Solomon Islands Pidgin
Cybercrime—Wat Nao Solution?
https://cms-imgp.jw-cdn.org/img/p/501100133/univ/art/501100133_univ_sqr_xl.jpg
mrt article 142

Cybercrime—Wat Nao Solution?

Cybercrime—Wat Nao Solution?

 Olketa computer, Internet, olketa mobile phone, and artificial intelligence (AI) hem barava changem hao iumi live distaem. Olketa technology hia introducem tu niu wei for duim olketa criminal activity, wea hem nao cybercrime.

 “No enitaem mi ting dat bae mi kamap wanfala victim blo online scam, bikos mi evritaem careful. Mi tingse olketa nara pipol nao bae kasem datwan, ino mi.”—Wanfala victim blo online shopping scam.

Lo disfala article

 Wat nao cybercrime?

 Cybercrime hem eni illegal activity wea olketa man duim thru lo computer, mobile phone, or lo internet for stealim selen, trikim pipol, threatenim olketa, harassim olketa, or damagem olketa system lo Internet.—Lukim box “ Samfala Type blo Cybercrime.”

 Why nao cybercrime hem big tumas?

 Cybercrime hem big tumas bikos staka samting wea pipol duim hem depend lo technology. Bat real problem hem no technology, hem pipol wea iusim. Bible talem finis dat pipol lo taem blo iumi bae garem olketa nogud wei wea bae spoelem olketa narawan. Diswan nao samfala nogud wei wea 2 Timothy 3:1-4, 13 storyim, wea olketa cybercriminal garem:

  •   “Tingim olketa seleva nomoa.” Olketa cybercriminal olketa selfish. Olketa no kea abaotem olketa narawan.

  •   “Laekem tumas selen.” Evri year, olketa cybercriminal stealim staka billion dollar from pipol and olketa organization.

  •   “Olketa man wea laea.” Staka taem olketa cybercriminal pretend olsem narawan mekem olketa savve stealim selen or private information blo samwan.

  •   “Raf, heitim gud samting.” Olketa cybercriminal targetim pipol wea olo, sik, no garem inaf selen, or wea lonely and sorre. Samfala cybercriminal attakim olketa important ples, olsem hospital, airport, and olketa system wea kontrolem electricity.

  •   “Laea for spoelem nem blo narawan.” Samfala cybercriminal min for duim samting for spoelem reputation blo narawan.

 Bible talem tu dat “olketa wicked man and olketa man wea laea bae worse go moa.” (2 Timothy 3:13) Diswan kamap tru lo olketa cybercriminal. Namba blo olketa hem gohed increase and crime wea olketa duim hem worse go moa.

 Solution for cybercrime

 Bible assurem iumi dat God lukim olketa nogud samting wea happen bikos lo crime, wea datwan includim cybercrime. Bible sei: “Pipol wea no garem blame, Jehovah a savve lo samting wea kasem olketa.” (Psalm 37:18) Bible promisim tu dat God bae no letem olketa problem hia for continue for olowe. Ting abaotem wat God duim finis and wat hem bae duim lo future.

God hem helpem pipol distaem for lusim wei for duim cybercrime

 Distaem: Thru lo olketa Bible principle, God hem helpem staka million pipol for stop for steal from olketa narawan and stop for laea lo olketa and for kamap pipol wea honest, waka hard and obeyim olketa law blo kantri. (Ephesians 4:23-25, 28) Diswan hem tufala example.

 Vincent b savve sendem olketa fake message lo pipol and promisim olketa dat if olketa peim smol amount lo selen nomoa, bae olketa kasem samting wea barava valuable.

 Wanday, wanfala Jehovah’s Witness offer for discussim Bible witim Vincent. Hem agree and gogo hem luksavve dat hem need for mekem samfala change lo laef blo hem. Hem barava regretim olketa nogud samting wea hem duim, and distaem hem garem honest living. Distaem Vincent garem peace lo mind and laef blo hem garem mining:

 “Mi thankiu lo Jehovah God from hem patient and kaen. Mi no laek for duim moa olketa nogud samting wea mi duim bifor.”


 Ben savve sendem email lo olketa wea salem olketa product, hem pretend olsem hem wanfala online company wea laek salem product blo olketa. Hem savve convincim olketa wea salem olketa product hia taem hem pretend dat pipol orderim olketa product hia lo hem. And tu hem savve laea lo olketa woman wea hem meetim online dat hem laekem olketa. Gogo, olketa woman hia start for trustim hem and sendem selen lo hem.

 Ben faendem wanfala Bible pablikeson blo Olketa Jehovah’s Witness between samfala buk wea olketa torowem. Wat hem readim mekem hem barava guilty lo wat hem duim lo past. Gogo, hem change and stop for duim olketa crime. Ben sei:

 “Instead for spoelem laef blo pipol olsem mi savve duim bifor, distaem mi helpem pipol for impruvim laef blo olketa. Mi laekem olketa for kasem tu wat mi faendem, wea hem nao for fren witim God and garem hope for future.”

 Lo future: From Jehovah God lovem iumi olketa man, hem promis dat klosap nao bae world no garem crime. God bae completely changem hao olketa man live mekem evriwan wea stap bae followim nomoa standard blo hem. Olketa wea getius for tek advantage lo olketa narawan bae lanem hao for honest and stop for spoelem olketa narawan. (Isaiah 11:9) Olketa wea no laek for change God bae no allowim olketa for stap lo earth. (Proverbs 2:21, 22) Iumi savve trustim promis blo God bikos hem nao Olmaeti and hem savve duim eni samting.—Matthew 19:26; Revelation 21:5.

 Hao for protectim iuseleva from cybercrime

 Distaem, iumi still havtu deal witim cybercrime. Bat, Bible givim iumi practical advaes for helpem iumi stap sef. Nomata olketa raetem Bible longtaem bifor iumi garem olketa electronic device, hem garem olketa principle wea still savve helpem iumi distaem.

 “Ability for ting raonem samting bae gaedem iu, and wei for luksavve lo samting bae protectim iu.”—Proverbs 2:11.

 “Man wea no garem experience hem bilivim evri toktok, bat man wea wise ting raonem each step blo hem.”—Proverbs 14:15.

 “Wise man hem lukim danger and hem haed from datwan, bat man wea no garem experience hem go nomoa and hem safa lo datwan.”—Proverbs 27:12.

 Olketa principle hia hem agree witim olketa suggestion lo daon wea olketa cybersecurity expert talem for avoidim cybercrime.

  1.  1. Iusim passkey, c or password wea bae hem hard for guessim and wea difren from each account. Maet iu laek for iusim eni app lo electronic device blo iu wea iu savve trustim for sevem password blo iu.

  2.  2. If fitim, onem multifactor authentication d lo device blo iu

  3.  3. Bifor iu clickim or openem eniting lo device blo iu, mek sure hem sef. Diswan includim:

    •   Olketa website address, email address, and social media account. Chekim gud spelling, bikos staka taem olketa criminal creatim fake version wea barava luk olsem real wan. Olketa maet iusim olketa leta or namba wea luk similar. Example namba zero (0) instead for leta “O.”

    •   Attachment. Bifor iu openem eni attachment, mek sure hem kam from samwan wea iu trustim. Nomata olsem, chekim gud sapos datfala message or attachment hem real wan or nomoa.

    •   Olketa code for scanim. Olketa criminal savve changem wanfala code. For example, olketa savve kavarem original code witim code wea bae tekem iu lo wanfala dangerous website. No scanim code wea iu no trustim

  4.  4. Careful lo olketa message, advertisement, and voice or video kol wea putim pressure lo iu for kwiktaem duim samting or wea promisim iu samting wea barava gud bat wea hard for kasem.

  5.  5. Bifor iu sharem personal information blo iu, whether lo text message, social media, or lo olketa AI tul, stop and ting hu nao maet receivim information blo iu and hao nao hem bae iusim.

  6.  6. No connectim eni device wea iu no savve lo wea nao hem kam from, olsem USB flash drive lo eni device blo iu.

  7.  7. Iusim antivirus/anti-malware eprogram wea iu trustim.

  8.  8. Installim nomoa olketa app or software wea iu needim and trustim, and gohed updatem. Allowim olketa app for accessim nomoa part blo information lo device blo iu wea hem really needim for hem waka, and deletem eni app wea iu no iusim or trustim. Careful lo olketa dangerous software (and olketa website), olsem olketa app for gambling, illegal software, and pornography.

  9.  9. Mek sure hao iu peim tings online hem sef, and markem limit lo haomas selen olketa bae aotem from account blo iu lo wanfala transaction.

  10.  10. No iusim pablik Wi-Fi for duim eni samting wea involvim selen or personal information blo iu, unless internet connection blo iu hem sef. f

  11.  11. Lokim olketa device blo iu, and no leavim lo eni ples wea olketa stranger maet iusim.

  12.  12. Mek sure iu deletem evri information g blo iu bifor iu torowem device blo iu or givim for samwan.

a Jehovah hem personal nem blo God. (Psalm 83:18) Lukim datfala article “Hu Nao Jehovah?”

b Mifala changem olketa nem.

c Passkey hem wanfala niu wei for sign in lo olketa device wea hem moa sef winim password. Hem no olsem password, wea iu mas rememberim and wea olketa savve stealim, hackem, or guessim. Passkey hem creatim wanfala digital key wea iu savve keepim lo device blo iu.

d Multifactor authentication needim atleast tufala wei for pruvim identity blo iu, olsem wanfala password witim fingerprint or wanfala authenticator app.

e Malware, or malicious software, hem refer lo software wea olketa wakem for spoelem olketa system blo computer or user blo hem.

f Iu savve iusim wanfala virtual private network (VPN) wea iu trustim for mek sure dat connection blo iu lo Internet hem sef.

g Iu savve duim datwan taem iu resettim device blo iu lo default factory setting blo hem or iusim wanfala software wea savve deletem evri information blo iu.