Цу ӕнаипдзинады фӕндагыл
Цу ӕнаипдзинады фӕндагыл
«Ӕз та цӕуын ме ’наипдзинады» (ПСАЛОМ 25:11).
1, 2. а) Адӕймаджы иузӕрдиондзинад ӕмӕ ӕнаипдзинад ӕнгом баст цӕмӕн сты Хуыцауы хицаудзинады фӕдыл дзырддаг фарстаимӕ? ӕ) Адӕм ӕмӕ зӕдтӕ Иегъовӕйы фарс кӕй сты, уый сӕ бон куыд у равдисын?
САЙТАН Едемы куы сызмӕста, уӕд сдзырддаг кодта, Хуыцауӕн уый бар ис, ӕмӕ Дун-дунейы — йе сконд зӕдтӕ ӕмӕ адӕмӕн — хицау уа. Цасдӕр рӕстӕджы фӕстӕ та Хуыцауӕн загъта, зӕгъгӕ дын кӕд адӕм лӕггад кӕнынц, уӕддӕр цыдӕр ӕнхъӕлӕй (Иов 1:9—11; 2:4). Уӕдӕй фӕстӕмӕ адӕймагы иузӕрдиондзинад ӕмӕ ӕнаипдзинад ӕнгом баст сты Иегъовӕйы хицаудзинады фӕдыл дзырддаг фарстаимӕ.
2 Кӕй зӕгъын ӕй хъӕуы, адӕм ӕмӕ зӕдтӕ сӕхи куыдфӕнды ма дарой, уӕддӕр Иегъовӕ у ӕмӕ уыдзӕн Дун-дунейы Хицау. Фӕлӕ сӕ цардӕй сӕ бон у равдисын, кӕй фарс сты, уый. Куыд? Ӕнаипдзинады фӕндагыл цӕудзысты ӕви нӕ, уымӕй. Ӕмӕ сын Иегъовӕ Хуыцау тӕрхон дӕр уымӕ гӕсгӕ кӕндзӕн.
3. а) Иов ӕмӕ Давид Иегъовӕйӕ цы куырдтой? ӕ) Ӕнаипдзинады фӕдыл нӕ цавӕр фарстытӕм хъӕуы ӕркӕсын?
3 Иов фидарӕй загъта: «[Иегъовӕ] мӕ раст тӕрӕзтыл сбардзӕн ӕмӕ мын Хуыцау мӕ ӕнаипдзинад базондзӕн» (Иов 31:6). Рагон Израилы паддзах Давид дӕр куывта Иегъовӕмӕ, цӕмӕй йын сбӕрӕг кодтаид йӕ ӕнаипдзинад: «Ӕртӕрхон кӕн мӕнӕн, Хицау, уымӕн ӕмӕ ӕз цыдтӕн мӕ ӕнаипдзинады, ӕмӕ, Хицауыл ныфсджынӕй нӕ фӕцуддзынӕн» (Псалом 25:1). Алкӕй дӕр нӕ хъӕуы ӕнаипдзинады фӕндагыл цӕуын. Уӕвгӕ, цы у ӕнаипдзинад? Куыд ис ӕнаипдзинады фӕндагыл цӕуӕн? Ӕмӕ дзы цӕмӕй ма адзӕгъӕл уӕм, уымӕн нын цы баххуыс кӕндзӕн?
«Ӕз цыдтӕн мӕ ӕнаипдзинады»
4. Ӕнаипдзинад цы у?
4 Библимӕ гӕсгӕ, ӕнаипдзинад йӕхимӕ байста ахӕм миниуджытӕ: ӕууӕнкджын, ӕнӕкъӕм, раст, ӕнӕфау. Фӕлӕ ӕнаипдзинад ӕрмӕст, раст цы у, уый аразын нӕу. Ацы миниуӕг кӕмӕ ис, уымӕ ис Хуыцауы ӕфсарм, у йыл иузӕрдион. Сайтан хъавыд Хуыцауы раз Иовыл цъыф бакалын: «Уӕдӕ ма йӕм дӕ къух сис, ӕмӕ [Иовӕн] йе стӕг ӕмӕ йӕ буармӕ бавнал,— кӕддӕра дӕ комкоммӕ нӕ ралгъитид» (Иов 2:5). Ӕнаипп чи у, уымӕн канд йӕ хъуыддӕгтӕ нӕ вӕййынц хорз, фӕлӕ ма йӕ зӕрдӕ дӕр вӕййы сыгъдӕг.
5. Цӕмӕй бӕрӕг у, ӕнӕххӕст адӕймаджы бон дӕр кӕй у, ӕмӕ ӕнаипп уа?
5 Ӕнаипп уай, уый ууыл дзурӕг нӕу, ӕмӕ хъуамӕ алцӕмӕй ӕххӕст уай. Цӕвиттонӕн райсӕм паддзах Давиды. Уый уыд ӕнӕххӕст адӕймаг ӕмӕ стыр рӕдыдтытӕ дӕр ӕруагъта. Фӕлӕ йӕ уӕддӕр Библи хоны «ӕнаипп зӕрдӕйы» хицау (3 Паддзахӕдты 9:4). Цӕмӕн? Уымӕн ӕмӕ уарзта Иегъовӕйы ӕмӕ йын йӕ зӕрдӕ ӕгасӕй дӕр радта. Уый-иу йӕ рӕдыдыл басаст, уайдзӕфмӕ-иу байхъуыста ӕмӕ-иу дарддӕр афтӕ нал кодта. Уӕдӕ Давиды ӕнаипп схонӕн уымӕн ис, ӕмӕ иузӕрдион уыд йӕ Хуыцау Иегъовӕйыл, бирӕ йӕ уарзта (Дыккаг закъон 6:5, 6).
6, 7. Ӕнаипдзинады фӕндагыл цӕуынӕн цы хъӕуы?
6 Адӕймаг ӕнаипп, ӕнӕфау царды ӕрмӕстдӕр кӕцыдӕр фӕзилӕны хъуамӕ ма уа, дзырдӕн, дины хъуыддаджы, фӕлӕ алы фӕзилӕны дӕр. Давид «цыд» ӕнаипдзинады фӕндагыл. Иу чиныгмӕ гӕсгӕ мивдисӕг «цӕуын» нысан кӕны: «царды фӕндаг», «царды уаг» («The New Interpreter’s Bible»). Йӕ фӕндагыл ӕнаиппӕй чи цӕуы, уыдоны тыххӕй псаломзарӕггӕнӕг зарыд: «Тӕхудиаг... [сты Хуыцауы] ӕргомдзинӕдтӕ хъахъхъӕнджытӕ, ӕппӕт зӕрдӕйӕ Уый агурджытӕ. Уыдон нӕ кӕнынц ӕнӕзакъондзинад, цӕуынц Уый фӕндӕгтыл» (Псалом 118:1—3). Уӕдӕ цӕмӕй ӕнаипп уӕм, уый тыххӕй хъуамӕ Хуыцауы фӕндон ӕппӕт зӕрдӕйӕ ӕххӕст кӕнӕм ӕмӕ йын йӕ фӕндагыл цӕуӕм.
7 Цӕмӕй ӕнаипдзинады фӕндагыл цӕуӕм, уый тыххӕй хъуамӕ цыфӕнды уӕззау уавӕрты дӕр Хуыцауыл ӕнувыд уӕм. Фыдӕвзарӕнты фидар куы фӕлӕууӕм, мастӕн куы ныффӕразӕм ӕмӕ ацы ӕнӕхуыцау дунейы цыбӕлты фӕдыл куы нӕ фӕцӕуӕм, уӕд нӕ ӕнаипдзинад рабӕрӕг вӕййы. Афтӕмӕй Иегъовӕйы зӕрдӕ барухс кӕнӕм — вӕййы йын, фидистӕ йын чи кӕны, уымӕн цы зӕгъа (Ӕмбисӕндтӕ 27:11). Уымӕ гӕсгӕ Иовау мах дӕр зӕгъӕм: «Цалынмӕ удӕгас дӕн, уӕдмӕ мӕ ӕнаипдзинадыл ӕвдисӕн нӕ бакӕндзынӕн!» (Иов 27:5). Ӕнаипдзинады фӕндагыл цӕуынӕн нын цы баххуыс кӕндзӕн, ууыл ныхас цӕуы 25 псаломы.
«Стайын кӕн мӕ уыргтӕ ӕмӕ мӕ зӕрдӕ»
8. Давид Иегъовӕйӕн кӕй лӕгъстӕ кодта, мӕ уыргтӕ ӕмӕ мын мӕ зӕрдӕ басгар, зӕгъгӕ, уымӕй цы ис базонӕн?
8 Давид куывта: «Басгар мӕн, Хицау, ӕмӕ мӕ бафӕлвар; стайын кӕн мӕ хуылфыдзауматӕ [«мӕ уыргтӕ», МГТ] ӕмӕ мӕ зӕрдӕ» (Псалом 25:2). Куыд зонӕм, афтӕмӕй уыргтӕ адӕймагӕн йӕ хуылфы арф ӕвӕрд сты. Ахӕсгӕ хуызы уыдон ӕвдисынц адӕймаджы сусӕг, рӕбинагдӕр хъуыдытӕ ӕмӕ ӕнкъарӕнтӕ. Зӕрдӕ та амоны ӕгасӕй дӕр йӕ миддуне — йӕ фӕндийӕгтӕ, йе ’нкъарӕнтӕ, йӕ зонд. Уӕдӕ Давид Иегъовӕйӕн куы лӕгъстӕ кодта, «басгар мӕ», зӕгъгӕ, уӕд ӕй фӕндыд, цӕмӕй йын йӕ уды, йӕ зӕрдӕйы арфмӕ ныккастаид ӕмӕ йын йӕ рӕбинаг хъуыдытӕ ӕмӕ ӕнкъарӕнтӕ лӕмбынӕг раиртӕстаид.
9. Иегъовӕ нын нӕ уыргтӕ ӕмӕ зӕрдӕ куыд ссыгъдӕг кӕны?
9 Давид Хуыцауӕн лӕгъстӕ кодта, мӕ уыргтӕ ӕмӕ мын мӕ зӕрдӕ стайын кӕн, ома ссыгъдӕг кӕн. Иегъовӕ адӕймагӕн йӕ миддуне куыд ссыгъдӕг кӕны? Давид зарыд: «Арфӕ кӕндзынӕн Хицауӕн, мӕнӕн бамбарынгӕнӕгӕн; суанг ӕхсӕвыгон дӕр ахуыр кӕны мӕн мӕ хуылф [«мӕ уыргтӕ», МГТ]» (Псалом 15:7). Ацы ныхӕстӕ цӕуыл дзурӕг сты? Ууыл, ӕмӕ Хуыцау Давидӕн цы ӕмбарын кодта, цы уынаффӕтӕ йын лӕвӕрдта, уыдон йӕ уд ӕмӕ йӕ зӕрдӕйы арф хызтысты, уидӕгтӕ дзы уагътой ӕмӕ йӕ «ахуыр кодтой» — йӕ сусӕг хъуыдытӕ ӕмӕ йын йӕ рӕбинаг ӕнкъарӕнтӕ ивтой. Мах дӕр, Хуыцау нын йӕ Ныхас, йӕ лӕггадгӕнджыты ӕмӕ йӕ организацийы уылты цы уынаффӕтӕ дӕтты, уыдоныл куы хъуыды кӕнӕм, нӕ зӕрдӕмӕ сӕ арф куы исӕм, уӕд мах дӕр афтӕ ивдзысты. Уӕдӕ ӕдзухдӕр Иегъовӕмӕ куы кувӕм, нӕ уыргтӕ ӕмӕ нӕ зӕрдӕ нын ссыгъдӕг кӕн, зӕгъгӕ, уӕд нӕ бон уыдзӕн ӕнаипдзинады фӕндагыл цӕуын.
Дӕ ӕнувыд уарзт ис мӕ цӕстыты раз
10. Давид ӕцӕгады фӕндагыл цӕй руаджы цыд?
10 «Дӕ хорзӕх [кӕнӕ ӕнувыд уарзт] мӕ цӕстыты раз,— дарддӕр загъта Давид,— ӕмӕ ӕз цыдтӕн Дӕ ӕцӕгады» (Псалом 25:3). Давид хорз зыдта, Хуыцау йӕ адӕмы йе ’нувыд уарзтӕй куыд тавта, уый. Уыдӕттыл арӕх лӕмбынӕг хъуыды кодта, ӕмӕ Хуыцауӕй уыд бузныг. «Арфӕ кӕн, мӕ уд, Хицауӕн, ӕмӕ ма рох кӕн Йӕ ӕппӕт хорз хъуыддӕгтӕ»,— зарыд Давид. Ӕмӕ уӕд йӕ зӕрдыл, ӕвӕццӕгӕн, уыцы хъуыддӕгтӕй кӕцыдӕр ӕрбалӕууыд, ӕмӕ йӕ зарӕг адарддӕр кодта: «Хицау кӕны рӕстдзинад ӕмӕ тӕрхон ӕппӕт ӕфхӕрдтытӕн. Уый равдыста Йӕ фӕндӕгтӕ Моисеймӕ, Израилы фырттӕм — Йӕ хъуыддӕгтӕ» (Псалом 102:2, 6, 7). Куыд зыны, афтӕмӕй Давид ӕрӕмысыд, Моисейы заман египетӕгтӕ израилӕгты куыд ӕфхӕрдтой, куыд сӕ ссӕстой, уый. Ӕмӕ йӕ цӕстыты раз куы сыстадысты, Иегъовӕ израилӕгты куыд ирвӕзын кӕндзӕн, уый тыххӕй Моисейӕн цы дзырдта, уыдӕттӕ, уӕд йӕ зӕрдӕ хурау куыннӕ ныррухс уыдаид ӕмӕ йӕ ныфс куыннӕ фӕфидар уыдаид, цӕмӕй дарддӕр дӕр ӕцӕгады фӕндагыл цыдаид!
11. Ӕнаипдзинады фӕндагыл цӕуынӕн нын цы баххуыс кӕндзӕн?
11 Хуыцауы Ныхас иудадзыг куы ахуыр кӕнӕм, ӕмӕ дзы цы базонӕм, ууыл арф куы хъуыды кӕнӕм, уӕд уый махӕн дӕр фӕахъаз уыдзӕн ӕнаипдзинады фӕндагыл цӕуынӕн. Дзырдӕн, Иосифы Потифары ус куы рӕдийын кодта, фӕлӕ дзы лӕппу куыд алыгъд, уый нӕ зӕрдыл куы дарӕм, уӕд мах дӕр дард лидздзыстӕм, чи нӕ рӕдийын кӕна, уыдонӕй — фӕнды не ’мкусджытӕ уӕнт, фӕнды не ’мкъласонтӕ (Уӕвынад 39:7—12). Зӕгъгӕ нын бирӕ ӕхца бакусын, ном скӕнын ӕмӕ стыр бынатмӕ бахауыны фадат фӕзынд, уӕд та куыд кӕнӕм? Уӕд бафӕзмӕм Моисейы, Египеты йын цы кад ӕмӕ бынат уыд, уыдон чи ныууагъта (Дзуттытӕм 11:24—26). Иов куыд фӕразон, куыд фидар уыд, уый куы нӕ рох кӕнӕм, уӕд-иу нӕм,— исты низ ныл стыхджын уа ӕви ныл исты ӕнамонд хабар ӕрцӕуа,— хъарутӕ фӕзындзӕн, ӕмӕ Иегъовӕйыл нӕ зӕрдӕ не сивдзыстӕм (Иаковы 5:11). Куыд кӕнӕм, нӕ ныхмӕдзӕуджытӕ нӕ карзӕй куы ӕфхӕрой, уӕд та? Данелы хъоргъы домбӕйттӕм куыд ныппӕрстой, уый-иу ӕрлӕууын кӕнӕм нӕ зӕрдыл, ӕмӕ ницӕмӕй тӕрсдзыстӕм! (Данел 6:17—23).
«Нӕ бадтӕн ӕз сайӕг адӕмимӕ»
12, 13. Нӕхи цавӕр адӕмӕй хъуамӕ хизӕм?
12 Давид дарддӕр дзуры, ӕцӕгады фӕндагӕй ма йӕ цы нӕ бауагъта цудын, уый тыххӕй: «Нӕ бадтӕн ӕз сайӕг адӕмимӕ, ӕмӕ хинӕйдзӕгтимӕ нӕ ацӕудзынӕн. Сӕнӕуынон мын фыдгӕнджыты ӕмбырд ӕмӕ ӕнӕрӕстытимӕ не сбаддзынӕн» (Псалом 25:4, 5). Ӕнӕраст, ома ӕнӕхуыцау адӕмимӕ, бадгӕ нӕ — ӕмгӕрон дӕр сӕм нӕ цыд, уыдысты йын ӕнӕуынон.
13 Мах та? Алыхуызон телералӕвӕрдты, киноты «сайӕг адӕймӕгты» куы февдисынц, кӕнӕ сыл Интернеты сайтты куы сӕмбӕлӕм, уӕд сӕ разы «сбадӕм» ӕмӕ сӕм фӕкӕсӕм, ӕви нӕхи айсӕм? Хинӕйдзӕгтӕ, ома йе ’цӕг цӕсгом чи ӕмбӕхсы, уыдонӕй нӕхи дард ласӕм? Кӕимӕ ахуыр кӕнӕм, йе та кӕимӕ кусӕм, уыдонӕй исчи, гӕнӕн ис, исты ӕнхъӕлӕй немӕ лымӕн кӕны. Ӕцӕгады фӕндагыл чи нӕ цӕуы, уыдоныл нӕ нӕхи бӕттын фӕнды? Динафӕливджытӕ дзургӕ афтӕ кӕнынц, цыма нӕ хорзыл тыхсынц — афтӕмӕй та архайынц мах Хуыцауы фӕндагӕй фӕиппӕрд кӕныныл. Ӕмӕ, зӕгъӕм, ӕмбырды чидӕртӕ дывӕлдах цардӕй цӕры, уӕд та? Уыдон дӕр, кӕй зӕгъын ӕй хъӕуы, се ’цӕг цӕсгом не ’вдисынц. Иу кӕстӕриуӕггӕнӕг ӕфсымӕр, Джейсон, зӕгъгӕ, йе ’рыгонӕй ахӕм чырыстӕттимӕ фӕиу. Уый зӕгъы: «Иу афон мын дзы сӕ иу афтӕ куы бакӕнид: „Ӕвзӕр кӕнай, хорз кӕнай, цы уӕлдай у — ног дуне куы ’рцӕуа, уӕд не ’ппӕт дӕр уыдзыстӕм мард. Нӕхи ӕнӕхай цӕмӕй фӕкодтам, уый нӕ иу дӕр нӕ базондзӕн“. Уыцы ныхӕстӕй мӕ зӕрдӕ фӕдисхъӕр ныккодта. Мӕн нӕ фӕнды, ӕмӕ, ног дуне куы ралӕууа, уӕд мард уон». Хорз у, ӕмӕ Джейсон уыцы ӕрдхӕрдты ныууагъта, сӕ зондыл нӕ ацыд! «Уӕхи ма сайут: ӕвзӕр ӕмбаладтӕ халынц хорз ӕгъдӕуттӕ»,— дзӕгъӕлы нӕ фӕдзӕхста апостол Павел (1 Коринфӕгтӕм 15:33). Куыд тынг нӕ хъӕуы нӕхи «ӕвзӕр ӕмбаладтӕй», ӕвзӕр адӕмӕй хъахъхъӕнын!
Дзурдзынӕн де ’ппӕт диссӕгты тыххӕй
14, 15. Иегъовӕйы нывондхӕссӕны алыварс зилӕм, зӕгъӕ, нӕ бон кӕд уыдзӕн зӕгъӕн?
14 «Ӕхсдзынӕн мӕ къухтӕ ӕнаххосдзинады ӕмӕ Дӕ нывондхӕссӕны мидӕг [«дӕ нывондхӕссӕны алыварс», НД], Хицау, зилдзынӕн»,— куывта Давид. Цӕмӕн? «Цӕмӕй хъусын кӕнон ӕппӕлыны хъӕлӕсӕй ӕмӕ дзурон Дӕ диссӕгтӕ ӕппӕт» (Псалом 25:6, 7). Иегъовӕйы раз йӕ цӕсгом сыгъдӕг уыдаид, уый Давиды уымӕн фӕндыд, цӕмӕй йын лӕггад кодтаид ӕмӕ йӕ кадджын кодтаид.
15 Раст дины артдзӕсты — хӕсгӕ кувӕндоны цатыры, фӕстӕдӕр та кувӕндоны — цы уыд, цы куыстытӕ дзы кодтой, уыдон иууылдӕр уыдысты «уӕларвойнаджы ныв ӕмӕ аууон» (Дзуттытӕм 8:5; 9:23, НФ). Нывондхӕссӕн ӕвдыста Иегъовӕйы фӕндон — Йесо Чырыстийы нывондӕй адӕмы балхӕнын (Дзуттытӕм 10:5—10). «Ӕхсдзынӕн мӕ къухтӕ ӕнаххосдзинады ӕмӕ... [Иегъовӕйы] нывондхӕссӕны алыварс зилдзынӕн», зӕгъгӕ, уый афтӕ ӕмбаргӕ у, ӕмӕ уыцы нывондыл кӕй ӕууӕндӕм, уый ӕвдисӕм хъуыддӕгтӕй (Иоанны 3:16—18).
16. Хуыцауы диссаг хъуыддӕгты тыххӕй дзурын хорз цӕмӕй у?
16 Ӕлхӕнӕг нывонд цы хорздзинӕдтӕ хӕссы, ууыл куы фӕхъуыды кӕнӕм, уӕд Иегъовӕ Хуыцау ӕмӕ йӕ иунӕггуырд Фыртӕй бузныг нӕ вӕййӕм? Кӕд о, уӕд дзурӕм Хуыцауы диссаг хъуыддӕгты тыххӕй — Хуыцау Едемы цӕхӕрадоны адӕймаджы куыд сфӕлдыста, уыцы хабарӕй райдай ӕмӕ ног дунейы ӕппӕт дӕр куы сӕххӕст уа, ома ӕппӕт дӕр куы сӕндидза, уымӕй фӕу (Уӕвынад 2:7; Куыстытӕ 3:21). Хуыцауы Паддзахады тыххӕй кӕй хъусын кӕнӕм ӕмӕ ахуыргӕнинӕгтӕ кӕй цӕттӕ кӕнӕм, уый нын нӕ уырнындзинад куыд тынг хъахъхъӕны! (Матфейы 24:14; 28:19, 20). Ӕдзух уыцы хъуыддагыл лӕуд куы уӕм, уӕд нӕм цы рухс фидӕн ӕнхъӕлмӕ кӕсы, уый нӕ нӕ рох кӕндзӕн, Хуыцауы зӕрдӕвӕрдтыл ӕууӕнддзыстӕм ӕмӕ Иегъовӕ, стӕй адӕмы стыр уарзтӕй уарздзыстӕм.
«Бауарзтон ӕз Дӕ хӕдзары цӕрӕн»
17, 18. Нӕ фембӕлдтӕм цы цӕстӕй хъуамӕ кӕсӕм?
17 Израилы хӕсгӕ кувӕндоны цатыр ӕмӕ йӕ нывондхӕссӕн уыдысты Иегъовӕ Хуыцауы дины артдзӕст. Давидӕн уыцы бынат афтӕ адджын уыд, ӕмӕ куывта: «Хицау! бауарзтон ӕз Дӕ хӕдзары цӕрӕн ӕмӕ Дӕ кады цӕрӕнбынат» (Псалом 25:8).
18 Иегъовӕйы тыххӕй бирӕ цыдӕртӕ кӕм базонӕм, уыцы бынатмӕ цӕуын уарзӕм? Абон раст дины артдзӕст у алы Паддзахады зал дӕр, уым нӕ ахуыр кӕны Хуыцау. Ӕрвылаз ма нын вӕййы облӕстон, районон ӕмӕ иубонон конгресстӕ дӕр. Уым нын фӕамонынц Иегъовӕйы «раргомдзинӕдтӕ», ома нын нӕ зӕрдыл ӕрлӕууын кӕнынц йӕ фӕдзӕхстытӕ. Ӕмӕ уыцы фӕдзӕхстытӕ кӕд «тыхджын уарзӕм», уӕд фембӕлдтӕм ӕнӕзивӕгӕй цӕудзыстӕм ӕмӕ программӕмӕ лӕмбынӕг хъусдзыстӕм (Псалом 118:167). Куыд хорз вӕййы, нӕ хорздзинад кӕй фӕнды ӕмӕ нын ӕнаипдзинады фӕндагыл цӕуынӕн чи ӕххуыс кӕны, уыцы хотӕ ӕмӕ ӕфсымӕртимӕ! (Дзуттытӕм 10:24, 25).
«Ма фесаф мӕ уды»
19. Цӕмӕй хызта йӕхи Давид?
19 Давид иттӕг хорз зыдта, адӕймаг ӕцӕгады фӕндагӕй куы фӕцуды, уӕд йӕхи фыдбылызы баппары, ӕмӕ куывта: «Ма фесаф мӕ уды тӕригъӕдджынтимӕ ӕмӕ мӕ цард тугмондӕгтимӕ. Кӕцыты къухты фыддзинад ӕмӕ кӕцыты рахиз къух дзаг у гӕртӕмттӕй» (Псалом 25:9, 10). Давиды нӕ фӕндыд, цӕмӕй йӕ ӕнӕхуыцау, ӕнӕгъдау ӕмӕ гӕртамхор адӕмы лымӕн хуыдтаиккой.
20, 21. Куыд ис уый гӕнӕн, ӕмӕ ӕнхуыцау адӕмы фӕндагыл слӕууӕм?
20 Ныры дуджы ӕгас дуне дӕр аирвӕзт ӕнӕгъдаудзинады малы. Телевизор, журналтӕ ӕмӕ кинотӕ адӕмы халынц — «ӕнӕфсарм митӕм» сӕ амидин кӕнынц (Галатӕгтӕм 5:19, НФ). Бирӕтӕ систы порнографийы цагъартӕ, ӕмӕ арӕх сӕхӕдӕг дӕр бафтынц худинаджы митыл — тынгдӕр фӕсивӕд. Иуӕй-иу бӕстӕты лӕппу ӕмӕ чызг ӕмбӕлой, уый ӕвзӕр никӕмӕ кӕсы. Уымӕ гӕсгӕ ӕрыгӕттӕн алырдыгӕй хъарынц ахӕм хъуыды, зӕгъгӕ дын хъуамӕ уа уарзон. Ӕмӕ афтӕ се ’взонг зӕрдӕты уарзты зынг ссудзы, сӕ цард искӕимӕ баиу кӕной, уымӕн та сын нырма вӕййы раджы. Сӕ зӕрдӕты цы ӕрдзон монц ссудзы, уый рохтыл хӕцынӕн нал вӕййынц, ӕмӕ сын иу бон феуӕгъд вӕййынц. Ӕмӕ худинаджы митӕ бакӕнынц.
21 Ӕвзӕрдзинад ӕрмӕст ӕрыгӕттыл нӕ фӕтых вӕййы, фӕлӕ хистӕртыл дӕр. Базарадон хъуыддӕгты иу иннӕйыл хинӕй кӕй цӕуы, алчидӕр йӕхи уды мӕт кӕй кӕны, уый дӕр ууыл дзурӕг у, ӕмӕ адӕм ӕнаипдзинады фӕндагыл нӕ цӕуынц. Ӕмӕ ацы дунейы фыдбылызы фӕндагыл куы ацӕуӕм, уӕд нӕхи адард кӕндзыстӕм Иегъовӕйӕ. Уӕдӕ не «сӕфт уынӕм ӕвзӕрдзинадӕй, хорздзинад та уарзӕм» ӕмӕ дарддӕр дӕр ӕнаипдзинады фӕндагыл цӕуӕм (Амос 5:15).
«Фервӕзын мӕ кӕн ӕмӕ мын бахатыр кӕн»
22—24. а) 25 псаломы фӕстаг ныхӕстӕ нӕ цавӕр ныфс уадзынц? ӕ) Иннӕ статьяйы ныхас цӕуыл цӕудзӕн?
22 Давид Хуыцауӕн фӕстагмӕ загъта: «Ӕз та цӕуын ме ’наипдзинады; фервӕзын мӕ кӕн ӕмӕ мын бахатыр кӕн. Мӕ къах лӕууы раст фӕндагыл; ӕмбырдты арфӕ кӕндзынӕн Хицауӕн» (Псалом 25:11, 12). Давид ӕнаипдзинады фӕндагыл кӕй цыд, уымӕ гӕсгӕ йӕ бон уыд Хуыцауӕй курын, фервӕзын мӕ кӕн, зӕгъгӕ. Диссаджы ныфсдӕттӕг ныхӕстӕ! Кӕд ӕнаипдзинады фӕндаг нӕ ныууадзӕм, уӕд Иегъовӕ махӕн, ӕнӕххӕст адӕмӕн, ахъаз кӕндзӕн.
23 Цӕй уӕдӕ нӕ царды алы фӕзилӕны дӕр ӕвдисӕм, Дун-дунейы ӕххӕстбарджын Хицау Иегъовӕйӕн кӕй аргъ кӕнӕм ӕмӕ йӕ кӕй нымайӕм. Курӕм дзы, цӕмӕй нын нӕ рӕбинаг хъуыдытӕ ӕмӕ ӕнкъарӕнтӕ лӕмбынӕг иртаса ӕмӕ сӕ сыгъдӕг кӕна. Йӕ «ӕцӕгад» иудадзыгдӕр уӕд нӕ цӕстыты раз — йӕ Ныхас ын зӕрдиагӕй ахуыр кӕнӕм. Ӕвзӕр адӕмӕй нӕхи хизӕм, Иегъовӕйӕн «ӕмбырдты арфӕ кӕнӕм», Паддзахады хабар зынгзӕрдӕйӕ хъусын кӕнӕм, ахуыргӕнинӕгтӕ цӕттӕ кӕнӕм ӕмӕ ма бауадзӕм ацы дунейӕн нӕхи Хуыцауӕй адард кӕнын. Ӕнаипдзинады фӕндагыл цӕуын ӕппӕт хъарутӕй куы архайӕм, уӕд нын Хуыцау хатыр кӕндзӕн ӕмӕ нӕ йӕ хорзӕх уыдзӕн.
24 Адӕймаг царды алы фӕзилӕны дӕр ӕнаипп, ӕнӕфау кӕй хъуамӕ уа, уымӕ гӕсгӕ ма нӕ хъӕуы нӕхимӕ кӕсын дӕр, карз нозты къӕппӕджы куыннӕ бахауӕм. Гъе ууыл уыдзӕн нӕ ныхас иннӕ статьяйы.
Бахъуыды кодтай?
• Хуыцау зӕдтӕ ӕмӕ адӕмӕн сӕ ӕнаипдзинадмӕ гӕсгӕ цӕмӕн кӕндзӕн тӕрхон?
• Цы у ӕнаипдзинад ӕмӕ ӕнаипдзинады фӕндагыл цӕуын куыд хъӕуы?
• Ӕнаипдзинады фӕндагыл цӕуынӕн нын цы баххуыс кӕндзӕн?
• Цӕмӕй ӕнаипдзинады фӕндагыл цӕуӕм, уый тыххӕй нӕхи цӕмӕй хъуамӕ хизӕм?
[Фарстатӕ ахуыр кӕнынӕн]
[Ныв 24 фарсыл]
Иегъовӕ йӕ адӕмы йе ’нувыд уарзтӕй куыд тавта, уый дӕ цӕстыты раз дарыс?
[Ныв 24 фарсыл]
Иегъовӕйӕ алыхатт дӕр фӕкурыс, цӕмӕй дын дӕ рӕбинаг хъуыдытӕ раиртаса?
[Нывтӕ 25 фарсыл]
Фӕлварӕнты куы нӕ фӕцудӕм, уымӕй Иегъовӕйы зӕрдӕ цинӕй байдзаг вӕййы.
