“Prea Hem Main Samting wea Helpem Mi For No Gohed Discourage”

PLAY

Lo June 19, 2026, Surgut City Court of Khanty-Mansi Autonomous Area—Yugra convictim brata Roman Khorikov, Yuriy Khorikov, and brata Kirill Severinchik. Thrifala brata kasem suspended prison sentence for six years and fo months, six years and six months, and fo years.

Profile

Roman Khorikov

Born: 1988 (Surgut)

Baptaes: 2009

Baekgraon: Hem wanfala mechanic. Maritim Filiya lo 2020. Dadi blo hem, Yuriy, court sentencem tu hem for sem case

Chargem hem for: Organizem and givim financial sapot lo olketa activities blo extremist organization

Sentence: Suspended prison sentence for six years and fo months

Personal Koment

Wat nao helpem iu during disfala hard situation?

Lo full taem hia, mi feel olsem mi insaed trap, mi weit for olketa searchim haos blo mi, for filem charge againstim mi, for feisim trial, and for judgem mi. Bikos lo diswan, mi feel nogud and samtaems frustrated. Bat taem mi go thru evri samting hia, mi faendem prea hem main samting wea helpem mi for no gohed discourage. Mi storyim evri tingting and feeling blo mi lo Jehovah, and then mi luk for even olketa smallest blessing wea mi kasem from hem. Diswan helpem mi for gohed tingim Jehovah, and barava feel klos lo hem, and datwan mekem mi feel calm.

Yuriy Khorikov

Born: 1967 (Soviet Union)

Baptaes: 2004

Baekgraon: Waka lo bank. Maritim Irada lo 1987. Tufala garem wanfala son and wanfala dota. Son blo tufala, Roman, court sentencem hem tu lo sem case

Chargem hem for: Organizem and givim financial sapot lo olketa activities blo extremist organization

Sentence: Suspended prison sentence blo six years and six months

Personal Koment

Wat nao helpem iu for no garem olketa negative tingting and feeling?

Proverbs 24:10 sei, “Sapos iu discourage lo day blo trabol, bae iu no garem inaf strong.” From mi savve mi need for strong, mi waka hard for gohed garem positive tingting. Hem important for mi focus lo hope blo mi. Mi evritaem tingim dat iumi stap lo olketa last part blo olketa last day and klosap nao olketa trabol hia bae hem finis. Taem mi prea evriday lo Jehovah and talem hem olketa wari blo mi, datwan mekem mi feel beta. Mi barava thankiu tu lo waef blo mi and dota blo mi. Sapot and kaeness wea tufala showim lo mi thru lo toktok and wat tufala duim hem evritaem strongim mi.

Kirill Severinchik

Born: 1997 (Surgut)

Baekgraon: Hem wanfala elevator electrician. Dadi blo hem, Brata Artur Severinchik, olketa previously convictim hem and givim hem suspended prison sentence blo six years and thri months

Chargem hem for: Participate lo olketa religious meeting blo Olketa Jehovah’s Witness

Sentence: Suspended prison sentence blo fo years

Personal Koment

Wat nao iu lanem taem iu go thru lo disfala experience?

During disfala taem, staka samting mi no fit for duim. Bat wat mi savve duim nomoa, hem for setim raet priority. From situation lo disfala world hem continue for kamap worst, mi gohed increasim wei wea mi tekem spiritual kaikai. Diswan includim tu for markem inaf taem for readim and meditate abaotem wat iumi readim lo Word blo God. If mi gohed followim disfala routine, mi confident dat Jehovah bae never lusim mi.

Taem iumi savve dat Jehovah evritaem alert lo wat pipol blo hem needim and hem evritaem redi for strongim and helpem olketa, datwan barava comfortim iumi.—Psalm 121:3, 4.

Lukim Tu

WORLD NIUS

Olketa Jehovah’s Witness wea Stap lo Prison Bikos lo Faith blo Olketa—Location

Kantri wea Jehovah’s Witness stap lo prison, samtaems olketa mistreatim olketa, bikos olketa duim samting for showim faith blo olketa and followim basic rights blo olketa.