“Na nikiniljuik motoka”

“Nikinpannextilik ajkeya ta ika ni tlakamej tlen tinechmakatok ipan ni Tlaltipaktli para nechneltokasej. [...] Na nikiniljuik motoka, uan sampa nikiniljuis” (JUAN 17:​6; 17:26, TNM).

¿Tlake kinekiyaya kiijtos Jesús? Ya nochipa kitekiuik toTeotsij itoka kema tlajtolmoyauayaya. Uan kema kiijtouayaya nopa tokajyotl, miakpa kipouayaya tlen Escrituras Hebreas (Lucas 4:​16-​21). Nojkia kinnextilik itokilijkauaj kenijkatsa momaijtoskiaj: “ToTeko toTata, [...] nochi tlakamej ma mitsueyichiuakaj” (Lucas 11:2).

Tlen kichijkej achtoui Cristo itokilijkauaj. Kema apóstol Pablo kamanaltik ika ueuejtlakamej tlen Jerusalén, kiniljuik toTeotsij kitlapejpenijtoya se altepetl uan “pejki kinnotsa tlakamej tlen axisraelitajmej [...] para kiueyichiuasej [itoka]” (Hechos 15:14). Uan kema nopa apóstoles uan sekinok Cristo itokilijkauaj tlajtolmoyauayayaj, kiijtouayayaj: “Nochi tlen kinojnotsasej toTeotsij Jehová ika itoka momanauisej” (Hechos 2:21; Romanos 10:13, TNM). Nojkia kitekiuiyayaj toTeotsij itoka kema tlajkuilouayayaj. Nechka xiuitl 300 tlankej kisentiliaj se keski tlanauatili tlen judíos, tlen kiixmatkej kej Tosefta, nopaya kiijtoua kenijkatsa kitlatijkej nopa amatlajkuiloli tlen Cristo itokilijkauaj kiijkuilojtoyaj. Nopaya kiijtoua: “[Nopa Evangelios] uan nochi nopa amochtli tlen kiijkuilojkej nopa sectas [uelis judíos katli eliyayaj Cristo itokilijkauaj] moneki nima kitlatisej. Ma tlatla kampa ijkuilijtok toTeotsij itoka”.

¿Ajkia inijuantij kiampa kichiuaj ipan ni tonali? Nopa Consejo Nacional de las Iglesias de Cristo tlen Estados Unidos, kikajki ma mochiua nopa Revised Standard Version tlen Biblia, kampa peua kiijtoua: “Kema ayamo ualajtoya Jesús, judíos ayokmo kinejkej ma kitekiuikaj toTeotsij itoka pampa moiljuiyayaj amo itstokej sekinok teotsitsij, yeka ipan ni tonali nojkia amo kinamiki kitekiuisej itoka”. Yeka, ipan nopa Biblia kipatilijkej toTeotsij itoka ika toTeko. Namanok, ipan nopa Vaticano kinnauatijkej obispos ma kichiuakaj ni: “Kema iniljuichiuasej, inuikasej o inmomaijtosej, amo kinamiki inkitekiuisej yon inkiijtosej toTeotsij itoka tlen nesi ipan tetragrammaton YHWH”. *

¿Onka se religión tlen kitekiuia uan kinnextilia sekinok toTeotsij itoka? Se telpokatl katli itoka Sergey kiijtoua kena onka. Kema nojua eliyaya piltelpokatsi uan itstoya Kirguistán, kiitak ipan se película kampa kiijtouayaya toTeotsij itoka Jehová. Panok se 10 xiuitl ayokmo kikajki nopa tokajyotl. Uan kema mochantito Estados Unidos, nopaya omej Jehová itlajtoltemakauaj kipaxalotoj uan kinextilijkej ika Biblia toTeotsij itoka Jehová. Sergey tlauel yolpajki pampa kipantik se religión kampa kitekiuiaj toTeotsij itoka. Ipan se diccionario, tlaj tijtemos “Jehová Dios”, kej ni kiixtoma: “Eli se Teotsij katli tlauel ueyi uan katli san Jehová itlajtoltemakauaj kiueyichiuaj” (Webster’s Third New International Dictionary).

[Tlatsintla kiijtoua]