Storia di Bida

Mi Participacion den e Obra Mundial di Educacion Biblico

SEGUN E RELATO DI ROBERT NISBET

Rei Sobhuza II di Suazilandia a duna ami cu mi ruman homber George, un caloroso bonbini na su residencia real. Tawata aña 1936, pero ainda mi ta corda nos combersacion cla cla. E motibo cu mi tawatin e combersacion largo aki cu un rei, ta pa motibo di mi envolvimento pa hopi tempo caba den un gran trabou di educacion biblico. Awor cu mi tin 95 aña, mi ta wak bek cu grato recuerdo riba mi participacion den e trabou ei, cu a hiba mi na cinco diferente continente.

TUR esaki a cuminsa na aña 1925, ora cu sr. Dobson, un bendedo di te, a cuminsa bishita nos famia na Edinburgh, Escocia. Mi tawata un teenager y tawata core stage como boticario. Aunke ainda mi tawata relativamente hoben, toch mi tawata precupa cu e cambionan cu e guera mundial di 1914 pa 1918 a causa den famia y bida religioso. Durante un di su bishitanan, sr. Dobson a laga e buki E Plan Dibino di Epocanan cu nos. E buki su presentacion di un Creador inteligente cu un “plan” spesifico, a parce masha rasonabel y apropia pa e Dios cu mi kier a adora.

Djis despues ami cu Mamachi a cuminsa asisti na e reunionnan di e Studiantenan di Bijbel, manera Testigonan di Yehova tawata conoci e tempo ei. Na september 1926 ami cu Mamachi a simbolisa nos dedicacion na Yehova mediante bautismo den awa na un congreso na Glasgow. Cada candidato pa bautismo a haya un bisti largo te abou, cu strep pa mara na enkel, pa nos bisti riba nos zwempak normal.  E tempo ei nan a considera esaki como e bisti apropia pa un ocasion serio asina.

Den e tempo ei di antes, tawatin varios cos cu nos no tawata compronde bon ainda. Mayoria, si no ta tur, miembro di congregacion a celebra Pasco di nacemento. Masha poco di nan a participa den sirbishi di veld. Asta algun anciano tawata contra pa parti literatura riba diadomingo, como cu nan a sinti cu esaki a viola sabat. Sinembargo, na 1925 articulonan di Toren di Vigilancia a cuminsa papia mas tanto riba textonan manera Marco 13:10: “E evangelio mester wordo predica prome na tur nacion.”

Con nos lo a logra haci e trabou mundial ei? Na mi prome intento humilde pa participa den e predicacion di cas pa cas, mi a djis bisa e doño di cas cu mi ta bendiendo bukinan religioso interesante y a ofrec’e E Harpa di Dios. E buki aki a splica dies siñansa importante di Bijbel, y a compara nan cu dies cuerde di un harpa. Mas despues, nos a haya un carchi di testimonio cu tawatin un mensahe cortico cu e doño di cas mester a lesa. Tambe nos a uza discursonan graba cu a dura cuater minuut y mei, y cu bo por a toca riba un tocadisco portatil. E prome modelnan di e tocadisco ei tawata basta pisa pa carga, pero esnan despues tawata hopi mas leve, y algun di nan tawata toca den posicion vertical.

Di 1925 te den e decada di 1930, nos tawata predica lo miho cu nos por bou di e circunstancianan ei. Anto na principio di decada ’40, nan a introduci e Scol di Ministerio Teocratico den tur congregacion. Nos a siña con pa presenta e mensahe di Reino personalmente door di papia directamente cu doñonan di cas cu scucha. Tambe nos a siña tocante e importancia di conduci studio di Bijbel na cas cu personanan interesa. Den un sentido, nos por bisa cu esei tawata e infancia di e obra mundial di educacion biblico manera e ta actualmente.

Animacion di Ruman Rutherford

Mi deseo pa participa mas tanto ainda den e obra educativo a pone cu na 1931 mi a inscribi pa e sirbishi di pionero di tempo completo. Lo mi a cuminsa mesora despues di un congreso na Londen. Pero durante un di e pausanan di merdia, Ruman Joseph Rutherford, kende e tempo ei tawata supervisa e obra, a pidi pa papia cu mi. E tawatin plan pa manda un pionero Africa. El a puntra mi: “Lo bo ta dispuesto pa bai?” Aunke e pregunta a cohe mi un poco fo’i base, mi a logra bisa cu firmesa: “Si, mi ta bai.”

Den e tempo ei nos meta principal tawata pa reparti mas tanto literatura biblico posibel, y esei a nifica biaha constantemente. Mescos cu mayoria ruman homber den puesto di responsabilidad den e tempo ei, mi tambe a haya e animacion pa keda soltero. Mi teritorio a cuminsa na Kaapstad, na e punta suit di Africa, y a core a lo largo di e banda oost di e continente, y a inclui e islanan canto di costa cu tawata den Oceano Indio. E frontera na west a core atrabes di e santo cayente di e Desierto Kalahari y te na e cabes di Riu Nilo na Lago Victoria. Ami cu un compañero lo mester a pasa seis luna pa aña den un of mas di e paisnan Africano situa den e teritorio inmenso aki.

Dosshen Caha di Rikesa Spiritual

Ora mi a yega Kaapstad, nan a mustra mi 200 caha di literatura destina pa Oost Africa. E literatura tawata imprimi na cuater idioma Europeo y cuater idioma Asiatico, pero no tawatin nada den ningun di e idiomanan Africano. Ora mi a puntra con bini tur e literatura aki tawat’ei prome cu mi a yega mes, e rumannan a bisa mi cu nan tawata pa Frank cu Gray Smith, dos pionero cu resientemente a bai predica na Kenia. Pero casi manera nan a yega Kenia, tur dos a haya malaria, y lamentablemente Frank a muri.

Aunke e noticia aki a pone mi pensa seriamente, e no a para mi. Ami cu mi compañero, David Norman, a bandona Kaapstad riba barco rumbo pa nos prome asignacion na Tanzania, 5.000 kilometer leu. Un agente di biahe na Mombasa, Kenia, a keda encarga cu nos stock di literatura y tawata manda e cahanan na  cualkier destinacion cu nos pidie. Na principio, nos tawata predica den e areanan di negoshi—tur tienda y oficina—di cada stad. Parti di nos stock di literatura a consisti di un set di 9 buki y 11 foyeto, y como cu cada un di nan tawatin un otro colo, nos a yam’e e set di regenboog.

Despues nos a dicidi di bishita e isla Zanzibar, un 30 kilometer for di costa oost. Pa siglonan Zanzibar tawata un centro di traficacion di catibo, pero tambe e tawata famoso pa e specerij clabo (kruidnagel) cu nos por a hole tur caminda den stad. Tawata masha dificil pa sa unda bo ta den stad, como cu nan a traha e stad sin ningun planificacion. Cayanan tawata lora y bira den un manera masha confuso, y tawata masha fasil pa perde bo sentido di direccion. Nos hotel tawata comodo, pero su portanan tawatin cabes di clabo masha grandi y su murayanan tawata masha diki, y el a parce mas un prizon cu un hotel. Sinembargo, nos tawatin bon resultado na Zanzibar, y nos a keda contento di topa Arabir, Indio y otro hende dispuesto pa acepta nos literatura.

Cu Trein, Boto y Auto

E tempo ei no tawata facil pa biaha den Oost Africa. Por ehempel, biahando for di Mombasa pa e area halto di Kenia, un plaga di tiracochi a para nos trein. Miyones di tiracochi a tapa e tereno y e railnan di trein, loke a pone cu e wielnan di e trein no tawata gara. E unico solucion tawata di laba e railnan dilanti di trein cu awa cayente cayente di e trein mes. Den e manera aki nos a core pocopoco te ora cu porfin nos a pasa e trupa di tiracochi. Y ki un alivio nos a sinti ora e trein a cuminsa subi e tereno cu a keda mas na halto y nos por a disfruta di e clima mas fresco den sero!

Mientras cu e stadnan canto di costa tawata facil pa yega cu trein y boto, tawata mas facil pa alcansa e areanan di cunucu cu auto. Mi a keda contento ora cu mi ruman homber George a join mi, pasobra e ora ei nos por a cumpra un pickup basta ruim cu baki sera. E tawata suficiente grandi pa nos ekip’e cu cama, cushina, un caminda di warda cos y cu screen contra sangura. Tambe nos a pone loudspeaker riba e dak. Cu e ekipo aki nos por a predica di cas pa cas den dia, anto invita hende pa bin scucha nos discursonan anochi riba e plenchi di mercado. Un grabacion popular cu nos a toca tawata titula “Fierno Ta Cayente?” Na un ocasion nos a biaha for di Sur Africa te Kenia, un biahe di 3.000 kilometer den nos “cas riba wiel”, y nos tawata contento cu durante e biahe aki si nos tawatin un variedad di foyeto chikito na varios idioma Africano. E hendenan tawata acepta nan cu smak serca nos.

Un dushi experencia pa nos tawata cu riba biahenan manera esei, nos por a mira hopi bestia di mondi di Africa. Claro cu pa nos siguridad nos tawata keda den e pickup ora bira scur, pero algo cu a fortalece nos fe hopi tawata  di mira e variedad grandi di Yehova su creacion di bestia den nan ambiente natural.

Oposicion Ta Cuminsa

Mientras nos tawata tene cuidou cu bestia salbahe, esaki no tawata nada na comparacion cu loke nos tawatin cu haci pa confronta varios funcionario di gobierno y lidernan religioso masha rabia cu a cuminsa opone abiertamente nos obra di predica e Reino. Un problema grandi cu nos tawatin ta di un fanatico cu a yama su mes Mwana Lesa, cu ta nifica “Yiu di Dios”, y su grupo conoci como Kitawala, cu desafortunadamente ta nifica “Watchtower” (Toren di Vigilancia). Un poco prome cu nos a yega, e persona aki a hoga varios Africano, bou di e pretexto di ta batisa nan. Cu tempo nan a arest’e y colg’e na palo di horca. Despues mi a haya chens di papia cu esun cu a horc’e, pa splic’e cu e homber aki no tawatin nada di aber cu nos Sosiedad Watch Tower.

Tambe nos tawatin problema cu hopi Europeo cu, principalmente pa motibonan financiero, no tawata contento cu nos obra educativo. Manager di un pacus a keha: “Pa hende blanco por keda den e pais aki, e Africano no mag haya sa con nos ta probecha di su forsa laboral barata.” Pa e mesun motibo, hefe di un compania di mina oro a saca mi for di su oficina na mal ordo. Anto rabia el a escolta mi te afo riba caya.

Sin duda influencia principalmente door di e tipo di opositornan religioso y comercial aki, cu tempo gobierno di Rodesia (awor Zimbabwe) a ordena nos pa sali for di e pais. Nos a apela e decision y a logra haya permit pa keda, bou di e condicion cu nos no ta predica na Africano. E motibo cu un funcionario a duna tawata cu nos literatura “no tawata apropia pa mente Africano.” Sinembargo, den otro paisnan nos obra educativo bou di Africanonan a sigui sin problema, y asta a ser ricibi gustosamente. Un di e paisnan aki tawata Suazilandia.

Un Bonbini Real na Suazilandia

Suazilandia ta un pais chikito y independiente di 17.364 kilometer cuadra, situa den Sur Africa. Ta einan nos a topa e elocuente Rei Sobhuza II, menciona den e introduccion di e relato aki. E tawata domina Ingles hopi bon, y el a siñ’e tempo cu el a bai universidad na Inglatera. Bisti informalmente, el a laga nos sinti cu echt nos tawata bonbini.

Nos combersacion cu ne a enfoca riba e Paradijs riba tera cu ta e proposito di Dios pa hende di bon curason. Aunke e no tawata masha interesa den e tema ei, el a laga nos compronde bon cla cu tawatin algo relaciona cu esei cu si tawata precup’e. E Rei a dedica su mes na mehora e nivel di bida di e hendenan pober y sin educacion. E no tawatin lei cu e actividad di hopi misionero di cristiandad, kendenan a parce mas interesa den haya miembro pa iglesia, cu den educa hende. Sinembargo, e Rei tawata conoce e actividad di varios di nos pioneronan, y el a felicita nos cu nos obra di educacion biblico, specialmente door cu nos  tawata dispuesto pa haci esaki sin exigi pago of otro obligacion.

Obra di Educacion Biblico Ta Acelera

Na 1943 a establece e Scol Biblico di Galad di Watchtower pa train misionero. E scol a enfatisa pa duna mas yudansa na esnan cu a mustra interes en bes di djis consentra riba laga literatura biblico. Na 1950, ami cu George a haya invitacion pa asisti na e di 16 klas di Galad. Ta einan mi a topa Jean Hyde pa prome bes. E tawata un bon ruman mohe di Australia, kende despues cu nos dos a gradua, a haya e asignacion pa bai traha como misionero na Hapon. E tempo ei ainda tawata reina e custumber di keda soltero, pesei nos amistad no a sigui desaroya.

Despues di nos entrenamento di Galad, ami cu George a ser asigna pa traha como misionero na Mauricio, un isla den Oceano Indio. Nos a sera amistad den e pueblo, nos a siña nan idioma y a conduci studio di Bijbel na cas cu nan. Mas despues, mi ruman homber mas chikito William, cu su casa Muriel, tambe a gradua for di Galad. Nan a bai mi teritorio bieu: Kenia.

Ocho aña a pasa lihe, anto na e congreso internacional na New York na 1958, mi a bolbe topa Jean Hyde. Nos a reanuda nos amistad y despues a compromete. Nan a cambia mi asignacion como misionero di Mauricio pa Hapon, y einan ami cu Jean a casa na 1959. Nos a cuminsa un periodo masha felis di trabou di misionero na Hiroshima, caminda e tempo ei tawatin solamente un congregacion chikito. Awe, tin 36 congregacion den e stad ei.

Sayonara Hapon

Segun cu añanan a pasa, problemanan di salu di nos tur dos a cuminsa haci nos sirbishi di misionero mas y mas dificil. Y cu tempo a bira necesario pa nos bandona Hapon y bai biba na Jean su pais natal, Australia. E dia cu nos a bandona Hiroshima tawata un dia tristo. Na e stacion di trein, nos a yama tur nos amigonan stima sayonara, es decir, ayo.

Awor nos ta biba na Australia, y nos ta sigui sirbi Yehova lo miho cu nos por hunto cu e Congregacion Armidale, den e estado di New South Wales. Tawata un gran goso di por a comparti e tesoro di berdad cristian cu asina hopi hende durante casi ocho decada. Mi a mira un crecemento maraviyoso di e programa di educacion biblico, y personalmente mi tawata testigo di evenementonan spiritual importante. Ningun hende ni grupo por tuma credito pa e logronan aki. Di berdad—fiando palabranan di e salmista—“esaki ta loke [Yehova] a haci; y e ta maraviyoso den nos bista.”—Salmo 118:23.

[Plachi na pagina 28]

Mi ruman George banda di nos cas riba wiel

[Plachi na pagina 28]

Ami na Lago Victoria

[Plachi na pagina 29]

Alumnonan di scol secundario cu a asisti na un discurso publico na Suazilandia na 1938

[Plachi na pagina 30]

Ami cu Jean dia nos a casa na 1959, y awe