1, 2. Ko e heigoa e aga kua moua he tau fekafekau ha Iehova?

KUA fakatali fakatekiteki e tau fekafekau ha Iehova ke he fakamooliaga he tau perofetaaga. Ma e fakatai, ne amanaki a Ieremia to moumou he tau Papelonia a Iuta, ti ko e mena ia ne tupu he 607 F.V.N. (Ieremia 25:8-11) Ne perofeta e Isaia to liuaki mai e Iehova e tau Iutaia ne fakapaea ki Iuta ti pehē: “Uhoaki a lautolu oti kua tatali atu kia ia.” (Isaia 30:18) Ne amanaki foki a Mika ke fakamooli e tau maveheaga ha Iehova ti pehē: “To tatali atu au kia Iehova.” (Mika 7:7) Ti totou teau e tau tau, ne mauokafua e tau fekafekau he Atua to hau e Mesia, po ke Keriso, ne mavehe.​—Luka 3:15; 1 Peteru 1:10-12. * (Kikite matahui tala.)

² He vahā nei, kua fakatali foki a tautolu ke fakamooli e tau perofetaaga he Kautu a Iehova. Ko Iesu, ko e Patuiki he Kautu ia, to nakai leva ti laveaki e tau fekafekau he Atua mai he lalolagi hagahaga kelea nei. To fakaotioti e ia e tau tagata mahani kelea mo e utakehe oti e tau matematekelea. (1 Ioane 5:19) Ti kua lata  ke amaamanaki tumau a tautolu ke hoko mai e aho a Iehova he ha magaaho mo e taute e tau mena oti kana ke maeke ia tautolu ke mautali ki ai.

3. Kaeke kua leva tuai e fakatali ha tautolu ke hoko mai e moumouaga, ko e heigoa kua liga manamanatu a tautolu ki ai?

³ Kua amanaki lahi atu a tautolu ke he aho ka eke e finagalo he Atua ke he lalolagi. (Mataio 6:10) Kaeke kua leva lahi tuai e fakatali ha tautolu ke he moumouaga ke hoko mai, liga kamata a tautolu ke manamanatu, ‘Ko e ha kua lata ia tautolu ke amaamanaki tumau ke hoko mafiti mai e moumouaga?’

4. Ko e ha kua aoga lahi ma tautolu ke “mataala”?

⁴ Poaki a Iesu ke he tau tutaki haana “kia mataala” mo e matakite tumau. Kakano haia ne aoga lahi ma tautolu ke amaamanaki tumau ke hoko mafiti mai e moumouaga. (Mataio 24:42; Luka 21:34-36) Ko e fakatokatokaaga foki ha Iehova kua fakamanatu tumau ki a tautolu ke “fakatalitali mo e foli atu kia hoko mai e aho he Atua” ti hagaaki mau ke he maveheaga ha Iehova ke he lalolagi foou.​—Totou 2 Peteru 3:11-13.

5. Ko e heigoa falu kakano kua moua e tautolu ke amaamanaki tumau ke he aho ha Iehova?

⁵ Ka lata he tau tutaki ha Iesu he senetenari fakamua ke amaamanaki tumau ke he aho ha Iehova, ti mua atu foki e aoga he mena nei ki a tautolu mogonei. Ko e ha? Ha ko e fakamailoga ne fakakite e Iesu kua fakamooli na Patuiki a ia he Kautu he Atua tali mai he 1914 ti kua nonofo a tautolu he tau aho fakamui. Ma e fakatai, tuga ni he perofeta mai e Iesu ko e tau tuaga he lalolagi kua holo ki mua e kelea ti ko e tala mitaki he Kautu kua fakamatala ke he lalolagi oti. (Mataio 24:3, 7-14) Nakai talahau e Iesu ko e leva fēfē e tau aho fakamui, ti kua lata ia tautolu ke mautauteute ma e moumouaga ka hoko mai he ha magaaho.

6. Iloa fēfē e tautolu to au atu e kelea he tau tuaga he lalolagi he tata lahi atu a tautolu ke he moumouaga?

⁶ Liga hagaao kia e “fakaotiaga he [“fakatokaaga nei,” NW]” ke he magaaho anoiha ka au atu e kelea he lalolagi ke he mogonei? Pehē e Tohi Tapu to au atu e kelea he tau tagata he “tau aho fakamui.” (2 Timoteo 3:1, 13; Mataio 24:21; Fakakiteaga 12:12) Ti pete ne kelea lahi e tau mena mogonei, iloa e tautolu to tolomaki atu ai ke au atu e kelea.

7. Ko e heigoa he Mataio 24:37-39 kua fakaako ki a tautolu hagaao ke he tau tuaga he lalolagi he tau aho fakamui?

⁷ Falu ne liga manamanatu ato “matematekelea lahi,” to ha ha i ai e felakutaki he tau motu oti ti laulahi he tau tagata to gagao mo e hoge. (Fakakiteaga 7:14) Ka tupu e mena ia, to maaliali ke he tau tagata oti kua fakamooli e perofetaaga he Tohi Tapu. To kitia mitaki foki ke he tau tagata ne nakai fiafia ke he mena ne talahau he Tohi Tapu. Manatu, pehē a Iesu he tau aho fakamui to laulahi he tau tagata ka nakai fakateliga. To momoui tokolologo a lautolu he tau aho takitaha ti ofo ka hoko mai e aho ha Iehova. (Totou Mataio 24:37-39.) Maaliali ai, kua nakai lata ia tautolu ke amanaki ke he tau tuaga he lalolagi ke tolomaki e kelea ato hoko e “matematekelea lahi” ti fakaohooho e tau tagata ke talitonu kua tata mai e moumouaga.​—Luka 17:20; 2 Peteru 3:3, 4.

8. Ha kua mataala a tautolu ke he fakamailoga ha Iesu, ko e heigoa kua mauokafua a tautolu ki ai?

⁸ Ko e fakamailoga kua talahau e Iesu ne kakano  ke fakakite ke he tau tutaki haana e hatakiaga maaliali he magaaho kua nonofo ai a lautolu. Kua mataala e tau tutaki ha Iesu. (Mataio 24:27, 42) Tali mai he 1914, kua fakamooli e tau vala kehekehe he fakamailoga ha Iesu. Mauokafua a tautolu kua nonofo a tautolu he tau aho fakamui, ko e ‘fakaotiaga he fakatokaaga nei.’ Fitā he fifili e Iehova e magaaho ka moumou e lalolagi kelea ha Satani.

9. Ko e ha kua lata ia tautolu ke amaamanaki tumau ke hoko mafiti mai e moumouaga?

⁹ Ti ko e ha kua lata ia tautolu ke amaamanaki tumau ke hoko mafiti mai e moumouaga? Ha kua omaoma a tautolu ki a Iesu Keriso. Kitia maaliali foki e tautolu ko e fakamailoga ne fakakite e Iesu hagaao ke he tau aho fakamui kua fakamooli. Talitonu a tautolu kua tata mai e moumouaga, nakai he falanaki a tautolu ke he tau mena oti ne logona e tautolu, ka kua talitonu a tautolu kua fakamooli e perofetaaga he Tohi Tapu. Kua lata ia tautolu ke nonofo mataala mo e mautali ke hoko mai e moumouaga.

10, 11. (a) Ko e ha ne tala age a Iesu ke he tau tutaki haana “kia mataala a”? (e) Ko e heigoa ne tala age e Iesu ke he tau tutaki haana ke taute kaeke ke nakai hoko mafiti mai e moumouaga tuga he manatu e lautolu? (Kikite fakatino he kamataaga.)

¹⁰ Tokologa ia tautolu ne fekafekau fakamooli ki a Iehova mo e kua totou tau he fakatali fakamakai ke hoko mai e aho haana. Pete he leva e fakatali ha tautolu, lata ia tautolu ke amaamanaki tumau ke hoko mafiti mai e aho ia. Lata ia tautolu ke mautali ka hau a Iesu ke moumou e lalolagi ha Satani. Manatu e mena ne tala age e Iesu ke he tau tutaki haana ke taute: “Kia [“matakite,” NW] a mutolu, mo e liogi, ha ko e mena nakai iloa e mutolu po ke hoko mai a fe e aho ia. Tuga ne tagata ka fano ke he fenoga ke he motu kehe, kua toka e ia hana fale, ti age e pule ke he tau fekafekau hana, takitokotaha foki mo e hana gahua, ti tala age ke he leoleo gutuhala kia mataala a ia. Hanai, kia mataala a mutolu; ha kua nakai iloa e mutolu po ke hau a fe e Iki he fale, po ke magaaho afiafi, po ke magaaho tulotopo, po ke magaaho ke ko ai e tau moa, po ke magaaho pogipogi; Neke hau fakalutukia a ia, ti moua a mutolu ha ne momohe. Ko e mena kua tala atu e au kia mutolu, kua tala atu ai e au ke he tau tagata oti, Kia mataala a.”​—Mareko 13:33-37.

¹¹ Ko e magaaho ne maama he tau tutaki ha Iesu kua kamata a ia ke pule he 1914, ne mailoga e lautolu to hoko mai e moumouaga he ha magaaho. Ti tauteute a lautolu ma e mena ia he fakalahi atu e magaaho ke he gahua fakamatala. Pehē a Iesu to liga hau a ia he mogo fakamui, he “magaaho ke ko ai e tau moa, po ke magaaho pogipogi.” Ka tupu e mena ia, ko e heigoa he tau tutaki haana kua lata ke taute? Pehē a Iesu: “Kia mataala a.” Ti pete ne logona hifo e tautolu kua leva e fakatali ha tautolu, nakai kakano e mena nei kua mamao agaia e moumouaga po ke to nakai hoko mai he magaaho nei ne momoui a tautolu.

12. Ko e heigoa ne hūhū e Hapakuka ki a Iehova, ti tali atu fēfē e Atua ki a ia?

 ¹² Ne fakatali fakatekiteki e perofeta ko Hapakuka he fakamatala a ia hagaao ke he moumouaga ha Ierusalema. Fai perofeta fakamua ia ia ne fakamatala foki e fekau ia ke he loga e tau tau. Maeke ia Hapakuka ke kitia e lahi atu he mahani kelea mo e nakai fakafili tonu ne nakaila pihia fakamua. Ne olelalo a ia ki a Iehova ma e lagomatai, he hūhū: “Iehova na e, ke ui atu au kia koe ato a fe?” Nakai tala age e Iehova e magaaho ka hoko mai e moumouaga, ne mavehe e ia ki a Hapakuka: “[To] nakai mule mai.” Tala age foki a Iehova ki a Hapakuka “kia [“amaamanaki,” NW] atu ki ai.”​—Totou Hapakuka 1:1-4; 2:3.

13. Ko e heigoa ka manamanatu a Hapakuka ki ai, ti ko e ha kua hagahaga kelea e mena ia?

¹³ Manamanatu la kua lolelole a Hapakuka he fakatali ke hoko mai e moumouaga ti pehē: ‘Leva tuai e amaamanaki haaku ke he moumouaga ha Ierusalema. To loa agaia e magaaho ato hoko e moumouaga. Ai lata au ke fakamatala tumau hagaao ki ai. Maeke he falu ke taute e gahua.’ Ko e heigoa ka tupu ane manamanatu pihia a ia? To galo e ia e taliaaga ha Iehova. Ti ane mai nakai mautali a ia he magaaho ne hoko mai e moumouaga, to mate a ia.

14. To fakaaue he ha a tautolu ki a Iehova he hataki a tautolu ke amaamanaki tumau ke he moumouaga?

¹⁴ Manamanatu la ko koe he lalolagi foou. Ko e tau mena tutupu oti ne perofeta hagaao ke he tau aho fakamui ne hohoko tuga ni he talahau e Iehova. Kua mua atu e falanaki haau ki a Iehova, ti mua atu foki e mauokafua haau to taute e ia e tau mena oti ne mavehe e ia. (Totou Iosua 23:14.) Kua fakaaue lahi a koe ki a Iehova he fakatoka e magaaho tonu ke fakahoko e moumouaga ti hataki e ia e tau tagata haana ke amaamanaki tumau ki ai.​—Gahua 1:7; 1 Peteru 4:7.

15, 16. Ko e ha kua lata ia tautolu ke taute e tau mena oti kana kua maeke ia tautolu ke he gahua fakamatala he magaaho nei he moumouaga?

¹⁵ Kua fakamanatu tumau he fakatokatokaaga ha Iehova ki a tautolu ke hagaaki e tau momoui ha tautolu ke fekafekau ki a Iehova. Lagomatai he tau fakamanatuaga nei ki a tautolu ke nakai ni fagahuatia tumau he fekafekau ke he Atua ka e kitia maaliali kua mafiti e fekau ha tautolu. Mauokafua a tautolu ko e fakamailoga ne talahau e Iesu kua fakamooli he magaaho tonu nei mo e to hoko mafiti lahi  mai e moumouaga. Ti tuku fakamua e tautolu a Iehova he tau momoui ha tautolu mo e fakamatala tumau e tala mitaki hagaao ke he Kautu.​—Mataio 6:33; Mareko 13:10.

¹⁶ Ka fakamatala e tautolu e tala mitaki ke he falu, kua lagomatai a tautolu ke fakahao a lautolu mai he moumouaga he lalolagi ha Satani ka hoko mafiti mai. Taha he tau matematekelea lahi mahaki ne tupu he 1945 he mogo ne tomo e toga Wilhelm Gustloff i tahi. Totou afe e tagata ne mamate. Ne hao mai e matakainaga fifine mo e taane haana he toga ia. Ne manatu he matakainaga fifine he mogo ne tomo e toga, ne matutaki e taha fifine ke tagi: “Haaku tau katoleta! Haaku tau katoleta! Haaku tau koloa fakamanaia tino! Ko e tau koloa fakamanaia tino oti haaku i kelekele he poko. Ai tuai fai mena au ne toe!” Ka e maama he falu pasese e mena ne mua atu e aoga ti eketaha fakamakamaka ke fakahao e tau momoui he tau tagata. He vahā nei kua hagahaga kelea e tau momoui. Manako foki a tautolu ke tuga e tau pasese nakai lotokai ia mo e hagaaki ke he mafiti lahi he gahua fakamatala ha tautolu. Lata ia tautolu ke taute e tau mena oti kana kua maeke ia tautolu ke lagomatai e tau tagata ke hao mai he moumouaga he fakatokaaga nei.

17. Ko e ha kua lata ia tautolu ke talitonu to hoko mai e moumouaga he ha magaaho ni?

¹⁷ Maeke ia tautolu ke kitia maaliali ko e perofetaaga he Tohi Tapu kua fakamooli ti ko e moumouaga he  fakatokaaga kelea nei kua tata lahi mai. Fakatali a tautolu ke he “tau hoe foki ne hogofulu” mo e “manu favale” ke totoko atu ke he lotu fakavai ko Papelonia Lahi. (Fakakiteaga 17:16) Nakai lata ke tali manatu e tautolu kua lahi agaia e magaaho ato tupu e mena ia. Ua nimo to “tuku atu he Atua ke he tau loto ha lautolu” ke totoko e lotu fakavai mo e to tupu mafiti e mena nei he ha magaaho ni! (Fakakiteaga 17:17) Ko e moumouaga he lalolagi kelea ha Satani kua tata lahi mai. Ti kua lata ia tautolu ke omaoma ke he hatakiaga ha Iesu: “A mutolu neke pehia ha mutolu a tau loto, he fakaniniko, mo e konahia, mo e fakaatukehe he tau mena he mouiaga nai; neke fakaofo mai e aho ia kia mutolu. Ha ko e mena tuga ne matahele.” (Luka 21:34, 35; Fakakiteaga 16:15) Kia nonofo mataala a tautolu mo e fagahuatia tumau ke he fekafekauaga ha Iehova, he mauokafua to “eke [ia] e tau mena mitaki ma lautolu kua [“amaamanaki,” NW] atu kia ia.”​—Isaia 64:4.

18. Ko e heigoa e hūhū ka tali he vala tala ka mui mai?

¹⁸ He fakatali a tautolu ke he moumouaga he lalolagi kelea nei, kua lata ia tautolu ke fanogonogo ke he fakatonuaga mai he tutaki ko Iuta: “Ko e tau fakahelehele na e, kia ati hake e mutolu a mutolu ke he ha mutolu a tua kua tapu ue atu, ko e Agaga Tapu ke liogi ai a mutolu, Kia fakatumau e mutolu a mutolu ke he fakaalofa he Atua, ti fakatalitali ke he fakaalofa he Iki ha tautolu ko Iesu Keriso, kia hoko atu ke he moui tukulagi.” (Iuta 20, 21) Ka e maeke fēfē ia tautolu ke amaamanaki ke he lalolagi foou he Atua ke hoko mai ti ko e mena ia ke onoono atu a tautolu ki ai? To fakatutala a tautolu ke he mena nei he vala tala ka mui mai.