Manamanatu ke he Tau Mana Mua Ue Atu he Atua
Manamanatu ke he Tau Mana Mua Ue Atu he Atua
“Iehova na e, haku Atua, kua loga e tau mena kua eke e koe, ko e hau a tau mana mo e hau a tau manatu kia mautolu, nakai maeke ke talahau atu kia koe.”—SALAMO 40:5.
1, 2. Ko e heigoa e tau fakamoliaga he tau mana mua ue atu he Atua ne ha ha ia tautolu, mo e heigoa kua lata he mena nei ke omoi a tautolu ke taute?
HE TOTOU e koe e Tohi Tapu, kua kitia moli e koe na taute he Atua e tau mana mua ue atu ma e tau tagata hana i tuai, ko Isaraela. (Iosua 3:5; Salamo 106:7, 21, 22) Pete ni kua nakai putoia mai a Iehova he puhala taha ia ke he tau mena fakatagata, ka e kitia e tautolu ha ne agaagai ia tautolu e tau fakamoliaga loga he tau mana mua ue atu hana. Ti fai kakano a tautolu ke talahau fakalataha mo e salamo: “Iehova na e, kua loga ue atu hāu a tau gahua! Ne eke e koe e tau mena oti ia mo e iloilo, kua puke e lalolagi ke he hāu a tau mena.”—Salamo 104:24; 148:1-5.
2 Tokologa he vaha nei ne fakaheu po ke tiaki e tau fakamoliaga maaliali pihia he tau gahua he Tufuga. (Roma 1:20) Ka ko tautolu, kua lata ke manamanatu ke he tau mena ia mo e taute e tau mena kua lauia ai ha tautolu a tuaga ki mua mo e matagahua ki a Ia ne Taute a tautolu. Ko e lagomatai mitaki lahi e Iopu tau veveheaga 38 ke he 41 ke he mena nei, ha kua vagahau a Iehova ki a Iopu hagaao ke he tau vala pauaki he tau mana mua ue atu Hana. Manamanatu ke he falu matakupu aoga lahi ne talahau he Atua.
Tau Mana Malolo Lahi mo e Mua Ue Atu
3. Tuga ne fakamau ia Iopu 38:22, 23, 25-29, ko e heigoa e tau mena ne huhu e Atua hagaao ki ai?
3 He taha magaaho, ne huhu e Atua hagaao ki a Iopu: “Ne hu atu nakai a koe ke he tau mena ne tatanaki ai e kiona, ne kitia nakai e koe e tau mena ne tatanaki ai e uha tuli, ko e tau mena ia kua toka e au ke lata ai mo e vaha matematekelea, mo e aho foki ke tau ai ke he tau?” He tau fahi loga he lalolagi ha tautolu, ko e taha vala he moui e kiona mo e uha tuli. Ne fakaholo atu e Atua: “Ko hai ne ihiihi e tau halavai mo e uha, ko e puhala foki ma e uhila he pakulagi? Kia to ai e uha ke he kelekele nakai ha ha i ai ha tagata, mo e tutakale nakai nofo ai ha tagata. Kia makona ai e kelekele ke he mena kua tagitagimoke mo e vao kua tiaki; kia fakatupu ai foki e vao mui. Kua fai matua tane nakai e uha? ko hai foki ne fanau ai e tau tulutā he hahau? Ne hau ai e vai tuli he manava a hai kia? Ko e hahau tuli foki mai he lagi, ko hai kia ne fanau ai a ia?”—Iopu 38:22, 23, 25-29.
4-6. Ko e kakano fe ne nakai katoatoa e iloilo he tagata hagaao ke he kiona?
4 Ko e falu ne nonofo he kaufakalatahaaga moui mafiti mo e lata ni ke o fenoga kua liga kitia e kiona mo mena fakaalaia. Pete ia, kua totou tokologa ne kitia e kiona mo mena fakafiafia, he taute e vaha makalili ke fulufuluola he foaki e tau magaaho ma e tau gahua pauaki. He mauloto e huhu he Atua, iloa mitaki nakai e koe e kiona, po ke tuga e heigoa foki? Oi, kitia e tautolu e tau kiona loga, liga mai he tau ata ne poki po ke ha kua fita he kitia e tautolu e tau kiona loga. Ka e kua e tau kapakapa kiona takitaha? Iloa nakai e koe ko e tuga e heigoa a lautolu, he liga kumikumi ke he mena ne puna mai a lautolu?
5 Kua fakamole he falu tagata tane e tau tau hogofulu tau he kumikumi mo e poki e tau kapakapa kiona. Liga ha ha he kapa kiona teau e vala vai tuli ikiiki he tau talaga fulufuluola kehekehe. Ne talahau he tohi Atmosphere: “Ko e kehekehe he tau kapa kiona kua talahaua lahi, mo e pete ni he talahau he tau saienetisi kua nakai fai fakatufono pauaki ke fakatapu e taute fakatatai ha lautolu, kua nakai la moua ia ha kapa ne tatai mo e taha. Taha e kumikumiaga ke he tau valavala ia ne taute e . . . Wilson A. Bentley, ne fakamole ke molea 40 e tau tau he kumikumi mo e poki e tau kapakapa kiona he puhala he maikorotikopu ka e nakai moua ha kapa ne tatai ua.” Mo e pete ni ka liga tatai e ua, to hiki kia he mena ia e fulufuluola he tau kapakapa kiona kehekehe?
6 Manatu e huhu he Atua: “Ne hu atu nakai a koe ke he tau mena ne tatanaki ai e kiona?” Tokologa ne manatu ko e tau aolu ko e tau mena ne tatanaki ai e kiona. Manamanatu la kua fano a koe ke he tau mena tatanaki nei ke tohi hifo e tau kapa kiona kehekehe nei mo e ke kumikumi ko e o mai i fe a lautolu? Ne talahau he enesaikolopetia saiene: “Ko e foliga mo e tupumaiaga he vala vai tuli, ne lata ke fakalagalaga aki e tuli he tau hihina ikiiki he aolu he fuafuaaga ke kavi -40°F (-40°C), kua nakala maama mitaki ia.”—Salamo 147:16, 17; Isaia 55:9, 10.
7. Lahi fefe e iloilo he tagata hagaao ke he uha?
7 Ka e kua e uha? Ne huhu e Atua ki a Iopu: “Kua fai matua tane nakai e uha? ko hai foki ne fanau ai e tau tulutā he hahau?” Ne talahau he enesaikolopetia agaia ni: “Ha ko e halahu he tau fakaholoaga he pulagi mo e kehekeheaga lahi he ahua mo e valavala he ea, kua nakai maeke ke fakamaama fakamatafeiga e talahauaga ke he puhala ne tupu mai e tau aolu mo e hahau tuli.” Talahau fakalapalapa ai, kua foaki he tau saienetisi e tau talahauaga fakamatafeiga, ka kua nakai fakaai ia lautolu ke fakamaama katoatoa e uha. Ka e, iloa e koe kua aoga lahi e uha ke to, ke fakamalu aki e lalolagi, fakamoui e tau akau, ke ha ha i ai e tau mena momoui mo e fiafia.
8. Ko e ha ne latatonu ai e tau kupu ha Paulo ne fakamau he Gahua 14:17?
8 To talia nakai a koe mo e fakaotiaga he aposetolo ko Paulo? Ne fakamalolo e ia falu ke kitia he tau mana mua ue atu nei e fakamoliaga hagaao ki a Ia i tua ia lautolu. Ne talahau e Paulo hagaao ki a Iehova ko e Atua: “Kua nakai toka noa ai e ia ke nakai fai mena ke talahau ai a ia, he hana totonu mai, mo e foaki mai e tau uha mai he lagi kia tautolu, mo e tau tau ke tupu ai e tau fua, he fakamakona foki e ia e tau loto ha tautolu ke he tau mena kai mo e fiafia.”—Gahua 14:17; Salamo 147:8.
9. Fakakite fefe he tau mana mua ue atu he Atua e malolo lahi hana?
9 Nakai fakauaua kua ha ha ia Ia ne Taute e tau mana mua ue atu mo e tau gahua aoga pihia e pulotu katoatoa mo e malolo mahaki. Ke he malolo hana, manamanatu ke he mena nei: Kua talahau mai kua kavi ke 45,000 afa pakulagi he tau aho oti, kua molea e 16 miliona he tau. Kakano he mena nei, kua tutupu ai ke kavi 2,000 he magaaho tonu nei ni. Ko e tau aolu he taha ni e afa pakulagi ne gahuahua mo e malolo lahi ke tatai ke he hogofulu po ke loga atu he tau pomu niukilia ne fakato he Felakutaki II he Lalolagi. Kitia e koe e malolo ia ko e uhila. Kehe mai he ofoofogia, kua lagomatai he uhila ke fakatupu e tau vahega naitorotene ne hifo ke he kelekele, moua ai he tau akau mo fetalaisa. Ti ko e uhila ko e fakatataaga he malolo lahi, ka kua ta mai foki e tau aoga moli.—Salamo 104:14, 15.
Ko e Heigoa e Fakahikuaga ki a Koe?
10. Tali fefe e koe e tau huhu ne moua ia Iopu 38:33-38?
10 Manamanatu la ko koe a Iopu, ha ne huhu atu e Atua Mua ue Atu ki a koe. Liga talia e koe ha i ai e laulahi he tau tagata ne manamanatu tote ke he tau mana mua ue atu he Atua. Ne huhu mai e Iehova ki a tautolu e tau huhu ne totou e tautolu ia Iopu 38:33-38. “Kua iloa nakai e koe e tau fakatufono he lagi? po ke tuku atu kia e koe hana pule ke he lalolagi? Kua maeke kia kia koe ke fakahoko hake e leo hau ke he tau aolagi, kia lofia ai a koe he tau vai loga? Kua maeke kia kia koe ke fakafano atu e tau uhila, ti o ai a lautolu, mo e pehe atu a lautolu, kia koe, Ko mautolu hanai? Ko hai kia ne tuku mai e iloilo ki loto he tagata? Po ko hai foki kua foaki mai e manamanatu ke he loto? Kua maeke kia hai he hana iloilo ke totou ai e tau aolagi? Po ke maeke foki kia hai ke liligi hifo e tau lupo he lagi? Ka kua liu pelapela ai e efuefu, mo e pipiki fakalataha ai e kelekele?”
11, 12. Ko e heigoa falu a mena ne fakamoli aki ko e Atua a Ia ne Taute e tau mana mua ue atu?
11 Kua tutala ni a tautolu ke he tau manatu gahoa ne huhu e Elihu ki a Iopu, mo e mailoga e tautolu falu huhu ne manako a Iehova ke tali e Iopu “po ke tagata malolo.” (Iopu 38:3) Talahau e tautolu ko e “falu” ha ko e tau veveheaga 38 mo e 39, ne fakamahao atu e Atua ke he falu puhala foki he tufugatiaaga. Ke fakatai ki ai, ko e tau liliaga fetu he lagi. Ko hai ne iloa katoa e tau matafakatufono ha lautolu? (Iopu 38:31-33) Ne fuluhi e Iehova e manamanatuaga ha Iopu ke he falu he tau manu—ko e leona mo e oreva, ko e koti he mouga mo e asini vao, ko e rema mo e renani, ko e solofanua malolo mo e aeto. Kua tuga pehe e Atua ki a Iopu kua age nakai e ia e tau aga ma e tau manu kehekehe nei, toka ai a lautolu ke momoui mo e ke tupuolamoui. Liga to fiafia a koe he kumikumi ke he tau veveheaga nei, mahomo atu ka loto a koe ke he tau solofanua po ke falu a manu foki.—Salamo 50:10, 11.
12 Maeke foki ia koe ke kumikumi ki a Iopu tau veveheaga 40 mo e 41, haia ne liu a Iehova ole ki a Iopu ke tali e tau huhu hagaao ke he tau mena momoui ne ua. Maama e tautolu a laua nei ko e hipotomati (Pehemota), kua lahi makimaki mo e malolo e tino, mo e kolokataila matakutakuina he vailele (Leviatana). Ke he puhala ni ha laua ko e tau tufugatia ofoofogia ne kua lata ke manamanatu ki ai. Kia o mai a tautolu mogonei ke kitia e fakahikuaga ke hohoko ki ai a tautolu.
13. Lauia fefe a Iopu he tau huhu he Atua, mo e lauia fefe ai a tautolu?
13 Fakakite mai ia Iopu veveheaga 42 ki a tautolu e hufiaaga he tau huhu he Atua ki a Iopu. He magaaho fakamua ne mua atu e manamanatu ha Iopu ki a ia ni mo e ke he falu. Ka e he talia e akonakiaga ne ha i ai he tau huhu he Atua, ne hiki e Iopu e manamanatuaga hana. Ne talahau e ia: “Kua iloa e au kua maeke kia koe [Iehova] e tau mena oti kana, ti nakai maeke foki ke lekua ai ha mena kua finagalo ki ai a koe. Ko hai kia hanai kua fakapouli ai hau a pule mo e nakai iloa? Ko e mena ia kua vagahau atu au mo e nakai manamanatu, ko e tau mena ne mua ue atu he uka kia au, nakai ni iloa e au.” (Iopu 42:2, 3) E, he mole e manamanatu ke he tau mana he Atua, ne talahau a Iopu kua mua ue atu e tau mena nei ki a ia. He mole e liu onoono ke he tau tufuga ofoofogia nei, kua lata ia tautolu ke nava foki ke he pulotu mo e malolo he Atua. Ke hoko ki fe? Ko e nava teao kia ke he malolo mua ue atu mo e iloilo ha Iehova? Po kua lata kia ia tautolu ke mua atu e logonaaga?
14. Tali fefe a Tavita ke he tau mana mua ue atu he Atua?
14 Ia Salamo 86, moua e tautolu e tau talahauaga pihia foki ne taute e Tavita, ne talahau he salamo fakamua atu: “Kua talahau he lagi e lilifu he Atua; kua fakakite foki he pu lagi likoliko e gahua he hana tau lima. Kua tala age he taha aho e kupu ke he taha aho, kua fakailoa foki he taha po e iloilo ke he taha po.” (Salamo 19:1, 2) Ka e lafi foki e Tavita. Ia Salamo 86:10, 11, ne totou e tautolu: “Ha kua homo ni a koe, kua eke e koe e tau mana, ko koe hoko koe ni ko e Atua. Iehova na e, kia fakakite mai e koe hāu a puhala, to fano au ke he tonu mai ia koe, kia fakamau e koe hoku loto ke matakutaku ke he hāu a higoa.” Ko e ofogia ha Tavita ke he Tufuga ma e tau mana mua ue atu oti Hana kua putoia ai e fuafuaaga latatonu he matakutaku fakalilifu. To mailoga e koe e kakano. Ne nakai manako a Tavita ke fakaita a Ia ne maeke ke taute e tau mana mua ue atu nei. Nakai manako foki a tautolu.
15. Ko e ha ne lata tonu ai e matakutaku fakalilifu ha Tavita ke he Atua?
15 Liga iloa e Tavita, ha kua ha ha he pule he Atua e malolo mua ue atu, to fakaaoga ai e ia ke he ha tagata ne nakai fiafia a ia ki ai. Ki a lautolu, ko e malaia lahi a ia. Ne huhu e Atua ki a Iopu: “Ne hu atu nakai a koe ke he tau mena ne tatanaki ai e kiona, ne kitia nakai e koe e tau mena ne tatanaki ai e uha tuli. Ko e tau mena ia kua toka e au ke lata ai mo e vaha matematekelea, mo e aho foki ke tau ai ke he tau?” Ko e kiona, uha tuli, tau afa uha, matagi, mo e uhila kua ha ha oti he mena tatanaki hana. Ti ko e tau malolo ofoofogia mua ue atu ha e tau mena ia!—Iopu 38:22, 23.
16, 17. Fakataitai he heigoa e malolo ue atu he Atua, mo e fakaaoga fefe e ia e malolo ia he vaha kua mole?
16 Liga manatu e koe falu matematekelea ne fakatupu he taha he tau mena nei—ko e afa lahi, tiotio, afa uha tuli, po ke puke namo e vai. Ke fakataitai, tata atu ke he matahiku he tau 1999, ne to e afa lahi ke he fahi toga ki lalo i Europa. Ne fakaofo aki foki e tau tagata pulotu kumikumi ke he matagi. Ne hoko e malolo he matagi ke 200 e kilomita he matahola, fulufuluhi e tau afe he tau tua fale, fakaveveli e tau pou hila, mo e fulufuluhi e tau tulaki. Lali ke kitia e mena nei: He magahala he afa ia ne huohuo po ke papaki ua ke kavi 270 e miliona akau, 10,000 he paaka ni i Versailles, i fafo ha Paris. Totou miliona he tau fale ne nakai fai hila. Teitei 100 ne mamate. Kua tutupu e tau mena oti ia he tama magaaho tote. Ko e malolo ha ia!
17 Liga talahau he taha e tau afa ko e tau mena tutupu fakalutukia, nakai pauaki, mo e fakahanoa. Ka e heigoa mogoia ka tupu, kaeke fakahoko e Ia ne malolo katoatoa e tau mana mua ue atu he fakaaoga e tau malolo pihia he puhala tau taofi mo e pauaki? Ne taute e ia e tau mena pihia he vaha ha Aperahamo, ne mailoga kua fuafua he Iki Fakafili he lalolagi katoa e mahani kelea he tau maga ua, ko Sotoma mo Komora. Kua kelea lahi a lautolu ati hohoko e tau tagi ke he Atua, ne laveaki e tau tagata loto hakohako mai he tau maga kelea ia. Ne hokotaki mai he fakamauaga tuai: “Ti fakato hifo poke uha e Iehova e taio . . . mo e afi mai ia Iehova mai he lagi,” ki luga he tau maga ia. Ko e mana mua ue atu a ia, he laveaki a lautolu ne loto hakohako mo e fakaotioti a lautolu ne mahani kelea muitui.—Kenese 19:24.
18. Ko e heigoa e tau mana mua ue atu ne tuhi e Isaia veveheaga 25 ki ai?
18 He magaaho fakamui, ne fakahoko he Atua e fifiliaga ke he maga tuai a Papelonia, liga ko e maga ne hagaao ki ai ia Isaia veveheaga 25. Ne talahau tuai he Atua to moumou ai e maga: “Kua eke e koe e maga mo toloaga maka; ko e maga nofo taue kua eke mo tau fala malolo; ko e fale iki he tau tagata kehe ke nakai eke mo maga; nakai liu ati a ia tukulagi.” (Isaia 25:2) Kua fakamoli he tau tagata o kitekite he vaha fou nei ke he maga i Papelonia e mena nei. Ko e mena tupu noa kia e fakaotiotiaga ha Papelonia? Nakai. Ka kua lata ia tautolu ke talia e fuafuaaga ha Isaia: “Iehova na e, ko e haku a Atua a koe; to nava atu au kia koe; to fakaheke atu au ke he hau a higoa; ha kua eke e koe e tau mena ke ofo ai; ko e tau mena ne pule ai tali mai ne aho mua ko e fakamoli ia, to moli ni.”—Isaia 25:1.
Tau Mana Mua Ue Atu he Vaha Anoiha
19, 20. Ko e heigoa e fakamoliaga ia Isaia 25:6-8 ne amanaki a tautolu ki ai?
19 Ne fakamoli he Atua e perofetaaga na i luga he vaha kua mole, ti to mua ue atu e mana ka taute e ia he vaha anoiha. He vala tala nei, ne totoku ai e Isaia e “tau mena ke ofo ai” he Atua, ne kitia e tautolu e perofetaaga moli ne nakala fakamoli ia, ke tuga e fakafiliaga ki a Papelonia nukua fakamoli. Ko e heigoa e “mena ke ofo ai’ ne mavehe mai? Ne talahau he Isaia 25:6: “To eke ai e Iehova Sapaota ke he mouga nai e galue ke he tau mena mitaki ma e tau motu oti, ko e galue e uaina ne toka ai e tau kele; ko e tau mena mitaki ue atu; ko e uaina ne toka ai mo e tau kele kua hakahaka.”
20 Ko e perofetaaga ia to tupu moli ai he lalolagi fou he maveheaga he Atua, ha i mua ni ia tautolu. He magaaho ia, to totoka mai e tau tagata he tau mena vihi ne fakamamafa aki e tokologa he mogonei. Ti mavehe mai he perofetaaga ia Isaia 25:7, 8 to fakaaoga he Atua e malolo tufugatia hana ke taute aki taha he tau mana mua ue atu lahi ne nakala kitia ia: “To fakaoti tukulagi e ia e mate; to holoholo kehe foki he Iki ko Iehova e tau hihina mata mai he tau mata oti; to uta kehe foki e ia e mena ke mā ai hana motu ke he lalolagi oti ni; ha kua vagahau mai ai e Iehova.” Ne futiaki mai he aposetolo ko Paulo he magaaho fakamui e tau kupu ia mo e fakaaoga ai ke he magaaho ka ta mai he Atua a lautolu ne mamate ke he moui, ko e liu fakatu mai he tau tagata mamate. Ko e mana mua ue atu ha a ia mogoia!—1 Korinito 15:51-54.
21. Ko e heigoa e tau mana mua ue atu ka taute he Atua ma lautolu ne mamate?
21 Taha kakano foki ka galo ai e tau hihina mata ha ko e mena to uta kehe mai he tau tagata e tau tatalu ha lautolu. He nofo a Iesu he lalolagi, ne fakamalolo e ia e tokologa—liu fakamaama e tau mata he tau mata pouli, liu logona e tau teligatuli, mo e fakamalolo a lautolu ne matulituli. Ne talahau he Ioane 5:5-9 ne fakamalolo e ia e tagata ne kulikuli ke he 38 e tau tau. Manatu a lautolu ne onoono ko e mana ofoofogia, po ke mua ue atu anei. E kua pihia moli! Ka e tala age a Iesu ki a lautolu to mua ue atu ai ka liu fakatutu mai e ia a lautolu ne mamate: “Aua neke ofo a mutolu he mena ia, ha ko e mena hoko ke he aho ke logona ai ke he hana leo a lautolu katoa ha he tau tukuaga, mo e o mai ai. Ko lautolu ne mahani mitaki, to tutu mai ke he moui.”—Ioane 5:28, 29.
22. Kua lata he ha e tau tagata nonofogati mo e matematekelea ke fai amaamanakiaga?
22 Kua amanaki moli e mena ia ke tupu ha ko ia ne mavehe mai ko Iehova. Kia mauokafua, ko e magaaho ka fakagahuahua mo e fakaaoga fakamitaki e ia e malolo fakafou hana, to homo ue atu e mena ka kitia. Ne tuhi e Salamo 72 ke he mena ka taute e ia he puhala he Tama Patuiki hana. Mogoia ka tupuolamoui a ia ne loto hakohako. To monuina lahi ai. To laveaki he Atua e tau tagata nonofogati mo e matematekelea. Ne mavehe mai e ia: “To ha i ai e puke aloalolima he tau saito ke he motu, ki luga he fuga mouga; ti gatiti ai hana tau fua tuga a Lepanona [i tuai]; to tupuolamoui e tau tagata he maga tuga ne tau lau kou kelekele.”—Salamo 72:16.
23. Ko e heigoa kua lata he tau mana mua ue atu he Atua ke omoi a tautolu ke taute?
23 Kitia maali ai, kua lata ia tautolu ke manamanatu ke he tau mana mua ue atu oti ha Iehova—tau mena ne taute e ia he vaha kua mole, tau mena ha ne taute e ia he vaha nei, mo e tau mena ka taute e ia he vaha ne tata mai anoiha. “Kia fakamonu kia Iehova ko e Atua, ko e Atua a Isaraela; hokoia ni ne eke mana. Kia fakaheke ke he hana higoa lilifu tukulagi ni; kia puke e lalolagi oti ke he hana lilifu; Amene mo Amene.” (Salamo 72:18, 19) Kua lata ai e mena ia ke eke mo matapatu tala he tau fakatutalaaga ha tautolu ke he tau magafaoa mo e falu foki. E, kia o mai a tautolu ke “tokutoku atu hana lilifu ke he tau motu kehe, mo e hana tau mana ke he tau motu oti kana”—Salamo 78:3, 4; 96:3, 4.
To Tali Fefe e Koe?
• Peehi fefe he tau huhu ki a Iopu e ku he iloilo he tagata?
• Ko e heigoa e tau fakafifitakiaga he tau mana mua ue atu he Atua ne fakamaama mai ia Iopu tau veveheaga 37-41 ne nava lahi e koe?
• Kua lata ke tali fefe a tautolu he mole e manamanatu ke he tau mana mua ue atu he Atua?
[Tau Huhu he Fakaakoaga]
[Tau Fakatino he lau 14]
Ko e heigoa e fakahikuaga hau hagaao ke he kehekehe lahi he tau kapakapa kiona mo e malolo homo ue atu he uhila?
[Credit Line]
snowcrystals.net
[Tau Fakatino he lau 17]
Toka e tau mana mua ue atu he Atua mo vala he fakatutalaaga tumau hau