1. Aoǁnâ-aob 7:20 ǃnâb ge Gao-aob Salomoba tae-e ge mî?

 GAO-AOB Salomob ge ge xoa: ‘ǂHanu-ai khoe-i, ǃgâise ǀgui ra dī. Tsî ǁore tama i ge ǃhūbaib ai a ǀkhai.’ (Aoǁn. 7:20) Nēs ge a ama, hoa da ge a ǁore-ao. (1Jhn. 1:8) ǁNā-amaga da ge Elob tsî nau khoen xa ǀûbahesa ǂhâ hâ.

2. Mati i ra tsâ ǀgū ǀhōsa-i xa ǀûbahesa?

² ǀNîsi du ge ra ǂâihō ǁae-i hîna du ge, sadu ǀgū ǀhōsa-e ǁaixa kai hâ i-i xa. ǁÎ-i ǀkha du ge ǀhōsagusisa ra ūhâ ǂgao. Amaga du ge ǀûbaba ǁî-i ai ge ǂgan. Mati du gere tsâ, māsenxase du ge ǀûbahe o? ǃGâise du ge tsâ tsoatsoa? Îo kaise du ge ǁnās xa ge ǂkhî.

3. Tae-e da nē ǁkhāǁkhāǃâs ǃnâ nî ǃhoaǃgao?

³ ǂHâba da ge ra îb Jehovaba sida di ǀgū ǀhōsa. Xawe da ge ǀnî ǁaega mî tsî da ra dī xūn ǃnâ ǁîba ra ǁaixa kai. Tae-i ǃaroma da a ǂgomǃgâ ǁkhā Jehovab ra ǀûba ǂgaosa? Mâ ǃkharagagusiba hâ Jehovaba khoe-e ǀûbas? Tsî sida khoe-e ǀûbas ǁaegu? Tsî ǀams ai ham-eb Jehovaba ra ǀûba?

4. Tae-i ǃaroma da a ǂgomǃgâ ǁkhā, Jehovab hoaǁae ra ǀûbasa?

⁴ Elobmîs ge ra mîba da Jehovab ge hoaǁae ra ǀûba. Jehovab ge Moseb tawa gere ǁguiǃāsen o ǃhomi ai.  Ob ge ǀhomǃgāba ge sî, îb nēti mî: ‘Tita Jehovata ge ǀkhomxasib tsî ǀkhommi xa ǀoa hâ. ǃHaese ǁaixa tama tsî ǃnāǂamsa ǀnammi tsî ǂgomǂgomsasiba ra ǁgau Elota. Tita ge ti hâhâ ra ǀnamma ǀoadisidi di ôananôaguga ra ǁgau. ǁÎn di tsūdīgu, ǁnâuǀnamoǃnâsib tsî ǁorena ǀûbas ǀkha.’ (Eks. 34:6, 7) Jehovab ge ǃgâi tsî ǀkhomxaǂgao Eloba. Hîna hoaǁae ǃhobasen ra ǁore-aona ra ǀûbaba.—Neh. 9:17; Psa. 86:15.

5. Psalmdi 103:13, 14 ǃoagu, Jehovaba khoenab ǃamkuse a ǂan amaga tae-e ra dī?

⁵ Sida di kuru-aob aseb ge Jehovaba, hoa xūna sida xa a ǂan. ǂÂis ǀguisa hî re. Kaise i ge buruxa, hoa khoen hîna nē ǃhūbaib ǃnâ hânab a ǂansa. (Psa. 139:15-17) ǁNā-amagab ge sida ǁgûna xu da ge hō ǀoasa tama kurus a ǂan. ǁNās xōǀkhāb ge sida tanisen ǀgauba ge tsâǀkhā xūna a ǂan. Jehovaba khoenab ǃamkuse a ǂan ǃkhais ǃaroma tae-e a dī ǁkhā? ǁNās ge ra ǁgaribi îb ǀkhom da.—Psa. 78:39; khomai re Psalmdi 103:13, 14 sa.

6. Jehovaba mati ge ǁgau khoenab ra ǀûba ǂgaosa?

⁶ Jehovab ge ge ǁgau khoenab ra ǀûba ǂgaosa. ǁÎb ge a ǂan ǂguro khoeb Adammi ge, dī xū-i ǃaroma da hoa da a ǁore-ao tsî nî ǁōsa. (Rom. 5:12) Sida tsî nau khoe-i tsîna da ge ǁoreb. Tsî ǁōba xu a ǁkhae ǁoa. (Psa. 49:7-9) Xaweb ge sida ǀnamxaǃnâ Eloba ǀkhom da. Tsî xū-e ge dī, i da orehe. Tae-eb ge dī? Johaneb 3:16 ǃnâ i ra ǂoaxa khamib ge. Jehovaba ǁîb di ǀguise ǃnae hâ ǀGôaba ge sî, îb sida ǁōba. (Mat. 20:28; Rom. 5:19) Jesub ge sida ge ǁōba. Î-i mâ khoe-i hoa-i hîna ǁîb ǃnâ ǂgomsa ūhâ-e orehe ǁkhā. (Heb. 2:9) Jehovab ge kaise ge tsûaǂgao. ǁÎb di ǀnamǀnamsa ǀGôab ge tsûtsûsa tsî taotaosa ǀgaub ǃnâ ǁō o. Amaseb ge Jehovaba ga mā-am tama hâ. Îb ǁîb ǀGôaba ǁō, ǀûba da ǂgao tamab ga hâ o.

7. Ham-eb ge Jehovaba māsenxase ǀûba?

⁷ Elobmîs ǃnâ i ge ǂgui aiǁgauna hâ. Khoen hîna ge Jehovab xa māsenxase a ǀûbahena. (Efe. 4:32) Ham-i xa du ra  ǂâi? ǀNîsi du ge Gao-aob Manaseb xa ra ǂâi. ǁNā eloxoresa khoeb ge dī ǁoreb ge Jehovab ǃoa-ai ge ǁgai i. ǁÎb ge ama tama eloga gere ǃoaba. Tsî nau khoen tsîna gere ǂkhâǃnâ în ǁkhā xū-e dī. ǁÎb ge ǁîb ǀgôana ge ǃgam tsî ama tama eloga ǃoa gere ǁguiba. ǁNās xōǀkhāb ge ama tama elob īsiba Jehovab ǃanu tempeli ǃnâ ge mâi. Elobmîs ge ra mî: “ǁÎb ge kaise ǃKhūb ǃoagu ǁore tsî ǁîba ge ǁaiǁai.” (2Kro. 33:2-7) Xawe Manaseb ge ǂgaoba xu a ǃhausen. Ob ge Jehovaba māsenxase ge ǀûba bi. Tsîb ge Eloba ge mā-am bi, îb ǁkhawa gao kai. (2Kro. 33:12, 13) ǀNîsi du ge Gao-aob David xas tsîna ra ǂâi. ǁÎb ge kai ǁoreba Jehovab ǃoagu ge dī. ǃGam tsîb ge ǃgamme khôa o. Xawe Davib ge ama ǃhausen tsî ǁîb ǁoreba ǂanǃgâ o. Ob ge Jehovaba ǁîb tsîna ge ǀûba. (2Sam. 12:9, 10, 13, 14) Îo, ǂgomǃgâ ǁkhā da ge a Jehovab ra ǀûba da ǂgaosa. Tsî mû da nî khami i ge Jehovab ra ǀûba ǀgauba, khoen dib khami i tama.

8. Jehovab a ǀō-aisa ǀgoraǃgâ-ao ǃkhaisa, mati ǁîb ra ǀûba ǀgausa ra tsâǀkhā?

⁸ Jehovab ge “hoaraga ǃhūbaib di ǀGoraǃgâ-aoba.” (Gen. 18:25) ǃGâi ǀgoraǃgâ-aob ge ǃgamse ǂhanuba nî ǂan. Jehovab ge sida ǀgoraǃgâ-ao tsîb ge ǀoasase ra ǁnâuǃā ǂhanuba. ǁÎb a sida ǂhanu mā-ao ǃkhais ǃaroma. (Jes. 33:22) Khoe-i ge tātsē ǂan tama hâ, mâ i-a ǂhanu. Tsî mâ i ǂhanu tamasa, Jehovab a ǂan khami. ǃGâi ǀgoraǃgâ-aoba tae-i tsîna ǂhâ hâ? ǂHâbasa xūn hoanab ge nî ǂan ǀgoraǃgâb nîs ais ai. Jehovab ge a ǂhanu ǀgoraǃgâ-ao. ǁÎb hoaǁae amaba a ǂan amaga.

9. Jehovaba taena ǂâis ǃnâ ūhâ, khoe-e ǀûbasab ga mîǁgui o?

⁹ Jehovab ge khoesi ǀgoraǃgâ-aogu i khami ī tama hâ. ǁÎb ge ǀgoraǃgâb nîs aiǃâ hoa xūna a ǂan. (Gen. 18:20, 21; Psa. 90:8) ǁÎb ge khoen ra ǁnâu tsî mû xūn ǀguina ǂan tama hâ. ǁÎb ge ra ǁnâuǃā khoe-i ge ǁgûna xu hō ǂūb. Skoli ǂans, mâpa i ge kais, ǁî-i tsâsib. Tsî ǁî-i ǂâiǀgaub, tanisen ǀgauba ra tsâǀkhā ǀgauba. Jehovab ge ǂgaob tsîna ra khomai. ǁÎb ge ǃamkuse ra ǁnâuǃā tae-i ǃaroma i khoe-e xū-e ra dīsa. ǁÎba xu a sâuhe ǁkhā xū-i ge ǀkhai. (Heb. 4:13) Jehovab ga khoe-e ǀûba o. Ob ge hoa xūnab a ǂan amaga ǁnāsa ra dī.

10. Tae-i ǃaroma i Jehovab ǀgoraǃgâsa hoaǁae a ǂhanu-ai? (Deuteronomium 32:4)

¹⁰ Jehovab di ǀgoraǃgâs ge hoaǁae a ǂhanu-ai. ǁÎb ge ǀoasase ǀkhā-e ǁhûi tama hâ. Jehovab ge tātsē khoe-e ǀûba tama hâ. ǁÎ-i îsa, ǃkhū, ǂhâǂhâsa tsî ǂgui ǁkhāsiga ūhâ amaga. (1Sam. 16:7; Jak. 2:1-4) Khoe-i ge tātsē Jehovaba ǁamaǃkhuni tamas ka io a ǁgari ǁoa, îb xū-e dī. (2Kro. 19:7) ǁÎb di mîǁguigu ge tātsē ǁaixasib. Tamas ka io tsâsigu ai ǃgaoǃgaohe tama hâ. (Eks. 34:7) Jehovab ge a ǂhanu ǀgoraǃgâ-ao. ǁÎb hoa xūn tsî mâsigu tsîna ra ǁnâuǃā amaga.—Khomai re Deuteronomium 32:4 sa.

11. Jehovab ra ǀûba ǀgauba khoen dib xa mati a ǀkhara?

¹¹ Hebreǁî xoadi di xoa-aogu ge ge mûǂan. Jehovab di ǀûbas kaise a ǀō-aisa ǃkhaisa. ǀNî ǃâgu ǃnâ i ge Hebre mîsa ra sîsenūhe. ǀGui ôaǃnâ ǂkhanis ge ra mî,  nē mîs “Elob ǁore-aona ra ǀûba ǀgauba ǃoa ǀgui ra ǁnaeǁgausa. Tsî ǁnā mîs ge khoen ra ǀûbagu ǀgauba ǃoa ǁnaeǁgau tama hâ.” Jehovab ǀguib ge ǃhausen hâ ǁore-ao-e ǀoasase a ǀûba ǁkhā. Tae-e ra ī Jehovab ga khoe-e ǀûba o?

12-13. (a) Jehovab xa ra ǀûbahe khoe-e tae-e ra hōǃâ? (b) Jehovab xa da ra ǀûbahe, o da ra hō ǂkhîba matikō ǁaeba ra hâ?

¹² Jehovab ge ǀûba dasa da ga ǂanǃgâ, o da ge “ǀasa gagasi ǀgaiba” ra hō. Tsî da ge ra ǂkhî tsî ǃanu ǃgâiǂâis tsîna ra ūhâ. ǁNāti ī ǀûbaba du ge khoena xu a hō ǁoa. Xawe ‘Jehovaba xu’ ǀgui a hō ǁkhā. (ǃNǃkh. 3:19) Jehovab ga ǀûbada o. O da ge ǁkhapa ra ǁîb di ǀhōsa kai. Tsî i ge ǁore tama da ge hâ-i khami nî tsâ.

¹³ Jehovab ǀûba da hâs khaoǃgâb ge ǂgari-am da. Tamas ka io ǁkhara da tama hâ, ǁnā ǁoreb ǃaroma. (Jes. 43:25; Jer. 31:34) “Aiǂoas huriǂoasa xu ǃnūs ǁkhās khamib” ge Jehovaba sida ǁorena ra ūbē. * (Psa. 103:12) Jehovab ǀûbab ǃkhōǂgâ hâ xūn xa da ga ǂâi o. O da ge buru tsî ra gangan. (Psa. 130:4) Xawe Jehovaba ham-e nî ǀûba?

14. Tae-e da go ǁkhāǁkhāsen Jehovab di mîǁguib ǀûbas dib xa?

¹⁴ Mû da ge go, Jehovab ga khoe-e ǀûba ob. Khoe-i ǁoreb go kai i tamas ka io ǂkhariros ai kō tamasa. Mûs tsîna da ge go hî, Jehovab sida Kuru-aob, ǂHanu mā-ao. Tsî ǀGoraǃgâ-aob aseb ūhâ ǂansa ra sîsenūsa, khoe-eb ga ǀûba o. Taenab Jehovaba ǂais ǃnâ ūhâ, sida ǀûbasab nî mîǁguis aiǃâ?

15. Lukab 12:47, 48 ǃoagub Jehovaba tae-e ǂâis ǃnâ ūhâ?

¹⁵ ǀGui xū-i Jehovab ǂâis ǃnâ ra ūhâ i ge. ǁOre-ao-e ǂan-e dī i ra xū-i go tsū isa. Jesub ge nēsa ǃgāsase ge ǁgau Lukab 12:47, 48 ǃnâ. (Khomai re.) Khoe-i ga ǂan i a hîna Jehovab ǂkhā hâ xūna ǀape tsî a dī o. O i ge ǁî-e ǀgaisa ǁoreba go dī. Jehovab ge mîǁgui ǁkhā îb, ǁnā khoe-e tā ǀûba. (Mrk. 3:29; Jhn. 9:41) Xawe ǀnî ǁaega da ge a ǂan, dī da go  xū-i a tsūsa. ǁNāti ī mâsib ǃnâ da ga hâ o, ǀûbahe ǁkhā i da a? Îo. Jehovab ge ǀnî xū-i tsîna ǂâis ǃnâ ūhâ. Sida ǀûbasab ga mîǁgui o.

16. ǃHausensa tae-e ra ǂâibasen? Tae-i ǃaroma da nî ǃhausen Jehovab xa da ga ǀûbahe ǂgao o?

¹⁶ ǀNî hâ xū-i hînab Jehovaba ǂâis ǃnâ ra ūhâ i ge. ǁOre-ao-i amabes ǃnâ ǃhausen hâsa. ǃHausensa tae-e ra ǂâibasen? ǃHausen ra khoe-i ge “ǁî-i di ǂâiǀgaub tsî tanisen ǀgaub tsîna ra dawa.” ǁNāti ī khoe-i ge dī i go ǁgai xū-i xa ǁgaise ra tsâ. Tsî ǃgamse ra tsâǀkhāhe. Tamas ka io ǂhanu xū-i hîna i ga dī hâ-e, i dī tama ǃkhais ǃaroma. ǃHausen hâ khoe-i ge ǁî-i dīsā hâ, xū-i ǃaroma ǀgui ǁgaise tsâ tama hâ. Xawe Jehovab ǀkha i ūhâ ǀhōsagusisa i ge. ǂKhabu kais ǃaromas tsîna ǁgaise ra tsâ. ǁNās ge nē ǁoreba a ǃaroma amaga. Gao-aob Manaseb tsî Davib tsîkha ge kai ǁoreba ge dī. Xaweb ge Jehovaba ǁîkha ge ǀûba, ama ǃhausen kha ge amaga. (1Gao. 14:8) Îo, Jehovab ge a ǀûba da ǁkhā. Ama ǃhausen da hâsab ga mû o ǀgui. Xawe dī da go ǁoreb xa ǁgaise tsâs ge ǂâu tama hâ. Dīgu ǀkha da ge nî ǁgau. * Tsî nē i ge ǀnî xū-i hînab, Jehovaba ǂâis ǃnâ ra ūhâ-e.

17. ǃHobasensa a tae? Tsî tae-i ǃaroma da nî ǃhobasen? (Jesajab 55:7)

¹⁷ ǀNî xū-i hînab Jehovaba ǂâis ǃnâ ra ūhâ i ge ǃhobasensa. ǃHobasens ge ‘dawasen’ ti ra ǂâibasen. ǁNās ge ra ǂâibasen, khoe-i dī i goro ǁgai xūna xu. Tsî Jehovab ra ǂgao khami nî ûisa. (Khomai re Jesajab 55:7 sa.) ǁNā khoe-i ge ǁî-i ra ǂâi ǀgauba nî dawa. Î-i Jehovab ǂâiǀgaub xa daoǁgauhe. (Rom. 12:2; Efe. 4:23) ǁÎ-i ge nî dītsâ î-i ǀnai i ge ūhâ-i, ǃgâi tama ǂâiǀgaub tsî dīga ǁnāxu. (Kol. 3:7-10) Jehovab ge Xristub di ǁguibas ǃnâ-ū a ǀûba da ǁkhā. Tsî sida ǁorena a ǃanuǃanu ǁkhā. Jehovab ge nē ǁguibas ǃnâ-ū nî ǀûba da. Mûb ga o dītsâ da rasa, dī da ge ǁgai xūna xu hâbesa.—1Jhn. 1:7.

18. Tae-e da go Jehovab ǀûbas xa ǃhoaǃgao?

¹⁸ ǀKhī da ǃnubuse ǃhoaǃgao re, ǀnî ǂhâǂhâsa xūn hîna da go ǃhoaǃgaona. Jehovab ge amabes ǃnâ, ǃhūbaib hoab ǃnâ a ǃgâi ǀûba-ao. Tae-i ǃaroma da ǁnāsa a mî ǁkhā? ǂGuroseb ge hoaǁae ra ǀûba. ǀGamǁîseb ge hoa xūna sida xa a ǂan. Tsîb ge a ǂhanu khoe hîna a mîǁkhāba ǃhausen da hâsa. Tsî ǃnonaǁîse, Jehovab ga ǀûba da o. O i ge ǁnāsa ǁîb ǃoagu, ǁore tama da go hâ-i khami i. Tsî nēs ge ra mā-am da î da ǃanu ǃgâiǂâis. Tsî ǁîb di mā-ams tsîna hō.

19. ǀOasa kurusa da ūhâ tama xawe da tae-i ǃaroma a ǂkhî ǁkhā?

¹⁹ Ama as ge ǀoasa kurusa da ūhâ tama hâs, kōse da nî ǁoresa. Xawe da ge ǁkhaeǂgaosa Insight on the Scriptures, Volume 2 ǃnâ hâ mîdi hîna 771ǁî ǂhaweb ai hâde xu ra hō. Saorase ra mî de: “Jehovab ǀkhomxaǃnâse ǁîb ǃoaba-aon di ǂkhabusasiga ra kō hîna. Î ge ǂhâbasa tama hâ în ǀnain ge dī hâ-i xūn ǃaroma tsūse tsâ. Hînan ge ǀoasa tama kurusa xu a hōna. (Psa. 103:8-14; 130:3) Dītsâ tsîn ga Elob ǀgaugu ǃoagu ûi o. On ge ǂkhîba a ūhâ ǁkhā. (Fil. 4:4-6; 1Jhn. 3:19-22).” ǁNā i ge kaise ra omkhâi xū-e.

20. Tae-e da sao ra ǁkhāǁkhāǃâs ǃnâ nî ǃhoaǃgao?

²⁰ Kaise da ge ra gangan, Jehovab hoaǁae ra ǀûba dasa. Amabes ǃnâ da ga sida ǁoren ǃaroma a ǃhausen o. Mâ ǀgaub ǃnâ da Jehovab di ǀûbaba a ǁgae ǁkhā? Tsî mâ ǀgaugu ǃnâb sida ǀûbasa Jehovab di ǀûbas ǀkha a ǀgui? Xawe mâ ǀgaugu ǃnâ a ǃkharagagu? Tae-i ǃaroma i ǁnā ǃkharagagusiba ǁnâuǃāsa a ǂhâbasa? Sao ra ǁkhāǁkhāǃâs ge ǁnā dîde nî ǃeream.