Jehová itlajtoltemakauaj tijtlajtolkuepaj amatlajkuiloli ipan miak tlajtoli. Ipan noviembre, 2014, tijtlajtolkueptoyaj Biblia ipan 125 tlajtoli, uan amatlajkuiloli ipan 742 tlajtoli. Nojkia tijtlajtolkuepaj videos. Ipan enero, 2015 pejkej tijtlajtolkuepaj nopa video ¿Tlake tijchiuaj ipan kali kampa timosentiliaj?, uan nama eltok ipan 398 tlajtoli, uan nopa video ¿Kenke moneki timomachtis Biblia? Motlajtolkueptok ipan 569 tlajtoli. ¿Kenke kichijkej? ¿Kenijkatsa kichijkej?

Ipan marzo, 2014, Katli kinyakanaj Jehová itlajtoltemakauaj kiijtok monekiyaya motlajtolkuepas nopa videos ipan tlauel miak tlajtoli, kiampa miakej kinekiskia momachtisej Biblia.

Mochiua naui tlamantli kema kitlajtolkuepaj se video. Se, kitlajtolkuepaj tlen moijtos ipan nopa video. Ome, kintlapejpeniaj se keskij tlen kamati nopa tlajtoli. Eyi, katli itstokej ipan audio y video kichijchiuaj uan kikualtlaliaj nopa grabación, uan nojkia kitlaliaj nopa tlajtoli tlen nesis ipan pantalla. Uan naui, kisejkotiliaj nochi uan kitlaliaj ipan Internet.

Ipan se keski kali Betel onka cabinas kampa uelij kichijchiuaj videos, uan maseualmej katli kuali kiixmatij nopa tekitl. Uajka, ¿kenijkatsa mochijki nopa videos ipan tlajtoli tlen motlajtolkuepa ipan uejuejka altepemej?

Ipan nochi Tlaltipaktli, katli kichiuaj nopa grabaciones kitekiuijkej tepostli tlen ueliskia kiuikasej kampa yaskiaj. San kitekiuiyayaj se micrófono, se computadora uan se programa tlen ika kichiuaj videos. Mosentiliyayaj ipan se kali uan nopaya kichijchiuayayaj nopa grabaciones. Maseualmej katli kamatij nopa tlajtoli kampa kichiuaj nopa videos tlapouayayaj, se keskij kiyakanayayaj nopa tekitl uan sekij kiitayayaj kuali ma mochiua. Kema kitlamiltiyayaj uan kuali kisayaya nopa grabación, kiijkueniyayaj nochi uan yauiyayaj sejkanok.

Pampa kiampa kichiuaj, kichijchijtokej videos ipan miak tlajtoli.

Ni videos tlauel kinpaleuijtok maseualmej. Miakej maseualmej amo kema kiitstoyaj se video ipan inintlajtol.

Ipan Australia, kipano 2,500 maseualmej kamatij tlajtoli pitiantiatiara, yeka nojkia kichijchijkej se keski videos ipan nopa tlajtoli. Ni mochijki ipan Alice Springs (Territorio del Norte). Callan Thomas, se katli tlapaleuik ipan grabaciones, kiijtok: “Nochi kinpaktia nopa videos Miakej maseualmej san kitlachilijtoyaj nopa videos ipan tableta uan miakpa tlajtlaniyayaj kanke uelis kipantisej sekinok videos. Amo onka amatlajkuiloli ipan pitiantiatiara, yeka maseualmej tlauel kinpaktia kema kitlakakiliaj uan kiitaj se tlamantli ipan inintlajtol”.

Ipan Camerún omej Jehová itlajtoltemakauaj yauiyayaj ipan se akali. Asitoj ipan se pilaltepetsi uan mokamauijkej iuaya katli tlayakana nopaya. Nopa tlakatl tlamachtiyaya ipan escuela. Kema kimatkej kamatiyaya tlajtoli bassa, toikniuaj kinextilijkej ipan se tableta nopa video ¿Kenke moneki timomachtis Biblia?, ipan nopa tlajtoli.

Ne Indonesia, se tlakatl katli tlayakana ipan se religión, kinkualankaita Jehová itlajtoltemakauaj. Se tonali kitlatik nochi amatlajkuiloli tlen tooikniuaj temakatoyaj. Sekij maseualmej nojkia kiijtojkej kintlatiliskiaj nopa kali kampa mosentiliaj. Nojkia, nauij policías kiitatoj se tosiuaikni ipan ichaj uan kitlajtlanilijkej tlake mochiua ipan nopa kali kampa mosentiliaj, ya kinextilik nopa video ¿Tlake tijchiuaj ipan kali kampa timosentiliaj?, ipan tlajtoli indonesio.

kema kitlachilik nopa video, se policía kiijtok: “Nama nijmati maseualmej amo kuali inmechixmatij”. Seyok policía kitlajtlanilik: “Ni video kinextia ajkia inmojuantij. ¿Uelis intechpanoltilisej uan kiampa uelis nikinextilis sekinok?”. Nopa policía nama kuali kinixmati Jehová itlajtoltemakauaj uan nama kinmokuitlauia.

¿Ipa tijtlachilijtok nopa videos? ¿Kenke amo tikita ipan motlajtol?