Kpuya Mɔɔ Vi Kengavolɛma Ɛkɛ
Kpuya Mɔɔ Vi Kengavolɛma Ɛkɛ
Kɛmɔ Baebolo ne anu mɛla mɔɔ fale mogya nwo la anu la ɛkɛ wienyi la ati, kɛzi Gyihova Alasevolɛ bu awie mogya mɔɔ bɛfa bɛyɛ ye ayile la ɛ?
Ɔwɔ kɛ Kilisienenli ko biala si ɛhye anwo kpɔkɛ, ɔnle kɛ ɔgyinla mɔɔ ɔkulo anzɛɛ dɔketama kɛha la azo. Emomu ɔwɔ kɛ ɔsuzu mɔɔ Baebolo ne ka la anwo kpalɛ. Ɔle ɔdaye nee Gyihova avinli edwɛkɛ.
Gyihova mɔɔ bɔle yɛ la, ɛha kɛ yɛmmadi mogya. (Gyɛnɛsese 9:3, 4) Wɔ Mɛla mɔɔ Nyamenle vale maanle Yizilayɛma la anu, ɔhilele mɔɔ ɔwɔ kɛ bɛfa mogya bɛyɛ la ɔluakɛ mogya gyi ɛkɛ maa ngoane. Nyamenle hanle kɛ: “Abɔdeɛ biala ngoane wɔ mogya ne anu, yɛɛ meva memaa bɛ kɛ bɛva bɛli bɛ ti mgbɔdalɛ wɔ afɔlemokyea ne azo.” Na saa awie kulo kɛ ɔku nane ɔdi ɛ? Nyamenle hanle kɛ: “Ɔwɔ kɛ ɔwola ye mogya ne ɔgua aze na ɔfa ndɛtɛlɛ ɔkeda zo.” * (Lɛvitikɔso 17:11, 13) Gyihova zile mɛla ɛhye azo fane dɔɔnwo. (Ditilɔnomi 12:16, 24; 15:23) Dwuuma Soncino Chumash ne ka kɛ: “Ɔnle kɛ bɛfa mogya bɛsie ɛkɛ, emomu ɔwɔ kɛ bɛwola bɛgua aze bɛfa bɛkile kɛ ɔnle kɛ bɛdi.” Ɛnee ɔnle kɛ Yizilayɛnli biala twe abɔdeɛ biala mogya, ɔfa ɔsie, na ɔdi ɔluakɛ abɔdeɛ ne ngoane le Nyamenle ɛdeɛ.
Bɛgyakyile Mosisi Mɛla ne azo ɛlilɛ wɔ mekɛ mɔɔ Mɛzaya ne wule la. Noko kɛzi Nyamenle bu mogya kɛ ɔle nwuanzanwuanza la ɛtɛkakyile. Nyamenle sunsum nwuanzanwuanza ne maanle ɛzoanvolɛma ne hanle hilele Kilisienema kɛ ‘bɛhwe bɛ nwo bɛvi mogya nwo.’ Ɛnee ɔnle kɛ bɛfa mɛla zɔhane bɛdi nwɔhoa. Ɛnee mɛla ɛhye anwo hyia kɛ mɔɔ mɛla mɔɔ se bɛhwe bɛ nwo bɛvi adwɔmane ɛbɛla nee awozonle ɛzonlenlɛ nwo hyia ala la. (Gyima ne 15:28, 29; 21:25) Mekɛ mɔɔ mogya mɔɔ bɛtwe bɛsie ɛkɛ nee mogya mɔɔ bɛfa bɛyɛ ayile bule zo wɔ Ewiade Konle II anzi la, Gyihova Alasevolɛ nwunle kɛ Nyamenle Edwɛkɛ ne ɛnlie debie zɛhae mɔɔ bɛyɛ la ɛndo nu. *
Ɔdwu mekɛ ne bie a, dɔketa bie baha ahile wuliravolɛ bie kɛ ɔmaa bɛhwe ye mogya bɛzie ɛkɛ wɔ dapɛne bie mɔ anu kolaa na bɛayɛ ye apelehyɛne (preoperative autologous blood donation, anzɛɛ PAD) amaa saa nwolɛ hyia a yeava wuliravolɛ mumua ne mogya ne yeayɛ ye ayile. Noko, mogya zɛhae mɔɔ bɛtwe, bɛfa bɛsie na bɛfa bɛyɛ ayile la nee edwɛkɛ mɔɔ Lɛvitikɔso nee Ditilɔnomi ka la ɛnle ko. Ɔnle kɛ bɛfa mogya bɛsie ɛkɛ; ɔwɔ kɛ bɛwola bɛgua—bɛsia bɛfa bɛmaa Nyamenle mɔɔ ɔle ye ɛdeɛ la. Nɔhalɛ nu, kɛkala yɛnli Mosisi Mɛla ne azo. Noko akee, Gyihova Alasevolɛ di Nyamenle ngyinlazo mɔɔ wɔ nu la azo yɛɛ yɛbɔ kpɔkɛ kɛ ‘yɛbahwe yɛ nwo yɛavi mogya nwo.’ Ɔti, yɛmmaa bɛndwe yɛ mogya yɛɛ yɛmmaa bɛnva yɛ mogya mɔɔ ɔwɔ kɛ ‘bɛwola bɛgua’ la bɛnzie ɛkɛ kɛ bɛfa bɛayɛ ayile. Debie zɛhae mɔɔ bɛyɛ la tia Nyamenle mɛla.
Ndenle bie mɔ mɔɔ bɛdua zo bɛfa awie mogya bɛyɛ ayile anzɛɛ neɛnleanu bie mɔ mɔɔ bɛyɛ ye wɔ awie mogya nu la ɛntia Nyamenle ngyinlazo ne mɔ bie fɔɔnwo. Kɛ neazo la, Kilisienema dɔɔnwo maa bɛtwe bɛ mogya na bɛneɛnlea nu na bɛwie a bɛagua ye lɔ. Noko ayileyɛlɛ bie mɔ wɔ ɛkɛ mɔɔ ɔwɔ kɛ yɛsi nwolɛ kpɔkɛ a.
Kɛ neazo la, ayileyɛlɛ bie wɔ ɛkɛ mɔɔ bɛfɛlɛ ye hemodilution. Saa bɛlɛyɛ apelehyɛne ne a, bɛmaa ahenle mogya ne bie fi ye nu kɔ milahyinli bie anu. Bɛfa ayile bɛfonla wuliravolɛ ne mogya ne mɔɔ ɛha la anu. Nzinlii, bɛsia bɛfa mogya ne mɔɔ wɔ milahyinli ne anu la bɛmaa wuliravolɛ ne. Bɛfɛlɛ bieko cell salvage. Saa bɛlɛyɛ apelehyɛne ne a, bɛmaa mogya mɔɔ ɛlɛtu awie la kɔgua milahyinli nu, bɛwowo nu na bɛsia bɛfa bɛmaa wuliravolɛ ne. Wɔ apelehyɛne gyɛne nu, bɛmaa wuliravolɛ ne mogya ne kɔ milahyinli mɔɔ yɛ gyima kɛ yɛ ahonle, yɛ ɛvovoa anzɛɛ yɛ kilenzia ne la anu. Akee bɛmaa mogya ne mɔɔ wɔ milahyinli ne anu la sia kɔ wuliravolɛ ne nu. Wɔ ayileyɛlɛ bie anu bɛmaa mogya ne kɔ milahyinli bie mɔɔ bɛfɛlɛ ye centrifuge la anu. Milahyinli ne kyɛ mogya ne anu yɛ ye afoa ngakyile amaa bɛaye foa ne mɔ mɔɔ ɛzɛkye la bɛavi nu. Anzɛɛ bɛkyɛ mogya ne anu bɛyɛ ye afoa ngakyile amaa bɛava nuhua bie mɔ bɛayɛ wuliravolɛ ne ɛleka bie mɔ ayile. Eza bɛtwe mogya ne bie amaa bɛava ayile bɛafonla ye na bɛazia bɛava bɛamaa wuliravolɛ ne.
Ayileyɛlɛ ngakyile dɔɔnwo wɔ ɛkɛ yɛɛ ndenle mɔɔ bɛdua zo bɛyɛ apelehyɛne, ayile nee neɛnleanu wɔ mogya nu la fofolɛ bara. Ɔnle yɛ gyima kɛ yɛbahile awie mɔ mɔɔ ɔwɔ kɛ bɛyɛ wɔ ko biala anwo a. Ɔwɔ kɛ Kilisienenli biala si ɔ ti anwo kpɔkɛ wɔ kɛzi ɔwɔ kɛ bɛfa ye mogya bɛdi gyima wɔ mekɛ mɔɔ bɛlɛyɛ ye apelehyɛne, bɛlɛneɛnlea ye mogya nu anzɛɛ wɔ ayileyɛlɛ bie mɔɔ bɛgua zo bɛlɛyɛ ye la anwo. Kolaa na bɛayɛ Kilisienenli bie apelehyɛne la, ɔwɔ kɛ ɔbiza dɔketa ne na ɔnwu adenle mɔɔ ɔbalua zo yeava ye mogya ne yeali gyima wɔ ayileyɛlɛ ne anu la. Akee ɔwɔ kɛ ɔnea saa ɔngyegye ye adwenle a na ɔsi nwolɛ kpɔkɛ. (Nea ɛlɛka.)
Ɔwɔ kɛ Kilisienema kakye kɛ bɛyila bɛ nwo zo bɛmaa Nyamenle na bɛbɔ ye ɛwɔkɛ kɛ ‘bɛbava bɛ ahonle muala nee bɛ ɛkɛla muala nee bɛ anwosesebɛ muala nee bɛ adwenle muala bɛahulo ye.’ (Luku 10:27) Gyihova Alasevolɛ ɛnle kɛ menli dɔɔnwo mɔɔ wɔ ewiade ye la, bɛmɛ agɔnwolɛvalɛ mɔɔ bɛ nee Nyamenle lɛ la anwo hyia bɛ kpalɛ. Ngoane Maavolɛ ne ɛha ɛhile yɛ muala kɛ yɛnyia diedi wɔ Gyisɛse mogya ne mɔɔ ɔvale ɔbɔle afɔle la anu. Baebolo ne ka kɛ: “Kɛmɔ bɛlua ye [Gyisɛse Kelaese] mogya ne azo bɛkpɔne yɛ la ati, bɛlie yɛ, ɛhɛe, bɛva yɛ ɛtane bɛhyɛ yɛ.”—Ɛfɛsɛsema 1:7.
[Ɔbodwɛkɛ ne mɔ]
^ ɛden. 4 Nwomanli Frank H. Gorman hɛlɛle kɛ: “Saa awie wola mogya ne gua a, ɔkile kɛ ɔbu nane ne ngoane yɛɛ eza ɔkile kɛ ɔyɛ tieyɛ na ɔbu Nyamenle mɔɔ bɔle nane ne na ɔkɔ zo ɔnea ye la.”
^ ɛden. 5 Ɛzinzalɛ Arane mɔɔ rale July 1, 1951 la buale edwɛkɛ ɛhye anwo kpuya bie mɔ, na ɔhilele deɛmɔti mogya mɔɔ bɛfa bɛyɛ ayile ɛnle kpalɛ la.
[Ɛlɛka/Nvoninli]
KPUYA BIE MƆ MƆƆ ƆWƆ KƐ ƐBIZA Ɛ NWO
Saa bɛbahwe me mogya ne bie bɛavi me nu wɔ mekɛ bie anu mɔɔ ɔnrɛnyia adenle ɔnrɛze a, asoo me adwenle bamaa meabu mogya ɛhye kɛ ɔtɛde me mogya, mɔɔ ɔti ɔnle kɛ ‘bɛwola bɛgua aze’ ɔ?
Saa bɛlɛyɛ me ayile na me mogya ne bie bavi me nu, bɛbawowo nu na eza bɛazia bɛava bɛawula me sonlabaka ne anu a, asoo ɔbagyegye me adwenle ne mɔɔ meva Baebolo ne metete ye la?