Ka. Xnochi religiones mitspaleuiskej xmouika iuan toTajtsin. Biblia kinteneua miyek religiones tlen toTajtsin xkiselia ken kiueyichiuaj. Matikitakan ome tlemach tlen toTajtsin xkuelita itech ken miyekej religiones kiueyichiuaj.

1. Kinueyichiuaj tajtsitsintin

 Biblia kijtoua ika xtlaj ika tepaleui tikinueyichiuas tajtsitsintin (Jeremías 10:3-5; 16:19, 20). Jehová okimijli israelitas: “Maka tikimpiyas oksekimej dioses, aparte de nejua” (Éxodo 20:3, 23; 23:24). a Ijkuak israelitas opeujkej kinueyichiuaj tajtsitsintin “toTEKO sanoyej okualan intechkopa” (Números 25:3; Levítico 20:2; Jueces 2:13, 14).

 Hasta aman toTajtsin xkuelita ijkuak sekimej kinueyichiuaj tajtsitsintin (1 Corintios 8:5, 6; Gálatas 4:8). ToTajtsin kimijlia nochimej akin kinekij kitekichiuiliskej ika maka makichiuakan ijkon ken kichiuaj religiones tlen xmelajkej. Biblia kijtoua: “Xkisakan ne intsajlan on yejuan xtlaneltokaj, niman intech xmoxelokan” (2 Corintios 6:14-17). ToTajtsin xijkon technauatiskiaj tla nochi religiones sa noijki yeskiaj niman nochi techpaleuiskiaj itech matonisiuikan.

2. Kiueyichiuaj toTajtsin ken yejua xkuelita

 Jehová xokuelitak ijkuak israelitas opeuj kinueyichiuaj tajtsitsintin niman opeuj kinelouaj religión tlen melauak iuan tlen xmelauak (Éxodo 32:8; Deuteronomio 12:2-4). Jesús okintlajtlakolmakak akin tlayekanayaj ipan religiones, pampa xkuajli ken kiueyichiujtoyaj toTajtsin. Yejuamej nesiya ika sajnoye tlaneltokayaj, san ika, omexayakyejke katkaj, xmelajkanemiyaj, xteikneliayaj niman xkichiuayaj ken toTajtsin tlanauatia (Mateo 23:23).

 Aman san uelis touikaskej iuan toTajtsin, tla tinemij ipan religión tlen temachtia tlen melauak itech Biblia (Juan 4:24; 17:17; 2 Timoteo 3:16, 17). Religiones akin temachtiaj tlen xuajlauj ipan Biblia, kichiuaj ika miyekej makitlalkauikan toTajtsin. Miyekej kinemiliaj ika Biblia temachtia ika toTajtsin se Trinidad, ika toalma xueli miki niman ika uelis tiaskej ipan infierno kampa titlajyouiskej. San ika, yejuin xmelauak, pampa yejuin tlaneltokiltin okiskej itech on akin kinueyichiuaj tajtsitsintin. Nochimej akin tlaneltokaj itech yejon, xkiueyichiujtokej toTajtsin ken yejua kuelita (Marcos 7:7, 8).

 ToTajtsin kintlauelita religiones akin xkichiuaj tlen temachtiaj (Tito 1:16). Se religión uelis techpaleuis matonisiuikan itech toTajtsin, san ika, para uelis kichiuas yejuin, xnoneki techititis itlaj costumbre noso itlaj iluitl, ka, noneki techititis tlen melauak kichiuas matopatlakan. Biblia kijtoua: “Tla yakaj kinemilia ika kuajli kipiya itlaneltok ixpan Dios niman xkipiya cuidado ken tlajtlatos, sano yejua nokajkayaua niman on tlen kineltoka xitlaj kijtosneki. On tlaneltoktli yejuan xkipiya ijtlakauilistli, yej kipiya chipaualistli ixpan Dios, kijtosneki ika on tlakatl kimpaleuis iknomej niman siuakaualtsitsimej ika on tlen kimpoloua, niman xkichiuas on tlen xkuajli yejuan kichiuaj on tlaltikpaktlakamej” (Santiago 1:26, 27).