A blechoel el nger er a rechad:

▪ “Chochoi. A Jesus a Dios el Cherrengelel a Klisiich.”

▪ “A Jesus a mle olechotel a Dios el ngar er tia el chutem.”

Ngerang dilung a Jesus?

▪ “Chomko ngbetik a rengmiu er ngak, e ngungil a rengmiu a kbora Chedam; ele Chedam a kuk ngarbab er ngak.” (Johanes 14:28) A Jesus a dilu el kmo ngii me a Demal a kmal kakerous a deruchellir.

▪ “Ak mo ngmasech el mora Demak el ngikel Demmiu, el Dios er ngak e dirrek el Dios er kemiu.” (Johanes 20:17) A Jesus a dimlak lolekoi el kmo ngii a Dios, e ngbai dilu el kmo a Dios a kuk ngar er a bab er ngii.

▪ “Ngak a dimlak di le ngak el melekoi; e ngngikel ulderchak el Chedam, ingii a milskak chodruchel el bo kulekoi e mengedecheduch.” (Johanes 12:49) A osisecheklel a Jesus a dimlak el ngar er ngii el mei, e ngbai mla er a Demal.

A JESUS a dilu el kmo ngii a Ngelekel a Dios, e dimlak ledu el kmo ngii a Dios el Cherrengelel a Klisiich. A lsekum a Jesus a mle Dios, e ngtecha ngike el lulluluuch el mo er ngii er a lengar er tia el chutem? (Matteus 14:23; 26:26-29) Ngkmal klebelung el tekoi a domdasu el kmo a Jesus a di ngii el mengedecheduch er ngii!

Tirke el teru el disaiplo er a Jesus er a lolengit er ngii a ileakl el deruchall er a Rengedel, e ngulenger el kmo: “Ngdi mo dengchokl ra kidekmek ma katruk a diak le kirek el meskemiu, ngbai kirir tirikel le meltutk el kirir era Demak.” (Matteus 20:23) A Jesus nguluumulak er a ledu er tir el kmo ngdiak a llemeltel el kongei er a ongterir? Ngdimlak! Ngbai uleba klengareourreng el lolecholt el kmo ngdi ta el Dios a ngar er ngii a llemeltel el melilt er a choua isel tekoi. A Jesus a dirrek el milsaod el kmo ngar er ngii a bebil el tekoi el ngii me a rechanghel a diak lodengei, ngdi ta el Demal a medengei.​—Markus 13:32.

Ngdi sera lechad el ngar er a chutem a Jesus, e ngmle ngar er a eou a deruchellel er a Dios? Ngdiak. A uriul er a kodellel me a okisel, e a Jesus a losaod er ngii er a Biblia el kuk ngar er a eou er a Dios. A apostol el Paulus a omeklatk er kid el kmo: “A bdelul a Kristus a Dios.” (1 Korinth 11:3) A Biblia a melekoi el kirel a ngar er a medad el klebesei el kmo “ma rokuil tekoi sel le bocha le chederdall ra Dios, e a Ngalek me ngdirrek el mo chederdall er ngikel riruul a rokuil tekoi el mo chederdellel, el kirel ma Dios bo le rokuil tekoi ra chelsir a rokuil chad.”​—1 Korinth 15:28.

Me ngbleketakl el kmo a Jesus a diak el Dios el Cherrengelel a Klisiich. Misei a uchul e ngmillekoi el kirel a Demal el kmo “Dios er ngak.”​—Chocholt 3:2, 12; 2 Korinth 1:3, 4. a

[Footnote]

[Blurb er a 7 el llel]

A Jesus a dilu el kmo ngar er ngii a bebil el tekoi el ngii me a rechanghel a diak lodengei, ngdi ta el Demal a medengei