TAMACHTILIS 21
¿Keniuj moteixmatiltijtok kuali tanauatilmej?
Amo uejkaua Jiova kitamis kuejmolmej tein tikpiaj ika iTekiuajyo. ¡Moneki tikteixmatiltiskej porin nejin se kuali tanauatil! Jesús kinekia maj itatojtokakauan kitematiltikan nejin itech nochi taltikpak (Mateo 28:19, 20). ¿Toni kichiuanij itaixpantijkauan Jiova para kitakamatiskej nejin tein Jesús tanauatij?
1. ¿Keniuj mochiujtok axkan tein kijtoua Mateo 24:14?
Jesús kijtojka: “Nejin kuali tanauatilmej ika Tekiuajyot motetapouis semanauak taltikpak” (Mateo 24:14, TNM). Tiitaixpantijkauan Jiova tikuelitaj titapaleuiskej itech nejin tekit tein semi moneki, tikteixmatiltiaj kuali tanauatilmej itech nochi taltikpak itech panoua 1,000 tajtolmej. Para mochiuas nejin ueyi tekit moneki se mochikauas uan maj ixyeto keniuj motekitis, amo ueliskia tikchiuaskej komo Jiova amo techpaleuiskia.
2. ¿Toni tikchiuaj para tikinnojnotsaskej nochin?
Titanojnotsaj kampa yeski. Uan ijkon kemej kichiuayaj imomachtijkauan Cristo itech yekinika siglo, tiouij “kalpan” (Hechos 5:42). Nejin tapaleuia maj nochi xiujmej tiuelikan tikinnojnotsakan millones. Sayoj ke, kemej amo nochipa tikinajsij ininchan, no titanojnotsaj kampa miakej yetokej. Nochipa tiktemouaj keniuj ika titajtoskej Jiova uan tein kinemilia kichiuas.
3. ¿Akonimej moneki kiteixmatiltiskej kuali tanauatilmej?
Nochin akin yekmelauj kichiuaj kemej Cristo, moneki kiteixmatiltiskej kuali tanauatilmej. Tejuan amo tikauilmatij nejin tekit. Titanojnotsaj nochi tein tiuelij porin tikmatij ke miakej uelis momakixtiskej (xikonita 1 Timoteo 4:16). Amo akin techtaxtauia keman tikchiuaj nejin tekit porin Biblia kijtoua: “Amo teyi xikintopaluikan” (Mateo 10:7, 8). Uan maski amo nochin techkakij, tiksentokaj titanojnotsaj porin ijkon tikueyichiuaj Jiova uan tikyolpaktiaj.
MAJ OKACHI TIMOMACHTIKAN
Maj tikitakan tein tikchiujtokej tiitaixpantijkauan Jiova para titanojnotsaskej itech nochi taltikpak uan keniuj techpaleuia Jiova.
Titanojnotsaj noyampa taltikpak: (A) Costa Rica, (B) Estados Unidos, (C) Benín, (D) Tailandia, (E) Yap (Micronesia), (F) Suecia.
4. Timochikauaj tikinnojnotsaskej nochin
Tiitaixpantijkauan Jiova timochikauaj ika titajtoskej kuali tanauatilmej kampa yeski. Xikitakan VIDEO uan ika xitajtokan nejin:
-
¿Toni okachi tikonmoujkaita tein kichiuaj itaixpantijkauan Jiova para tanojnotsaskej?
Xikitakan Mateo 22:39 uan Romanos 10:13-15 uan ika xitajtokan nejin:
-
¿Keyej tiknextiaj ke titetasojtaj keman titanojnotsaj?
-
¿Keniuj kinita Jiova akin kiteixmatiltiaj kuali tanauatilmej? (Xikitakan versículo 15).
5. Titekitij iuan Dios
Miak taman kinextia ke Jiova kiixyekana totanojnotsalis. Maj tikitakan tein panok ompa Nueva Zelanda. Se tiotak, se tokniuj akin monotsa Paul yajki tanojnotsato kajkalpan uan kiajsik se siuatsin. Nejon kualkan siuatsin kichiujka netataujtil, kinotsak Jiova ika itokay uan kitajtanij maj aksa kikalpano. Paul kijtoua ke keman panok eyi hora ajsik ichan.
Xikitakan 1 Corintios 3:9 uan ika xitajtokan nejin:
-
¿Keniuj kinextia ke Jiova kiixyekantok tanojnotsalis keman mochiua kemej tein panok Nueva Zelanda?
Xikitakan Hechos 1:8 uan ika xitajtokan nejin:
-
¿Keyej moneki maj Jiova techpaleui itech totanojnotsalis?
¿Tikonmatia?
Keman timosentiliaj itajkotian semana techmachtiaj keniuj titanojnotsaskej. Komo touan tionmosentiliani, ¿keniuj tikonita kemej techmachtiaj?
6. Titanojnotsaj porin Dios tanauatia
Itech yekinika siglo, itatojtokakauan Cristo tanojnotsayaj maski kinixnamikiaj. Yejuan kitematiltijkej “inixpan in tekiuani” ke monekia tanojnotsaskej (Filipenses 1:7). Itech nejin tonalmej, tiitaixpantijkauan Jiova no ijkon tikchiuaj. a
Xikitakan Hechos 5:27-42 uan ika xitajtokan nejin:
-
¿Keyej nochipa titanojnotsaskej? (Xikitakan versículos 29, 38 uan 39).
TEIN SEKIN UELIS MITSONTAJTANISKEJ: “¿Keyej itaixpantijkauan Jiova tanojnotsaj kajkalpan?”.
-
¿Toni tiontanankiliskia?
TEIN TIKITAKEJ
Jesús kinnauatij itatojtokakauan maj kiteixmatiltikan kuali tanauatilmej itech nochi altepemej. Jiova kinpaleuijtok itekitikauan maj kichiuakan nejin tekit.
Maj tikelnamikikan
-
¿Keniuj moteixmatiltijtok kuali tanauatilmej noyampa taltikpak?
-
¿Keyej keman titanojnotsaj tiknextiaj ke titetasojtaj?
-
¿Tikonnemilia ke komo titanojnotsaj kichiuas maj tiyolpakikan? ¿Keyej?
NO XIKONITA NEJIN
Xikonita keniuj tanojnotsaj itaixpantijkauan Jiova itech uejueyi xolalmej.
Tanojnotsalis senteixtenoj kampa miakej panouaj ompa París (5:11)
¿Keniuj itaixpantijkauan Jiova kinnojnotsaj akin motepalotiaj itech okse altepet?
Tikinpaleuiaj maj kiixmatikan Dios akin motepalotiaj itech okse altepet (5:59)
Xikonkaki keyej semi yolpaki aksa akin tanojnotsani nochi inemilis.
Xikonita keniuj tein moixtaliani ininixpan tekiuanij tapaleuiani maj moteixmatilti kuali tanauatilmej.
a Dios technauatia maj titanojnotsakan, yejua ika tiitaixpantijkauan Jiova amo moneki maj tikintajtanikan tekiuanij maj techkauakan maj tikteixmatiltikan kuali tanauatilmej.
Xa no tikonuelitas
NETAJTANILMEJ TEIN MOCHIUAJ
¿Keniuj itaixpantijkauan Jiova kimachtiaj aksa ika Biblia?
Keman se itaixpantijkauj Jiova mitsonmachtis, tejuatsin uelis tikonkuis tein yeski Biblia. No uelis tikonyoleuas akin nemij mokalijtik oso akin yeski.
