• IJKUAK OTLAKAT: 1941

• PAÍS: BENÍN

• TLEN KICHIUAYA: KINPIAYA MIYEKEJ ISIUAUAN NIMAN KINTLAUELITAYA ITEIXPANTIJKAUAN JEHOVÁ

TLEN NIKCHIUAYA:

Onitlakat Cotonou, se ikalpan de Benín. Oninoskalti ipan religión católica, san ika, xkeman niaya misa. Miyekej católicos kinpiayaj miyekej insiuauan pampa ijkuakon notekauiliaya. Nejua onikinpix naui nosiuauan.

Ipan 1970 opeuj nouisokij ne Benín. Pampa niknemiliaya ika yejon kipaleuiskia nokalpan, oninokalakti ipan política niman opeuj nikinpaleuiya. Yejuamej kintlauelitayaj iteixpantijkauan Jehová pampa xnokalaktiayaj ipan política niman nejua onitlapaleui ijkuak opeuj kintlaueltokaj. Ipan 1976 ijkuak okinkixtijkej akin chikauak tenojnotsayaj, oniknemili ika xok keman nokuepaskiaj.

KEN BIBLIA OKICHIUJ MANINOPATLA:

Otlan noixnamikij ipan 1990, niman onechmojkatlachialti ika iteixpantijkauan Jehová akin chikauak tenojnotsayaj, oksejpa onokuepkej. Opeuj niknemilia ika toTajtsin kema kinpaleuiaya. Ipan yejon xiuitl onikpatlak kampa nitekitiya. Se akin iuan nitekitiya iteixpantijkauj Jehová katka, niman opeuj nechnojnotsa itech tlen kineltokaya. Onechititi tlaxeloltin kampa kijtouayaj ika Jehová melajki niman tetlasojtla (Deuteronomio 32:4; 1 Juan 4:8). Pampa onikmat ika toTajtsin ijkon katka, oniknek más nikmatis niman onikseli manechmachtikan itech Biblia.

Nimantsin opeuj niauj tlanechikoltin niman onechmojkatlachialti ika yejuamej melak notlasojtlayaj niman xtechikoitayaj. Ijkuak opeuj más iminuan ninouika, onikitak ika san yejuamej kichiuayaj ijkon ken Jesús (Juan 13:35).

Onikasikamat ika tla niknekiya más niktekichiuilis Jehová, nonekiya nijkauas noreligión. Ouijtika onikitak nijkauas nochi yejon, pampa nechajmanaya tlenon oksekimej kijtoskiaj notech. Pampa Jehová onechpaleui, ika yolik ouel onijkauj nochi yejon.

Nonekiya itlaj okse nikchiuas. Ipan Biblia oniuel ika toTajtsin xkiselia ika yakaj makinpiya miyekej isiuauan (Génesis 2:​18-​24; Mateo 19:​4-6). Jehová san kuajli kita ika yakaj manonamikti iuan san se siuatl, ika yejon kuajli oninonamikti iuan kachtopa nosiuauj ixpan tekiuajkej. Noijki ononek nikinkauas oksekimej nosiuauan, san ika, onikitak ika maka itlaj makinpolo niman makipiyakan tlen nonekiya. Sakin, ome de yejuamej onochiujkej iteixpantijkauan Jehová.

KEN YONECHPALEUI BIBLIA:

Maski nosiuatsin ok católica, kitlakaita ika niktekichiuilia Jehová, niman yokitak ika aman kuajli niteueuentsin.

Yeuejkaui niknemiliaya ika san política ueliskia kiyektlaliskia kampa tinemiyaj, san ika, xijkon opanok. Aman nikmati ika san iTekiuajyo toTajtsin uelis kiyektlalis tlen xkuajli panoua ipan yejuin tlaltikpaktli (Mateo 6:⁠9, 10). Melak niktlasojkamachilia Jehová pampa onechpaleui manikita kenon kuajli ninemis niman niyolpakis.

• IJKUAK OTLAKAT: 1977

• PAÍS: BRASIL

• TLEN KICHIUAYA: TLAYEKANKETL KATKA ITECH SE IGLESIA PENTECOSTAL

TLEN NIKCHIUAYA:

Oninoskalti ipan se kalpan itoka Itu tlen onka ne São Paulo, ompa melak noixmati pampa nochiua tlen xkuajli.

Niauilnemiya, nitlauele katka niman niknemakaya drogas. San ika, onikitak ika tla xninopatlaya ueliskia nechtsakuaskia noso hasta nimikiskia. Yejua ika, nochi onijkauj niman opeuj niauj Iglesia Pentecostal kampa sakin opeuj nitlayekana.

Oniknemili ika ijkon uelis nikinpaleuis oksekimej, ika yejon, opeuj nikpanoltia se programa ipan radio tlen okichiuj melak manechixmatikan. San ika, onikitak ika akin nemiyaj ipan Iglesia kampa niaya xkinemiliayaj kinpaleuiskej oksekimej nion kiueyichiuaskej toTajtsin. Nesiya ika san kinekiyaj notomintiskej. kuakon oniktlalkaui yejon Iglesia.

KEN BIBLIA OKICHIUJ MANINOPATLA:

Ijkuak opeuj ninomachtia imiuan iteixpantijkauan Jehová, onikitak ika yejuamej xijkon katka ken oksekimej religiones. Melak onikmojkaitak ijkuak onikitak ika yejuamej xsan kijtoua ika tetlasojtlaj niman kintlasojtlaj oksekimej, yejuamej yemelak kiteititia ika tlen kichiuaj. Noijki onikuelitak ika xnokalaktiaj ipan política nion ipan guerras (Isaías 2:4). Yejuin onechititi ika yoniknextijka tlaneltokijli tlen melauak, on ojtli pitsauak tlen teuika ipan nemilistli (Mateo 7:​13, 14, TNM).

Onikitak ika tla niknekiya nikyolpaktis toTajtsin nonekiya niyolyemanki yes niman más ninemis iuan nofamilia. Ouijtika onikitak ninopatlas, san ika, Jehová onechpaleui. Ijkuak nosiuatsin akin kachtopa opeuj nomachtia, okitak ika oninopatlak, opeuj más chikaui itlaneltokil nimantsin otikijtokej ika tochiuaskiaj iteixpantijkauan Jehová. Hasta otoapolaktijkej ipan san no yejua tonajli.

KEN YONECHPALEUI BIBLIA:

Nosiuatsin niman nejua tokojtiliaj tikinpaleuiskej yeyimej tokoneuan para manouikakan iuan Jehová. Tinochimej melak tiyolpaki. Niktlasojkamachilia toTajtsin pampa onechpaleui manikixmati tlen temachtia ipan iTlajtol. Biblia uelis kinpaleuis oksekimej, ijkon ken nejua onechpaleui maninopatla. Aman niyolpaki niman nimelajkanemi.

• IJKUAK OTLAKAT: 1957

• PAÍS: AUSTRALIA

• TLEN KICHIUAYA: MELAK OTLAJYOUI IJKUAK KONETL KATKA

TLEN NIKCHIUAYA:

Nikinpiya chikuasen nokniuan niman nejua akin más iniueyi, oninoskalti ne Newcastle tlen onka Nueva Gales del Sur. Notaj melak tlauele katka niman tlauaniya. Nonan noijki melak tlauele katka, san tlemach nechijliaya niman nechtlajyouiltiaya. Mojmostla nechijliaya ika nejua xnikuajli niman ika niaskia infierno. Nochi tlen nechijliaya melak nechmojtiaya.

Kemantika, xueliya niaya escuela ipampa tlen nonan xkuajli nexchiuiliaya. Ijkuak nikpiaya 11 xiuitl, gobierno xok okikauili nofamilia ompa manechpiya niman yejuamej opeuj nechtlajpiyaj. Sakin onechkauatoj ipan se convento, san ika oniuajcholojteu ijkuak nikpiaya 14 xiuitl. Pampa xok niknekiya nias nochan, opeuj san nichanti ipan calles ne kings Cross.

Ijkuakon, opeuj nikintekitiltia drogas, opeuj nitlauani, opeuj nikita pornografía niman opeuj niauilnemi. Sejpatipan melak oninomojti. Nichantiya ichan se tlakatl akin kiyekanaya se discoteca, san ika, onikitak ika omemej tlakamej okitlajpalotoj. Maski onechijli maniuiya kampa nikochis, onijkak tlen kijtouayaj. Kinekiya nechnemakas itech yejon omemej tlakamej, yejuamej kinemiliayaj nechiyanaskej ipan se barco niman nechuikaskej ne Japón para nitekitis ipan se cantina. Pampa melak oninomojti, oniuajkisteuj ipan ventana niman oninotlalo para manechpaleuikan.

Oniknexti se tlakatl akin otetlajpaloto ipan yejon ciudad, niman onikijli tlenon nopan nochiujtoya. Nejua niknekiya manechmaka tomin. San ika, yejua onechijli maniuiya kampa nokaujtoya para ninaltiskia niman nitlakuaskia. Kuakon ompa iuan oninokauj niman se xiuitl sakin, otonamiktijkej.

KEN BIBLIA OKICHIUJ MANINOPATLA:

Ijkuak opeuj ninomachtia iuan iteixpantijkauan Jehová, opeuj nitlanemilia itech tlen nikchiujtoya. Melak onikualan ijkuak onikmat ika Satanás yejua akin kichiujtoya nochi tlen xkuajli. Nochipa nechijliayaj ika toTajtsin akin techtlajyouiltiaya. San ika, melak oniyolseuj ijkuak onikmat ika toTajtsin xtetlajyouiltiaya ipan infierno, pampa yejon itlaj tlen nechmojtiaya desde ijkuak nipitentsin katka.

Melak onimojkatlachix ijkuak onikitak ika iteixpantijkauan Jehová, kema kichiuaj tlen nomachtiaj ipan Biblia. Nejua xkuajli nitenotsaya, maski ijkon, iteixpantijkauan Jehová nechititiayaj ika nechtlasojtlayaj niman nechtlakaitayaj.

Melak ouijtika onikitak xok nitlanemilis itech tlen xkuajli onikchiujka. Niknemiliaya ika xitlaj ika nitepaleui niman melak ninotlauelitaya, maski ijkuakon achijtsin youejkaujka ika yoninoapolaktijka ken iteixpantijkauj Jehová. Nejua niktlasojtlaya toTajtsin, san ika, kuajli nikmatstoya ika yejua xueliskia kitlasojtlas yakaj ken nejua.

Nochi onopatlak quince xiuitl sakin ika yoninoapolaktijka. Ipan se tlamachtijli tlen onopanolti ipan kajli kampa nosentlalia iteixpantijkauan Jehová, tokniuj akin okipanolti okiteneuj Santiago 1:​23, 24. Yejon tlaxeloltin kijtouaj ika iTlajtol toTajtsin yeskia ken se espejo kampa uelis tikitaskej kenon Jehová techita. Opeuj ninotlajtoltia tla ken nejua ninoitaya xsan noijki ken yejua nechitaya. Maski Jehová yonechititijka ika nechtlasojtla, ouijtika onikitak nikasikamatis yejon.

Seki tonaltin sakin, onikpouj se tlaxelojli tlen okipatlak nonemilis. Katka Isaías 1:18, kampa Jehová kijtoua: “Xualakan, ma tikitakan ken tikchiuaskej para tikixtiskej in tlen xkuajli. Maski xueli kisa on nemotlajtlakol kenon tlapajli yejuan sanoyej tekoltik ika chichiltik yejuan sanoyej tekuik, nejua nemechistalis ken iichkayo borrego”. Onikmachili ika Jehová nejua nechnotstoskia, kentla nechijliskia: “Xuajla Vicky, matikyektlalikan tlen xkuajli. Nimitsixmati, nikimixmati motlajtlakoluan, nikixmati moyojlo, maski ijkon, nejua nimitstlasojtla”.

Yejon yeuajli xouel onikoch. Ok xnikneltokaya ika Jehová nechtlasojtlaya, san ika, opeuj nitlanemilia itech imikilis Jesús niman onikitak ika Jehová youejkaujka ika nechijyouitoya. Onikasikamat ika miyekpa yonechititijka ika melak nechtlasojtlaya. Yeskia ken tla nejua nikijlitoskia: “Motlasojtlalis xuelis nechpaleuis. Imikilis moKoneuj xnechpaleuis para xtlapopolui nochi tlen xkuajli onikchiuj”. Onikitak ika xnikpatiojkaitaya ika Jesús omik topampa. San ika, aman pampa kuajli yonitlanemili itech itetlayokolil Jehová, opeuj nikmachilia ika yejua kema nechtlasojtla.

KEN YONECHPALEUI BIBLIA:

Aman niyolpaki niman nichipaujkanemi. Kuajli ninouika iuan nofamilia, niman niyolpaki ika pampa nochi tlen yonikixnamik ueli nikinpaleuiya oksekimej. Aman nikmachilia ika más nisiuj ninemi itech Jehová.

• IJKUAK OTLAKAT: 1974

• PAÍS: RUSIA

• TLEN KICHIUAYA: KUELITAYA KIKAKIS HEAVY METAL

TLEN NIKCHIUAYA:

Onitlakat ipan se familia kampa xkipiayaj tomin ne Vótkinsk, ompa noijki otlakat Piotr Ilič Chaikovski, akin kichijchiuaya música. Notaj se kuajli tlakatl katka, san ika, melak tlauaniya, ika yejon, nochipa xkuajli tinemiyaj tochan.

Nejua xmás kuajli ninomachtiaya niman niknemiliaya ika xnitepaleui katka. Yejon okichiuj maka sa manitlajto imiuan oksekimej nion itech manitlaneltoka, noijki nechtekiyomakaya nias escuela. Ijkuak nonekiya nitlajtos imixpan akin imiuan ninomachtiaya, ninomojtiaya. Ijkuak san noselti ninemiya ueliya kuajli nitlajtouaya, san ika, imixpan oksekimej xniueliya. Ijkuak ninomachtiaya ipan secundaria, nomaestros okijkuilojkej ipan nocuaderno: “Xmás kineki tlajtos niman xueli kijtoua tlen kinemilia”. Yejon okichiuj ika maka kuajli maninomachili niman más maniknemili ika xtlaj ika nitepaleui. Kuakon opeuj ninotlajtoltia tleka oninemiko.

Ijkuak initelpochtli katka, opeuj nitlauani. Nikmatiya ika yejon nechpaleuiaya, san ika, ijkuak más nitlauaniya xok kuajli ninomachiliaya. Melak ninoyolajmanaya pampa xnikmatiya tleka oninemiko, niman kemantika miyek tonaltin xnikisaya nochan. Hasta oniknemili ninomiktis.

San ika, ijkuak nikpiaya 20 xiuitl, opeuj nijkaki itlaj tlen nechyolseuiaya: heavy metal. Nikmachiliaya ika yejon nechkojtiliaya, niman opeuj ninouika iuan akin noijki kikakiyaj, onijkauili maueyakiya notson, oninotlalili aretes niman opeuj ninotlakentia ijkon ken akin nokuikatia. Melak nitlauele katka niman oksekimej nechmakasiyaj, yejon okichiuj maka maniyolpakto iuan nofamilia.

Melak yoninopatlaka. Niknemiliaya ika tla nijkakiya yejon música nechyolpaktiskia, san ika, xijkon opanok. Niman ijkuak onikmat nochi tlen xkuajli kichiuayaj akin kitsotsonayaj yejon tlakuikaltin, más xkuajli oninomachili.

Oksejpa oniknemili ninomiktis, san ika, aman kema niknekiya nikchiuas. Pampa onitlanemili itech nonan, xijkon onikchiuj. Yejua melak nechtlasojtlaya niman melak nechpaleuiaya. Yejon melak nechtlajyouiltiaya pampa xok niknekiya ninemis, san ika, xueliya ninomiktiaya.

Pampa xok niknekiya itech nitlanemilis, opeuj nikinpoua amoxtin tlen yeuejkaui onoijkuilojkej itech literatura rusa. Ipan se libro tlajtouaya itech se tlakatl akin melak tlapaleuiaya ipan se teopan. Ijkuakon onikmachili ika niknekiya nikchiuas itlaj ipampa toTajtsin niman ipampa oksekimej. Onikijli toTajtsin nochi tlen nikmachiliaya, itlaj tlen xkeman nikchiuaya. Oniktlajtlanili manechpaleui maniyolpaki. Ijkuak ijkon onikchiuj, onikmachili ika oniyolseuj. Niman melak onechmojkatlachialti tlen opanok ome horas sakin, ijkuak se iteixpantijkauj Jehová okitetsotson nopuerta niman onechijli tla niknekiya ninomachtis Biblia. Onikitak ika toTajtsin onechnankili. Ijkuakon opeuj ika noyojlo ninemi.

KEN BIBLIA OKICHIUJ MANINOPATLA:

Maski ouijtika onikitak, oniktlajkal nochi tlen nikpiaya itech heavy metal. Maski ijkon, ok nikimilnamikiya yejon tlakuikaltin. Ijkuak nipanouaya kampa kintlaliayaj yejon tlakuikaltin, nikilnamikiya nochi tlen xkuajli onikchiuj. Xniknekiya ika yejon makijtlako nochi tlen kuajli nikchiujtoya, kuakon xok ompa onipanok. Niman ijkuak niknekiya nikilnamikis nochi tlen xkuajli nikchiuaya, chikauak niknotsaya toTajtsin. Yejon onechpaleui manikpiya iyolseuilis toTajtsin, “yolseuilistli más ueyi yejuan xakaj uelis kajsikamatis” (Filipenses 4:7).

Ijkuak ninomachtijtoya Biblia, onikasikamat ika akin kichiuaj ken Cristo noneki kiminojnotsaskej oksekimej itech tlen kineltokaj (Mateo 28:​19, 20). Nejua nikmatiya ika xkeman ijkon niueliskia nikchiuas, san ika, tlen niueliya melak nechyolpaktiaya niman nechyolseuiaya. Nikmatstoya ika oksekimej noijki nonekiya kimatiskej tlen melauak. Ika yejon, maski ninomojtiaya, ouel onitlajto iuan oksekimej itech tlen niueltiaya. Yejon melak onechyolchikauj niman nochi tlen oninomachti onokauj ipan noyojlo.

KEN YONECHPALEUI BIBLIA:

Aman yoninonamikti niman melak niyolpaki pampa ueli nikinpaleuiya oksekimej makimatikan tlen melauak itech Biblia, ijkon ken nonan niman nokniuj. Niktekichiuilis toTajtsin niman nikinpaleuis oksekimej makixmatikan yokichiuj melak maniyolpaki.