Кӕй ӕгъдаумӕ гӕсгӕ цӕрын у хуыздӕр?

Африкӕмӕ фыццаг хатт чи ӕрцыд, иу ахӕм адӕймаджы дисы бафтыдта иу хабар: тӕккӕ фӕндаггӕрон цавддурау лӕууыд иу лӕг. Бӕлццон фӕхатыд, цалдӕр минуты-иу куы рацыд, уӕд-иу лӕг гыццыл размӕ кӕй акъахдзӕф кодта ӕмӕ та-иу афтӕ сагъдау лӕугӕйӕ кӕй баззад. Ӕрмӕстдӕр ӕй цасдӕры фӕстӕ бамбӕрста, уыцы лӕг афтӕ ӕнахуыр йӕхи цӕмӕн дардта, уый. Телеграфы цӕджындзы аууоны йӕхи хурӕй ӕмбӕхста. Фӕссихор хур бынмӕ куыд цыд, афтӕ йӕ фӕдыл сындӕггай цыд аууон дӕр.

АУУОН куыд нӕ лӕууы иу ран, афтӕ адӕмы цард, сӕ фӕтк ӕмӕ се ’гъдау дӕр ӕдзухдӕр кӕны ивгӕ. Уый хыгъд «рухсы Фыд» (НФ) Иегъовӕ Хуыцау та нӕ ивы. Йесойы ахуыргӕнинаг Иаков куыд загъта, афтӕ Хуыцаумӕ «нӕй ивддзинад ӕмӕ ивддзинады аууон» (Иаковы 1:17). Дзуттаг пехуымпар Малахи ныффыста Хуыцауӕн йӕхи ныхӕстӕ: «Ӕз дӕн Иегъовӕ; Ӕз нӕ ивын» (Малахи 3:6). Исайы заманы Хуыцау Израилы адӕмӕн загъта: «Куы базӕронд уат, уӕддӕр Ӕз уый уыдзынӕн; уӕ сӕртӕ куы сурс уой, уӕддӕр уӕ нӕ ныууадздзынӕн. Ӕз мӕхӕдӕг сараздзынӕн уый» (Исай 46:4). Уымӕ гӕсгӕ, кӕд рӕстӕг цӕуы, уӕддӕр уый никуыд ӕндавы, Дунескӕнӕджы зӕрдӕвӕрдтыл нӕ бон фидарӕй ӕууӕндын кӕй у, ууыл.

Цӕуыл ахуыр кӕнӕм Моисейы закъонӕй

Иегъовӕйӕн йӕ зӕрдӕвӕрдтӕ куыд ӕнӕивгӕ сты, афтӕ ӕнӕивгӕ у, хорз ӕмӕ ӕвзӕры ’хсӕн цы арӕн скодта, уый дӕр. Цӕвиттон, йӕ барӕнтӕ раст кӕмӕн нӕ барынц, ахӕм уӕйгӕнӕгыл баууӕнддзынӕ? Кӕцӕй?! Афтӕ «ӕнӕраст тӕраз ӕнӕуынон у Иегъовӕйӕн, раст гиритӕ та цӕуынц йӕ зӕрдӕмӕ» (Фӕсномыг ныхӕстӕ 11:1; 20:10). Иегъовӕ израилӕгтӕн цы Закъон радта, уым уыд ахӕм фӕдзӕхст: «Тӕрхон кӕнгӕйӕ рӕстдзинады сӕрты ма хиз, дӕргъ ӕмӕ уӕрх баргӕйӕ, стӕй уӕз баргӕйӕ дӕр ма сай. Хъуамӕ дӕм уа иухуызон барӕн къустӕ, раст гиритӕ, раст ефӕ ӕмӕ раст гин. Ӕз дӕн дӕ Хуыцау Иегъовӕ, Египеты зӕххӕй дӕ чи ракодта, уый» (Левит 19:35, 36).

Израилӕгтӕ уыцы закъонмӕ кӕй хъуыстой, уый фӕрцы хайджын уыдысты Хуыцауы хорзӕхӕй, ӕмӕ сӕм уыд бӕркад. Афтӕ абон дӕр, Иегъовӕйыл чи ӕууӕнды, уыдонӕн стыр арфӕдзинӕдтӕ хӕссы, ӕрмӕст исты барыныл куы фӕцӕуы дзырд, уӕд нӕ, фӕлӕ царды ӕппӕт фӕзилӕнты дӕр йӕ ӕнӕивгӕ закъӕттӕ ӕмӕ йе ’вӕрд ӕгъдаумӕ гӕсгӕ кӕй цӕрынц, уый. Хуыцау йӕхӕдӕг дзуры: «Ӕз дӕн Иегъовӕ, дӕ Хуыцау, пайда дын цы у, уый дын Чи амоны, цы фӕндагыл дӕ хъӕуы цӕуын, ууыл дӕ Чи кӕны» (Исай 48:17).

Ӕгъдау цӕуылнӕуал ис?

Абон ӕфсарм ӕмӕ ӕгъдау цӕуылнӕуал ис, уый нын ӕмбарын кӕны Библи. Раргомады, Библийы фӕстаг чиныджы, дзырд цӕуы, уӕларвыл цы хӕст ӕрцыд, уый зӕххыл адӕмы цардыл абоны онг дӕр куыд ӕндавы, уый тыххӕй. Апостол Иоанн фыста: «Ӕрцыд хӕст арвыл: Михаил ӕмӕ йӕ Зӕдтӕ хӕцыдысты кӕфхъуындары ныхмӕ, кӕфхъуындар дӕр йӕ зӕдтимӕ хӕцыд уыдоны ныхмӕ, фӕлӕ нӕ бафӕрӕзтой, ӕмӕ нал разынд бынат уыдонӕн арвыл. Ӕмӕ ӕппӕрст ӕрцыд стыр кӕфхъуындар, рагон калм, йӕ ном хӕйрӕг ӕмӕ иблис, ӕппӕт дунейы сайӕг, ӕппӕрст ӕрцыд зӕхмӕ ӕмӕ йӕ зӕдтӕ дӕр ӕппӕрст ӕрцыдысты йемӕ» (Раргомад 12:7—9).

Цы ӕрхаста уыцы хӕст? Иоанн дарддӕр дзуры: «Уӕдӕ цин кӕнут, ӕрвтӕ ӕмӕ уыдоныл цӕрджытӕ! Зындзинад [«додой», НФ] зӕххыл ӕмӕ денджызы цӕрджытӕн, уымӕн ӕмӕ сымахмӕ ныццыд хӕйрӕг тыхджын тызмӕгӕй, зонгӕйӕ бирӕ рӕстӕг ын кӕй нал баззад!» (Раргомад 12:12).

Зӕххыл цӕрджытӕ додойаг фесты, 1914 азы Фыццаг дунеон хӕст куы ныггуыпп кодта, уӕд. Уыцы хӕстимӕ амардысты, абоны ӕгъдауӕй тынг цы ӕгъдау ӕмӕ удварны хӕзнатӕ хицӕн  кодтой, уыдон. «1914—1918 азты Стыр хӕст баззад сыгъд зӕххы тӕлмау уӕды заман ӕмӕ нӕ дуджы ’хсӕн,— загъта историк Барбара Такман.— Уыцы хӕст, ӕнӕнымӕц цардбӕллон адӕмы цард кӕй ахаста, адӕмы миддуне кӕй сзыгъуыммӕ кодта, сӕ зондахаст сын кӕй фӕивта ӕмӕ адӕмы зӕрдӕты фыдӕнхъӕлдзинады ӕнӕссӕугӕ фӕдтӕ кӕй ныууагъта, уымӕй ӕнӕбын дӕлджинӕгау слӕууыд дыууӕ дуджы ’хсӕн». Ахӕм хъуыды ма загъта ӕндӕр историк Эрик Хобсбам дӕр: «1914 азӕй бӕрӕг фӕзынд, кӕддӕр размӕцыд бӕстӕты цы ӕфсарм ӕмӕ ӕгъдау ныффидар, уыдонӕн тых кӕй нал ис, уый... Хъыгагӕн, XIX ӕнусы цӕрӕг адӕм „варваризм“ кӕй схуыдтой, уымӕ кӕнӕг ивындзинӕдтӕ ныл куыд тынг фӕзындзысты, уый ӕххӕстӕй нӕма ӕмбарӕм».

Джонатан Гловер йӕ чиныджы банысан кодта: «Нӕ дуджы ӕууӕлтӕй иу у, ӕгъдау ӕмӕ ӕфсарм цадӕггай кӕй сӕфынц, уый» («Humanity​—A Moral History of the Twentieth Century»). Ныгуылӕн бӕстӕты дин заууатмӕ кӕй ӕрцыд, уый тыххӕй чиныджы авторы нӕ уырны, адӕймаг йӕхи куыд хъуамӕ дара, уыцы закъӕттӕ йӕхӕдӕг кӕй нӕ ӕрӕмысыд, фӕлӕ йын сӕ ӕндӕр чидӕр кӕй радта, уый, ӕмӕ уӕддӕр дзуры: «Кӕд ӕмӕ мах дины закъӕттӕм гӕсгӕ нӕ цӕрӕм, уӕддӕр нӕ хъуамӕ сагъӕстыл ӕфтауа, уыцы закъӕттӕн тых кӕй нал ис, уый».

Абон дунейы ӕууӕнк кӕй никуыуал ис — нӕдӕр базарады, нӕдӕр политикӕйы, нӕдӕр дины, нӕдӕр адӕмы ’хсӕн ӕмӕ ма ӕгӕрыстӕмӕй бинонты ’хсӕн дӕр,— уый дӕр ӕмӕ уыцы ӕнӕууӕнкдзинад адӕмӕн цы бирӕ зындзинӕдтӕ хӕссы, уый дӕр у Сайтаны аххос. Уый архайы ӕппӕт тыхтӕй, цӕмӕй зӕххыл адӕм хъизӕмар кӕной. Хӕйрӕг йӕ гӕрзтӕ ӕрывӕрынвӕнд нӕ кӕны, уый кӕронмӕ кӕны йӕ тох, Хуыцауы закъӕттӕм гӕсгӕ чи цӕры, уыдоны ныхмӕ, цӕмӕй сӕ иууылдӕр сӕрсӕфӕнмӕ йӕ фӕдыл акӕна (Раргомад 12:17).

Цымӕ искуы ахӕм рӕстӕг уыдзӕн, ӕмӕ адӕм кӕрӕдзийыл ӕууӕнддзысты? Апостол Петр дӕтты дзуапп ацы фарстӕн: «Мах, Йӕ [Хуыцауы] зӕрдӕвӕрдмӕ гӕсгӕ, ӕнхъӕлмӕ кӕсӕм ног арв ӕмӕ ног зӕхмӕ, кӕцытыл цӕры рӕстдзинад» (2 Петры 3:13). Ацы ныхӕстыл ӕууӕндӕн ис, ӕрмӕст уый тыххӕй нӕ, ӕмӕ Хуыцауӕн йӕ бон кӕй у йӕ фӕнд сӕххӕст кӕнын, фӕлӕ ма нын йӕхӕдӕг дзырд кӕй дӕтты, сӕххӕст уыдзысты, зӕгъгӕ, уый тыххӕй дӕр. Йӕ «дзыхӕй цы дзырд рацӕуы», уый тыххӕй Иегъовӕ дзуры: «Уый мӕм фӕстӕмӕ ӕнӕсӕххӕстӕй не ’рбаздӕхдзӕн, фӕлӕ ӕнӕмӕнг сараздзӕн, мӕн цы фӕнды, уый ӕмӕ сӕххӕст кӕндзӕн, цӕй тыххӕй йӕ арвыстон, уый». О, Хуыцауы зӕрдӕвӕрдыл фидарӕй ис ӕууӕндӕн! (Исай 55:11; Раргомад 21:4, 5).

Хуыцауы ӕвӕрд ӕгъдаумӕ гӕсгӕ цӕр

Ацы фӕлдурӕджджын ӕмӕ сӕфтмӕ цӕуӕг дунейы Иегъовӕйы Ӕвдисӕнтӕ цӕрынц, Библи сӕ цы ӕгъдау ӕмӕ ӕфсармыл ахуыр кӕны, уымӕ гӕсгӕ. Уымӕй хицӕн кӕнынц дунейы иннӕ адӕмӕй ӕмӕ уымӕй хауынц иннӕты цӕсты, арӕх та сыл худгӕ дӕр фӕкӕнынц.

Лондоны Иегъовӕйы Ӕвдисӕнты конгресс куы цыди, уӕд телеуынынады уацхӕссӕг иу Ӕвдисӕнмӕ ахӕм фарст радта, зӕгъгӕ, ӕцӕгдӕр Иегъовӕйы Ӕвдисӕнтӕ чырыстӕттӕ сты. Уый йын дзуапп радта: «О, ӕнӕмӕнг, уымӕн ӕмӕ мах цӕрӕм, Йесо куыд цард ӕмӕ куыд амыдта, афтӕ. Ацы дунейы хиуарзон адӕмӕй хъауджыдӕр махӕн Йесо у фӕндаг, ӕцӕгад ӕмӕ цард. Мах уырны, Йесо кӕй нӕу Ӕртӕуоны хай, фӕлӕ кӕй у Хуыцауы Фырт, ӕмӕ мах куыд ӕмбарӕм Библи, уый дунейы сӕйраг динты ахуырӕдтӕй дӕр уымӕн хицӕн кӕны».

Уыцы ныхӕстӕ Би-Би-Си-йы телеуынынады куы ралӕвӕрдтой, уӕд уацхӕссӕг кӕронбӕттӕны загъта: «Ныр бирӕ хуыздӕр ӕмбарын, Иегъовӕйы Ӕвдисӕнтӕ нӕм цӕмӕн ӕрбацӕуынц ӕмӕ нын нӕ дуар цӕмӕн ӕрбахойынц, уый. Ӕз нырмӕ никуы федтон, ӕмӕ иумӕ ӕрӕмбырд уӕвгӕйӕ, уыйбӕрц адӕм (25 мин адӕймаджы) се ’ппӕт дӕр уыдаиккой афтӕ аив конд ӕмӕ афтӕ уӕздан сӕхи дардтаиккой». Ӕддагон адӕймаг Иегъовӕйы Ӕвдисӕнты тыххӕй ахӕм ныхӕстӕ кӕй загъта, уый у диссаджы бӕлвырдгӕнӕн, Хуыцауы ӕвӕрд ӕнӕивгӕ ӕгъдаумӕ гӕсгӕ цӕрын иууыл хуыздӕр кӕй у, уымӕн!

Чи зоны, алкӕй зӕрдӕмӕ нӕ цӕуы, куыд цӕрын ӕй хъӕуы, уый йын исчи амона, фӕлӕ дӕ уӕддӕр мах разӕнгард кӕнӕм, цӕмӕй Библи кӕсай ӕмӕ Хуыцауы ӕвӕрд ӕгъдауимӕ базонгӕ уай. Фӕлӕ Библи уӕлӕнгӕйтты кӕсын фаг нӕу. Архай, апостол Павел куыд загъта, уымӕ гӕсгӕ: «Ацы дугмӕ гӕсгӕ уӕхи ма дарут, фӕлӕ фендӕр ут уӕ зонды сногӕй, цӕмӕй бамбарат, цы у цымӕ хорз, ӕхцон ӕмӕ ӕххӕст Хуыцауон фӕндон» (Ромӕгтӕм 12:2, НФ). Кӕд уӕм ӕввахс искуы Паддзахады зал ис, уӕд ӕм иу бон бацу ӕмӕ дӕхӕдӕг базонгӕ у Иегъовӕйы Ӕвдисӕнтимӕ. Уӕд дӕхи цӕстӕй фендзынӕ, уыдон кӕй сты, Библийы цы зӕрдӕвӕрдтӕ ис, уыдоныл йӕ ныфс чи дары ӕмӕ Хуыцауыл фидарӕй кӕй ӕууӕндынц, уый, йӕ амынд фӕндагыл кӕй цӕуынц, уымӕй чи ӕвдисы, ахӕм хуымӕтӕг адӕм.

Хуыцауы ӕвӕрд ӕнӕивгӕ ӕмӕ ӕууӕнчы аккаг ӕгъдаумӕ гӕсгӕ куы цӕрай, уӕд дын уый ӕнӕмӕнг ӕрхӕсдзӕн стыр арфӕдзинӕдтӕ. Хуыцау дын йӕхӕдӕг лӕгъстӕ кӕны: «Ехх, ӕмӕ мын мӕ амындтӕм куы хъусис! Уӕд дӕ фарн уаид цӕугӕдонау, дӕ рӕстад та — денджызы уылӕнтау» (Исай 48:18).