Go Babadi Ba Rena

RE THABELA go le tsebiša gore go thoma ka tokollo ye, go tla ba le diphetogo tše itšego tseleng yeo Morokami o rulaganywago ka yona. Pele re hlalosa dilo tšeo di tlago go fetoga, anke re le botše gore ke dife tšeo di ka se kego tša fetoga.

Leina la makasine wo, Morokami O Tsebatša Mmušo wa Modimo, ga se la fetošwa. Ka gona, Morokami o tla tšwela pele go godiša Jehofa e le Modimo wa therešo le go homotša babadi ba wona ka ditaba tše dibotse tša Mmušo wa gagwe. Dihlogo tše di lego go matlakala 5 go ya go 9 a tokollo ye di ahla-ahla seo Mmušo woo e lego sona le gore o tla tla neng. Go tlaleletša moo, Morokami o tla tšwela pele o kgothaletša tumelo go Jesu Kriste, o emela therešo ya Beibele le go hlalosa seo se bolelwago ke ditiragalo tša lefase ge di bapetšwa le boporofeta bja Beibele go etša ge o be o dira bjalo ka nywaga-some e mentši.

Ka gona, ke’ng seo se tlago go fetoga? Anke re hlalose tše dingwe tša dihlogo tše di kgahlišago tšeo di tlago go tšwelela ka kgatišong yeo e nago le letšatši-kgwedi la pele kgweding e nngwe le e nngwe. *

Dihlogo tše mmalwa tše di šišinyago kgopolo di tla tšwelela kgwedi e nngwe le e nngwe. Sehlogo se se rego, “Na o be o Tseba?” se tla nea tsebišo e kgahlišago ya tlaleletšo yeo e re thušago go kwešiša dipego tše di kgethilwego tša Beibele. Sehlogo se se rego, “Batamela Kgaufsi le Modimo” se tla hlalosa seo re ka ithutago sona ka Jehofa ditemaneng tše itšego tša Beibele. Sehlogo se se rego, “Babadi ba Rena ba a Botšiša” se tla ahla-ahla dikarabo tša dipotšišo tše di tlwaelegilego tša Beibele. Ka mohlala, batho ba bantši ba be ba ipotšiša gore, “Na Mmušo wa Modimo o ka pelong ya gago?” Le tla hwetša karabo go letlakala 13.

Dihlogo tše mmalwa tšeo di tlago go ba gona ka mehla di hlametšwe go hola malapa. Sehlogo se se rego, “Ditsela tša go Hwetša Lethabo la Lapa” seo se tlago go tšwelela gane ka ngwaga, se tla hlalosa maemo a kgonthe a bophelo ao malapa a bago le mathata go ona gomme se bontšhe kamoo melao ya motheo ya Beibele e ka thušago go rarolla mathata ao. Sehlogo se se rego, “Ruta Bana ba Gago” seo batswadi ba ka se balago le bana ba bona, se tla tšwelela kgweding e nngwe le e nngwe ya bobedi. Sona se tla šiedišana le seo se rego, “Bakeng sa Bafsa ba Rena” seo se hlalosago mediro yeo bafsa ba ka e dirago ya go ithuta Beibele.

Dihlogo tše sego kae tša tlaleletšo di tla tšwelela gane ka ngwaga. Sehlogo se se rego, “Ekišang Tumelo ya Bona” se tla re kgothaletša go latela mohlala wa moanegwa yo a itšego wa Beibele. Ka mohlala, go matlakala 18 go ya go 21 a tokollo ye, o tla bala pego e kgomago pelo ya mabapi le moporofeta Eliya gomme wa ithuta kamoo re ka ekišago tumelo ya gagwe. Sehlogo se se rego, “Lengwalo le le Tšwago go . . . ” se tla nea dipego tše di ngwadilwego ka go lebanya ke baromiwa le batho ba bangwe bao ba tšwago dikarolong tše di fapa-fapanego tša lefase tšeo ba di hlalosago ka mantšu a bona. Sehlogo se se rego, “Seo re Ithutago Sona go Jesu” se tla hlalosa dithuto tša motheo tša Beibele ka tsela e bonolo.

Re kgodišegile gore Morokami o tla tšwela pele go ipiletša go batho bao ba hlomphago Beibele le bao ba nyakago go tseba seo ge e le gabotse puku ye e se rutago. Re holofela gore makasine wo o tla go thuša go kgotsofatša go nyorelwa ga gago therešo ya Beibele.

BAGATIŠI

[Mongwalo wa tlase]