Mohlala​—Baheberu ba Bararo

Hanania, Mishaele le Asaria ba eme molaleng wa Dura kgauswi le Babilona. Batho ka moka bao ba ba dikologilego ba khuname pele ga seswantšho se segolo. Go sa šetšwe kgateletšo ya dithaka le ditšhošetšo tša kgoši, banna ba ba ema ba tiile. Ka tlhompho eupša ba tiile ba botša Nebukadinetsara gore ba ka se fetoše phetho ya bona ya go hlankela Jehofa.—Daniele 1:6; 3:17, 18.

Banna ba e be e le bafsa ge ba be ba išwa bothopša Babilona. Go botega ga bona ge e be e sa le ba banyenyane ka go gana go ja dijo tšeo di ka bago di be di ileditšwe ke Molao wa Modimo, go ba lokišeleditše go lebeletšana le diteko tšeo di bego di tla tšwelela ka morago bophelong. (Daniele 1:6-20) Ba be ba tseba go tšwa phihlelong gore go kwa Jehofa ke tsela e bohlale. Na le wena o ikemišeditše go kgomarela ditekanyetšo tša Modimo go sa šetšwe kgateletšo ya dithaka tša gago? Ge e ba gona bjale ge o sa le yo monyenyane o ithuta go kwa Jehofa dilong tšeo di ka bonagalago e le tše dinyenyane, o tla ba o itokišeleditše gakaone go dula o botega ge o lebeletšana le diteko tše dikgolo tšeo di ka tšwelelago ka morago bophelong.—Diema 3:5, 6; Luka 16:10.