Maseualmej katli moechkapanouaj tlatlepanitaj. Amo momatij tlauel ininpati uan amo kichiaj sekinok ma kinuejkapantlalikaj. Inijuantij kintekipachoua tlen kinpano sekinok uan kinekij kiyekosej tlen kichiuaj.

Maske sekij maseualmej moiljuiaj katli moechkapanouaj amo kipiaj chikaualistli, nopa amo nelia pampa ni kuali tlamantli techpaleuia ma tijmatikaj ipan tlake tlamantli timokuapolouaj uan tlake tlamantli amo ueli tijchiuaj.

• Kipaleuis mokone ma kinpia iuampoyouaj. Nopa amochtli La epidemia del narcisismo kiijtoua: “Maseualmej katli moechkapanouaj nima mouampojchiuaj ininuaya sekinok”. Nojkia “amo ouij kimatij itstosej ininuaya sekinok maseualmej”.

• Kipaleuis mokone kuali ma itsto. Tlaj mokone moechkapanos kuali itstos nama uan nojkia teipa kema kitemos tekitl. Nopa tepajtijketl Leonard Sax kiijtok: “Se telpokatl katli moueyimati uan moiljuia nochi uelis kichiuas, amo kuali kisas kema kitemos tekitl uan se katli kuali kikakis tlen kiiljuisej, uelis kena kitekimakasej”. *

Xikinpaleui ma moitakaj kej kinamiki

TLEN BIBLIA TETLAJTOLMAKA: “Intla se tlakatl moiljuia yajaya más ueyi kej sekinok uan axueli kipaleuia se tlen uetstok, yajaya nelia mokajkayaua” (Gálatas 6:3).

• Amo xikiniljui tlen amo nelia panos. “Mochiuas nochi tlen timoiljuia”. “Uelis tijchiuas nochi tlen tijnekis”. Maske timoiljuis tlauel kinpaleuis tlaj kiampa tikiniljuis, kemantika uelis amo mochiuas tlen kinekij. Uan tlaj mokoneuaj mosentlaliaj kichiuasej tlen kena uelisej uan kichiuasej kampeka, kinpaleuis kuali ma itstokaj.

• Xikiniljui kuali tlen kichijkej. Tlaj tikiniljuis mokoneuaj nochi kuali kichiuaj, amo tikinpaleuis ma moechkapanokaj. Yeka, san xikiniljui tlake tlamantli kuali kichijkej.

• Xikinpaleui amo tlauel ma kitekiuikaj redes sociales. Miakej maseualmej kitekiuiaj redes sociales pampa moueyimatij uan kinekij sekinok ma kimatikaj tlen kichiuaj, tlake uelij kichiuaj o tlake kichijtokej.

• Xikinpaleui nimantsi ma kiniljuikaj sekinok ma kintlapojpoljuikaj. Kema mokoneuaj kichiuasej  se tlamantli tlen amo kuali, xikinpaleui ma kiitakaj kanke mokuapolojkej.

Xikinpaleui ma tetlaskamatilikaj

TLEN BIBLIA TETLAJTOLMAKA: “Nochipa ximotlaskamatikaj” (Colosenses 3:15).

• Ika tlen toTeotsij kichijchijtok. Konemej moneki kipatiitasej tlen onka ipan Tlaltipaktli. Xikinpaleui ma kiitakaj tlaj amo onkaskia ajakatl, atl uan tlakualistli mikiskiaj. Tlaj tikiniljuis ni tlamantli kinpaleuis ma kipatiitakaj uan ma kitlaskamatikaj nochi tlen toTeotsij kichijchijtok.

• Ika kuajkuali tlamantli tlen kinextiaj sekinok. Xijpaleui mokone ma kiita onka se keski tlamantli tlen ya amo ueli kichiua uan sekinok kena kuali kichiuaj. Yeka, xijpaleui ma kiyeko tlen sekinok kichiuaj uan amo ma kinkualankaita.

• Xikinpaleui ma tetlaskamatilikaj. Xikinpaleui ma tetlaskamatilikaj ika nochi ininyolo uan amo san ma kiijtokaj. Tlaj tetlaskamatilisej kinpaleuis ma moechkapanokaj.

Xikinpaleui ma kipatiitakaj kinpaleuisej sekinok

TLEN BIBLIA TETLAJTOLMAKA: “Sejse inmojuantij xikinitakaj nochi sekinok keja más uejueyij kej ta. Amo san ximoiljuikaj tlen tlamantli tlen inmechpaleuis. Nojkia ximoiljuikaj tlen kinpaleuis sekinok” (Filipenses 2:3, 4).

• Xikiniljui ma mitspaleuikaj ipan mochaj. Tlaj amo tijkauas mokone ma kichiua tlen moneki ipan mochaj, elis kejuak tikiljuiskia: “Ta tlauel mopati, yeka amo moneki tijchiuas ni tlamantli”. Mokone moneki momatis achtoui tlapaleuis ipan mochaj uan teipa mauiltis. Xijpaleui ma kiita tlen kichiuas tlauel kinpaleuis sekinok uan tlauel kipatiitasej uan kitlepanitasej.

• Xikinpaleui ma kiitakaj tlauel kuali tlaj kinpaleuisej sekinok. Tlaj mokone kitekipachos tlen kinpano sekinok kipaleuis kuali ma tlalnamiki. Yeka, xikitakaj ajkia moneki inkipaleuisej uan kenijkatsa ya uelis kipaleuis. Kema kinpaleuis sekinok, xikiljui kuali tlen kichijki.