Buri mwaka, nituba twiniire ekihika eby’okurya by’omwoyo ebi turikutunga aha ruteerane oruhango. Ahabw’okwenda ngu n’abandi babaase kureeba oburungi bwa Yehova, nitwija kweta abantu baingi nk’oku kirabaasike kwija kuba naitwe aha ruteerane oru. (Zab 34:8) Buri kakiiko k’abareeberezi nikaija kucwamu oku obupapura bw’okweta abantu kwija aha ruteerane oru buraagabwe gye.

• Oruteerane orwaitu oruhango nirwija kubaho ryari?

• Kampeyini y’okweta abantu b’omu kicweka kyaitu kwija aha ruteerane oru neetandika ryari?

• Enteerane z’okwetebeekanisa kuza kubuurira ez’ekibiina kyaitu niziija kubaho ryari?

• Nyine bigyendererwa ki omu kampeyini egi?

• Ntebeekaniise kweta baahi?

Bwanyima y’okuramutsya omuntu, noobaasa kugira oti:

“Turiyo nitwejumba omu kampeyini y’okugaba akapapura k’okweta abantu kwija aha ruteerane oruhango eriyo neegyenda omu maisho omu nsi yoona. Eshaaha, omwanya n’endagiriro byorekirwe aha kapapura aka. Nitwija kushemererwa kuba naiwe aha ruteerane oru”

N’obu turaabe nitwenda kweta abantu baingi kwija aha ruteerane oru, tushemereire kuteeraho kubareetera kwenda kumanya ebirikukiraho.

Aha wiikenda, noobaasa kugaba magaziini n’akapapura k’okweta abantu kwija aha ruteerane oruhango.