Biblia okichiuj manopatlakan

¿Tlenon okipaleui se punk akin xtetlasojtla manajmana inpampa oksekimej niman makintlasojtla? ¿Tlenon okipaleui se telpochtli akin chanti México maka sa maauilnemi? ¿Tleka se ciclista japonés akin melak ueltoya okikajkauj ika nauiltia? Matikitakan tlen okinpaleui.

“Xnitetlakaitaya, ninoueyimatiya niman xnitetlasojtlaya”. (DENNIS O’BEIRNE)

IJKUAK OTLAKAT: 1958

PAÍS: INGLATERRA

TLEN KICHIUAYA: SE PUNK AKIN XKUELITAYA NOUIKAS IMIUAN OKSEKIMEJ

TLEN NIKCHIUAYA: Oninoskalti ken católico irlandés pampa notaj katka irlandés. Miyekpa san noselti nechontitlaniyaj teopan niman yejon xnikuelitaya. Maski ijkon nikilnamiki ika niknekiya nikixmatis toTajtsin. Mojmostla ika tlayoua nikchiuaya teoyotl itech padrenuestro niman ijkuak ninemiya ipan nocama nitlanemiliaya itech tlen kijtouaya yejon teoyotl, pampa niknekiya nikmatis tlen kijtosnekiya.

Ijkuak onitelpochtiak oninosentlali imiuan rastafaris niman noijki niknekiya nikmatis itech política, ken itech liga antinazi. San ika, más onikuelitak tlen kichiuayaj punks pampa yejuamej tlaixnamikiyaj. Mojmostla nikinkuiya drogas niman más nikuelitaya nijkuis marihuana. Melak nitlauaniya, xnikpatiojkaitaya nonemilis niman san notech nitlanemiliaya. Xninouikaya imiuan oksekimej, nechkualaniaya manechkixtilikan fotos niman xmás nitlajtouaya, san nitlajtouaya imiuan oksekimej tla melak nonekiya noso tla nikuelkakiya tlen kijtouayaj. Ijkuak nikilnamiki nochi tlen nikchiuaya, nikita ika xnitetlakaitaya, ninoueyimatiya niman xnitetlasojtlaya. San noamigos kuajli imiuan nitlajtouaya niman nikuelitaya nikinmakas tlen nikpiaya.

Ijkuak nikpiaya 20 xiuitl oniknek nikmatis itech tlen kijtoua Biblia. Se noamigo akin kinemakaya drogas opeuj kipoua Biblia ijkuak tsauktoya. Se tonajli opeuj titlajtlajtouaj itech religión, teopan niman itech tlen kichiua Diablo ipan yejuin tlaltikpaktli. Onikouj se Biblia niman opeuj ninomachtia. Nejua iuan noamigo san toseselti tikpouayaj Biblia niman ijkuak tosentlaliayaj tikijtouayaj tlen yotiuelkaj, ijkon otikchiujkej miyek metstin.

Otikitakej ika Biblia temachtia yejuin: ika itinemij ipan itlamiyan tonaltin, ika akin kichiuaj ken Cristo noneki teijliskej yejon kualtsin tlajtojli itech iTekiuajyo toTajtsin, ika xnoneki nokalaktiskej ipan política niman ika Biblia kuajli techyekana ipan tonemilis. Kuajli tikmatstoyaj ika Biblia kijtouaya tlen melauak niman ika nonekiya onias se tlaneltokijli tlen melauak. San ika, totlajtoltiayaj ¿katlejua katka? Opeuj tikitaj tlen kichiuaj sekimej tlaneltokiltin tlen melak noixmatiyaj, kenon nokalaktiayaj ipan política niman kenon kichiuayaj uejueyimej iluimej. Niman otikitakej ika xkichiuayaj ijkon ken Jesús okichiuj, kuajli nesiya ika toTajtsin xkuelitaya tlen kichiuayaj, ika yejon otikijtokej tikitaskej tlenon kichiuayaj okseki religiones tlen xmás noixmatiyaj.

Otosentlalijkej imiuan sekimej akin nemiyaj ipan yejon religiones niman miyek otikintlajtoltijkej itech Biblia. Pampa tejuamej itikmatstoyaj tlen kijtouaya Biblia, nimantsin tikitayaj tla tlen kijtouayaj uajnestiaya ipan Biblia noso ka. Sakin ika imiuan titlajtouayaj, niktlajtlaniliaya toTajtsin ika tla yejuamej temachtiayaj tlen melauak, makichiua manikneki oksejpa imiuan nitlajtos. San ika, opanok seki metstin niman ok xtiknextiayaj se grupo akin matechnankili ika Biblia tlen tejuamej totlajtoltiayaj niman nejua xniknekiya oksejpa imiuan nitlajtos.

Oajsik yejon tonajli ijkuak otosentlalijkej imiuan iteixpantijkauan Jehová, otikintlajtoltijkej tlen oksekimej tikintlajtoltiayaj niman yejuamej otechnankilijkej ika Biblia. Tlen technankiliayaj notlajtolnamikiya ika on tlen tejuamej otomachtijkaj. Kuakon otikintlajtoltijkej tlen tejuamej xtikmatiyaj, ken: tlen kinemilia toTajtsin ijkuak yakaj kitekitiltia drogas niman tabaco. Niman oksejpa otechnankilijkej ika Biblia. Otikijtokej ika tiaskej kampa yejuamej nosentlaliayaj.

Melak ouijtika onikitak ompa ninemis. Nejua xnikuelitaya ninouikas imiuan oksekimej, ika yejon, xonikuelitak ijkuak onechtlajpalojkej, ken kualtsin onechnotskej niman ken notlakentiayaj. Pampa niknemiliaya ika kinekiyaj itlaj nexchiuiliskej xok oniaj ipan tlanechikoltin. San ika, oksejpa oniktlajtlanili toTajtsin ika tla yejuamej kipiayaj tlen melauak, makichiua manikneki oksejpa imiuan nitlajtos, ijkuakon oniknek manechmachtikan iteixpantijkauan Jehová.

KEN BIBLIA OKICHIUJ MANINOPATLA: Nikmatstoya ika nonekiya nikinkajkauas drogas niman nimantsin onikchiuj. San ika, melak ouijtika onikitak nijkauas tabaco, miyekpa onikyejyeko, san ika, xoniuel. Ijkuak onechijlijkej ika miyekej san okintlajkalkej incigarros niman ika xkeman oksejpa okintekitiltijkej, oniktlajtlanili Jehová manechpaleui. Desde ijkuakon xkeman oksejpa nipoki. Onikasikamat ika melak tepaleuiya ijkuak tejuamej tiknotsaj Jehová ika nochi toyojlo.

Noijki ononek nikpatlas ken ninotlakentiaya niman ninoyektlaliaya. Ijkuak kachtopa oniajka ipan Kajli kampa nosentlaliaj iteixpantijkauan Jehová, notson notejteketstoya niman katka azul, sakin oniktlapalioti de naranjado. Nikitkiya seki pantalones niman se chamarra de cuero tlen kipiaya tlaixkopinaltin. Nejua xniknemiliaya ika nonekiya nikpatlas, maski miyekpa iteixpantijkauan Jehová nechijliayaj ika nonekiya nikchiuas. Sakin oniknemili itech tlen kijtoua1 Juan 2:​15-​17: “Maka xnejnekikan nemouikaskej ken on tlajtlakolejkej nouikaj, nion maka xtlajsojtlakan on tlen onkaj ipan in tlaltikpaktli. Tla yakaj kineki nouikas ken on tlajtlakolejkej nouikaj, yejua xkitlajsojtla Dios toTajtsin”. Onikitak ika ken ninotlakentiaya kiteititiaya ika niktlasojtlaya tlen onkatka ipan yejuin tlaltikpaktli niman tla niknekiya nikteititis ika niktlasojtla toTajtsin nonekiya ninopatlas niman ijkon onikchiuj.

Sakin onikitak ika xiteixpantijkauan Jehová nechijliayaj maniuiya ipan tlanechikoltin, toTajtsin akin nechijliaya, pampa ijkon kijtoua Hebreos 10:24, 25. Pampa opeuj niauj ipan nochi tlanechikoltin niman opeuj nikimixmati tokniuan, okichiuj manikneki ninosentemakas itech Jehová niman maninoapolakti.

KEN YONECHPALEUI BIBLIA: Nechyolchikaua nikmatis kenon Jehová techkauilia iuan matouikakan. Ken techiknelia niman techtlasojtla yokichiuj manikneki nikchiuas ijkon ken yejua niman ikoneuj Jesucristo (1 Pedro 2:​21). Yoniuel ika tla ninokojtilia nikchiuas ken Cristo xkijtosneki ika noneki nikajkauas nochi tlen nikuelita. Ninokojtilia más kuajli nitenotsas, nitetlasojtlas, ninajmana inpampa tokniuan niman kuajli ninouika iuan nosiuatsin niman nokoneuj. Nikchiuas ijkon ken Cristo yokichiuj manechtlakaitakan, kuajli maninomachili niman manikintlasojtla oksekimej.

“Yejuamej onechtlakaitakej”.​(GUADALUPE VILLARREAL)

IJKUAK OTLAKAT: 1964

PAÍS: MÉXICO

TLEN KICHIUAYA: AUILNEMIYA

TLEN NIKCHIUAYA: Oninoskalti imiuan chikuasen nokniuan ipan Hermosillo (Sonora, México), se kalpan kampa xonkatka tomin. Notaj omik ijkuak nejua nipitentsin katka niman nonan ononek san iselti techiskaltis. Opeuj nitekiti desde ijkuak nikonetl niman ijkon nikpaleuis nonan, pampa xtikpiayaj tomin xueliya tikinkouayaj tozapatos. Ijkon ken miyekej familias, tejuamej noijki san sekan tichantiyaj pampa xtlaueyi katka.

Nonan melak tekitiya, ika yejon, xueliya techmanauiaya itech tlen texchiuiliayaj oksekimej. Ijkuak nikpiaya chikuasen xiuitl, se telpochtli akin kipiaya 15 xiuitl onechnajnauilti. Ijkon okichiuj miyek xiujtin niman yejon melak onechijtlako, pampa niknemiliaya ika kuajli katka ika nikinuelitaya tlakamej. Pampa niknekiya manechpaleuikan, onitlajto imiuan tlapajtijkej niman teopixkej, yejuamej onechijlijkej ika xtlaj panouaya niman ika tlen nikmachiliaya kuajli katka.

Ijkuak nikpiaya 14 xiuitl, onikijto ninosiuakuepas. 11 xiuitl nikistinemiya imiuan miyekej tlakamej. Oninomachti kenon niktekis tsontli niman sakin oniktlali kampa nitekitis. Maski ijkon, xniyolpakiya pampa melak onechtlajyouiltijkej niman nechkajkayauayaj. Nikmachiliaya ika tlen nikchiujtoya xkuajli katka, niman ninotlajtoltiaya tla ok nemiyaj akin tetlasojtlaj.

Onikilnamik nokniuj. Akin nomachtiaya Biblia niman yonochiujka iteixpantijkauj Jehová. Yejua nechijliaya tlen yonomachtijka, san ika, nejua xnikakisnekiya. Maski ijkon, nechmojkatlachialtiaya kenon katka inemilis niman kenon nouikaya iuan iueuentsin, pampa yejuamej kuajli nonotsayaj, notlasojtlayaj niman notlakaitayaj. Sakin opeuj ninomachtia Biblia imiuan iteixpantijkauan Jehová. Kachtopa xmás nikuelitaya ninomachtis, san ika, sakin onopatlak.

KEN BIBLIA OKICHIUJ MANINOPATLA: Opeuj niauj kampa nosentlaliaj iteixpantijkauj Jehová. Niman onikitak ika yejuamej tlamantikej katka. Miyekej melak nechpijpinaujtiayaj, san ika, yejuamej xijkon okichiujkej. Yejuamej kuajli nechnotsayaj niman nechtlakaitayaj, melak kuajli oninomachili.

Más onechmojkatlachialti tlen onikitak ipan se ueyi tlanechikojli. Kampa maski melak miyekej nemiyaj, nochimej melak kuajli nouikayaj ijkon ken nokniuj. Onikijto: “Yejuamej akin nikintejtemouaya pampa melak notlasojtlaj niman kuajli inyojlo kipiyaj”. Ken notlasojtlayaj niman ken san sekan nemiyaj onechmojkatlachialti, noijki kenon kitekitiltiayaj Biblia niman ijkon mitsnankiliskej tlen timotlajtoltia. Onikitak ika iTlajtol toTajtsin kinpaleuiya ipan inemilis. Niman onikasikamat, ika nonekiya miyek nikpatlas tla niknekiya ninochiuas iteixpantijkauj Jehová.

Nonekiya nikpatlas nochi nonemilis, pampa ninemiya ken se siuatl. Nonekiya nikpatlas ken nitlajtouaya, ken ninoliniaya, ken ninotlakentiaya, ken ninokualnextiaya niman nikinpatlas akin imiuan ninouikaya. Akin katka noamigos opeuj nechijliaj: “¿Tleka tikchiua yejon? Ijkon kuajli tinemi. Maka xmomachti Biblia. Nochi tikpiya”. Melak ouijtika onikitak nikajkauas ika niauilnemiya.

Tlen kijtoua 1 Corintios 6:​9-​11 oajsik ipan noyojlo niman onikasikamat ika ueliskia ninopatlas, ompa kijtoua: “¿Tlen xnenkimatij ika on xkuajkualtin tlakamej xuelis kalakiskej ne kampa Dios tlamandaroua? Maka xmokajkayauakan, yej kuajli xmatikan ika on yejuan auilnemij, noso on yejuan kinyekteneuaj ídolos, xkalakiskej ne kampa Dios tlamandaroua. No xkalakiskej on yejuan siuapapatlaj, noso tlakapapatlaj, noso on siuamej yejuan keleuiyaj sano siuamej, noso on tlakamej yejuan keleuiyaj sano tlakamej [...]. Sekimej nemejuamej nenkichiuayaj on ken on tlajtlakojli. Pero itechkopa toTEKO JesuCristo, niman itechkopa on iEspíritu toDios, yomechyolchipajkej”. Jehová okinpaleui manopatlakan niman nejua noijki nechpaleuis. Miyek xiujtin ononek melak ninokojtilis, san ika, melak onechpaleui tlen nechijliayaj niman kenon nechtlasojtlayaj iteixpantijkauan Jehová.

KEN YONECHPALEUI BIBLIA: Aman nejua iuan nosiuatsin, tikmachtia tokoneuj makichiua ijkon ken kijtoua Biblia. Tlen yeuejkaui nikchiuaya xok nikchiua, aman niyolpaki niktekichiuilis Jehová niman nikpiyas tlen yejua nechmaka. Nitlayekanketl itech se tlanechikojli niman yonikinpaleui miyekej manomachtikan itech iTlajtol toTajtsin. Ken oninopatlak okichiuj ika nonan makineki nomachtis Biblia niman sakin yejua onoapolakti. Se nokniuj siuatl akin noijki auilnemiya onopatlak niman onochiuj iteixpantijkauj Jehová.

Hasta akin nechijliayaj maka maninopatla, yokitakej ika melak yonechpaleui Biblia. Niman nejua nikmatstika akinon yonechpaleui. Yeuejkaui xonechpaleuijkej ken nonekiya, san ika, Jehová melak onechpaleui. Pampa yejua onechyoltilan, onechtlasojtlak niman xonosiaujkauj. Ouel oninopatlak pampa toTajtsin akin melak tetlasojtla niman tlamachilise onechitak niman onechmachti kenon niyolpakis.

“Xniyolpakiya niman san noselti ninomachiliaya”.​(KAZUHIRO KUNIMOCHI)

IJKUAK OTLAKAT: 1951

PAIS: JAPÓN

TLEN KICHIUAYA: MELAK KUELITAYA TOMIN NIMAN KUELITAYA CICLISMO

TLEN NIKCHIUAYA: Oninoskalti ipan se kalpan tlen itoka Shizuoka (Japón), kampa nichantiya imiuan chiknaui nochanejkauan ipan se kajli pitentsin. Notaj kinemakaya bicicletas. Niman ijkuak nipitentsin katka nechuikayaj kampa notlatlaniyaj ika bicicletas, yejon okichiuj manikuelita ciclismo. Yejua kinekiya ika maninochiua se ciclista akin melak ueltok. Ika yejon, opeuj nechmajmachtia ijkuak nejua nikpiaya 14 xiuitl. Ijkuak nikpiaya 16 hasta 18, yexpa onitetlan ijkuak notlajtlaniya ika bicicletas ne Japón. Se universidad kinekiya ompa maninomachti, san ika, nejua oniktlapejpeni nias kampa nemiyaj akin más ueltokej. Ijkuak nikpiaya 19, yoninochiujka se ciclista akin melak ueltok.

Ijkuakon san niknekiya ika ipan nochi Japón makimatikan ika melak niueltoya ciclismo. Niknekiya niktlanis miyek tomin niman ijkon nikintlajpiyas nochanejkauan niman nikinmakas tlen kinpolouaya. Ika yejon, melak opeuj ninomajmachtia. Ijkuak yonisiaujka pampa melak ninotlajtlaniya noso pampa melak ninomajmachtiaya, miyekpa ninoijliaya ika oninemiko para ninauiltis ciclismo niman ika xnonekiya ninosiaujkauas. Pampa melak oninokojtili, okichiuj manitetlani. Ipan kachtopa xiujtin onechmakakej se premio niman sakin onechijlijkej ika ueliskia ninotlatlanis imiuan miyekej niman ijkon kitaskiaj akinon más ueltoya ciclismo ipan nochi Japón. Chikuasen veces onikpix segundo lugar.

Pampa melak ninomajmachtiaya niman ijkon nitetlanis, opeuj nechtokayotiaj la Lo­ comotora de Tokai, se kalpan tlen onka Japón. Melak niknekiya nitetlanis hasta oksekimej ciclistas nechmakasiyaj pampa nejua nochipa nikintlaniya. Pampa opeuj melak miyek tomin niktlani ouel oninokouili tlen nejua niknekiya. Onikouj se kajli kampa nikpiaya tlen ika ninomajmachtis, onikouj se carro tlen melak patioj kanaj ijkon ken se kajli. Para maka nechtlaxtekiliskej onikinkouj miyek kaltin niman okseki tlemach.

Maski nikpiaya nochi yejon, xniyolpakiya niman san noselti ninomachiliaya. Ijkuakon yoninonamiktijka niman nikinpiaya yeyimej nokoneuan. Miyekpa nikualaniya iuan nosiuauj niman nokoneuan. Yejuamej hasta ikimatstoyaj ijkuak nejua nikualaniya san pampa ken ninesiya.

Sejpatipan, nosiuauj opeuj nomachtia Biblia imiuan iteixpantijkauan Jehová. Yejon okichiuj miyek manopatla. Ijkuak yejua okijto ika kinekiya yas ipan tlanechikoltin, onikijto ika tiaskia ken familia. Ok nikilnamiki yejon teotlak, ijkuak se tlayekanketl itech tlanechikojli ouajla nochan niman ijkon opeuj tomachtiaj Biblia, tlen oniuel oajsik ipan noyojlo.

KEN BIBLIA OKICHIUJ MANINOPATLA: Xkeman nikilkauas tlen onikpouj ipan Efesios 5:⁠5, ompa kijtoua: “Tej, ye nenkimatstokej ika on yejuan auilnemi, noso xyolchipauak, noso nochi kinoyaxkatisneki xuelis kalakis kampa Cristo niman Dios tlamandaroua. Yejuamej ken kinyekteneuaskiaj on ídolos”. Ipan ciclismo san kinekij notlajtlaniskej niman ijkon kipiyaskej miyek tomin. Yejuin opeuj kipajsoloua notlamachilis. Onikitak ika tla nikneki nikyolpaktis Jehová, nonekiya nikajkauas ika ninauiltia ipan ciclismo, yejuin ouijtika onikitak nikchiuas.

Melak kuajli ken ninauiltitoya niman miyekpa nitetlaniya, xniknekiya nikajkauas. San ika, kuajli nikmatstoya ika ninomachtis Biblia kichiuaya kuajli maninomachili niman manikpiya yolseuilistli xijkon ken ijkuak ninotlajtlaniya ika bicicletas. Desde ijkuak opeuj ninomachtia san yexpa oninauilti ciclismo, san ika, ok niknekiya oksejpa ninotlatlanis. Noijki xnikmatiya kenon nikinmakas nochanejkauan tlen kinpolouaya. Melak miyek tlen nechpasolouaya, hasta nochanejkauan xokuelitakej ika nejua opeuj ninomachtia. Niman notaj melak onoyolkoko. Ipampa nochi yejuin onechajsik se kokolistli noijtik.

Ijkuak nikixnamiktoya nochi yejon, melak onechpaleui ika xonikajkauj ninomachtia Biblia niman ika nochipa oniaj tlanechikoltin. Ijkon ika yolik opeuj más nitlaneltoka. Oniktlajtlanili Jehová manechkaki niman manechpaleui manikita ika yejua kema kinankilia toteoyouan. Nosiuatsin noijki melak onechpaleui ijkuak onechijli ika yejua xkinekiya se kajli ueyi niman ijkon yolpakis. Ijkon opeuj más kuajli niktekichiuilia Jehová.

KEN YONECHPALEUI BIBLIA: Yonikitak ika tlen Jesús okijto ipan Mateo 6:​33 melauak, ompa kijtoua: “Yej achtoj xtejtemokan para nenkichiuaskej nochi on tlen Dios mechnauatia, niman no xnekikan kuajli nennemiskej ken yejua nemi. Tla ijkon nenkichiuaskej, Dios mechmakas nochi tlen mechpoloua”. Xkeman techpoloua on okseki tlemach pampa toTajtsin nochipa techmaka. Maski aman xok miyek niktlani tomintsin ijkon ken yeuejkaui, ipan yejuin 20 xiujtin nochipa tikpiya tlen ika topanoltiskej.

Niktekichiuilis Jehová imiuan akin noijki tlaneltokaj ken nejua, yokichiuj maniyolpaki niman kuajli maninomachili, nion xnikmati kenon panoua tonaltin. Aman kuajli ninouika imiuan nochanejkauan. Niman nechyolpaktia ika yeyimej nokoneuan iuan insiuatsitsinuan melajkanemi itech Jehová.