1. Ko e ha e magaaho kua nonofo ai a tautolu ne kehe mai he falu magaaho foki?

KUA nonofo a tautolu he magaaho ne kehe lahi mai he falu magaaho he fakamauaga tuai he tagata. Fakapotopoto e Iehova e moto tagata tokologa “mai he tau motu oti, mo e tau faoa, mo e tau tagata kehekehe, mo e tau vagahau kehekehe,” tuga ni ne talahau tuai he Tohi Tapu. Ko lautolu ko e “motu malolo” he tau tagata fiafia ne molea e valu e miliona hane “fekafekau [ke he Atua] ke he aho mo e po.” (Fakakiteaga 7:9, 15; Isaia 60:22) Nakaila tokologa pihia ia e tau tagata kua fakaalofa ke he Atua mo e tau tagata.

2. Ko e heigoa e vahega fakaalofa hehē ne kitia e tautolu he tau tagata ne nakai ko e tau kapitiga he Atua? (Kikite fakatino he kamataaga.)

² Ka e talahau tuai foki he Tohi Tapu ke he magahala ha tautolu, ko e tau tagata ne nakai kapitiga mo e Atua to hehē e puhala fakaalofa ha kua lotokai ai. Tohi he aposetolo ko Paulo ko e tau aho fakamui to “ofaofa he tau tagata a lautolu ni, to velevele koloa,” mo e “to manako lahi ke he tau mena ke fiafia ki ai, ka e manako tote ke he Atua.” (2 Timoteo 3:1-4) Ko e vahega fakaalofa nei ne manamanatu ni ki a ia kua nakai tatai mo e fakaalofa  ke he Atua. Ko e tutuli e tau foliaga lotokai ne nakai taute e tagata ke fiafia, ka e manatu a ia to pihia. Ka kua feaki ai e lalolagi lotokai mo e taute e moui ke uka ma e tau tagata oti.

3. Ko e heigoa ka kumikumi e tautolu he vala tala nei? Ko e ha?

³ Iloa he aposetolo ko Paulo ko e fakaalofa lotokai to tupu lahi mo e to hagahaga kelea ma e tau Kerisiano. Ti hataki e ia a lautolu ke “kalo kehe,” po ke fakamamao mai ia lautolu ne fakakite e fakaalofa lotokai. (2 Timoteo 3:5) Ka e nakai maeke a tautolu ke kalo kehe katoatoa mai he tau tagata pihia. Ti ko e heigoa ka taute e tautolu ke puipui mai he tau aga he tau tagata ne viko takai ia tautolu mo e fakafiafia a Iehova, ko e Atua he fakaalofa? Kia kitekite la ke he kehekehe he fakaalofa ne manako e Atua ki a tautolu ke moua mo e fakaalofa ne fakamaama he 2 Timoteo 3:2-4. Ti onoono hifo ki a tautolu ni mo e kitia e puhala ka fakakite e tautolu e fakaalofa ke moua e tautolu e fiafia mo e loto fakaaue mooli.

4. Ko e ha ne nakai hepe ke fai ofaofa ki a tautolu ni?

⁴ Tohi e Paulo: “Ofaofa he tau tagata a lautolu ni.” Kakano kia e mena nei kua hepe ke ofaofa e tautolu a tautolu? Nakai, ko e aga pauaki mo e kua lata ke ofaofa e tautolu a tautolu. Tufuga e Iehova a tautolu ke he puhala ia. Pehē a Iesu: “Kia fakaalofa atu a koe ke he tagata ne katofia a mua, kia tuga a koe kia koe ni.” (Mareko 12:31) Ti nakai maeke a tautolu ke fakaalofa ke he falu tagata ka nakai ofaofa e tautolu a tautolu. Tala mai foki he Tohi Tapu ki a tautolu: “Kua lata pihia foki ke he tau tane ke fakaalofa age ke he tau hoana ha lautolu, tuga e tau tino ha lautolu. Ko ia kua fakaalofa ke he hana hoana, kua fakaalofa a ia kia ia ni. Ha kua nakai fakai taha ke fakavihia hana a tino, ka kua fagai mo e leveki ai e ia.” (Efeso 5:28, 29) Maaliali ai kua lata a tautolu ke fai ofaofa ki a tautolu ni.

5. Fakamaama fēfē e koe e tau tagata ne ofaofa lahi e lautolu a lautolu ni?

⁵ Ko e ofaofa he tagata a ia ni nukua totou e tautolu ia 2 Timoteo 3:2 ne nakai ko e fakaalofa hako po ke mitaki. Kua lotokai e fakaalofa ia. Ka ofaofa lahi he tagata a ia, kua lahi mahaki e manamanatu haana ki a ia ni. (Totou Roma 12:3.) Kua mua atu e leveki haana ki a ia ni ka e nakai ke he falu tagata. Ka fai mena ne hepe, ne tukupau e ia e falu ka e nakai ko ia. Taha e fakamaamaaga he Tohi Tapu ne fakatatai e tagata pihia ke he manu totolo ko e hedgehog ne fa pukupuku fakaveliveli ke mafana he tau fulufulu molū ka e fakakite ni ke he falu e tau fotofoto matila. Ko e tau tagata pihia kua nakai fiafia mooli.

6. Ko e heigoa e tau fua mitaki ne moua mai ka fakaalofa a tautolu ke he Atua?

⁶ Falu pulotu ke he Tohi Tapu ne talitonu kua totoku e Paulo e ofaofa fakamua he tagata a ia ni ne kua tupu mai e tau mahani kelea ne talahau foki e ia. Ke he taha faahi, ko e fakaalofa ne manako e Atua ki a tautolu ke moua to tupu mai e tau mahani mitaki. Matutaki ai ke he fiafia, mafola, fakauka, totonu, mahani mitaki, tua, mahani molu, mo e manako fakalatalata. (Kalatia 5:22, 23) Tohi he salamo: “Uhoaki e motu kua eke a Iehova mo Atua ha  lautolu.” (Salamo 144:15) Ko Iehova ko e Atua fiafia ti fiafia foki e tau tagata haana. Ko lautolu kua ofaofa lahi e lautolu a lautolu mo e manamanatu ni ke he tau mena ka moua e lautolu, ne kehe mai he tau fekafekau ha Iehova ha kua fiafia a lautolu ke foaki atu ke he falu.​—Gahua 20:35.

7. Ko e heigoa e tau hūhū ka lagomatai a tautolu ke hakahaka ha tautolu a fakaalofa ke he Atua?

⁷ Iloa fēfē e tautolu kua malolō lahi e ofaofa e tautolu a tautolu ni ke he fakaalofa ma e Atua? Manamanatu ke he fakatonuaga pulotu nei: “Aua neke manatu ha mena mo e fetoko mo e hula noa, ka kia igatia a mutolu mo e manatu he loto fakatokolalo kua mua e faoa oti kia ia; Aua neke takitokotaha mo e manamanatu ke he tau mena hana, ka e takitokotaha mo e manamanatu ke he tau mena he falu.” (Filipi 2:3, 4) Maeke a tautolu ke hūhū hifo: ‘Fanogonogo nakai au ke he fakatonuaga nei? Lali nakai au ke taute e mena ne manako e Atua ke taute e au? Kumi puhala nakai au ke lagomatai e falu he fakapotopotoaga mo e he gahua fakamatala?’ Nakai mukamuka tumau ke foaki e magaaho mo e malolō ha tautolu. Liga kakano ai kua lata a tautolu ke gahua fakamalolō mo e toka kehe e falu mena ne fiafia a tautolu ki ai. Ka e nakai fai mena ka fakafiafia a tautolu he iloa kua fiafia e Pule Katoatoa he lagi mo e lalolagi ki a tautolu!

8. Ko e heigoa ne taute he falu Kerisiano ha kua fakaalofa a lautolu ke he Atua?

⁸ Ha kua fakaalofa a lautolu ke he Atua mo e manako ke fekafekau fakalahi ki a ia, falu Kerisiano ne toka e tau gahua tupe ha lautolu ne liga fakamuhukoloa aki a lautolu. Ko Ericka ko e ekekafo ne fifili ke paionia ka e nakai hagaaki ke he gahua fakaekekafo haana. Kua maeke a ia mo e taane haana ke fekafekau ke he loga e tau motu. Pehē a ia: “Ko e tau mena loga ne moua e maua he lagomatai ke he fonua vagahau kehe, fakalataha mo e tau  kapitiga ne moua e maua kua fakaholo ki mua mooli e tau momoui ha maua.” Gahua agaia a Ericka ko e ekekafo ka e fakaaoga e ia e laulahi he tau magaaho mo e malolō haana ke fakaako e tau tagata hagaao ki a Iehova mo e lagomatai e tau matakainaga haana. Talahau e ia ko e mena nei ne tamai ki a ia “e fiafia mooli mo e makona he loto.”

9. Ko e ha kua nakai fiafia e tagata ne manako lahi ke he tau tupe?

⁹ Tohi e Paulo “to velevele koloa” e tau tagata. Fai tau kua mole, ko e paionia i Ireland ne tutala ke he taha tagata hagaao ke he Atua. Ne hafagi he tagata e pesi haana ti totō hake e falu tupe pepa mo e pehē: “Ko e atua haaku a ē!” Pete he liga nakai talahau he tau tagata ka e tokologa ia lautolu ne manatu pihia. Ne manako lahi a lautolu ke he tau tupe mo e tau mena ka fakatau aki. Ka e hataki he Tohi Tapu: “Ko ia kua manako ke he ario, to nakai makona ai a ia ke he ario; ko ia foki kua manako ke he tau koloa loga to nakai makona a ia ke he hana mena ne moua ai.” (Fakamatalaaga 5:10) Ko e tagata kua manako lahi ke he tau tupe ne nakai makona e logonaaga. Manako tumau a ia ke loga e tupe ti foaki e moui haana he lali ke moua ai. Takitaki he mena nei a ia ke he “tau mena matematekelea loga.”​—1 Timoteo 6:9, 10.

10. Ko e heigoa ne talahau he Tohi Tapu hagaao ke he muhu mena mo e nofogati?

¹⁰ Mooli, manako oti a tautolu ke fai tupe. Foaki ai ki a tautolu e mena ke malu ai. (Fakamatalaaga 7:12) Ka e fiafia nakai a tautolu ka lata ni e tupe ne moua ma e tau levekiaga ha tautolu? Ē! (Totou Fakamatalaaga 5:12.) Ko Akuru ko e tama taane a Iake ne tohi: “Aua neke foaki mai e koe kia au e nofogati po ke muhu mena; kia fagai e koe au ke he tau mena kai kua lata mo au.” Mukamuka ke maama e kakano ne nakai manako e tagata nei ke nofogati lahi. Pehē a ia kua nakai manako a ia ke kamatamata ke kaihā, ha ko e kaihā to nakai fakalilifu e Atua. Ka ko e ha ne nakai manako a ia ke muhu mena? Tohi e ia: “Neke makona ni au mo e fakatikai e au a koe, mo e pehe age au, Ko hai kia a Iehova.” (Tau Fakatai 30:8, 9) Liga iloa e koe e tau tagata ne falanaki ke he muhu mena ka e nakai ke he Atua.

11. Ko e heigoa ne talahau e Iesu hagaao ke he tau tupe?

¹¹ Ko e tagata ne manako lahi ke he tau tupe kua nakai maeke ke fakafiafia e Atua. Pehē a Iesu: “Nakai maeke ia taha ke fekafekau ke he na iki tokoua, ha ko e mena fakavihia e ia taha, ka e fakaalofa ke he taha; ka nakai pihia, ti pipiki atu a ia ke he taha, ka e fakateaga ke he taha. Nakai maeke ia mutolu ke fekafekau ke he Atua mo Mamone.” Pehē foki a ia: “Aua neke tanaki e mutolu e tau koloa ma mutolu ke he lalolagi, ha ha i ai e moko mo e pala ke fakaoti ai, ha ha i ai foki e tau tagata kaiha ke keli atu mo e kaiha ai. Ka kia tanaki e mutolu e tau koloa ma mutolu ke he lagi, nakai ha ha i ai e moko mo e pala ke fakaoti ai, nakai ha ha i ai foki e tau tagata kaiha ke keli atu mo e kaiha ai.”​—Mataio 6:19, 20, 24.

12. Maeke fēfē he moui mukamuka ke lagomatai a tautolu ke fekafekau ke he Atua? Talahau e fakatai.

¹² Tokologa e tau fekafekau ha Iehova hane lali ke momoui mukamuka. Moua e lautolu ko e taute pihia kua foaki ki a lautolu e magaaho lahi ke fekafekau ki a Iehova mo e fakafiafia lahi ki a lautolu. Ko Jack ne nofo i United States, ne sela e kaina makimaki mo e pisinisi haana ke maeke a ia ke paionia mo e hoana haana. Fakamaama e ia: “Kua nakai mukamuka ke toka e kaina fulufuluola ha maua i fafo he taone.” Ka kua loga e tau tau ne hau a ia ki kaina mo e hogohogo manava ha ko e tau  lekua he gahua. Pehē a ia: “Paionia tumau e hoana haaku ti fiafia tumau a ia. Fa pehē a ia, ‘moua e au e takitaki mua ue atu!’ Ha kua paionia foki au mogonei, ne gahua tokoua a maua ke he taha e Takitaki ko Iehova.”

13. Ko e heigoa ka lagomatai a tautolu ke kumikumi ke he onoonoaga ha tautolu ke he tupe?

¹³ Ka kumikumi a tautolu ke he onoonoaga ha tautolu ke he tupe, lata ke fakamooli mo e hūhū hifo: ‘Fakakite nakai he moui haaku kua talitonu mooli au ke he mena ne talahau he Tohi Tapu hagaao ke he tupe? Ko e gahua tupe kia ko e mena ne mua e aoga ki a au? Mua atu kia e manamanatu haaku ke he tau koloa he tino ke he fakafetuiaga haaku mo Iehova mo e tau tagata? Talitonu mooli kia a au to foaki e Iehova e tau mena kua lata mo au?’ Mauokafua a tautolu to nakai tiaki e ia a lautolu ne falanaki ki a ia!​—Mataio 6:33.

14. Ko e heigoa e onoonoaga lagotatai ke he tau mena ke fiafia ai?

¹⁴ Talahau tuai foki he Tohi Tapu he tau aho fakamui “to manako lahi ke he tau mena ke fiafia ki ai” e tau tagata. Tuga ni he iloa e tautolu kua nakai hepe ke moua e onoonoaga lagotatai ki a tautolu ni mo e tupe, ti iloa foki e tautolu kua nakai hepe ke fiafia e moui he puhala lagotatai. Talitonu falu tagata kua nakai lata a lautolu ke moua e fiafia, ka e nakai ko e mena nei ne manako a Iehova ma tautolu. Fakamafana he Tohi Tapu e tau fekafekau tua fakamooli he Atua: “Kia fano a a koe, kia kai a hāu a tau mena kai mo e olioli, kia inu foki hāu a uaina mo e loto fiafia.”​—Fakamatalaaga 9:7.

15. Ko e heigoa e kakano ke “manako lahi ke he tau mena ke fiafia ki ai”?

¹⁵ Ia 2 Timoteo 3:4 ne tutala hagaao ki a lautolu ne manako lahi ke he tau mena ke fiafia ki ai ka e toka kehe e Atua he tau momoui ha lautolu. Mailoga kua nakai pehē e kupu tohi kua manako lahi e tau tagata ke he tau mena ke fiafia ka e nakai pihia ke he Atua. To kakano e mena ia kua tote e fakaalofa ha lautolu ke he Atua. Pehē e kupu tohi “ka e” nakai ke he Atua. Taha e pulotu ne tohi ko e kupu nei “kua nakai kakano mooli kua fakaalofa foki a lautolu ke he Atua. Kakano ai kua nakai fai fakaalofa a lautolu ke he Atua.” Ko e hatakiaga malolō lahi anei ke he tau tagata ne manako lahi ke he tau mena ke fiafia ai. Fakamaama he Tohi Tapu ko lautolu ne manako lahi ke he tau mena ke fiafia ki ai kua tuga a lautolu kua “o atu ai” ti putoia he tau mena fakafiafia he mouiaga nai.​—Luka 8:14.

16, 17. Ko e heigoa e fakafifitakiaga ne fakatoka e Iesu ke he onoonaga haana he tau mena ke fiafia ai?

¹⁶ Fakakite e Iesu ki a tautolu e kakano ke lagotatai ke he tau mena ke fiafia ai. Fina atu a ia ke he “taonaga” mo e “kaiaga mena lahi.” (Ioane 2:1-10; Luka 5:29) He taonaga, ne nakai lahi e uaina ti taute e Iesu e mana mo e fakafaliu e vai ke he uaina. Taha mogo foki ne tuhituhi he tau tagata a Iesu he kai mo e inu, ti talahau fakamaali e ia kua nakai lagotatai e onoonoaga he tau tagata ia.​—Luka 7:33-36.

¹⁷ Ka e nakai eke e Iesu e tau mena ke fiafia ai ke mua atu he moui haana. Tuku fakamua e ia  a Iehova mo e taute e tau mena oti kua maeke a ia ke lagomatai e falu. Ne makai a ia ke mate ke he puhala mamahi lahi he akau ke fakahao e tau tagata. Tala age a Iesu ki a lautolu ne manako ke mumui ki a ia: “Uhoaki a mutolu ka faikupu kelea a lautolu, mo e favale kia mutolu, mo e tukumale pikopiko a lautolu kia mutolu ke he tau mena kelea oti ha ko au. Kia kolikoli a mutolu mo e fiafia ni; ha ko e ha ha he lagi ha mutolu a palepale kua lahi; ha ko e mena favale pihia a lautolu ke he tau perofeta ne mumua ia mutolu.”​—Mataio 5:11, 12.

18. Ko e heigoa e tau hūhū ka lagomatai a tautolu ke kumikumi ke he lahi e manako ha tautolu ke he tau mena ke fiafia ai?

¹⁸ Ko e heigoa ka lagomatai a tautolu ke kumikumi ko e lahi fēfē e manako ha tautolu ke he tau mena ke fiafia ai? Hūhū hifo ki a tautolu: ‘Kua mua atu kia e fakafiafiaaga ki a au ke he tau feleveiaaga mo e gahua he fonua? Makai nakai au ke fakatoka kehe falu mena ne fiafia au ki ai ha kua manako au ke fekafekau ke he Atua? Ka fifili e au e fakafiafiaaga, manamanatu nakai au ke he puhala ka onoono a Iehova ke he tau fifiliaga haaku?’ Ha kua fakaalofa a tautolu ke he Atua ti manako ke fakafiafia a ia, kua mataala a tautolu ke kalo kehe mai he tau mena ne iloa e tautolu kua hepe ti pihia foki mo e tau mena kua manatu a tautolu kua liga nakai fakafiafia a Ia.​—Totou Mataio 22:37, 38.

19. Ko hai ka nakai fiafia mooli?

¹⁹ Kua fakamatematekelea he lalolagi ha Satani e tau tagata kavi ke he 6,000 tau. He tau aho fakamui he fakatokaaga nei, kua puke e lalolagi he tau tagata ne ofaofa e lautolu a lautolu ni, tau tupe, mo e tau mena ke fiafia ai. Manamanatu a lautolu ke he tau mena ha lautolu ka moua ti tuku fakamua e tau manako ni ha lautolu he moui. Ka ko e tau tagata pihia kua nakai fiafia mooli! Kehe ai, pehē e Tohi Tapu: “Uhoaki e tagata ha i ai e Atua a Iakopo mo lagomatai hana; ko e hana amaamanaki ha i ai ia kia Iehova ko e hana Atua.”​—Salamo 146:5.

20. Puhala fe he fakaalofa haau ke he Atua kua fakafiafia a koe?

²⁰ Kua fakaalofa mooli e tau fekafekau ha Iehova ki a Ia, ti tokologa foki he tau tau takitaha ne o mai ke iloa mo e fakaalofa foki ki a Ia. Fakakite he mena nei kua pule e Kautu he Atua mo e to nakai leva ti tamai e tau monuina ne nakai manamanatu a tautolu ki ai! Ka taute e tautolu e tau mena ne manako a Iehova ke taute e tautolu, to fakafiafia e tautolu a ia mo e to tamai he mena nei e fiafia mooli ki a tautolu. Ko lautolu ne fakaalofa ki a Iehova to fiafia tukulagi! He vala tala ka mui mai to kumikumi a tautolu ke he falu he tau mahani kelea ne fua mai ha ko e fakaalofa lotokai. To kitia mogoia e tautolu e kehe he tau mahani nei ke he tau mahani mitaki he tau fekafekau ha Iehova.