Kautū Fēfē ke he Fī ko e Mate?
PETE kua nakai omaoma ha tautolu a tau matua fakamua ko Atamu mo Eva ti hoko mai e agahala mo e mate ke he tau tagata oti kana, nakai hiki he mena ia e finagalo he Atua ma e tau tagata. He Tohi Tapu katoa haana, talahau tumau he Atua kua nakai hiki e finagalo haana.
-
“To eke ni e motu ma e tau tagata tututonu, to nonofo muatua ai a lautolu.”—Salamo 37:29.
-
“To fakaoti tukulagi e ia e mate; to holoholo kehe foki he Iki ko Iehova e tau hihina mata mai he tau mata oti.”—Isaia 25:8.
-
“Ko e fi fakamui ke fakaotioti ai ko e mate haia.”—1 Korinito 15:26.
-
“Ti nakai tuai fai mate, po ke fakatutuku, po ke tagi, ti nakai tuai fai matematekelea.”—Fakakiteaga 21:4.
Puhala fe ka “fakaoti tukulagi e ia [Atua] e mate,” ti “fakaotioti” e fī ko e mate? Fakakite fakamaali he Tohi Tapu ko e “tau tagata tututonu, to nonofo muatua ai a lautolu.” Ka e pehē foki “nakai ni ha ha i ai ha tagata tututonu ke he lalolagi, kua eke e mahani mitaki.” (Fakamatalaaga 7:20) Ke kautū ke he mate, to tiaki kia he Atua e tau tutūaga ni haana? Nakai fakaai! To nakai taute e ia pihia, ha ko e “Atua kua nakai maeke ke pikopiko.” (Tito 1:2) Ko e heigoa mogoia ka taute he Atua ke fakamooli e finagalo fakaalofa haana he tufugatia e tau tagata?
‘TO FAKAOTI TUKULAGI HE ATUA E MATE.’—ISAIA 25:8
KAUTŪ KE HE MATE HA KUA TOTOGI E LUKUTOTO
Taute e Iehova ko e Atua e foakiaga fakaalofa ke laveaki e tau tagata mai he mate—he totogi e lukutoto. Ko e kakano he lukutoto ko e taha mena ne tatai e totogi ke lata mo e tau mena ne malona po ke fakamooli e poakiaga he fakafili tonu. Ha kua agahala e tau tagata oti kana ti kua fakahala ke mamate, talahau fakatonu he Tohi Tapu: “Nakai fakai ke maeke ia taha ia lautolu ke fakafua e matakainaga hana, po ke ta atu ke he Atua e palepale māna, (ha ko e mena uka lahi ni e palepale . . . ha lautolu; ti nakai maeke ni tukulagi).”—Salamo 49:7, 8.
He mate e tagata nakai mitaki katoatoa, kua totogi ni e ia e tau agahala haana; nakai maeke a ia ke laveaki a ia, po ke totogi e ia e tau agahala he falu. (Roma 6:7) Lata a tautolu mo e tagata mitaki katoatoa kua nakai agahala ke foaki haana moui, nakai ma e tau agahala ni haana, ka e ma e tau agahala ha tautolu.—Heperu 10:1-4.
Pihia tonu e fakatokaaga ne taute he Atua. Fakafano mai e ia e Tama haana ko Iesu he lagi ke fanau ke he lalolagi, ko e tagata mitaki katoatoa ne nakai agahala. (1 Peteru 2:22) Pehē a Iesu kua hau a ia ke “foaki atu hana moui, ko e lukutoto ke hukui aki e tau tagata tokologa.” (Mareko 10:45) Ne mate a ia ke kautū ke he fī ko e mate ke maeke a tautolu ke moua e moui.—Ioane 3:16.
MAGAAHO FE KA KAUTŪ KE HE MATE?
Mogonei, he fakamooliaga he perofetaaga he Tohi Tapu, kua nonofo a tautolu he “tau aho uka,” fakamooli ai kua nonofo a tautolu he “tau aho fakamui” he fakatokaaga kelea nei. (2 Timoteo 3:1) To fakaotioti e tau aho fakamui ka hoko mai e “aho ke fakafili ai mo e mahakava ai e tau tagata matahavala.” (2 Peteru 3:3, 7) Ka ko e tau tagata ne fakaalofa ke he Atua to hao he moumouaga ia ti moua e monuina ko e “moui tukulagi.”—Mataio 25:46.
Totou miliona ka moua e magaaho ke momoui tukulagi ka fakaliu tu mai a lautolu. Ne taute e Iesu Luka 7:11-15) Pehē foki e aposetolo ko Paulo: “Ha ha ia au e amaamanaki ke he Atua, . . . ke liu foki tutu mai a lautolu kua mamate, ko lautolu ne tututonu katoa mo lautolu ne hepehepe.” Ko e amaamanakiaga mauokafua nei ko e fakakiteaga ofoofogia he fakaalofa he Atua ma e tau tagata.—Gahua 24:15.
e fakaliu tu mai he fina atu a ia ke he maaga ko Naina. Taha ni e tama taane he fifine takape ti kua mate tuai, ne “fakaalofa hohofi” a Iesu mo e fakaliu tu mai a ia ke he moui. (Totou piliona ka amaamanaki ke momoui tukulagi. Pehē e Tohi Tapu: “To eke ni e motu ma e tau tagata tututonu, to nonofo muatua ai a lautolu.” (Salamo 37:29) He magaaho ia, to logona hifo mooli e lautolu e tau kupu omoomoi ka e mafanatia ne tohi hifo he aposetolo ko Paulo he kavi 2,000 tau kua mole: “Ko e mate na e, ko fe hau a huki? Ko e tukuaga [mate] na e, ko fe hau a kautu?” (1 Korinito 15:55) To kautū mooli ai ke he fī malolō lahi mahaki he tagata ko e mate!