Miak xiujmej, tel miakej akin kipiayaj se kokolis momikilijkej porin amo kimatiaj itanankilil nejon netajtanil. Satepan, tamatinij kiajsikej tein melauak porin kimatkej keniuj se momaua. Nejon kinpaleuiani sekin maj amo momauakan oso maj pajtikan. No kinpaleuiani tel miakej maj nemikan okachi xiujmej uan maj kuali moajsikan.

Sayoj ke, onkak okseki netajtanilmej tein motelnekij. ¿Tikonnemilia ke uelis mitsonpaleuis tikonmatis itanankililuan nejin netajtanilmej?

• ¿Akoni Dios?

• ¿Akoni Jesucristo?

• ¿Toni iTekiuajyo Dios?

• ¿Toni panos satepan?

Miakej kiajsinij tanankilil uan okachi yolpakij. Tejuatsin no ijkon uelis mitsonpaleuis.

Xa tionmotajtania ox uelis tikonmatis tein melauak ika seki taman porin axkan ouij se kimati ox se taman melauak oso amo. ¿Keyej?

Miakej amo kineltokaj tein kijtouaj tekiuanij, tein moteixmatiltia oso tein moijtoua itech uejueyi tekitiloyamej. Ouij kinkisa kimatiskej ox melauak tein kijtouaj, sayoj kijtouaj tein kinemiliaj, amo nochi kijtouaj oso senkis takajkayauaj. Kemej ouij se kineltokas tein oksekin kijtouaj uan miak taman amo melauak, miakej omeyolouaj uan amo kimatijok tein melauak.

Maski ijkon, tejuatsin uelis tikonmatis itanankililuan seki netajtanilmej tein motelnekij. ¿Keniuj? Moneki tikonchiuas ijkon kemej tikontemoua tikonnankilis okseki netajtanilmej tein amo motelnekij.

Mojmostaj tiktemouaj tikmatiskej tein melauak. Se siuat akin monotsa Jessica nochipa kikoua takual tein amo kipia kakauat. Yejua kijtoua: “Nosiuapil amo ueli kikua nion tepitsin kakauat porin uelis kichiuas maj momikili. Yejua ika, achto ke nikouas teisa, nikita ika toni taman chijchiujtok. Satepan niktemoua nikmatis okachi uan hasta nikita kani mochijchiuak porin nikneki nikmatis ox kipia tein uelis kijtakos. No nitatemoua okseko uan ijkon nikitas ox kampa mochijchiuak kuali kichijchiujkej”.

Xa amo mojmostaj tikontemoua tikonmatis tein melauak itech seki taman tein motelneki, sayoj ke no uelis tikonchiuas kemej Jessica uan ijkon tikonmatis itanankililuan okseki netajtanilmej:

• Tikontemos tikonmatis tein moneki.

• Tikontemos okachi.

• Tikonitas maj takuaujtamach tein tikonajsik.

Komo ijkon tikonchiua, mitsonpaleuis xikonajsi itanankililuan netajtanilmej tein motelnekij. ¿Keniuj?

Jessica kimatik itanankililuan netajtanilmej tein motelnekij porin kichiuak se taman kemej ijkuak kitemoua kimatis ox seki taman kipiaj kakauat. Yejua kijtoua: “Nikixtajtoltis Biblia ika nejmachkayot uan niktemos nikmatis okachi, nechpaleuiani maj nikmati tein yekmelauj tamachtia”. Tel miakej no ijkon kichiuanij uan kiitanij keniuj Biblia kinankilia nejin netajtanilmej:

• ¿Keyej tinemij?

• ¿Toni techpanoua keman timomikiliaj?

• ¿Keyej titajyouiaj?

• ¿Keniuj Dios kitamis tajyouilis?

• ¿Keniuj uelis tiyolpakiskej kemej kalyetouanij?

Tejuatsin no uelis tikonajsis itanankililuan nejin uan okseki netajtanilmej komo tikonixtajtoltia Biblia uan tikontemoua tikonmatis okachi itech www.jw.org/ncj, tein moajsi itech Internet.