6. Okubuurira omu Nsi Yoona
6. Okubuurira omu Nsi Yoona
‘Amakuru marungi g’Obukama nigaija kubuurirwa omu nsi yoona okuba eky’okuhamya aha mahanga goona.’—MATAYO 24:14.
● Vaiatea naatuura aha kirwa kya Pacific omuri Tuamotu Archipelago. N’obu Tuamotu erimu ebirwa bikye nka 80 aha mwanya ogurikurenga mahiro 310,000 nari (kiro mita 802,900), neetuurwaho abantu abarikuhika nka16,000. Kwonka, Abajurizi ba Yehova babaasize kuhika omuri Vaiatea n’emyanya egihereire. Ahabw’enki? N’ahabw’okugira ngu Abajurizi ba Yehova nibakunda kubuurira abantu boona amakuru marungi agarikukwata aha Bukama bwa Ruhanga hoona ahu barikutuura.
OBUHAME NIBWOREKA KI? Obutumwa bw’Obukama buriyo nibuhika omu bicweka by’ensi byona. Omwaka 2010 gwonka, Abajurizi ba Yehova bakamara eshaaha akahumbi 1.6 barikubuurira amakuru marungi omu mahanga 236. Ekirikumanyisa ngu buri Mujurizi wa Yehova akamara edakiika 30 buri izooba arikubuurira. Emyaka mikye ehingwire, babaasize kushohoza ebitabo ebirikushoboorora Baibuli ebirikurenga obuhumbi 20 kandi baabiha abantu.
ABANTU BAINGI NIBAKIRA KUGAMBA KI? Obutumwa bwa Baibuli butwire nibubuurirwa kumara enkumi z’emyaka.
EKI BARIKUGAMBA SHI KIHIKIRE? N’amazima, baingi babuuriire obutumwa bwa Baibuli. Kwonka, bakikozire kumara obwire bukye kandi omu myanya mikye. Okutaana n’ekyo, Abajurizi ba Yehova nibakora omurimo gwabo gw’okubuurira omu nsi yoona gutebeekanisiibwe gye, kandi niguhika aha bukaikuru bw’abantu. Abajurizi ba Yehova batwire nibahiiganisibwa munonga ab’obushoboorozi n’ebibiina ebitaine saasi omu murimo gwabo gw’okubuurira. * (Mako 13:13) Kwonka, Abajurizi ba Yehova tibarikushashurwa ahabw’okukora omurimo ogu. Kureka, nibakoresa obwire bwabo beekundiire, kandi n’ebitabo byabo nibabiheera abantu busya. Omurimo gwabo nigushagikwa abarikuhayo beekundiire.
NOOTEEKATEEKA KI? Mbwenu shi ‘amakuru marungi g’Obukama’ nigabuurirwa omu nsi yoona? Tugire ngu okuhikiirira kw’obunabi obu nikimanyisa ngu hari haihi kubaho embeera nungi?
[Obugambo obw’Ahansi]
^ kacw. 6 Kumanya ebirikukiraho, reeba vidiyo ishatu “Faithful Under Trials,” “Purple Triangles,” na “Jehovah’s Witnesses Stand Firm Against Nazi Assault,” ezirikujanjaazibwa Abajurizi ba Yehova.
[Ebigambo ebitoorainwe]
“Yehova yaaba akireekireho embeera ezi, nitwija kugumizamu nitubuurira amakuru marungi g’Obukama n’omujinya, turikukoresa buri mugisha kuhika abantu.”—2010 YEARBOOK OF JEHOVAH’S WITNESSES.