Ngmo Diak a Tellemall!

OMKO a chad a dmu er kau el kmo, “Ngdi kmedung e ngmo diak a tellemall,” e ngmo uangerang a uldesuem? Ke locha mo onger el kmo, “Kau kele momerrous. A tellemall a di blechoel el mo er ngii.” Me a lechub e ke mo omdasu el kmo, ‘Ngka el chad a di mengebelung.’

Alta e ngua leblechoel el mo er ngii a tellemall, engdi ngngar er ngii a mera el omelatk el kmo ngmochu diak aika el chelebuul. Engdi tiang a diak bo lemeketmokl el oeak a urerir a rechad. A rechad a diak el sebechir el mo ungil el medengei a uchul me ngngar er ngii a tekoi el ua ses el eolt me a tsunami, me ngulterekokl el diak el sebechir el omtebechel me a lechub e lorrob aika el tekoi. Ngike el mellomes a rengul e sekutab el King el Salomon er a Israel a milluches el kmo: “A lesal mo blak a rengum el melasem, me kau a di diak bo modengei. A re mellomes a rengrir a bo ledu el kmo te medengei, me tir a di diak lodengei.”​—Olisechakl 8:17.

Me a lsekum a rechad a diak el sebechir el omtebechel aika el tellemall, e ngtecha sebechel? A Biblia a melekoi el kirel a Omebeled el kmo, ngii a mo ngodechii tia el blekeradel. Ngii a Ngike el milebii a chutem e rullii a rolel a ralm me ngmelemolem el ngar er ngii el mo chull e ruebet el mei er iou. (Olisechakl 1:7) Me a klou el klekakerous er a rechad me a Dios, a sel diak a telkelel el klisichel a Dios. Me a Jeremia er a losaod er tia el tekoi e ngdilu el kmo: “E a [Jehovah] el DIOS, ng kau ia rirellii a eanged ma chutem el di uleba klisichem. Ng diak a ngeral meringel er kau.” (Jeremia 32:17) E le Dios a milebii a chutem me ngsebechel el omtebechel a rokui el tekoi me bo el sebechir a rechad el kiei el ngar er a budech e selebechakl.​—Psalm 37:11; 115:16.

A leuaisei, e ngmekerang a Dios a bo lengedechii tia el tekoi? Aika el betok el kdekudel el tekoi el dubecha er a chutem er chelechang a “olangch” el olechotel a “ullebongel ra taem ra belulechad.” A Jesus a dilu el kmo: “Me cho mesengei a ikal tekoi el mo uaisei, e bo modengei el kmo a rengedel a Dios a kmedang.” (Matteus 24:3; Lukas 21:31) A Rengedel a Dios, el kabelment er a Dios el ngar er a eanged, a mo melodech a blekeradel er tia el chutem, me ngmo omtebechel a ralm me a eolt me a chutem me ngdiak bo luchul a tellemall. A Jehovah el Dios a ngar er ngii a klisichel el sebechel el remuul aikang, engdi ngmla msang a Ngelekel a ngerachel el mo kutmeklii tia el tekoi. A profet el Daniel a mesaod el kirel a Ngalek el kmo: “Ngmlar isei e ngiluu a klisiich, ma omengull, ma klisichel omerreder, el kirel me losiou er ngii a re chad er a bek el beluu, ma re bek el bedengir a re chad, ma kakerous el omelekoi.”​—Daniel 7:14.

A Ngelekel a Dios el Jesus Kristus, a mla nguu a klisiich el lousbech el mo rullii tia el chutem el kmal mo ungil basio el kirir a rechad. Eru el telael el rak er a mla me mong er a lengar er a chutem a Jesus, e ngulechotii a klisichel el sebechel el omtebechel a ses el eolt. Ngmla er ngii a ta el taem e ngii me a redisaiplo er ngii a mla er a bos er a Daob er a Galilea, e ng “mlorngii a misisiich loiu, ma chedesaoch a diliderekl ra bos el mekekii.” A redisaiplo a kmal mlo medakt el kirel a klengar er tir me te ulekisii a  Jesus. Me ngmilekerang a Jesus? Ngdi uluungeroel er a “eolt e dmu ra daob el kmo, ‘Bo mchelellakl! E bo meiusech!’ Me ngmlo kekere eolt, e mlo klou a iusech.” A redisaiplo a kmal mlo mechas a rengrir me te uleker el kmo: “Ngika ngkol techang, el eolt ma daob chorrenges er ngii?”​—Markus 4:37-​41.

Chelechang e a Jesus a ngar er a eanged e ngmla nguu a lmuut el klou el klisiich me a ngerachel. Ngii a King er a Rengedel a Dios, me ngsebechel e dirrek el ngar ngii a ngerechelel el mo kutmeklii tia el chutem, me bo el sebechir a rechad el kiei er ngii el ngar er a budech e selebechakl.

A omerellir a rebebil el tir a di melatk a udoud e merechorech a rengrir a uchul a bebil er aika el meklou el tellemall me a mondai, e dirrek el mla remuul aika el tekoi el lmuut el mo mekngit. A Renged ngngerang mo meruul el mo er tirke el di melemolem el uaisei a omerellir? A Biblia a mesaod er a Rubak el Jesus sel “le ngara eanged . . . el me duum el ngara kerdel a ngau, el cheltekill rar ngarngii a klisichir el anghel, isei e a Rubak a mo melaitechei er tirikel diak lomtab ra Dios, mar diak lolengesenges ra evangkelio ra Rubak er kid el Jesus.” Nguaisei, ngii a mo ‘okngemedeterir tirikel olekngemed ra belulechad.’​—2 Thesalonika 1:7, 8; Chocholt 11:18.

Uriul er tiang e a “King rar king” el Jesus Kristus a mo omtebechel a rokui el tekoi el ngar er tia el chutem. (Chocholt 19:16) Ngii a mo oterekeklii el kmo a rechedal a Renged a diak bo lecharm a ngii di el tellemall. Ngmo ousbech er a klisichel el omekrael a rolel a ralm me a sils, misei e a blekerdelel a eanged a mo uchul a klungiolir a rechad. Seikid el taem e ngmo mutaut sel telbilel a Jehovah el mo er a rechedal el kmo: “Ak mo meskemiu a chull a le belsechel a chull ma chutem a mo mekdubech a dellomel ma kerrekar a mo bekerredechel.” (Levitikus 26:4) A rechad a dirrek el mo sebechir el meleketek a blirir e diak lemedakt er a klou tellemall el mo tomall ngii el blai: “A re chad a mo toketek a blai e mo kiei er ngii. Te mo dualem a sers er a bilong, e mo dmeu a rengrir er a bilong.”​—Isaia 65:21.

Ngkirem el Mekerang?

Me kau a locha di ua rebebil el soam el kiei er a chelsel a beluulechad el diak a meklou el tellemall er ngii. A leuaisei, e ngngera kirem el mo meruul er ngii? A chad a kmal kirel el mesuub el kirel a Dios, e melisiich er sel uleketmokl el omengederederel el kirel tia el chutem, e le “tirikel diak lomtab ra Dios” me tirke el “diak lolengesenges ra evangkelio” a diak lerredemelel a mo kiei er sel mei el beluulechad el diak a tellemall er ngii. A Dios a soal a bo dodengelii, e bo dolengesenges er a ungil el chais er a Renged el bla leketmeklii el okiu a Ngelekel.

A omesubel a Biblia a sebechel el ngosukau el mo meruul er tiang. Ngar er ngii a ulekrael er a Biblia el ochotii a rolel e a chad a mo rredemelel a mo kiei el selebechakl el ngar cheungel a omengederedel a Renged. Ngsebechem el olengit er a Resioning er a Jehovah me lengesukau el mo medengei a lolisechakl a Biblia. Te kmal kltmokl el mo olisechakl er kau. Ngsebechel el mo ulterekokl a rengum el kmo, a lsekum ke meruul aike el sebechem el mo medengelii a Dios e mo olengesenges er a ungil el chais, e ke mo mesa otutel a Osisechakl 1:33 el kirem el kmo: “Ngdi ngikel orrenges er ngak a mo ungilbesul. Ng mo selebechakl, ele ng diak a ngeral uchul me bo le medakt.”