Pakuié Ntang Jéova gouôgô na no Ssé, mboo na lékuiétée pʉa mésong tsèe mélaʼ ta ntôg 200. Taʼ, méjʉʼ ta nkouʼou 35 wo wo mié kouaʼ pôb naa mmo poŋo ntʉm ta a kouʼou lé tangté méno mié é lié wôb. Mé ping ndôg nkab foo nzôô ta ndôg ntangté méno tsèe méjʉʼ mié pʉa té yiôôn jʉʼo tèʼ wô?

 Létsiŋé lôg ntségé tchouʼté Pakuié Ntang Jéova zoo tangté choum sié é né ndié wôb, mbing ndié no na méfaʼ môb tsèe ngoung ntsém. Mé gʉo mbudjè na mmo poŋo ntʉm, mbing yousé nkab kouaʼ paʼ yèe mbudjè né nzèté. Tsoo Bétèl woo ta ndôg nkab ngouôg méfaʼ mé ta pfouôʼ vʉʼʉ péʼé, pô toum nnaa mbwo pétso pié pôô tsaa nzag. Pô lôgô pouʼou mbii fʉʼ na Mékréeté pé tam Yéeso, «pô lôg ngwiée mmo ndʉng ndʉng» (2 Korénto 8:14) Pô lôg mézaba mié ée na nkab yôb nduiŋé nzag yié pétso pʉa gwiée.

 Méfè pié métso Mébétèl ka toum mézabaa nkab môb nnaa mbwo pôb jouʼou ntʉm pô lékô? Aa Tanzanie ngouo yié mé lôôn chʉa laʼ nzsé pʉa, taʼa gouoong wo pʉa pié pô gʉa na taʼa lièeʼ ngwiée nkab po ndaʼ 1 100 frs. Mé la yousé nkab yié pétso méfa naa, ndôg nging ngnièté nda tso tchouʼté yié mé tong lé Mafinga. Pʉa yaa tchouʼté ma la ŋwéʼé ngié: «Nzuing pakouou tchouʼté kuiʼii tèʼ ta fo paʼ mé ka yiing ngnièté nda! Pég pouou née nnaa ndaag mbwo tchouʼté ngoung suié, ta mboo mbwo méfè ntsém tsèe ngouong, anoué pô ka tsôʼô manzsé mbwo pégé lé lôg ngwiée yôôn jʉʼʉ gouʼté yié a pouou si tèʼ.»

 Tsô méfè pégé pé Sri Lanka ka gia ngôʼ téʼ nti nzhié yié gouô COVID-19 ka lôg nto. Imara Fernando po ming wé Enosh la jouʼ yôb kékang nti pouʼou. Mé ka ping nzuiè nkab mmo poŋo ntʉm yié é foo tsaa métso mélaʼ, nkuiété wôb kouaʼ paʼ a né nzèté. Pô la lôg pô kouaʼ pwo yôb ŋwéʼé ngié: «Pég né nnaa ndaag mbwo méfè pié é ka kuiété wég tsèe môôn métam ntʉ tʉ. Pég chʉachʉa ngwiée lékag lé wo tsèe yôôn tsiŋé nda. Pég yiing née ngʉo préya mbwo Jéova ngié a kuiʼi nkuiété méfa ntsém na môôn ménzsonzém lièʼè laʼ.»

 Méfè pégé né ntsuié pô nzôô wô péʼé, nké nkoung pô lé gabté mmo yié pô gwiée. Enosh wuié mé zôôn nkimé yé la ka gʉo mouô mététôʼ lôg nnéng nkab, paʼ a gé lôg kuiété tso métsiŋé nda mié é ying né ngia yôb ngôʼ. Guadalupe Álvarez yiing nkoung yé lé gaba pwo po pouʼou. A tsuié tso jʉʼ Mexique yié mé té péen mégaŋa faʼ wo mboŋoo wô, pʉa ta ngiôôn ping té tsuié ngwiée nkab wô. Ta mboo pouʼou, a lôgô yé mmo yié a kouʼou moo ndôg nnaa mmo poŋo ntʉm. A la ŋwéʼé ngié: «Méng na ndaag pwo Jéova paʼ a gwiée poŋo ntʉm mbing nkouè nnè na mégaŋa faʼ pé. N né nzsé ngié mé gé témté yôôn mmo poŋo ntʉm na yé pétso pʉa, a kouʼou lé kuiété méfa pié ée tsaa nzag.»

 Méfilial mié é toum nkab jʉʼ yié nzag ée wo gwiée maamaa lékag. «A la gʉo méngouʼ ta ngiôôn paʼ Bétèl wég la né ntsôôn kuiété yié a foo mbwo métso méfilial.» Aa no yié Anthony Carvalho, wuié a gouôgô Bétèl Brésil la gôôn. «A la tchʉa na paʼ mé la toonté wég pouʼou, patsui nkʉ Ssé kuiʼi ngiôôn tèʼ. A ping ngouo fʉʼôôn pég té ying née fʉaga tèʼ wô, mbing ngwiée lékag lé kuiété pétso méfè. Méfè pégé né mmaʼa léjʉôg tsèe ngouong ntsém ndôgô ndié faʼ léchouŋo no Ssé, mbiŋé nkouangté paʼ ngouô pô zuing lé gnié tso choum, ntchouŋo faʼ méfaʼ Ssé paʼ Yéeso.»

 Ngouô Pakuié Ntang Jéova tchʉa lékô ta nkuiété méfa pôb pié é né nzaga choum? Pô té gwiée pô lé toum nkab nnaa mbwo méfilial wô, a zèté pô lé naa mmo poŋo ntʉm yié a lié méfaʼ mégé tsèe ngouong ntsém. Ngouo mé gʉo pouʼou ntchʉa na lénéŋé mmo poŋo ntʉm tsèe tétôʼ wuié mé ŋwéʼé moo ngié «Méfaʼ mégé tsèe ngoung ntsém», nkoung mé toumo na donate.jw.org. Pég kouaʼ ngôʼté sèe choum poŋo ntʉm.