Исты саразыны размӕ, ӕвӕццӕгӕн, ахъуыды кӕныс: «Цы пайда мын уыдзӕн?» Фӕлӕ Хуыцаумӕ кувыны тыххӕй афтӕ куы хъуыды кӕнай, уӕд уый ууыл дзурӕг уыдзӕн, ӕмӕ дӕ пайда йеддӕмӕ ницы ӕндавы? Уый бынтон афтӕ нӕу. Алкӕй дӕр фӕфӕнды зонын, цы аразы, уый йын исты пайда уыдзӕн ӕви нӕ. Иухатт иу хорз адӕймаг Иов Хуыцауы тыххӕй бафарста: «Куы йӕм фӕдзырдтаин, уӕд мын дзуапп раттаид?» (Иов 9:16).

Айразмӕ статьятӕй базыдтам, кувын ӕрмӕст дины ӕгъдау кӕнӕ хисабыргӕнӕн хос кӕй нӕу. Иунӕг Ӕцӕг Хуыцау хъусы куывдтытӕм. Куыд ӕмбӕлы, афтӕ йӕм куы кувӕм ӕмӕ нӕ курдиӕттӕ йӕ фӕндонмӕ гӕсгӕ куы уой, уӕд нӕ хъусдзӕн. Уымӕй уӕлдай ма нын Хуыцау йӕхӕдӕг дзуры, цӕмӕй йӕм баввахс уӕм (Иаковы 4:8). Уӕдӕ Хуыцаумӕ алы бон дӕр куы кувӕм, уӕд нын уый цы пайда уыдзӕн? Стыр пайда. Ӕмӕ цавӕр хъуыддӕгты, уыдонӕй цалдӕрмӕ ӕркӕсӕм.

Царды сагъӕстӕ ӕмӕ дыл зындзинӕдтӕ уӕз кӕнын куы райдайынц, уыд не стыхсыс? Библи нӕ разӕнгард кӕны, цӕмӕй-иу ахӕм рӕстӕджыты «ӕппынӕдзух кувӕм» ӕмӕ дзы «курӕм, цы нӕ хъӕуы, уый» (1 Фессалоникӕгтӕм 5:17; Филиппӕгтӕм 4:6). Библи нын ныфс ӕвӕры, куы кувӕм, уӕд «нын Хуыцауы фарн, зонд кӕуыл не ’ххӕссы, уыцы фарн... [кӕй] бахъахъхъӕндзӕн нӕ зӕрдӕтӕ ӕмӕ нӕ зонд» (Филиппӕгтӕм 4:7). Нӕ уӕларвон Фыдӕн нӕ зӕрдӕйы сагъӕстӕ куы радзурӕм, уӕд нын фенцондӕр вӕййы. Хуыцау нӕ йӕхӕдӕг дӕр уымӕ разӕнгард кӕны: «Дӕ уаргъ Йегъовӕйыл сӕвӕр, ӕмӕ дын уый баххуыс кӕндзӕн» (Псалом 55:22).

Ӕгас дунейы дӕр тынг бирӕ адӕм сӕхицӕй зонынц, Хуыцауы фарн цы у, уый. Иу сылгоймаг, Хи Ран, Хуссар Корейӕ, зӕгъы: «Кӕд мӕ мӕ уӕззау цардӕй мӕ сӕрыл схӕцыны бон дӕр  нӕй, уӕддӕр куы скувын, уӕд цыма ме ’ккойӕ стыр уаргъ ахауы, афтӕ мын фенцон вӕййы ӕмӕ та мӕм ногӕй тыхтӕ фӕзыны». Сесилия, Филиппинтӕй, радзырдта: «Мӕнӕн ис дыууӕ чызджы ӕмӕ мад. Мӕ мад мӕ йӕ низы аххосӕй зонгӕ дӕр нал кӕны. Фӕлӕ Хуыцаумӕ кӕй фӕкувын, уый фӕрцы къаддӕр тыхсын ӕмӕ мӕ бон у мӕ царды хабӕрттӕ кӕнын. Зонын ӕй, Йегъовӕ мӕ ӕнӕ ’ххуысӕй кӕй нӕ ныууадздзӕн».

Мыййаг, истӕуыл тынг тыхсыс, дӕ цардӕн тӕссаг у кӕнӕ дыл исты ӕвирхъау хабар ӕрцыд? «Удӕнцойдӕттӕг Хуыцаумӕ» куы кувай, уӕд дӕ зӕрдӕ ӕрсабыр уыдзӕн. Библи нын ныфс ӕвӕры, Хуыцау «нын удӕнцой [кӕй] дӕтты не ’ппӕт зындзинӕдты дӕр» (2 Коринфӕгтӕм 1:3, 4). Зӕгъӕм, иухатт Йесо йӕхимидӕг тынг куы  хъуырдухӕн кодта, уӕд «йӕ зонгуытыл ӕрхауд ӕмӕ кувын райдыдта». Цымӕ йын Хуыцау йӕ куывд фехъуыста? «Уӕларвӕй [йӕм] ӕрцыди зӕд ӕмӕ йӕ бафидар кодта» (Лукайы 22:41, 43). Хуыцауыл иузӕрдион адӕймаг Нееми та куывта, фыдзӕрдӕ адӕм ӕй Хуыцауы хъуыддаг аразын куы нӕ уагътой, уӕд: «Кувын дӕм, бафидар мӕ кӕн!» Дарддӕр хабӕрттӕ куыд цыдысты, уымӕй бӕрӕг у, Хуыцау ын ӕцӕгдӕр кӕй баххуыс кодта, цӕмӕй ма тарстаид ӕмӕ йӕ куыст дарддӕр кодтаид (Нееми 6:9–16). Реджиналд, Ганӕйӕ, зӕгъы: «Куы фӕкувын, уӕлдайдӕр та мын тынг зын куы вӕййы, уыцы рӕстӕджыты, уӕд мӕм афтӕ фӕкӕсы, ӕмӕ мӕ зындзинӕдтӕ дзурын, йӕ бон мын баххуыс кӕнын кӕмӕн у ӕмӕ мын афтӕ чи зӕгъы, мацӕуыл тыхс, зӕгъгӕ, уымӕн». Уӕдӕ нын Хуыцау удӕнцой дӕтдзӕн, куы йӕм кувӕм, уӕд.

Цы уынаффӕтӕ рахӕссӕм, уыдонӕй иуӕй-иутӕ фӕзынынц нӕхи ӕмӕ нӕ хиуӕтты дарддӕры цардыл. Цы нын баххуыс кӕндзӕн зондджын уынаффӕтӕ хӕссынӕн? Библийы фыст ис: «Уӕдӕ уӕ кӕд искӕмӕ зонд фаг нӕй [уӕлдайдӕр та зын уавӕрты бахаугӕйӕ], уӕд курӕд Хуыцауӕй,– уымӕн ӕмӕ уый алкӕмӕн дӕр дӕтты рӕдауӕй ӕмӕ ӕнӕ уайдзӕфӕй,– ӕмӕ йын ӕнӕратгӕ нӕ фӕуыдзӕн» (Иаковы 1:5). Хуыцауӕй зонд куы курӕм, уӕд нын йӕ сыгъдӕг тыхы фӕрцы разамынд дӕтдзӕн, цӕмӕй раст уынаффӕтӕ хӕссӕм. Ӕцӕгдӕр, нӕ бон у Хуыцаумӕ кувын, цӕмӕй-иу нӕ йӕ сыгъдӕг тыхӕй схайджын кӕна, уымӕн ӕмӕ, Чырысти куыд зӕгъы, афтӕмӕй «нӕ уӕларвон Фыд... ратдзӕн сыгъдӕг тых, чи дзы куры, уыдонӕн» (Лукайы 11:13).

Суанг ма-иу Чырысти дӕр куырдта ӕххуыс йӕ Фыдӕй, исты ахсджиаг уынаффӕ-иу ӕй рахӕссын куы хъуыди, уӕд. Библийы фыст ис, зӕгъгӕ, 12 апостолы равзарыны размӕ «ӕнӕхъӕн ӕхсӕв арвыста Хуыцаумӕ кувгӕйӕ» (Лукайы 6:12).

Йесойау абон дӕр бирӕтӕ фӕныфсджындӕр вӕййынц, Хуыцау сын раст уынаффӕ рахӕссынӕн куы баххуыс кӕны, уӕд. Регинӕ, Филиппинтӕй, радзырдта йӕ уавӕры тыххӕй: йӕ цардӕмбал амард, ӕнӕ куыстӕй баззад ӕмӕ йын йӕ сывӕллӕтты хъомыл кӕнын дӕр ӕнцон нӕу. Цымӕ йын раст уынаффӕтӕ хӕссынӕн цы ’ххуыс кӕны? Мӕнӕ цы зӕгъы: «Йегъовӕмӕ ӕххуысы тыххӕй фӕкувын». Квабенӕ, Ганӕйӕ, радзырдта, Хуыцаумӕ ӕххуысы тыххӕй цӕмӕн фӕкувы: «Арӕзтады куыстон ӕмӕ мын хорз мызд уыди. Фӕлӕ мӕ рарвыстой». Ног куыст куыд ӕвзӕрста, уый тыххӕй загъта: «Цӕмӕй раст уынаффӕ рахастаин, уый тыххӕй Йегъовӕмӕ зӕрдиагӕй куывтон». Стӕй ма йӕ ныхасмӕ бафтыдта: «Мӕ бон фидарӕй зӕгъын у, Йегъовӕ мын ахӕм куыст равзарынӕн кӕй баххуыс кодта, ӕмӕ мӕ бон у мӕхи дарын дӕр ӕмӕ мын ис рӕстӕг Хуыцауимӕ баст хъуыддӕгтӕн дӕр». Иуӕй-иу уынаффӕтӕ фӕзынынц, Хуыцаумӕ ӕввахсдӕр фӕуыдзыстӕм ӕви дзы адард уыдзыстӕм, ууыл. Ӕмӕ ахӕм фарстаты тыххӕй Хуыцаумӕ куы куват, уӕд уын ӕнӕмӕнгӕй баххуыс кӕндзӕн.

Ацы статьяйы аныхас кодтам, кувын цы пайда у, цалдӕр ахӕм хъуыддагыл. (Фылдӕр базонӕн ис рамкӕйӕ « Хуыцаумӕ кувын цы пайда у».) Фӕлӕ дын цӕмӕй Хуыцау дӕ куывдтытӕ хъуса, уый тыххӕй уал ын хъуамӕ йӕхи ӕмӕ йӕ фӕндон базонай. Кӕд дӕ фӕнды, уӕд дын Йегъовӕйы Ӕвдисӕнтӕ баххуыс кӕндзысты Библи хуыздӕр базонынӕн *. Уый уыдзӕн дӕ фыццаг къахдзӕф, цӕмӕй, «куывдтытӕ чи хъусы, уыцы Хуыцаумӕ» баввахс уай (Псалом 65:2).