Тыллӕг бафснайыны фӕстӕ цы баззайа, уый ӕмбырд кӕныны фӕдыл Моисейы закъоны цавӕр фӕдзӕхст уыд ӕмӕ пайда кӕмӕн уыд?

▪ Моисейы закъон зӕхкусджыты фӕдзӕхста, цӕмӕй-иу сӕ зӕххы тыллӕг иууылдӕр, фӕстаг гагайы онг, ма ӕмбырд кодтаиккой. Хуымгӕрдджытӕ-иу хъуамӕ хуымтӕ суанг сӕ кӕрӕтты онг ма ныккарстаиккой. Сӕнӕфсиртонджытӕ-иу, зӕхмӕ цы гагатӕ ӕрхауд, уыдон хъуамӕ ма уыгътаиккой, стӕй-иу, чи нӕма срӕгъӕд, уыцы цупӕлттӕ ӕртонынмӕ дӕр фӕстӕдӕр мауал ӕрбацыдаиккой. Оливӕбӕлӕстӕ-иу чи цагъта, уыдон дӕр-иу хъуамӕ ныууагътаиккой, къалиутыл цы гагатӕ баззад, уыдон (Левит 19:9, 10; Дыккаг закъон 24:19–21). Тыллӕгӕй-иу цы баззад, уый-иу стӕй ӕруыгътой мӕгуыртӕ, сидзӕртӕ, идӕдз сылгоймӕгтӕ ӕмӕ ӕрцӕуӕггӕгтӕ.

Уыцы закъон Израилы алкӕмӕн дӕр уыди пайда. Зӕххытӕ кӕмӕн уыд, уыдоны разӕнгард кодта, цӕмӕй уой рӕдау, ӕрмӕст сӕхиуыл ма хъуыды кӕной ӕмӕ сӕ ныфс дарой, Хуыцау сын кӕй раарфӕ кӕндзӕн, ууыл. Тыллӕг бафснайыны фӕстӕ ма-иу цы баззад, уый чи ӕмбырд кодта, уыдоны та ахуыр кодта, цӕмӕй уыдаиккой куыстуарзаг, уымӕн ӕмӕ уыцы куыст ӕнцон нӕ уыд (Руф 2:2–17). Уыцы закъоны фӕрцы мӕгуыртӕ ӕххормагӕй никуы баззадаиккой ӕмӕ иннӕтӕн уаргъ никуы суыдаиккой. Уый фӕрцы никуы ӕрхаудаиккой ахӕм ӕгады уавӕрмӕ, цӕмӕй мӕгуыргур цӕуой кӕнӕ иннӕты ӕххуысмӕ ӕнхъӕлмӕ кӕсой.

Соломон Иерусалимы кувӕндон саразынӕн хъӕдӕрмӕг суанг Ливанӕй цӕмӕн ласта?

▪ 1 Паддзӕхты 5:1–10 стихты фыст ис, Соломон ӕмӕ Тиры паддзах Хирам цӕуыл баныхас кодтой, уый тыххӕй: кувӕндон аразынӕн Израилмӕ Ливанӕй денджызыл ласдзысты кедрбӕлас ӕмӕ ӕхсӕлыбӕласы хъӕдтӕ.

Раджы заманты кедрбӕласӕн Ӕввахс Скӕсӕны уыд стыр аргъ. Египеты ӕмӕ Месопотамийы ацы хъӕдӕрмӕгӕй арӕзтой цары хъӕдтӕ кувӕндӕттӕн ӕмӕ галуантӕн, стӕй-иу сын дзы ӕмбӕрзтой сӕ къултӕ дӕр. Паддзӕхты гӕххӕттытӕй, литературон уацмыстӕй ӕмӕ дуртыл фыстытӕй бӕрӕг у, кедрбӕлӕстӕ ӕдзух кӕй ластой хуссар Месопотамийы горӕттӕм, хатт-иу сӕ байстой хӕсты, йе та-иу сӕ райстой хъалонӕн. Египеты дзы арӕзтой паддзахы наутӕ, стӕй чырынтӕ ӕмӕ ма мард бавӕрынӕн ноджыдӕр цы дзауматӕ хъуыди, уыдон.

Ливаны кедртӕн уӕлдайдӕр аргъ кодтой, сӕ хъӕд фидар ӕмӕ рӕсугъд кӕй уыд, стӕй адджын тӕф кӕй кодта, уый тыххӕй, зулчъытӕ ӕмӕ йӕм хъӕндилтӕ та ӕмгӕрон дӕр нӕ цыдысты. Уӕдӕ Соломон кувӕндон аразынӕн пайда кодта ӕппӕты хуыздӕр ӕрмӕгӕй. Кӕддӕр Ливаны хӕхтыл цы стыр кедры хъӕдтӕ зади, уыдонӕй ма абон ранӕй-рӕтты баззади ӕрмӕстдӕр гыццыл къохтӕ.

[Ныв 15 фарсыл]

Фӕласынц ливайнаг кедртӕ. Ассириаг къӕйдур, ис Саргоны галуаны

[Барлӕвӕрдӕй]

Erich Lessing/​Art Resource, NY