Pamela kawehwehda: “Erein ei kin ale sawas en wini ong ei kansero, I kin kalapw masak. Ahpw ni ahnsou me I kin kapakap ong Siohwa Koht, I kin meleileidi oh kakehr apwalih ei irairo. I kin ahnekihte medek, ahpw kapakap kin sewese ie en ahneki madamadau toupahrek ong ei irairo. Ni aramas ar kin idek rehi ia irei, I kin nda, ‘I soumwahu, ahpw I peren!’”

Mehlel, kitail sohte anahne awih lao kitail ahnekihda soumwahu laud de kahpwal laud ehu, kitail ahpw kapakap. Kitail koaros kin lelohng kahpwal kan, mehnda ma laud oh tikitik, oh kitail kin kalapw pehm me kitail anahne sawas pwe kitail en dadaurete. Ia duwe, kapakap kak sawas?

Paipel mahsanih: “Mweidohng KAUN-O omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.” (Melkahka 55:22) Ia uwen madamadau wet eh kansenamwahu! Eri, ia duwen kapakap eh kak seweseiuk? Ni omw pahn kapakap ong Koht ni ahl me pwung, e pahn ketikihong uhk dahme ke anahne pwe ken kak dadaur pahn omw kahpwal kan.​—Menlau kilang koakon “ Dahme Kapakap Kak Wadohng Uhk.”