TAMACHTILIS 11
Keniuj okachi mitsonpaleuis tein kijtoua Biblia
¿Tikonouijita tikonpeualtis se ueyi tekit? Komo ijkon, xa tikonxejxeloua uan achto tikonchiua tein amo ouij. Xa no ijkon panoua keman peua tikonleroua Biblia, yejua ika xa tionmotajtania: “¿Kani maj nipeua?”. Itech nejin tamachtilis tikitaskej seki taman tein mitsonpaleuis xikonuelita xikonlero uan xionmomachti Biblia.
1. ¿Keyej moneki nochipa tikleroskej Biblia?
Akin mojmostaj kileroua Biblia oso “itanauatil Jiova”, semi yolpaki uan kuali kisa nochi tein kichiua (xikonita Salmo 1:1-3). Peua xikonlero Biblia maski sayoj seki minutos. Keman okachi tikonitas tein kijtoua Biblia, okachi tikonuelitas.
2. ¿Keniuj okachi mitsonpaleuis tein kijtoua Biblia?
Para maj techpaleui tein tiklerouaj itech Biblia, moneki maj timotsakuilikan uan maj tiknemilikan toni techmachtia. Yejua ika amo sayoj moneki tikleroskej, ta no moneki tikitaskej tein techmachtia (Josué 1:8). Keman tiontalerojtos xiontanemili itech nejin netajtanilmej: “¿Toni nechmachtiaj nejin versículos kemej tamati Jiova? ¿Keniuj uelis nikchiuas tein nikita itech Biblia? ¿Keniuj uelis ika nikinpaleuis oksekin?”.
3. ¿Kemanian uelis tikonleros Biblia?
¿Amo tionkemanti tikonleros Biblia? Timiakej ijkon techpanoua. Yejua ika, ‘kuali xikonkui motiempo’ (Efesios 5:16, TNM). Uelis tikonchiuas nejin komo tikonixtalia toni hora tikonleros Biblia. Sekin kichiuaj kualkan, sekin xa keman moseuiaj para kikuaskej teisa uan sekin achto ke kochiskej. Uan tejuatsin, ¿toni hora ueliskia tiontaleros?
MAJ OKACHI TIMOMACHTIKAN
Maj tikitakan keniuj peuas tikonuelitas tikonleros Biblia. No tikitaskej keniuj uelis tionmomachtis achto ke mitsonmachtiskej para okachi mitsonpaleuis nochi tein tionmomachtis.
Ijkon kemej se tapalol peua se kiuelilia komo miakpa se kikua, no uelis se kiuelitas se kileros Biblia.
4. Tein mitsonpaleuis xikonuelita xikonlero Biblia
Xa ouij techkisas peuas tikleroskej Biblia, sayoj ke yolik tikuelitaskej, ijkon kemej se tapalol keman miakpa se kikua peua se kiuelilia. Xikitakan 1 Pedro 2:2 uan ika xitajtokan nejin:
-
¿Tikonnemilia ke peuas tikonuelitas komo mojmostaj tikonleroua Biblia?
Xikitakan VIDEO para tikonitas tein kinpaleuij seki telpochmej maj kiuelitakan kileroskej Biblia, uan ika xitajtokan nejin:
-
Telpochmej akin nesij itech video, ¿keyej ouij kinkisaya kileroskej Biblia?
-
¿Toni kinpaleuij?
-
¿Keyej peuak okachi kiuelitaj kileroskej Biblia?
Tein uelis tikonchiuas:
-
Xikonkui se Biblia tein kuali kitajtolkepkej uan tein kipia tajtolmej tein axkan mokuij. Xikonkui Traducción del Nuevo Mundo komo yetok itech motajtol.
-
Peua xikonlero tein okachi tikonuelita. Xikonita tabla “Mojmostaj xikonlero Biblia”.
-
Xikonijkuilo tein tikonlerojya. Xikonkui tabla “Nikan nikijkuiloua tein nikleroua itech Biblia” tein kipia nejin amaix.
-
Xikonkui aplicación JW Library®. Komo tikonpia itech moteléfono oso itech okse tepos, uelis tikonleros Biblia uan tikonkakis kampa yeski tionyetos.
-
Xikonkui Amaix tein ika timomachtiaj iTajtol Dios. Ompa tikonajsis mapas uan tablas tein mitsonpaleuis okachi xikonuelita xikonlero Biblia.
5. Achto ke mitsonmachtiskej xikonita tamachtilis tein nankiitaskej
Xikitakan Salmo 119:34 uan ika xitajtokan nejin:
-
¿Keyej semi moneki tikonchiuas netataujtil achto ke tikonleros Biblia oso keman peuas tionmomachtis?
¿Keniuj okachi mitsonpaleuis tein mitsonmachtiskej? Keman tionmomachtis sejse tamachtilis uelis tikonchiuas nejin:
-
Xikonlero párrafos tein ika peua sejse tamachtilis.
-
Xikonita textos uan xikonita keniuj mouika ika tamachtilis.
-
Xikontsojkuilo tajtolmej tein kinankiliaj netajtanilmej. Komo tikonchiua nejin, mitsonpaleuis keman mitsonmachtiskej.
¿Tikonmatia?
Tiitaixpantijkauan Jiova tikuinij okseki Biblias, sayoj ke okachi tikuij Traducción del Nuevo Mundo porin kuali tajtolkeptok, niman se kimati tein kijtosneki uan kipia itokay Dios (xikonita nejin tamachtilis itech jw.org/ncj: “¿Itaixpantijkauan Jiova kipiaj ininBiblia?”).
TEIN SEKIN KIJTOUAJ: “Semi ouij nimomachtis Biblia. Amo nikneki uan amo nikemanti”.
-
¿Uan tejuatsin toni tikonnemilia?
TEIN TIKITAKEJ
Xikonixtali se hora keman tikonleros Biblia, xikontajtani Dios maj mitsonpaleui xikonmati tein kijtosneki uan xionmomachti achto ke mitsonmachtiskej, ijkon okachi mitsonpaleuis tein kijtoua Biblia.
Maj tikelnamikikan
-
¿Toni mitsonpaleuis kuali xionmomachti Biblia?
-
¿Toni hora uelis tikonleros Biblia uan tionmomachtis moselti?
-
¿Keyej semi moneki xionmomachti achto ke mitsonmachtiskej?
NO XIKONITA NEJIN
Xikonita seki taman tein uelis tikonchiuas para mitsonpaleuis tein kijtoua Biblia.
“Keniuj uelis mitsonyolpaktis tikonixtajtoltis Biblia” (Tanejmachtijkej, tapoual 1 xiuit 2017)
Xikonita eyi taman kemej uelis tikonleros Biblia.
“¿Cómo puede ayudarme la Biblia? Primera parte: Busca tesoros en la Biblia” (Artículo de jw.org)
Xikonita keniuj uelis mitsonyolpaktis tikonleros Biblia.
Xikonita keniuj kichiuanij sekin akin uejkaujya kilerouanij Biblia.
Keniuj okachi techpaleuis tein timomachtiskej itech Biblia (2:06)
Xa no tikonuelitas
NETAJTANILMEJ TEIN MOCHIUAJ
¿Keniuj itaixpantijkauan Jiova kimachtiaj aksa ika Biblia?
Keman se itaixpantijkauj Jiova mitsonmachtis, tejuatsin uelis tikonkuis tein yeski Biblia. No uelis tikonyoleuas akin nemij mokalijtik oso akin yeski.
