Leina la Modimo

“Ge e se ge Jehofa a aga ngwako, baagi ba wona ba itapišetša lefeela.” Ke kamoo mongwalo wo wa Selatine o balegago ka gona. Mantšu a a theilwe go Psalme 127:1 ka Beibeleng, gomme a swere therešo ya motheo: Boiteko lege e le bofe bjo bo se nago tšhegofatšo ya Jehofa e tla ba bja lefeela mafelelong.

Mongwalo wo e lego wa 1780, o hwetšwa moagong kua Colombo, Sri Lanka, gomme ke wo o tumilego ka gobane o na le leina la Modimo, Jehofa. (Bona seswantšho.) Nywaga-kgolong ya pele leina leo le be le dirišwa ka gohle. Gantši le be le ngwalwa meagong ya mmušo, dikerekeng, gotee le ditšheleteng. Baromiwa ba dirišitše leina la Modimo ge ba iša Beibele dinageng tša kgole, e lego seo ka ntle le pelaelo se ikarabelelago ka mongwalo wo kua Sri Lanka.

Dilo ke tše di fapanego gakaaka’ng lehono! Ke ba sego kae bao ba ipolelago gore ke Bakriste bao ba nago le taba le leina la Modimo. Baithuti ba bangwe ba bile ba nyatša Dihlatse tša Jehofa bakeng sa go le gatelela. Ka baka la’ng? Go ya ka ba bangwe, ke ka gobane mmiletšo wa lona wa Sehebere o sa tsebje gabotse. Eupja ke ba bakae bao ba tsebago mmiletšo wa mathomo wa Sehebere wa leina la Jesu? Lega go le bjalo, leina la gagwe le dirišwa le go hlompšha ka gohle.

Go Jesu, leina la Modimo le be le le bohlokwa e le ka kgonthe. O re rutile go rapela gore: “Leina la xaxo a le kxêthwê.” (Mateo 6:9) Le gona pejana ga lehu la gagwe, o itše go Modimo: “Ke tsebadiše ’ina l’axo mo bathong ba O nneilexo bôná bá e-tšwa ’faseng.” (Johane 17:6) Bakriste ba therešo ke balatedi ba mohlala wa Jesu. Na ga se ba swanela gore le bona se ba ‘tsebatše leina la Modimo’? Dihlatse tša Jehofa di dira bjalo, gomme Jehofa o šegofatša “ngwako” wa tšona ka mo go tletšego. Go bona psalme ye ke ya therešo: “Go lehlogonolo batho bao Modimo wa bona e lego Jehofa!”—Psalme 144:15, NW.