Ngaaha. Baibuli neeyoreka butunu ngu Ruhanga akahanga abantu, enyamaishwa n’ebimera buri kimwe omu muringo gwakyo. a (Okutandika 1:12, 21, 25, 27; Okushuuruurwa 4:11) Nihagira ngu abantu boona bakakomooka ahari Adamu na Haawa, abazaire baitu ab’okubanza. (Okutandika 3:20; 4:1) Baibuli terikushagika enyegyesa erikugira ngu Ruhanga akakora ebintu birikubaasa kurugamu ebindi by’emiringo etarikushushana. Amazima agari ngu, Baibuli terikuhakanisa okucondooza kw’abanyasaayansi, ngu ebihangirwe eby’omuringo gumwe nibibaasa kugira ebika bitarikushushana. b

•  Ruhanga shi akakora ebintu birikubaasa kurugamu ebirikutaana nabyo?

•  Enyegyesa y’ebintu kurugamu ebirikutaana nabyo neikirizana na Baibuli shi?

•  Kandi shi okubaasa kw’ebimera n’enyamaishwa kumanyiira embeera nsya?

 Ekigambo “okurugamu ebirikutaana” kiine amakuru maingi. Kurugiirira aha kitabo Encyclopædia Britannica, nikireetera abantu kuteekateeka ngu Ruhanga naakoresa amaani g’obuhangwa kureetera ebintu kurugamu ebindi ebirikutaana nabyo.”

 Enyegyesa egyo neebaasa n’okutwariramu enyetegyereza eziri ahaifo:

•   Obukooko bukye bwona bukakomooka omu bintu ebyahaireho kare munonga.

•   Omuringo gumwe gw’ekintu nigubaasa kurugamu ekintu eky’omutaano, eki barikukira kweta okuhindahinduka kw’ebintu.

•   Ruhanga niwe aine obushoboorozi by’okureetera ebi byona kubaho.

 Okugira ngu ebintu nibirugamu ebirikutaana nabyo nikyoreka ngu okuhangwa kw’ebintu okuri omu Baibuli omu kitabo ky’Okutandika tikuhikire. Kwonka, Yesu akajuriza ebiri omu Okutandika nk’ebirikwesigwa. (Okutandika 1:26, 27; 2:18-24; Matayo 19:4-6) Baibuli neegira ngu Yesu atakaizire omu nsi, akaba naatuura omu iguru na Ruhanga kandi akeejumba omu kuhwera Ruhanga kuhanga “ebintu byona” ebiriho. (Yohaana 1:3) N’ahabw’ekyo, enyegyesa erikugira ngu Ruhanga akakora ebintu birikubaasa kurugamu ebindi by’emiringo y’omutaano tekirikuhikaana n’eki Baibuli erikwegyesa.

 Baibuli terikushoboorora empinduka zoona ezirikubaasa kubaho omu muringo gumwe ogw’ekihangirwe. Kandi terikuhakaanisa obuhame oburikworeka ngu enyamaishwa n’ebimera ebyatairweho Ruhanga nibibaasa kuhinduka omu mbeera nsya z’omwanya. N’obu abamwe baraabe nibagira ngu empinduka ezi ziine akakwate n’enyegyesa y’okubaho ky’ebintu birikuruga omu bindi, kwonka tihariho kihangirwe eky’omuringo musya ekirikubaho.