НЫРТӔККӔ адӕм зӕронд дӕр кӕнынц, рынчын дӕр ӕмӕ мӕлгӕ дӕр. Мӕлынц сывӕллӕттӕ дӕр. Куыд дӕм кӕсы, мӕлӕтӕй тӕрсын хъӕуы? ~ Чи амард, уыдонӕй та? ~ Куыд хъуыды кӕныс, адӕймаг куы амӕлы, уӕд ма искуы фӕцӕры? ~

Ныртӕккӕ зӕххыл цы адӕм цӕры, уыдонӕй ацы фарстӕн дзуапп ничи ратдзӕн, уымӕн ӕмӕ сӕ мард ничи уыди ӕмӕ сӕ мӕрдтӕй ничи раздӕхт. Фӕлӕ ӕппӕты хуыздӕр Ахуыргӕнӕджы рӕстӕджы цард ахӕм адӕймаг. Уыцы адӕймаджы тыххӕй куы бакӕсӕм, уӕд ӕй базондзыстӕм, адӕймаг куы амӕлы, уӕд ма искуы фӕцӕры ӕви нӕ. Уый уыди Йесойы ӕмбал, царди гыццыл горӕт Вифанийы, Иерусалиммӕ хӕстӕг. Йӕ ном хуынди Лазӕр. Лазӕрӕн уыди дыууӕ хойы, Марфӕ ӕмӕ Марийӕ.

Иухатт Лазӕр тынг фӕрынчын. Йесо та уыцы рӕстӕг уыди дард. Ӕмӕ йӕм Марфӕ ӕмӕ Марийӕ кӕйдӕр арвыстой, цӕмӕй йын загътаид, Лазӕр кӕй фӕрынчын. Уыдоны фӕндыди, цӕмӕй Йесо ӕрцыдаид ӕмӕ сын се ’фсымӕры сдзӕбӕх кодтаид. Йесо дохтыр нӕ уыд, фӕлӕ йын Хуыцау радта ахӕм тых, ӕмӕ йӕ бон уыди алыхуызон рынчынты дзӕбӕх кӕнын (Матфейы 15:30, 31).

Фӕлӕ цалынмӕ Йесо цыди, уӕдмӕ Лазӕр амард. Уӕд Йесо йӕ ахуыргӕнинӕгтӕн загъта, зӕгъгӕ, Лазӕр бафынӕй, фӕлӕ ӕз цӕуын, цӕмӕй йӕ райхъал кӕнон. Йӕ ахуыргӕнинӕгтӕ йын йӕ ныхӕстӕ нӕ бамбӕрстой. Ӕмӕ сын уӕд комкоммӕ загъта: «Лазӕр амард». Куыд хъуыды кӕныс,  ацы ныхӕстӕй мӕлӕты тыххӕй цы ис базонӕн? ~ Адӕймаг куы амӕлы, уӕд, цыма тынг бафынӕй, афтӕ вӕййы. Ӕмӕ фынтӕ дӕр нӕ фӕуыны.

Марфӕ ӕмӕ Марийӕмӕ ӕрцыдысты се ’мбӕлттӕ ӕмӕ сӕ хӕстӕджытӕ, цӕмӕй сын ныфсытӕ бавӕрдтаиккой. Йесо кӕй ӕрбацӕуы, уый Марфӕ куы фехъуыста, уӕд йӕ размӕ ацыди. Йӕ фӕстӕ та ацыд Марийӕ дӕр. Марийӕ тынг куыдта, ӕмӕ Йесойы куы ауыдта, уӕд йӕ разы йӕ зонгуытыл ӕрхауд. Марийӕйы фӕдыл чи рацыд, уыдон дӕр сӕ кӕуынӕй не ’нцадысты.

Ӕппӕты хуыздӕр Ахуыргӕнӕг сӕ бафарста, Лазӕры кӕм бавӕрдтат, зӕгъгӕ. Уӕд Йесойы акодтой, Лазӕры кӕм бавӕрдтой, уыцы бынатмӕ. Адӕм иууылдӕр куыд кӕуынц, Йесо уый куы федта, уӕд йӕхи зӕрдӕ дӕр суынгӕг ӕмӕ йӕ цӕссыгтӕ ӕркалдысты. Уый зыдта, адӕймагӕн исчи куы амӕлы, уӕд ын куыд зын вӕййы.

Лазӕр кӕм ӕвӕрд уыди, уым бахизӕныл уыди дур фӕлдӕхт, ӕмӕ Йесо адӕмӕн загъта: «Дур-ма иуварс айсут». Марфӕмӕ уый хорз нӕ фӕкаст, ӕмӕ Йесойӕн загъта: «Хицау, тӕф кӕндзӕн, ныр ыл цыппар боны рацыд».

Фӕлӕ йын Йесо загъта: «Нӕ дын загътон, кӕд дӕ уырна, уӕд Хуыцауы кад кӕй фендзынӕ?» Йесойы ныхӕстӕм гӕсгӕ, Марфӕ хъуамӕ федтаид, Хуыцау кӕмӕй скадджын уыдаид, ахӕм диссаг. Фӕлӕ Йесойы цы фӕндыди саразын? Дур бахизӕнӕй куы айстой, уӕд Йесо Йегъовӕмӕ хъӕрӕй скуывта. Стӕй хъӕрӕй загъта: «Лазӕр, ӕддӕмӕ рацу!» Куыд хъуыды кӕныс, Лазӕр рацыд? Уымӕн гӕнӕн уыд? ~

Зӕгъ-ма, дӕ бон у фынӕй адӕймаджы райхъал кӕнын? ~ О, хъӕрӕй йӕм куы сдзурай, уӕд райхъал уыдзӕн. Фӕлӕ мард адӕймаджы райхъал кӕнын та дӕ бон у? ~ Уый дӕ бон нӕу. Тынг хъӕрӕй йӕм куы дзурай, уӕддӕр дӕ  нӕ фехъусдзӕн. Никӕй бон у марды райхъал кӕнын – нӕдӕр дӕуӕн, нӕдӕр мӕнӕн, нӕдӕр ӕндӕр искӕмӕн.

Фӕлӕ Йесойы бон та уыди. Хуыцау ын радта ахӕм тых. Ӕмӕ Лазӕрмӕ куы бадзырдта, уӕд ӕрцыд диссаг. Цыппар боны мард чи уыди, уыцы адӕймаг ӕддӕмӕ рацыд! Йесо Лазӕры райгас кодта! Ӕмӕ та Лазӕрӕн йӕ бон уыди улӕфын, цӕуын ӕмӕ дзурын! (Иоанны 11:1–44).

Ныр-ма ахъуыды кӕнӕм. Лазӕр куы амард, уӕд йӕ буарӕй исты рахицӕн ӕмӕ ӕндӕр искуыдӕм цӕрынмӕ ацыд? Мыййаг, уӕларвмӕ ацыд ӕмӕ цыппар боны дӕргъы Хуыцау ӕмӕ зӕдтимӕ царди? ~

Уый афтӕ нӕу. Хъуыды ма йӕ кӕныс, Йесо Лазӕрӕй афтӕ куы загъта, фынӕй кӕны, зӕгъгӕ? Зӕгъ-ма, тынг куы бафынӕй вӕййыс, уӕд, дӕ алыварс цытӕ фӕцӕуы, уый фембарыс? ~ Ӕмӕ куы райхъал вӕййыс, уӕд ӕй зонгӕ дӕр нӕ  фӕкӕныс, цас фӕфынӕй кодтай, уый, цалынмӕ сахатмӕ нӕ бакӕсыс, уӕдмӕ.

Чи амӕлы, уыдон дӕр афтӕ вӕййынц. Уыдон зонгӕ дӕр ницы кӕнынц, ӕмбаргӕ дӕр, ӕмӕ сӕ бон аразын дӕр ницы вӕййы. Лазӕр куы амард, уӕд уымӕн дӕр йӕ бон ницы уыди. Мӕлӕт абарӕн ис, адӕймаг фынӕй куыд вӕййы ӕмӕ куыд ницы фембары, уыимӕ. Библийы афтӕ фыст ис: «Мӕрдтӕ ӕппындӕр ницы зонынц» (Екклесиаст 9:5, 10).

Ноджыдӕр-ма ахъуыды кӕн. Лазӕр уыцы цыппар боны уӕлӕрвты куы уыдаид, уӕд ницы радзырдтаид? ~ Ӕмӕ афтӕ куы уыдаид, уӕд ма йӕ Йесо уыцы дзӕбӕх бынатӕй фӕстӕмӕ зӕхмӕ раздӕхтаид? ~ Кӕй зӕгъын ӕй хъӕуы, нӕ йӕ раздӕхтаид!

Бирӕтӕ дзурынц, зӕгъгӕ, адӕймагӕн йӕ мидӕг ис цыдӕр, ӕмӕ мӕлӕты фӕстӕ цӕргӕйӕ баззайы. Уыдон ма афтӕ дӕр фӕзӕгъынц, зӕгъгӕ, дам, Лазӕр куы амард, уӕд дӕр, дам, кӕмдӕр цард. Фӕлӕ Библи афтӕ нӕ дзуры. Библийы фыст ис, Хуыцау Адамы куы сфӕлдыста, уӕд кӕй уыди «удӕгас адӕймаг», ӕмӕ тӕригъӕд куы сарӕзта, уӕд кӕй амард. Адам ницыуал ӕмбӕрста. Цы сыджытӕй конд  уыди, фӕстӕмӕ уырдӕм аздӕхт. Ӕмӕ, Библийы куыд фыст ис, афтӕмӕй Адамы сывӕллӕттӕ дӕр иууылдӕр сӕ туджы рахастой тӕригъӕд ӕмӕ мӕлӕт (Райдиан 2:7; 3:17–19; Ромӕгтӕм 5:12).

Иуӕй-иутӕ мӕрдтӕй тӕрсгӕ кӕнынц. Ӕмӕ уӕлмӕрдтӕм дӕр хӕстӕг нӕ фӕцӕуынц. Фӕлӕ, мард чи у, уый ма ӕгас адӕймагӕн исты ракӕндзӕн? ~ Ӕппындӕр ницы.

Иуӕй-иутӕ та ма афтӕ дӕр хъуыды кӕнынц, ӕмӕ, дам, мӕрдтӕ ӕрбацӕуынц сӕ хиуӕттӕм ӕмӕ се ’мбӕлттӕм. Ӕмӕ уый тыххӕй мӕрдтӕн хӕринӕгтӕ скӕнынц. Фӕлӕ афтӕ чи кӕны, уыдоны нӕ уырны, Хуыцау мӕрдты тыххӕй цы зӕгъы, уый. Хуыцауы ныхӕстыл куы ’ууӕндӕм, уӕд мӕрдтӕй нӕ тӕрсдзыстӕм. Ӕмӕ нын Хуыцау цард кӕй радта, уый тыххӕй дзы бузныг куы уӕм, уӕд араздзыстӕм, йӕ зӕрдӕмӕ цы цӕуы, уый.

Фӕлӕ дӕ, чи зоны, фӕнды базонын, сывӕллӕттӕй чи амард, уыдоны Хуыцау райгас кӕндзӕн ӕви нӕ. Цымӕ Хуыцауы уый фӕнды? Ацы фарстытӕн дзуапп базондзынӕ иннӕ сӕрӕй.