwohdiso oh tuhwong Sounkadehde kiripw teikan. Ke kak rong arail wia padahk nan mihting, oh ar kasalehda ar pwoson sang ni arail pasapeng kan. (1 Tim. 6:11, 12) Ke pil kak koasoiong irail nan breakout room mwurin mihting kan. Ma ke iang ekei Sounkadehde kan koasoi de mwemweitpene nan Internet, ke kak kilang mwomwen en aramaso eh wiewia ong meteikan, oh ke kak ese soangen aramas dahmen ih. (1 Pit. 3:4) Mwuhr, ni omw esehla mwahu aramaso, ke kak ese ma amwa mehn akadei ko duwehpene de ma kumwa kak wia pwopwoud mwahu.

Ni me kiripw kan ar kin doadoahngki kaweid en Paipel pwehn sewese irail rapahki arail pwoud, irail pahn kak ahneki mouren pwopwoud nsenamwahu. E pahn duwehte dahme lepin padahk wet mahsanih: “Me kin diaradahr eh pwoud lih mwahu [de ohl] e diaradahr mehkot mwahu; met kasalehda me KAUN-O ketin kupwureiuk.”​—Lep. Pad. 18:22.