WANGƆ 21

Kwa ti pangɔ nzɔ̃ pa ndo li tɛrɛ lo ndɛ ngasia?

Angbã dã Yehova na onzingɔ apɛnɔ tɛ e zu na lége ti Lo-lɛngɔ Gbia tɛ lo. Na lo mɛ ya ni du nzɔ̃ pa ko, ta elengbi ti batangɔ ni bo na lo tɛ e kɔi ma. Yezo yɔ ka ti ava lo ya ala pa nga nzɔ̃ pa niko hɛ̃ azi mɛndɛ̃! (Matie 28:19, 20) Atɛmwɛ tɛ Yehova ndo tɔndɔ ndia niko ngasia?

1. Tɛnɛ mɛ kaya mbɛti ti Matie 24:14 ndo ti na seni ndɛ ngasia?

Yezo tɛnɛndó ya: “Apa gbanda Nzɔ̃ Pa ti lo Lɛngɔ Gbia tɛ Nzapa na lɛ sese zu.” (Matie 24:14) Atɛmwɛ tɛ Yehova ndo pa nzɔ̃ pa niko ti ngbondoni na dengɔ bɛ zu. E ndo pa nzɔ̃ pa na ndo lɛ gigi zu na yanga ɔngɔ 1 000! Na lo mɛ ya kwa ni du kota niko, a ndo yɔ ge ge ge wa e li nga ni na seni. Bo Yehova la ndo za e ya e li kwa niko nzɔ̃ni.

2. Ge ge ge mɛ e ndo li ti nɛngɔ ya e fa tɛnɛ nɛ?

E ndo fa tɛnɛ ndo zu mɛ e tã azi da. Nga ma se mɛndó awakristo ti siɛklɛ ti uzu ndo li na niko, e ndo fanga tɛnɛ “nyɔ̃ da na nyɔ̃ da.” (Awa Pangɔ Kwa 5:42, NWT) Se ti nzɔ̃ni ti fangɔ tɛnɛ niko ndo li ya etengbi na amiliɔ̃ tɛ azi bulu kɔi kɔi. Na lo mɛ ya ta azi ndo du ngoi zu kaya da tɛ la ma ko, e ndo fa nga tɛnɛ na ndo mɛ azi ndo tengbi da gba. E ndo gi lége zu ti pangɔ hɛ̃ azi tɛnɛ mɛ ba Yehova nga na nzɔ̃ dangɔ bɛ mɛ lo na ni.

3. Zo mɛ lengbi ti pangɔ nzɔ̃ pa na?

Abɛta awakristo zu na kumba ti pangɔ nzɔ̃ pa. Ta e ndo lɛ kwa niko na wele ma. E ndo li zu ti pangɔ nzɔ̃ pa na bangɔ ngunu tɛ e na lo mɛ ya, ni lengbi ti songɔ dungɔ lɛ ngɛ̃́ tɛ azi. (Di 1 Timɔte 4:16.) Ta ndo futa e na lo ti pangɔ nzɔ̃ pa ma na lo mɛ ya Ngbangɔ tɛnɛ ya: “Ahɛ̃ ĩ ye gɛgɛrɛ, ko ĩ hɛ̃ nga ye hɛ̃ azi gɛgɛrɛ.” (Matie 10:7, 8) E ndo tɔndɔ Yehova e ndo hɛ̃ nga lo dengɔ bɛ na ndenge mɛ e ndo ngbã bo la kwɛ pa nzɔ̃ pa abɛse du ya ta azi zu ndo ye mangɔ e ma.

GI HĨNGANGƆ LO MƐNDƐ̃

Gi hĩngangɔ ge ge ge mɛ Atɛmwɛ tɛ Yehova ndo li ti nɛngɔ ya ala pa nzɔ̃ pa na ndo lɛ gigi zu. Gi nga hĩngangɔ se mɛ Yehova ndo za na la.

Kwa ti pangɔ nzɔ̃ pa mɛ ndo li tɛrɛ lo na ndo lɛ gigi zu: (A) Costa Rica, (B) États-Unis, (C) Bénin, (D) Thaïlande, (E) Yap, (F) Suede

4. E ndo e li kpengbani ti pangɔ nzɔ̃ pa hɛ̃ azi zu

Atɛmwɛ tɛ Yehova ndo li kpengbani ti pangɔ nzɔ̃ pa na ndo zu mɛ azi da Ba VIDEO, wa na pɛni hɛ̃ gbinya ti hũnda olo mɛ:

VIDEO: Kosakola na “esika eleki mpenza mosika na mabele” (7:33)

Ye mɛ kamwisa mɔ na bangɔ ge ge ge mɛ Atɛmwɛ tɛ Yehova ndo li ti fangɔ tɛnɛ nɛ?

Di Matie 22:39 nga na Roma 10:13-15, wa na pɛni hɛ̃ gbinya ti ahũnda olo mɛ:

Ngasia la kwa tɛ e ti pangɔ nzɔ̃ pa ndo fa ya e ndo ye afɔ̃ e nɛ?
Yehova ndo ma ngasia na lo tɛ azi ko la ndo pa nzɔ̃ pa nɛ?—Ba vɛrsɛ ti 15.

5. E ndo li kwa ndoni kɔi na Yehova

E na aye gba mɛ ndo fa ya Yehova la ndo tambwisa kwa tɛ e. E mu selɛlo tɛ nyita kɔli paul mɛ ndo du ka Nouvelle-Zélande na ngoi mɛndó lo ndo fa tɛnɛ nyɔ̃ da na nyɔ̃ da na pɛ midi ko, lo tengbindó na wali kɔi. Kanda na nda pelele uzu ti nɛngɔ ya kɔli niko ga si ka tɛ lo ko, lo lindó sambela wa lo di ngandó ili Nzapa Yehova wa lo yɔ ngandó ka ti lo ya lo to zo ga ba ni. “A lindó ola taa na pɛni,” Paul pa ya, “mbi gɔngɔndó nyɔ̃ da tɛ lo.”

Di 1 Kɔrinto 3:9, wa na pɛni hɛ̃ gbinya ti hũnda olo mɛ:

Na bangɔ ndakisa ti lo mɛndó ɔ ka Nouvelle-Zélande, ye mɛ ndo fa ya Yehova la ndo tambwisa kwa tɛ e ti fangɔ tɛnɛ nɛ?

Di Awa Pangɔ Kwa 1:8, wa na pɛni hɛ̃ gbinya ti hũnda olo mɛ:

Nda mɛ e na gwɛ̃ ya Yehova za e ti nɛngɔ ya e li kwa tɛ e na seni nɛ??

Mɔ hĩnga ni?

Ka bombi kɔi kɔi ti ya pɔsɔ, e ndo lua formasiɔ̃ mɛ ba se ti fangɔ tɛnɛ nzɔ̃ni. Se du ya mɔ gwe bombi niko wɛ mɔ da bɛ mɔ ya nɛ na lo ti formasiɔ̃ niko nɛ?

6. E ndo tɔndɔ ndia tɛ Nzapa mɛ ba kwa ti fangɔ tɛnɛ

Na siɛklɛ ti uzu awa kula tɛ ava Yezo lindó zu ti gbanzingɔ la na kwa ti fangɔ tɛnɛ. Awakristo ti gã niko fandó ya ta zo kɔi lengbi ti gbanzingɔ la na kwa ti fangɔ tɛnɛ ma na ndenge mɛndó ala ndo “tɔndɔ na nda lo ti Nzɔ̃ Pa ka gbɛlɛ awa fangɔ ngbanga.” (Filipɛ 1:7) Se mɛ Atɛmwɛ tɛ Yehova ndo li nga na ni ndɛ la. a

Ba VIDEO.