“From taem wea mi start for journalist lo olketa years blo 1960s kam kasem distaem, mi reportim nius abaotem moa than 40-fala war raonem world. Mi watchim datfala Cold War hem kamap worse, then isisi hem stop. Bat lo 2025, mi wari tumas winim enitaem bifor. Datwan hem bikos staka big war nao happen, and tu, wanfala lo olketa war hia hem barava affectim olketa gavman lo disfala world, wea datwan hem samting wea never happen bifor.”—John Simpson, BBC world affairs editor, emphasis ours.

 Pipol wari abaotem olketa war wea happen raonem world. Staka pipol wonder if enitaem olketa war bae end. Wat nao Jesus teachim?

Wat Jesus teachim

 Jesus profesi finis abaotem olketa samting wea iumi lukim distaem. Hem talem olketa follower blo hem: “Iufala bae herem olketa war and herem nius abaotem olketa war.”—Matthew 24:6.

 Nomata olketa war and violent conflict wea iumi lukim distaem hem mekem pipol wari, iumi hapi iumi garem hope. Why nao olsem? Bikos Jesus talem finis dat olketa war wea affectim staka pipol, witim other events, conditions, and attitude blo pipol hem “saen” wea showim “world hem gogo for finis.” (Matthew 24:3; Luke 21:7) Diswan minim dat lo future Jesus bae finisim olketa war. Hao nao bae hem duim datwan?

Wat Jesus bae duim

 Klosap nao, Jesus wea hem King lo Kingdom blo God, bae “finisim olketa war lo evri ples lo earth.”—Psalm 46:9.

 For lanem moa samting abaotem disfala peaceful future, hao bae hem happen, and hao datwan affectim iu, readim article “Hao War and Violent Conflict Bae Finis.”