Mikaeli ou abanyadiini baingi barikukira kweta “Mikaeli Orikwera,” n’eiziina rya Yesu atakaizire omu nsi na yaaheza kwija. a Mikaeli akarwanisa Sitaane bwanyima y’okufa kwa Musa, kandi akahwera na maraika kutwarira nabi Danieli obutumwa kuruga ahari Ruhanga. (Danieli 10:13, 21; Yuda 9) Mikaeli naakora ebirikuhikaana n’amakuru g’eiziina rye, ngu “N’oha Ori nka Ruhanga?” arikujuririra obutegyeki bwe, akarwanisa n’abazigu be.—Danieli 12:1; Okushuuruurwa 12:7.

 Yetegyereze ahabw’enki n’eky’oburyo kugira ngu Yesu niwe Mikaeli maraika omukuru.

•   Mikaeli niwe “maraika omukuru.” (Yuda 9) Ekitiinisa “maraika omukuru,” ekirikumanyisa “mukuru wa baamaraika,” kiri omu mishororongo ebiri ya Baibuli yonka. Hombi ahu kiri, naagambwaho nk’omwe ekirikworeka ngu ni maraika omwe wenka oine eiziina eryo. Gumwe aha mishororongo egyo nigugira ngu Yesu naija kwimuka “ashuume naaruga omu iguru agambe munonga n’eiraka rya maraika omukuru.” (1 Abatesalonika 4:16) Yesu aine ‘eiraka rya maraika omukuru’ ahabw’okugira ngu niwe Mikaeli mukuru wa baamaraika.

•   Mikaeli naaduumira eihe rya baamaraika. ‘Mikaeli na baamaraika be bakarwanisa ekijoka,’ Sitaane. (Okushuuruurwa 12:7) Mikaeli aine obushoboorozi bwingi omu iguru, ahakuba naayetwa “omwe ahari baamaraika abakuru” kandi “omukuru rugambwa.” (Danieli 10:13, 21; 12:1) Ebitiinisa ebi nibyoreka ngu Mikaeli “n’omuduumizi w’eihe rya baamaraika,” nk’oku omucondooza aha Ndagaano Ensya David E. Aune arikugira.

   Baibuli neegamba erindi eiziina ery’ogwo oine obushoboorozi aha ihe rya baamaraika. Neegamba ahari “Mukama waitu Yesu [ngu naija kushuuruurwa] naaruga omu iguru na baamaraika be ab’amaani, ari omu muriro ogurikwaka, okuhoora enzigu.” (2 Abatesalonika 1:7, 8; Matayo 16:27) Yesu akaza omu iguru kandi “naategyeka baamaraika n’abategyeki n’ab’obushoboorozi.” (1 Petero 3:21, 22) Kikaabaire kitarikukora makuru Ruhanga kutaho Yesu na Mikaeli kuhayahayana omu kuduumira baamaraika. Kureka, kihikire kugira ngu amaziina gombi, Yesu na Mikaeli n’ag’omuntu omwe.

•   Mikaeli ‘naija kwimuka’ omu ‘bunaku bw’obusaasi obutakabahoga.’ (Danieli 12:1) Omu kitabo kya Danieli, ebigambo ‘naija kwimuka’ nibikira kukoresibwa kumanyisa omugabe orikwimuka kukora ekintu ky’omutaano. (Danieli 11:2-4, 21) Yesu Kristo, orikumanywa nka “Kigambo kya Ruhanga,” naija kukora ekintu ky’omutaano ‘nk’Omugabe w’abagabe’ kucwekyereza abazigu ba Ruhanga boona n’okurinda abantu be. (Okushuuruurwa 19:11-16) Eki naija kukikora omu bwire ‘bw’okubonabona kwingi okutakabahoga okwiha aha kuhangwa kw’ensi.’—Matayo24:21, 42.