1. Ko e heigoa ne fakamalolō he aposetolo ko Ioane ke manamanatu a tautolu ki ai, ti ko e ha?

KUA fakamalolō he aposetolo ko Ioane a tautolu ke manamanatu fakahokulo ke he fakaalofa lahi ha Iehova ma tautolu. Ia 1 Ioane 3:1, ne totou e tautolu: “Kitiala e fakaalofa lahi kua foaki mai he Matua kia tautolu.” Ka manamanatu fakahokulo a tautolu ke he lahi he fakaalofa ha Iehova ki a tautolu mo e puhala kua fakakite e ia e fakaalofa haana ki a tautolu, kua fakatata lahi a tautolu ki a ia ti fakaalofa lahi foki a tautolu ki a ia.

2. Ko e ha kua uka he falu ke maama kua fakaalofa e Atua ki a lautolu?

² Momoko ai, falu ne nakai maama e puhala ka fakaalofa e Atua ki a lautolu. Manatu a lautolu kua nakai leveki he Atua e tau tagata. Liga talitonu a lautolu ko e taute ni e Atua he tau matafakatufono ti fakahala a lautolu ne nakai omaoma ki a ia. Ha ko e tau fakaakoaga fakavai, falu ne manamanatu foki kua favale e Atua ti nakai maeke ke fakaalofa ki a ia. Falu ne logona hifo kua fakaalofa e Atua ke he tau tagata oti pete ne tau mena ne taute e lautolu. Ka ko e fakaako haau ke he Tohi Tapu kua lagomatai a koe  ke iloa e mena mooli ki a Iehova. Iloa e koe ko e fakaalofa e fua mua ue atu haana ti foaki e ia e Tama haana mo lukutoto haau. (Ioane 3:16; 1 Ioane 4:8) Ka e, he tau mena ne tutupu ke he moui haau, liga uka ma haau ke maama e lahi he puhala ne fakaalofa a Iehova ki a koe.

3. Ko e heigoa ka lagomatai a tautolu ke maama e fakaalofa ha Iehova ki a tautolu?

³ Ke lagomatai a tautolu ke maama e fakaalofa ha Iehova ki a tautolu, kua lata fakamua ia tautolu ke maama ko Iehova ne tufuga a tautolu. Ne foaki e ia e moui ki a tautolu. (Totou Salamo 100:3-5.) Kakano haia ne fakamaama he Tohi Tapu e tagata fakamua ‘ko e tama he Atua.’ (Luka 3:38) Ti fakaako e Iesu a tautolu ke ui a Iehova ko e ‘ha mautolu a Matua ha ha he lagi.’ (Mataio 6:9) Ti ko Iehova e Matua ha tautolu, kua fakaalofa a ia ki a tautolu he puhala ne fakaalofa e matua taane mitaki ke he haana tau fanau.

4. (a) Ko e vahega Matua fēfē a Iehova? (e) Ko e heigoa ka fakatutala a tautolu he vala tala nei mo e vala tala ka mui mai?

⁴ Kua uka he falu ke manamanatu ke he matua taane ko e tagata fakaalofa. Liga ha ha ia lautolu e tau manatu mamahi ke he ha lautolu a vahā ikiiki ha kua taute fakakelea he matua taane ha lautolu a lautolu. To nakai taute pihia e Iehova e tau fanau haana. Ko ia ko e Matua Taane ne mua atu e mitaki kua moua e tautolu. (Salamo 27:10) Kua fakaalofa lahi mahaki a ia ki a tautolu ti leveki a tautolu ke he tau puhala loga. Ko e lahi e logonaaga fakaalofa mai ha Iehova ki a tautolu, to lahi e fakaalofa ha tautolu ki a ia. (Iakopo 4:8) Ke he vala tala nei, to fakatutala a tautolu ke he fā e puhala kua fakakite e Iehova e fakaalofa haana ki a tautolu. He vala tala ka mui mai, to onoono a tautolu ke he fā e puhala ka fakakite e tautolu e fakaalofa ha tautolu ki a ia.

5. Ko e heigoa ne foaki he Atua ke he tau tagata oti kana?

⁵ He haia e aposetolo ko Paulo i Atenai i Heleni, ne mailoga e ia kua loga e tau tupua tā ti talitonu e tau tagata kua foaki he tau atua ha lautolu ki a lautolu e moui. Ti tala age a ia ki a lautolu hagaao ke he “Atua ne eke e lalolagi mo e tau mena oti kana ha ha i ai.” Pehē a Paulo ko e Atua “kua foaki mai e ia e moui, mo e fafagu, mo e tau mena oti kana ke he tau mena oti” ti ko e mena ia “kua momoui a tautolu ia ia, mo e gahuahua ia ia, ha ha i ai foki a tautolu ia ia.” (Gahua 17:24, 25, 28) Foaki e Iehova e tau mena oti kana kua lata mo tautolu ke momoui mo e fiafia e moui. Manamanatu ke he falu mena ne foaki e ia ki a tautolu ha ko e fakaalofa haana ki a tautolu.

6. Ko e vahega kaina fēfē ne foaki e Iehova ki a tautolu? (Kikite fakatino he kamataaga.)

⁶ Ma e fakatai, ne tauteute e Iehova e kaina fulufuluola ma tautolu. (Salamo 115:15, 16) Mai he tau palaneta oti ne tufuga e ia, ko e lalolagi ne tuga kua kehe lahi mahaki. Ne kumikumi he tau saienetisi e aolagi ti moua e tau palaneta loga, ka e nakai la moua e lautolu e taha palaneta ne ha ha i ai e tau mena oti kana kua lata ke momoui ai e tau tagata. Nakai ni foaki e Iehova e tau mena oti kana kua lata mo tautolu ke tumau e moui, ka e taute foki e ia e lalolagi mo matakavi fulufuluola, tokotoko mitaki, mo e haohao mitaki ke maeke ia tautolu ke fiafia e moui. (Isaia 45:18) Ka manamanatu a tautolu ke he kaina ne foaki mai he ha tautolu a Matua ko Iehova ki a tautolu, logona hifo mooli e tautolu e fakaalofa lahi haana ki a tautolu.​—Totou Iopu 38:4, 7; Salamo 8:3-5.

7. Fakakite fēfē he puhala ne tufuga e Iehova a tautolu kua fakaalofa mooli a ia ki a tautolu?

⁷ Taha puhala ne fakakite e Iehova e fakaalofa  haana ki a tautolu ko e tufugatia a tautolu aki e lotomatala ke fifitaki a ia. (Kenese 1:27) Kakano e mena nei kua maeke ia tautolu ke logona hifo e fakaalofa haana ki a tautolu ti fakakite mogoia e fakaalofa ha tautolu ki a ia. Iloa e ia ko e mena nei ne taute a tautolu ke fiafia mooli. Kua fiafia lahi mahaki e tau fanau ka logona hifo e lautolu kua fakaalofa e tau mamatua ha lautolu ki a lautolu. Ti manatu, na fakaako e Iesu to fiafia a tautolu ka fakatata a tautolu ke he ha tautolu a Matua ko Iehova. (Mataio 5:3) Kua foaki e ia ki a tautolu e “tau mena oti ke fiafia ai.” Maaliali ai, kua fakamokoi lahi mo e fakaalofa lahi mahaki a ia ki a tautolu.​—1 Timoteo 6:17; Salamo 145:16.

8. Ko e ha kua manako a tautolu ki a Iehova ke fakaako a tautolu?

⁸ Kua fakaalofa e tau matua taane ke he tau fanau ha lautolu ti nakai manako ki a lautolu ke hehē po ke tataki kehe. Ka e tokologa e matua he vahā nei ne nakai talia e tau tuaga he Tohi Tapu ke he hako mo e hepe.  Ti nakai maeke ia lautolu ke takitaki fakamitaki e tau fanau ha lautolu, ne fua mai mogoia e nakai fiafia mo e fakagogoa. (Tau Fakatai 14:12) Ka e foaki e Iehova ke he tau fanau haana e takitakiaga mitaki lahi mahaki ha ko ia “ko e Atua fakamoli.” (Salamo 31:5) Fiafia a ia ke fakaako a tautolu ke he kupu mooli hagaao ki a ia. Ne fakaako foki e ia a tautolu ke he puhala ke tapuaki a ia mo e fakakite ki a tautolu e puhala mitaki lahi mahaki ke moui. (Totou Salamo 43:3.) Ti ko e heigoa ne fakaako e Iehova ki a tautolu kua fakakite e fakaalofa lahi haana ki a tautolu?

9, 10. (a) Ko e ha kua talahau e Iehova a ia ki a tautolu? (e) Ko e ha kua fakaako e ia a tautolu ke he finagalo haana ma tautolu?

⁹ Fakamua, talahau e Iehova ki a tautolu hagaao ki a ia. Manako a ia ki a tautolu ke iloa a ia. (Iakopo 4:8) Ti tala mai e ia e higoa haana ki a tautolu. Lagaloga e totoku he Tohi Tapu e higoa haana ke he falu higoa foki. Talahau foki e Iehova ki a tautolu ko e Atua fēfē a ia. Ka onoono a tautolu ke he tau mena ne tufugatia e ia, fakaako e tautolu kua malolō mo e pulotu a ia. (Roma 1:20) Ti ka totou e tautolu e Tohi Tapu, kua fakaako e tautolu e mahani tonu haana mo e lahi he fakaalofa haana ki a tautolu. He iloa e tautolu e aga totonu ha Iehova, kua fakatata lahi a tautolu ki a ia.

¹⁰ Kua fakaako foki e Iehova ki a tautolu e finagalo haana. Tala mai e ia ki a tautolu ko e vala he magafaoa haana a tautolu. Fakamaama foki e ia e mena ne amanaki a ia mai ia tautolu ke maeke ia tautolu ke gahua fakalataha mo e mafola mo e tau tagata oti he magafaoa haana. Fakakite fakamaali he Tohi Tapu kua nakai tufuga he Atua a tautolu aki e tonuhia ke fifili ni e tautolu e mena mitaki mo e mena kelea. (Ieremia 10:23) Iloa e Iehova e mena mitaki lahi mahaki ma tautolu. Ti ko e talia ni e pule haana mo e omaoma ki a ia ka moua e tautolu e moui mafola mo e fiafia. Fakaako e Iehova ki a tautolu e aoga he kupu mooli nei ha kua fakaalofa a ia ki a tautolu.

11. Ko e heigoa ne tala mai he ha tautolu a Matua fakaalofa ki a tautolu hagaao ke he vahā anoiha?

¹¹ Ko e matua taane fakaalofa ne manamanatu fakahokulo ke he vahā anoiha he tau fanau haana. Manako a ia ki a lautolu ke moua e moui fiafia. Momoko ai, laulahi he tau tagata he vahā nei kua tupetupe ke he vahā anoiha, ti tokologa ne moumou e tau momoui ha lautolu he gahua ma e tau mena ne nakai tumau. (Salamo 90:10) Fakaaue mooli a tautolu ke he ha tautolu a Matua ko Iehova ha kua nakai ni fakaako e ia a tautolu ke he puhala ke moua e moui fiafia mogonei ka e mavehe e ia ki a tautolu e vahā anoiha ne homo ue atu!

12. Lali fēfē a Iehova ke lagomatai a Kaino mo Paruka?

¹² Ko e mogo ne kitia e Iehova kua hagahaga kelea a Kaino he taute e mena kelea lahi, ne lali a ia ke lagomatai a Kaino he hūhū ki a ia: “Kua ita he ha a koe? Ti fakatetefu mai he ha e mata hāu? Kaeke kua mahani mitaki a koe ti ha ia koe e fiafia.” (Kenese 4:6, 7) Ne fakaheu e Kaino e lagomatai ha Iehova, ti matematekelea lahi e fua ne moua e ia. (Kenese 4:11-13) Taha magaaho,  ne mailoga e Iehova kua taute he aga hepe ha Paruka a ia ke mategūgū mo e loto lolelole. Ti tala age a Iehova ki a Paruka kua hepe e manamanatuaga haana ti kua lata a ia ke hiki. Ne fanogonogo a Paruka ke he fakatonuaga ha Iehova, ti fakahao ai e moui haana.​—Ieremia 45:2-5.

13. Ko e heigoa he tau fekafekau fakamooli ha Iehova ne fakaako mai he tau kamatamata?

¹³ Takitaki mo e akonaki e Iehova a tautolu ha kua fakaalofa a ia ki a tautolu. Nakai ni fakahako e ia a tautolu kaeke kua lata, ka e fakamahani foki e ia a tautolu. (Heperu 12:6) He Tohi Tapu, totou e tautolu hagaao ke he tau fekafekau tua fakamooli ne fakamahani e Iehova ke eke mo tau tagata mitaki. Ma e fakatai, ko Iosefa, Mose, mo Tavita ne lauia he tau magaaho uka lahi mahaki. He tau kamatamata ha lautolu, ne fakalataha a Iehova mo lautolu. Ko e tau mena ne fakaako e lautolu he tau mogo kamatamata ia ne lagomatai a lautolu he mogo ne foaki e Iehova ki a lautolu e tau matagahua lalahi. He totou e tautolu i loto he Tohi Tapu e puhala ne lalago mo e fakamahani e Iehova e tau tagata haana, logona hifo e tautolu kua fakaalofa mooli a Iehova ki a tautolu.​—Totou Tau Fakatai 3:11, 12.

14. Ka taute e tautolu e mena hepe, fakakite fēfē e Iehova ki a tautolu e fakaalofa?

¹⁴ Pete foki ka taute e tautolu e mena hepe, ne matutaki a Iehova ke fakakite ki a tautolu e fakaalofa. Ka talia e tautolu e akonakiaga haana ti fakatokihala, to fakamagalo “fakalahi” e ia a tautolu. (Isaia 55:7) Ko e heigoa e kakano he mena ia? Ko e tau kupu ha Tavita hagaao ke he fakamagalo ha Iehova kua fakakite ki a tautolu ha tautolu a Matua fakaalofa noa: “Ko ia kua fakamagalo hāu a tau mahani hepehepe oti, ko ia kua fakamaulu hāu a tau gagao oti kana; Ko ia kua laveaki hāu a moui mai he tukuaga; ko ia kua fakafoufou a koe ke he fakaalofa mo e fakaalofa hofihofi; Tuga ne vaha mamao e fahi uta mo lalo, kua fakamamao pihia e ia ia tautolu ha tautolu a tau holifono.” (Salamo 103:3, 4, 12) Kua akonaki mo e takitaki e Iehova a tautolu ke he tau puhala kehekehe. Mafiti nakai a koe ke taute e tau hikihikiaga? Manatu tumau kua akonaki e Iehova a tautolu ha kua fakaalofa a ia ki a tautolu.​—Salamo 30:5.

15. Ko e heigoa taha puhala foki ne fakakite e Iehova kua fakaalofa a ia ki a tautolu?

¹⁵ Kua puipui he matua taane fakaalofa e magafaoa haana mai he hagahaga kelea. Pihia e mena ne taute he ha tautolu a Matua ko Iehova ma tautolu. Talahau he salamo hagaao ki a Iehova: “Kua leoleo e ia e tau agaga he hana tau tagata tapu, kua laveaki e ia a lautolu mai he tau lima he tau tagata mahani kelea.” (Salamo 97:10) Manamanatu ke he mena nei: Tuga ni he mafiti a koe ke puipui e tau mata haau ha kua uho ai ki a koe, kua mafiti a Iehova ke puipui e tau tagata haana ha kua uho a lautolu ki a ia.​—Totou Sakaria 2:8.

16, 17. Puipui fēfē e Iehova e tau tagata haana he vahā i tuai mo e vahā nei ha tautolu?

¹⁶ Ko e taha puhala ne puipui e Iehova e tau tagata haana, he vahā i tuai mo e vahā nei, puhala he tau agelu haana. (Salamo 91:11) Taha e agelu ne kelipopo 185,000 e kautau Asuria ke he taha e pō ti fakahao e tau tagata he Atua. (2 Tau Patuiki 19:35)  He senetenari fakamua, ne fakahao he tau agelu a Peteru, Paulo, mo e falu mai he fale puipui. (Gahua 5:18-20; 12:6-11) Nakaila leva ia, ha ha i ai e felakutaki kelea lahi he taha motu i Aferika. Ko e motu kua miha lahi ha ko e tau latau, kaihā, fakapilo pulenoa, mo e kelipopo. Pete he nakai fai matakainaga ne mamate, tokologa ne galo e tau mena oti ne moua e lautolu. Ka e logona hifo e lautolu oti e fakaalofa ha Iehova ti iloa ai kua leveki e ia a lautolu. Pete ne tau mena oti ne matematekelea a lautolu, ne fiafia agaia a lautolu. He mogo ne ahiahi atu e hukui he matapatu ki a lautolu ti hūhū ke he tau matakainaga ko e fēfē a lautolu, pehē a lautolu, “Mitaki e tau mena oti, fakaaue ki a Iehova!”

¹⁷ Mooli, falu he tau fekafekau ha Iehova, tuga e tutaki ko Setefano mo e falu ne tuga a ia ne mamate ha ko e mahani fakamooli ha lautolu. Nakai puipui tumau e Iehova e mena nei neke tupu. Ka e puipui e ia e tau tagata haana ko e matakau he hataki a lautolu hagaao ke he tau puhala kehekehe ne lali a Satani ke fakavaia a lautolu. (Efeso 6:10-12) Moua e tautolu e tau hatakiaga nei he Tohi Tapu mo e tau tohi mai he fakatokatokaaga ha Iehova. Ma e fakatai, fakaako e tautolu hagaao ke he tau hagahaga kelea he Initanete, he loto lahi ke he tau tupe, mo e mahani feuaki mo e favale he tau kifaga, tau pepa, po ke tau pelē. Maaliali ai, ne fakaalofa a Iehova ki a tautolu ti manako ke puipui a tautolu.

18. Fēfē e logonaaga haau ke he fakaalofa ha Iehova ki a koe?

¹⁸ He mogo ne manamanatu a Mose ke he tau tau loga ne fekafekau a ia ki a Iehova, ne talitonu a ia kua fakaalofa a Iehova ki a ia. Pehē a Mose: “Kia fakamakona e koe a mautolu ke he magaaho pogipogi ke he hāu a fakaalofa; kia kalaga fiafia ai mo e olioli a mautolu ke he tau aho oti ha mautolu.” (Salamo 90:14) Kua fakamonuina a tautolu he maeke ke maama mo e logona hifo e fakaalofa ha Iehova ki a tautolu. Ko e lilifu lahi mooli ke fakaalofa mai a Iehova! Kua logona hifo e tautolu tuga e aposetolo ko Ioane, ne pehē: “Kitiala e fakaalofa lahi kua foaki mai he Matua kia tautolu.”​—1 Ioane 3:1.