Mualɛ Ɛkpondɛlɛ

“Asɛɛ menli kɔsɔɔti lɛ sonla holɛ ko mɔɔ [Gyisɛse] de la anwo adwenle. Ɔnva nwo ninyɛne mɔɔ yɛdie yɛdi anzɛɛ yɛnlie yɛnli la, ɔyɛ a yɛ kɔsɔɔti yɛbiza kɛ, ‘Nwane a le sonla ɛhye?’”—KƐLƐVOLƐ STAN GUTHRIE.

MENLI kpondɛ kɛ bɛnwu Gyisɛse anwo edwɛkɛ. Bɛtɔ mbuluku mɔɔ Gyisɛse anwo edwɛkɛ wɔ nu la kpalɛ. Gyisɛse anwo sini mɔɔ bɛyɛ la ɛlie duma wɔ ewiade amuala. Noko menli lɛ kpuyia dɔɔnwo wɔ Gyisɛse anwo. Menli lɛ adwenle ngakyile wɔ sonla holɛ ko mɔɔ ɛnee Gyisɛse de la anwo.

Kenlensa ye ala, adwelie kɛlɛvoma nwiɔ vɛlɛle menli kɛ bɛhile bɛ adwenle wɔ edwɛkɛ mɔɔ bɛvale bɛdole gua kɛ “Ɛnee Gyisɛse a le nwane?” la anwo. Bɛ mualɛ ne bie a doɔdoa zo la:

● “Ɔda ali kɛ ɛnee ɔle rabbi (kilehilevolɛ) mɔɔ vale ye ngoane yɛle anwunvɔnezelɛ nwo neazo.”

● “Ɛnee ɔle sonla kɛ yɛdayɛ ala la noko ɛnee ye ɛbɛlabɔlɛ le ngakyile kolaa.”

● “Daselɛ biala ɛngile kɛ Gyisɛse dɛnlanle aze.”

● “Gyisɛse le Nyamenle Ara mɔɔ bɛwole ye, ɔwule, na bɛdwazole ye bɛvile mɔwuamra anu bɛmanle ɔraliele yɛ ɔvile ɛtane nu. Ɔde aze kɛkala, na Ɔbara azɛlɛ ye azo bieko.”

● “Medie medi kɛ Gyisɛse Kelaese le Nyamenle ara kokye, ɔle sonla na eza ɔle nyamenle.”

● “Ngakula a die Gyisɛse anwo edwɛkɛ zɛhae mɔ di a.”

Ɔda ali kɛ adwenle ngakyile zɛhae kɔsɔɔti ɛnrɛhola ɛnrɛyɛ nɔhalɛ. Debie wɔ ɛkɛ mɔɔ yɛbahola yɛava yɛ nwo yɛado zo mɔɔ ɔbamaa yɛanyia kpuyia mɔɔ fane Gyisɛse anwo la anwo mualɛ mɔɔ di munli ɔ? Menli mɔɔ yɛ buluku ɛhye la die di kɛ Baebolo ne le Nyamenle Edwɛkɛ yɛɛ ɔ ngomekye a ɔka nɔhalɛ mɔɔ fane Gyisɛse anwo la kɔsɔɔti ɔkile yɛ a. *—2 Temɔte 3:16.

Yɛbazuzu mualɛ mɔɔ Baebolo ne fa maa wɔ kpuyia bie mɔ mɔɔ fane Gyisɛse anwo la anwo wɔ edwɛkɛ mɔɔ doa zo la anu. Ɔdaye mumua ne ɔhanle kɛ “awie biala mɔɔ kɛlie ye kɛli la” banyia ngoane mɔɔ ɛnlɛ awieleɛ. (Dwɔn 3:16) Yɛsɛlɛ wɔ kɛ neɛnlea mualɛ ne mɔ anu na si Gyisɛse anwo ninyɛne dɔɔnwo mɔɔ ɔhyia kɛ ɛsukoa nee kɛ ɔkɛyɛ na wɔanyia diedi wɔ ye nu la anwo kpɔkɛ.

[Ɔ bo ɛkɛ ne edwɛkɛ]