Obu entumwa Yohaana yaabaire ari omu kihome aha kirwa kya Patumo, Yesu akamuha okworekwa kw’emiringo 16, okwabaire nikukwata aha biro by’omumaisho. Okworekwa okwo kwona kukoreka oku eiziina rya Ruhanga, Yehova rirayezibwe, oku Obukama bwe buraije, n’oku ebi arikukunda biraakorwe omu nsi nk’oku birikukorwa omu iguru.

Omu kworekwa kumwe, Yohaana akareeba Yehova ari aha kitebe kye eky’ekitiinisa omu iguru, kyehinguririziibwe abakuru 24 bajwaire ebijwaro birikwera kandi aha mitwe yaabo bajwaire ebirunga by’ezaabu. Kandi omuri ekyo kitebe hakarugamu emirabyo n’okuhinda kw’enkuba. Abakuru 24 bakainama omu maisho ga Yehova baamuramya. Omu kworekwa okundi, Yohaana akareeba abantu baingi kuruga omu mahanga goona, n’enganda zoona, n’endimi abaabaire nibaramya Yehova. Omwana gw’entaama, Yesu, naabeebembera kubahitsya aha maizi g’amagara. Bwanyima omu kworekwa okundi, Yesu akatandika kutegyeka nk’Omugabe omu iguru, hamwe n’abakuru 24. Omu kworekwa okwakuratsireho, Yohaana akareeba Yesu naarwanisa ekijoka ekihango, ekirikwetwa  Sitaane na baadaimoni bakyo. Yesu akababinga omu iguru yaabanaga ahansi.

Bwanyima Yohaana akareeba ekishushani ky’omwana gw’entaama kandi 144,000 beemereire aha Rushozi Saayuuni. Akagaruka yaareeba maraika naagyendera ahaiguru omu mwanya, arikugambira abantu omu nsi yoona ngu batiine Ruhanga kandi bamuhe ekitiinisa.

Omu kworekwa okwakuratsireho, hakabaho orugamba Haramagedoni. Omu rugamba orwo, Yesu n’eihe rye bakasingura ensi ya Sitaane. Omu kworekwa okw’ahamuheru, Yohaana akareeba obumwe omu iguru n’omu nsi. Sitaane n’oruzaaro rwe boona bakacwekyerera. Buri omwe omu iguru n’omu nsi akaba naatwara eiziina rya Ruhanga, Yehova nk’eririkwera kandi arikumuramya.