Edeni Ekaba Eri Eka Y’abantu Ab’okubanza?

TEERA akashushani ori omu musiri. Hatariyo ebirikuhuzya, n’endembo z’abantu ezirimu abantu baingi ezirimu akajagararo. Omusiri ogu ni muhango munonga, kandi tihaine ekirikubaasa kuteganisa obusingye bwawe. Kandi torikwerarikirira, omubiri gwawe tigurikubaasa kurwara, nk’efumbi, nari obusaasi. Ebikwetooroire byona tibirikutiinisa.

Nikikushemeza kureeba ebimuri birungi, amaizi marungi, ebimera birungi, n’ebibunda by’emiti. Noohurira akabeho aha mubiri kandi nookaga akahooho karungi. Noohurira amababi nigakubana, amaizi nigahimintika aha nkiri, ebinyonyi nibyeshongora n’okujunjuta kw’obukooko bwaba nibukora. Ku orikuteera akashushani, torikugira ekihika ky’okuba omu mwanya nk’ogwo?

Abantu baingi omu nsi yoona nibaikiriza ngu tukaba nitutuura omu mbeera nk’ezo. Kumara ebyasha bingi, ab’ediini y’Ekiyudaaya, Abaakristendomu, n’Abasiraamu batwire nibeegyesibwa aha musiri Edeni ogu Ruhanga yaatairemu Adamu na Haawa kutuuramu. Baibuli neegira ngu bakaba baine okushemererwa n’obusingye. Bakaba baine obumwe aha gati yaabo, enyamaishwa na Ruhanga owaabahaire amatsiko g’okutuuraho ebiro byona omu mwanya ogwo murungi.—Okutandika 2:15-24.

Abahindi nabo haine eki barikumanya aha paradiso eya ira. Ab’ediini ya Buddha nibaikiriza ngu abeebembezi baabo, nibazoora batuura omu mwanya ogwo oguri nka paradiso. Kandi ediini nyingi z’Africa nizeegyesa enshonga eziine akakwate n’okubaho kw’Adamu na Haawa.

Nangwa, ebirikukwata aha paradiso ey’okubanza nibimanywa munonga amadiini. Omuhandiiki omwe akagira ati: “Abantu baingi nibaikiriza ngu hakaba hariho paradiso eyaabaire erimu abantu bahikiriire, abaine obugabe, obusingye, okushemererwa, etarimu ebirikutiinisa nari obutabanguko. . . . Eki kikabareetaire kuteekateeka aha paradiso ei bafeereirwe kwonka n’okugira ekihika ky’okugigaruraho.”

Tugire ngu shi ebitebyo ebi byona n’emigyenzo biine obukomooko burikushushana? Nikibaasika abantu kuteekateeka kandi bakaijuka kyenyini ekyabaireho? Mbwenu shi buzima omusiri Edeni gukaba guriho nari Adamu na Haawa bakabaho?

Abahakanisa ekyo tibarikukiikiriza. Omu bwire obu obw’entunguuka ya saayansi, baingi nibateekateeka ngu ebi n’ebitebyo butebyo. Ekirikutangaaza, n’abeebembezi b’ediini baingi, nibagira ngu omusiri Edeni tigurabaireho. Nibagira ngu hakaba hatariho omwanya nk’ogwo. Nibagira ngu paradiso n’omwanya gw’akamanyiso, nari n’ekitebyo butebyo.

Amazima gari ngu, Baibuli erimu enfumu. Yesu akagamba enfumu zimwe ezirikumanywa gye. Kwonka, Baibuli yaaba neegamba aha musiri Edeni, terikugugambaho nk’ekitebyo, kureka nk’ekyafaayo, omuringo ogworobi kwetegyereza. Mbwenu shi, ebirikugambwaho ku biraabe bitarabaireho, nitubaasa kwesiga ebindi ebiri omu Baibuli? Ka tureebe ahabw’enki abamwe batarikwikiriza ngu omusiri Edeni gukabaho kandi tureebe yaaba enshonga zaabo zihikire. Kandi nituza kureeba ahabw’enki buri omwe aine kumanya enshonga egi.