Diccionario de uso del español, de María Moliner kijtoua ika ijkuak tikijtouaj tikchiuaskej itlaj niman tikteneuaj toTajtsin, tikijtotokej ika yejua testigokisa itech tlen tikijtouaj tikchiuaskej. Sekimej, ijkuak kijtouaj tlenon kichiuaskej kemantika san kijtouaj noso kijkuilouaj.

Sekimej kijtouaj ika xkuajli tla tikteneua itoka toTajtsin ijkuak tikijtos itlaj tikchiuas, pampa Jesús okijto: “Maka itlaj ika xmotlajtolmakakan. [...] San xtlanankilikan ‘kemaj’ noso ‘ka’, pampa nochi tlen okseki nenkijtoskej ualeuas itech on diablo” (Mat. 5:33-37). Jesús kimatstoya ika ipan tlanauatiltin tlen okimakakej Moisés kijtouaya ika israelitas kemantika nonekiya kiteneuaskej itoka toTajtsin ijkuak kijtoskiaj tlen kichiuaskej niman kimatstoya ika sekimej itekipanojkauan toTajtsin ijkon yokichiujkaj (Gén. 14:22, 23; Éx. 22:10, 11). Noijki kimatstoya ika hasta Jehová ijkon yokichiujka (Heb. 6:13-17). Kuakon, Jesús xkijtotoya ika xkuajli tla tikteneuaj toTajtsin ijkuak tikijtoskej itlaj tikchiuaskej. Yejua kijtotoya ika xkuajli tla tikteneuaj itoka toTajtsin ijkuak tikijtouaj itlaj tlen san tikauilmatij noso itlaj tlen xueyi kijtosneki. Kuakon, nochipa matikchiuakan tlen tikijtouaj pampa yejon tlen kineki Jehová.

¿Tlenon uelis tikchiuas tla mitsijliaj xteneua toTajtsin para tikijtos tlen tikchiuas? Kachtopa, kuajli xnemili tla uelis tikchiuas tlen tikijtos. Tla tikita ika xtiuelis, kuakon, maka itlaj xkijto. ITlajtol toTajtsin techijlia: “Más kuajli tla xitlaj tikprometeros xken tla tikprometeroua niman yej xtikchiua” (Ecl. 5:5). Sakin, xkita tlenon kijtoua Biblia itech tlen mitstlajtlaniliaj xchiua niman sakin xtlapejpeni tlen tikchiuas. ¿Katlejua tlaxeloltin uelis tikimitas?

Seki tlen tikijtouaj tikchiuaskej kuelita toTajtsin. Ijkuak iteixpantijkauan Jehová nonamiktiaj kijtouaj ixpan toTajtsin ika nochipa notlasojtlaskej, notlajpiyaskej niman notlakaitaskej (sekimej achijtsin kipatlaj tlen kijtouaj ijkuak nonamiktiaj, san ika, ixpan toTajtsin kijtouaj tlenon kichiuaskej). Sakin, yejuin tokniuan noneki nochipa san sekan nemiskej ijkon ken yokijtokej (Gén. 2:24; 1 Cor. 7:39). ToTajtsin kuelita tlen kijtouaj novios ijkuak nonamiktiaj.

Seki tlen tikijtouaj tikchiuaskej xkuelita toTajtsin. Iteixpantijkauan Jehová xkeman kijtouaj ika tlaixnamikiskej para kipaleuiskej se país nion xkijtouaj ika xok kitlakamatiskej toTajtsin. Tla ijkon kijtoskiaj, kuakon, xok kitlakamatstoskiaj toTajtsin. Noijki, akin kichiuaj ken Cristo xtlaixnamikij pampa yejuamej xkichiuaj “ken on tlaltikpaktlakamej” (Juan 15:19; Is. 2:4; Sant. 1:27).

 Seki tlen tikijtouaj tikchiuaskej sa no tejuamej noneki tiknemiliskej. Jesús okijto: “Xmakakan César on tlen iyaxka, niman xmakakan Dios on tlen yejua iyaxka” (Luc. 20:25). Se iteixpantijkauj Jehová noneki kuajli kitas tlen kijtoua yejuin tlaxelojli achto kitlapejpenis tlenon kichiuas.

Matikonnemilikan ika se iteixpantijkauj Jehová kineki onchantis okse país noso kineki kikixtis ipasaporte, san ika, kijliaj ika noneki itlaj kijtos. Sakin kita ika seki tlen kijliaj makijto xkuelita toTajtsin. Tla yejua kuajli yonomachti Biblia, xkijtos nochi tlen kitlajtlaniliaj makijto. Yejua uelis kimijlis tekiuajkej ika achijtsin kipatlas tlen kijliaj makijto niman ijkon xkijtos tlen toTajtsin xkuelita. Niman sekimej tekiuajkej kinkauiliaj ijkon makichiuakan.

Kuakon, kema uelis tikijtoskej seki tlen techtlajtlaniliaj tekiuajkej pampa ipan Romanos 13:1 kijtoua: “Nochi tlakatl ma tetlakamati intech on tekiuajkej”. Kanaj se iteixpantijkauj Jehová kitas ika xtlaj tlenon tla kintlakamati tekiuajkej niman kijtos tlen kitlajtlaniliaj pampa Jehová technauatia matikintlakamatikan.

Noijki se iteixpantijkauj Jehová noneki kinemilis tla itlaj kikuis noso itlaj kichiuas niman ijkon kiteititis ika kema kichiuas tlen kijtoua. Yeuejkaui, romanos niman escitas kikuiyaj inespadas niman ijkon kiteititiskej ika kema kichiuaskej tlen kijtouayaj. Ijkuak kiteneuayaj inespadas kentla kiteneujtoskiaj intajtsin akin kinpaleuiaya ijkuak ontlaixnamikiyaj. Niman griegos ontlamajpiluiayaj ne iluikak ijkuak kijtouayaj itlaj kichiuaskej. Ijkon kiteititiayaj ika nemiya yakaj akin kikakiya tlen kijtouayaj niman kitaya tla kichiuayaj ijkon ken yokijtokej.

Sekimej kemantika kiteneuaj bandera niman ijkon kiteititiskej ika kichiuaskej tlen kijtouaj. San ika, se iteixpantijkauj Jehová xkeman ijkon kichiuaskia. San ika ¿tlenon kichiuas tla nemi ipan se tribunal niman kijliaj makitlali ima ipan Biblia niman ijkon kiteititis ika kijtos tlen melauak? Yejua uelis ijkon kichiuas pampa Biblia kinteneua sekimej akin noijki itlaj okichiujkej para okiteititijkej ika kichiuaskiaj tlen okijtokej (Gén. 24:2, 3, 9; 47:29-31). Tla tejuamej tiktlapejpeniaj tikchiuaskej yejon, matikilnamikikan ika ixpan toTajtsin tikijtotokej ika tikijtoskej tlen melauak. Ika yejon, noneki tikijtoskej tlen melauak ijkuak itlaj techtlajtoltiskej.

Kuakon, tla tiknekij tiktekitiltiskej itoka toTajtsin ijkuak tikijtoskej itlaj tikchiuaskej, kachtopa matikchiuakan teoyotl niman matiknemilikan tla kema uelis ijkon tikchiuaskej. Tla ijkon tikchiuaj, nochipa touikaskej iuan Jehová. Tejuamej nochipa tiknekij tikchiuaskej tlen Biblia kijtoua. Kuakon, tla tikijtouaj itlaj tikchiuaskej, ijkon matikchiuakan (1 Ped. 2:12).