Сет * дзуры: «Ӕз дӕр ӕмӕ мӕ цардӕмбал дӕр ӕнӕ куыстӕй уыцы иу рӕстӕг баззадыстӕм. Дыууӕ азы дӕргъы цардыстӕм, нӕ хӕстӕджытӕ-иу нын цы авӕрдтой ӕмӕ-иу цыдӕр куыстытӕ кӕй акодтам, уымӕй. Мӕ цардӕмбал Приссиллӕйӕн йӕ ныфс бынтондӕр асаст, ӕз та мӕхимӕ ницыуал кастӕн.

Цы нын баххуыс кодта? Приссиллӕ-иу йӕ зӕрдыл арӕх ӕрлӕууын кодта Матфейы 6:34 стих. Уым фыст ис, цӕмӕй, райсом цы уыдзӕн, ууыл ма катай кӕнӕм, уымӕн ӕмӕ алы бонӕн дӕр ис йӕхи катӕйттӕ. Стӕй-иу Йегъовӕмӕ зӕрдӕбынӕй кӕй куывта, уый йын тыхтӕ лӕвӕрдта. Мӕнӕн та-иу мӕ зӕрдӕ ’рсабыр кодтой Псалом 55:22 стихы ныхӕстӕ. Псаломзарӕггӕнӕгау ӕз дӕр мӕ уаргъ Йегъовӕйыл сӕвӕрдтон, ӕмӕ мын ӕххуыс кодта. Кӕд мын ныр куыст ис, уӕддӕр хуымӕтӕг цард кӕнӕм, уымӕн ӕмӕ архайӕм, Чырысти нӕ Матфейы 6:20–22 стихты цӕмӕй фӕдзӕхсы, уымӕ гӕсгӕ. Ӕппӕты сӕйрагдӕр та уый у, ӕмӕ Хуыцаумӕ дӕр ӕмӕ кӕрӕдзимӕ дӕр баввахсдӕр стӕм».

Джонатан зӕгъы: «Ӕнӕхъӕн бинонтӕй цы гыццыл куыст кодтам, уый куы ныллӕууыд, уӕд тынг фӕтарстӕн, уымӕн ӕмӕ нӕ зыдтон, дарддӕр цӕмӕй цӕрдзыстӕм, уый. 20 азы дӕргъы цы уӕззау фыдӕбон фӕкодтам, уый доны къусы сӕфт фӕци. Ӕхца нын кӕй нӕ фаг кодта, уый тыххӕй-иу мӕ цардӕмбалимӕ фӕбыцӕу стӕм. Суанг ма нӕ карточкӕйӕ исты ӕлхӕнын дӕр нӕ уӕндыдыстӕм, банк нын кредит куы нӕ ратта, зӕгъгӕ.

Фӕлӕ нын Хуыцауы Ныхас ӕмӕ нын йӕ сыгъдӕг тых баххуыс кодтой, цӕмӕй раст уынаффӕтӕ хастаиккам. Цыфӕнды куыстыл дӕр-иу сразы дӕн, ӕмӕ дзӕгъӕл хӕрдзтӕ нӕ кодтам. Не ’мбырды хотӕ ӕмӕ нын ӕфсымӕртӕ дӕр ӕххуыс кодтой. Уыдон нын баххуыс кодтой, цӕмӕй нӕхимӕ ӕгад ма кастаиккам,  ӕмӕ-иу нын тынг зын куы уыд, уӕд-иу нӕм се ’ххуысы къух ӕрбадардтой».

Ракель зӕгъы: «Мӕ цардӕмбал мӕ ӕнӕнхъӕлӕджы куы ныууагъта, уӕд мӕ зӕрдӕ фыррыстӕй ӕмӕ фырмӕстӕй фӕцӕйтыдта. Мӕхимӕ нал цыдтӕн. Фӕлӕ Хуыцаумӕ баввахс дӕн, ӕмӕ мын удӕнцой радта. Алы бон дӕр ӕм куывтон, ӕмӕ мын йӕ фарн мӕ зӕрдӕ хъахъхъӕдта. Хуыцау мын мӕ рыст зӕрдӕ сдзӕбӕх кодта.

Библийы фӕрцы мӕ маст ссыд. Стыр ӕххуыс мын фесты апостол Павелы ныхӕстӕ: „Ма бауадз, ӕмӕ дыл ӕвзӕрдзинад фӕуӕлахиз уа, фӕлӕ ӕвзӕрдзинадыл хорздзинадӕй уӕлахиз кӕн“ (Ромӕгтӕм 12:21).

Мӕ хорз ӕмбал мын баххуыс кодта, цӕмӕй бамбӕрстаин, цард ууыл кӕй нӕ фӕци. Уый мын равдыста Екклесиасты 3:6 стих ӕмӕ мын фӕлмӕнӕй бамбарын кодта, ахӕм рӕстӕг кӕй вӕййы, ӕмӕ, цы фесӕфтай, ууыл къух ауигъын фӕхъӕуы. Кӕд мын уыцы ныхӕстӕ фехъусын ӕхсызгон нӕ уыд, уӕддӕр мӕ уыцы рӕстӕг растдӕр ахӕм уынаффӕ хъуыд. Ныр мӕ хъуыдытӕ сты, тыхтӕ мын цы дӕтты, уыдӕттыл».

Элизабет зӕгъы: «Адӕймаг йӕ цардӕмбалӕй куы ахицӕн вӕййы, уӕд ӕй ӕххуыс тынг фӕхъӕуы. Иу хорз ӕмбал мын уыд. Алы бон дӕр-иу мӕ фарсмӕ уыд, ӕмӕ мын тынг баххуыс кодта. Мемӕ-иу фӕкуыдта ӕмӕ-иу мын мӕ зӕрдӕ ’рсабыр кодта. Йӕ фӕрцы бамбӕрстон, иннӕтӕ мӕм ӕвзӕр зӕрдӕ кӕй нӕ дарынц, фӕлӕ мӕ кӕй уарзынц. Ӕз ӕй фидарӕй зонын, Йегъовӕ мын мӕ зӕрдӕйы хъӕдгӕмттӕ ме ’мбалы ’ххуысӕй кӕй сдзӕбӕх кодта».

Фыццаг статьяйы кӕй кой кодтам, уыцы нӕлгоймаг, Луис, хъӕрзы зӕрдӕйы низӕй ӕмӕ дыууӕ хатты та мӕлгӕ фӕцӕйкодта. Ныр алы бон дӕр хъуамӕ 16 сахаты трубкӕйӕ кислород улӕфа. Луис зӕгъы: «Ӕдзух Йегъовӕмӕ фӕкувын. Куы йӕм скувын, уӕд мӕм хъарутӕ фӕзыны. Хуыцаумӕ кӕй фӕкувын, уый фӕрцы мӕ къухтӕ не ’руадзын, уымӕн ӕмӕ йыл ӕууӕндын ӕмӕ зонын, кӕй мыл тыхсы, уый».

Иу сылгоймаг Петрӕйыл цӕуы 80 азӕй гыццыл фылдӕр. Петрӕ зӕгъы: «Бирӕ цыдӕртӕ мӕ фӕфӕнды саразын, фӕлӕ мӕ бон нӕу. Хъаруйы мур мӕм кӕй нӕй, уый мын тынг зын у. Тынг ӕдых дӕн, ӕмӕ хъуамӕ ӕдзух хостӕ нуазон. Арӕх фӕхъуыды  кӕнын, Чырысти йӕ Фыдмӕ куыд куывта, цӕмӕй, кӕд гӕнӕн уыд, уӕд ӕй цавӕрдӕр зындзинадӕй бахызтаид. Йегъовӕ Йесойӕн хъарутӕ радта ӕмӕ мӕнӕн дӕр ратты. Куывд у мӕ хуыздӕр хос. Хуыцаумӕ куы скувын, уӕд мын дзӕвгар фенцондӕр вӕййы» (Матфейы 26:39).

Хулиан дӕр хуыздӕр уавӕры нӕй. Иу-30 азы размӕ уӕззау низӕй фӕрынчын (рассеянный склероз). Хулиан дзуры: «Хицауы бынатӕй инвалиды коляскӕмӕ ’рхаудтӕн. Фӕлӕ ма цард дзӕгъӕлы нӕу, уымӕн ӕмӕ иннӕтӕн лӕггад кӕнын. Иннӕтӕн куы ’ххуыс кӕнай, уӕд зындзинӕдтӕн быхсын ӕнцондӕр у, ӕмӕ Йегъовӕ дӕр йӕ ныхасӕн хицау у – зын рӕстӕджыты нын хъарутӕ фӕдӕтты. Апостол Павелау махӕн дӕр нӕ бон у зӕгъын: „Алцыдӕр у мӕ бон, хъару мын чи дӕтты, уый фӕрцы“» (Филиппӕгтӕм 4:13).

Антонио зӕгъы: «Мӕ фыды мын машинӕ куы скъуырдта, уӕд мӕ фыццаг уырнгӕ дӕр нӕ кодта. Цы аххосджын уыд? Йӕхицӕн фистӕгӕй фӕцӕйцыд, ӕндӕр цы?! Фӕлӕ ма мӕ бон цы уыд? Фондз боны йӕхимӕ не ’рцыд, ӕмӕ стӕй амард. Мӕ мады раз-иу мӕхи бӕргӕ урӕдтон, фӕлӕ-иу иунӕгӕй куы аззадтӕн, уӕд-иу фӕкуыдтон. „Цӕмӕн? Цӕмӕн?“ – фарстон-иу мӕхи.

Уыцы зын рӕстӕг-иу Йегъовӕмӕ куывтон, цӕмӕй мын мӕхиуыл хӕцынӕн баххуыс кодтаид ӕмӕ мын мӕ зӕрдӕйы фарн ӕрцӕрын кодтаид. Ӕмӕ мын гыццылгай фенцондӕр. Мӕ зӕрдыл ӕрлӕууыд, Библийы афтӕ фыст кӕй ис, зӕгъгӕ, кӕд кӕуыл цы ’рцӕудзӕн, уымӕн ничи ницы зоны. Хуыцауӕн йӕ бон сайын кӕй нӕу, уымӕ гӕсгӕ фидарӕй зонын, мӕ фыд куы райгас уа, уӕд ӕй ногӕй кӕй фендзынӕн» (Екклесиаст 9:11; Иоанны 11:25; Титмӕ 1:2).

Фыццаг статьяйы кӕй кой кодтам, уыцы нӕлгоймаг Роберт дӕр афтӕ хъуыды кӕны. Роберт зӕгъы: «Йегъовӕмӕ-иу кӕй куывтам, уый фӕрцы-иу мӕ цардӕмбалимӕ схайджын стӕм, Филиппӕгтӕм 4:6, 7 стихты цы фарны кой ис, уымӕй. Уымӕ гӕсгӕ нӕ бон уыд, мӕрдтӕ кӕй райгас уыдзысты, уый тыххӕй журналисттӕн дзурын. Цалынмӕ нӕ фырт авиакатастрофӕйы нӕ фӕмард, уӕдмӕ бирӕ хъӕлдзӕг бонтӕ арвыстам, ӕмӕ сӕ ныр ӕхсызгонӕй ’рымысӕм. Фӕархайӕм, цӕмӕй ӕрмӕстдӕр уыцы хорз рӕстӕджытыл хъуыды кӕнӕм.

Ӕмбырды хотӕ ӕмӕ-иу нын ӕфсымӕртӕ дзырдтой, телевизоры нӕ куы ’вдыстой, уӕд нӕ уырнындзинады тыххӕй сабырӕй кӕй дзырдтам. Мах сын-иу бамбарын кодтам, зӕгъгӕ нын уыйбӕрц адӕм куы нӕ куывтаиккой, уӕд нӕхимӕ ахӕм хъарутӕ нӕ разындаид. Хотӕ ӕмӕ нӕм ӕфсымӕртӕ бирӕ ныфсфидаргӕнӕн ныхӕстӕ фӕфыстой, ӕмӕ йӕ зонын, уый тыххӕй бузныг Йегъовӕйӕ кӕй хъуамӕ уӕм».

Ацы статьяты цы адӕмы кой ракодтам, уыдоны хабӕрттӕй бӕрӕг у, Хуыцау удӕнцой кӕй ратты, бӕллӕх кӕуыл ӕрцӕуы кӕнӕ зындзинӕдтӕ чи февзары, уыдонӕн. Ӕмӕ дӕуӕн та? Цыфӕнды зын уавӕры ма бахауай, уӕддӕр дӕ бон у удӕнцой ссарын *. Хорз уаид, Йегъовӕйӕ ӕххуыс куы агурис. Уый у «удӕнцойдӕттӕг Хуыцау» (2 Коринфӕгтӕм 1:3).