¿Nelnelia elij Cristo itokilijkauaj nochi katli kiijtouaj kitokiliaj Cristo?

¿TIJMATI keskij Cristo itokilijkauaj itstokej ipan nochi Tlaltipaktli? Se amochtli tlen kiijtoua keskij maseualmej elij Cristo itokilijkauaj (Atlas of Global Christianity), kiijtoua ipan 2010 onkayaya kipano 41,000 religiones, uan ipan nochi nopa religiones itstoyaj nechka 2,300 millones Cristo itokilijkauaj. Uan nochi nopa religiones amo sanse tlamachtiaj. Yeka, miakej maseualmej amo kimatij tlake kichiuasej uan teipa san moyolkokouaj. Yeka uelis motlajtlaniaj: “Katli kiijtouaj kitokiliaj Cristo, ¿nelnelia kiampa kichiuaj?”.

Tlaj tijnekij tijnankilisej ni tlajtlanili, ma timoiljuikaj ipan ni neskayotl. Tlaj tijneki tias ipan seyok altepetl, ¿kenijkatsa uelis tijnextis tiuala ipan nopa altepetl kampa tikijtoua tieua? Amo mitsneltokasej tlaj san tikijtos, moneki titenextilis mocredencial o seyok amatl. Yeka, tlaj tijnekij tielisej Cristo itokilijkauaj, amo san moneki tikijtosej titlaneltokaj ipan ya. Moneki tijnextisej nelnelia tijtokiliaj Cristo. Ma tikitakaj kenijkatsa uelis tijchiuasej.

Teipa tlen xiuitl 44 kema ya ualajtoya Jesús, pejkej kiniljuiaj cristianos katli kitokiliyayaj Jesús. Lucas kiijtok “elki nepa ipan altepetl Antioquía kampa tlakamej achtoui pejkej kintokaxtiaj nopa tlaneltokanij ‘cristianosʼ ” (Hechos 11:26). Nopa cristianos monekiyaya kitokilisej Jesús. Uajka, ¿tlake kiijtosneki tielis se Jesús itokilijka? Nopa Diccionario Teológico del Nuevo Testamento kiijtoua: “Se Cristo itokilijka moneki mosentlalis nochipa kitokilis Jesús [...] uan amo kema kitlauelkauas”. Ni kiijtosneki katli nelnelia kitokiliaj Cristo, moneki nochipa kichiuasej tlen tlamachtik uan nojkia tlen tlanauatik.

Ipan ni tonali, ¿itstokej katli nelnelia kitokiliaj Cristo? ¿Tlake kiijtok Jesús kichiuaskiaj itokilijkauaj? Tlaj tijneki tijmatis tlen Biblia kiijtoua, timitstlaneuij xijpoua ni makuili tlamachtili tlen uala ipan ni pilamochtsi. Sejse tlamachtili kiixtomas tlen Jesús kiijtok kichiuaskiaj itokilijkauaj. Nojkia tikitasej tlake kichijkej Cristo itokilijkauaj tlen achtoui siglo, uan teipa tikitasej ajkia inijuantij kiampa kichiuaj ipan ni tonali.