Distaem price blo energy and kaikai barava increase. Samting wea kosim diswan hem raoa saed lo politik, international conflict, or war. Even olketa kantri wea stap farawe from ples wea conflict happen, olketa tu affected lo datwan bikos world hem connect winim enitaem bifor.

 Bible savve helpem iumi for understandim why iumi feisim economic problem, hao iumi savve deal witim datwan, and hem storyim permanent solution for disfala problem.

Price blo evri samting hem increase lo “olketa last day”

•   Iumi stap lo taem wea Bible kolem lo “olketa last day.”—2 Timothy 3:1.

•   Jesus sei “pipol bae lukim . . . olketa samting wea mekem olketa barava fraet” lo disfala taem. (Luke 21:11) Wei wea price blo evri samting gohed for increase savve mekem pipol fraet and wari. Pipol wari abaotem future blo olketa and hao olketa bae provaedem need blo famili.[3]

•   Wanfala profesi lo Bible buk Revelation sei price blo kaikai bae increase lo disfala taem. Hem sei: “Mi herem samting olsem wanfala voice.  . . Hem sei: ‘Price blo wan kilo wheat hem wanfala denarius, and price blo thri kilo barley hem wanfala denarius.’”—Revelation 6:6, Easy-to-Read Version.

 For lanem moa samting abaotem “olketa last day” and profesi lo buk blo Revelation, watchim disfala video World Hem Change Start From 1914 and readim disfala article “Fofala Man wea Raedem Horse—Hu Nao Olketa?”

Solution for evri economic problem

•   “Olketa bae buildim olketa haos and stap insaed, and olketa bae plantim olketa grape planteison and kaikaim frut blo olketa. Olketa bae no buildim haos for narawan kam stap insaed, olketa bae no plantim grape planteison for olketa narawan kaikaim.”—Isaiah 65:21, 22.

•   “Staka grain bae stap lo earth, hem bae fulap antap lo olketa maunten.”—Psalm 72:16.

•   “‘Bikos olketa wea safa, pipol treatim nogud lo olketa, bikos lo krae blo olketa wea poor, mi bae getap for duim samting,’ Jehovah hem talem.”—Psalm 12:5. a

 Klosap nao God bae finisim olketa economic problem wea mekem samfala for rich and staka for poor. Hem bae no duim datwan lo wanfala kantri nomoa, bat lo evri ples lo world. If iu laek savve hao hem bae duim datwan, readim disfala article “Waswe, Enitaem Bae Economy Mekem Evriwan Garem Gud Laef?”

 Bat Bible savve helpem iumi distaem tu mekem iumi savve deal witim wei wea price blo evri samting hem gohed for increase. Hao nao Bible savve helpem iu? Bible garem olketa practical advaes lo hao for managem selen lo wisefala wei. (Proverbs 23:4, 5; Ecclesiastes 7:12) If iu laek lanem moa samting abaotem diswan, readim disfala article “Protectim Need blo Famili” and “Wat for Duim Taem Pei blo Iu Katdaon.”