TE PONO mō te aha? Mō ētahi o ngā tino pātai nui kua pātai te tangata. Kua mahara pea koe ki ngā pātai pēnei:

• Kei te aroha mai rānei te Atua ki a tātou?

• E mutu rawa te whawhai me te mamae?

• Ina mate tātou ka tūpono ki a tātou he aha?

• He aha te tūmanako mō te hunga mate?

• Kia pēhea tāku inoi e rangona ai e te Atua?

• He pēhea e riro mai ai te koa ki taku oranga?

E rapu koe i ngā whakautu ki ēnei pātai i hea? Ki te haere koe ki ngā puna me ngā toa hoko pukapuka, tērā koe e kite i te manotini pukapuka e mea ana kei a rātou ngā whakautu. Heoi, he maha tonu kei te whakahē i ētahi atu. Ka tika pea ētahi atu āianei, āpōpō ia ka tahito, ka whakakapi.

Arā tonu tētahi pukapuka, he pono nei āna whakautu. He pukapuka ia o te pono. I inoi a Ihu Karaiti ki te Atua: “Ko tāu kupu te pono.” (Hoani 17:17) E mōhio ana tātou ki taua pukapuka ināianei ko te Paipera. I ngā whārangi ake, ka kite iti noa koe i ngā whakautu mārama, pono a te Paipera ki ēnei pātai i runga.

TE TAKE E PUTA MAI ANA TE PĀTAI: E noho ana tātou ki tētahi ao kī tonu i ngā mahi nanakia me te kino. He maha ngā momo karakia e whakaako ana, ko tā te Atua i pai ai mō tātou ēnei mamae.

TĀ TE PAIPERA E AKO ANA: Ehara rawa i te Atua ngā mea kino. “E kore rawa te Atua e mahi i te kino; e kore rawa hoki te Kaha Rawa e mahi i te hē!” e kī ana a Hopa 34:10. He aroha tonu tōna kaupapa mō tātou. Nō konei te ako a Ihu kia inoi tātou: “E tō mātou Matua i te rangi, kia . . . tae mai tōu Rangatiratanga. Kia meatia tāu e pai ai ki runga ki te whenua, kia rite anō ki tō te rangi.” (Matiu 6:9, 10) Nā te nui o tōna aroha ki a tātou, he nui rawa āna i mahi ai ki te whakatutuki i tōna kaupapa.—Hoani 3:16.

Tirohia hoki Kēnehi 1:26-28; Hēmi 1:13; me 1 Pita 5:6, 7.

TE TAKE E PUTA MAI ANA TE PĀTAI: Ka hia tonu ngā tāngata e mate ana i te pakanga. Kua pā te mamae ki a tātou katoa.

TĀ TE PAIPERA E AKO ANA: E kōrero ana te Atua mō te wā e whakapūmautia e ia te rangimārie puta noa i te ao. I raro i tōna Rangatiratanga, he kāwanatanga i te rangi, ka “mutu pū tā rātou ako ki te whawhai.” Engari, “ka patupatua e rātou a rātou hoari hei hea parau.” (Īhāia 2:4) Ka whakamutu te Atua i ngā mahi tūkino katoa me te mamae. E kī taurangi ana te Paipera: “Ka murua e [te Atua] ngā roimata katoa i ō rātou kanohi; ā kore ake he mate, kāhore hoki he auē, kāhore he tangi, kāhore he mamae i ngā wā i muri nei. Kua pahemo atu hoki ngā mea o mua [tae ki ngā tūkino me ngā mamae o ēnei rā].”—Whakakitenga 21:3, 4.

Tirohia hoki Ngā Waiata 37:10, 11; 46:9; me Mika 4:1-4.

TE TAKE E PUTA MAI ANA TE PĀTAI: He nui ngā momo karakia e whakaako ana, ka ora tonu he wāhi o te tangata i muri i te matenga. Ko ētahi atu kei te whakapono ka whakamamae te hunga mate i te hunga ora, ka whiua rānei te hunga kino e te Atua mā te tahu i a rātou ki te ahi e kore e tineia.

TĀ TE PAIPERA E AKO ANA: Hei te matenga, ka kore noa iho te tangata. “Ko ngā tūpāpaku ia, kāhore ō rātou mōhio ki tētahi mea,” e kī ana a Te Kaikauwhau 9:5. Tā te mea kāhore te hunga mate e mōhio, e rongo, e mahi rānei, kāore e taea e rātou te whakamamae—te āwhina rānei—i te hunga ora.—Ngā Waiata 146:3, 4.

Tirohia hoki Kēnehi 3:19 me Te Kaikauwhau 9:6, 10.

TE TAKE E PUTA MAI ANA TE PĀTAI: E hiahia ana tātou kia ora tonu, kia hari tahi hoki me rātou e aroha nei tātou. He ngākau māori noa iho te hiahia kia kite anō i ngā whanaunga kua hemo.

TĀ TE PAIPERA E AKO ANA: Ka ara te nuinga o ngā tāngata kua mate. I kī taurangi ai a Ihu, ka puta “ngā tāngata katoa i roto i ngā urupā.” (Hoani 5:28, 29) Hāngai tonu ki te kaupapa taketake o te Atua, ko te hunga e ara ka whai wāhi ki te ora ki te whenua pararaiha. (Ruka 23:43) Kei roto i te kupu whakaari mō taua rā, ko te ora pai whakaharahara, mutungakore hoki mō te hunga whakarongo. E kī ana te Paipera: “Ka riro te whenua i te hunga tika, ka nohoia hoki a reira e rātou ake ake.”—Ngā Waiata 37:29.

Tirohia hoki Hopa 14:14, 15; Ruka 7:11-17; me Ngā Mahi a ngā Āpōtoro 24:15.

TE TAKE E PUTA MAI ANA TE PĀTAI: E inoi ana ngā tāngata i ngā momo karakia katoa. Heoi, he nui rātou e pēnei ana kāhore he whakautu ki a rātou inoi.

TĀ TE PAIPERA E AKO ANA: I whakaako a Ihu kia kaua tātou e inoi i ngā kupu kua ako tātou. I kī ia “Ka inoi koutou, aua e whakahuatia noatia ko aua kupu anō.” (Matiu 6:7) Ki te hiahia tātou kia whakarongo te Atua ki a tātou inoi, me inoi tātou hei tāna e pai ai. E taea ai tēnā, me ako tatou ki tā te Atua e pai ai, ā ka inoi pērā. E mea ana a 1 Hoani 5:14: “Ki te inoia e tātou tētahi mea i [te Atua], tāna i pai ai, ka whakarongo mai ia ki a tātou.”

Tirohia hoki Ngā Waiata 65:2; Hoani 14:6, 14; me 1 Hoani 3:22.

TE TAKE E PUTA MAI ANA TE PĀTAI: E whakapono ana te nuinga mā te moni, te rongonui, te ātaahua rānei ka koa rātou. Nā wai, e whai ana rātou i aua mea—me te kite kāore tonu rātou e koa.

TĀ TE PAIPERA E AKO ANA: I kōrerotia e Ihu te pūtake o te harikoa i tāna kī: “Ka koa te hunga e hiakai ana, e hiainu ana ki te tika.” (Matiu 5:6) Ka kitea te tino koa ina mākona tō tātou matenui—arā, kia mōhio ki te pono ā-wairua e pā ana ki te Atua, me tōna kaupapa mō tātou. Kei roto i te Paipera taua pono. Mā taua pono e mōhio ai tātou he aha ngā mea nui o te ora, he aha ngā mea iti. Ina ārahi te pono o te Paipera i a tātou whakaritenga, me a tātou mahi, ka tino whai tikanga te oranga.—Ruka 11:28.

Tirohia hoki Ngā Whakataukī 3:5, 6, 13-18 me 1 Tīmoti 6:9, 10.

 Kua titiro poto noa tātou ki ngā whakautu a te Paipera ki ngā pātai e ono. E pai rānei koe kia mōhio ki ētahi atu mea? Me kei roto koe i te hunga “e hiakai ana ki te tika,” kāore e kore e pai koe. Kei te mahara pea koe ki ētahi atu pātai, pēnei: ‘Me i aroha te Atua ki a tātou, he aha ia i tuku ai i ngā kino me ngā mamae nunui, mai rā anō? He pēhea e pai ake te ora o taku whanau?’ Kei te Paipera ngā whakautu nui, pai hoki ki ēnei me ētahi atu pātai.

Heoi anō, ka āhua mataku ētahi ki te titiro ki te Paipera. Ki a rātou he pukapuka roa, he uaua ki te mōhio. E pai rānei koe kia kite i aua whakautu i te Paipera? E toro ana ngā Kaiwhakaatu a Ihowa i ēnei taonga e rua hei āwhina i a koe.

Tuatahi, kua tuhia te pukapuka What Does the Bible Really Teach? kia kite ngā tāngata pukumahi i ngā whakautu mārama a te Paipera ki ngā pātai hira. Ko te taonga tuarua, he kaupapa ako Paipera i te kāinga, mō te kore utu. Kore utu tonu, ka haere ki a koe he hoa noho tata, he tangata matatau ki te whakaako i te Paipera. Ka haere ia ki tōu kāinga ia wiki, tētahi wāhi kē rānei, ki te kōrero tahi me koe mō te Paipera. Inā te nui o ngā tāngata kua whiwhi painga i tēnei kaupapa puta noa i te ao. He nui anō rātou kua kī: “Kua kite ahau i te pono!”

Kāhore he taonga utunui i tua atu i tēnei. Ka wetekina tātou e te pono o te Paipera i ngā kōrero mauri tūpato, i ngā whakaaro pōhēhē, i te wehi o te mate. Ka tukuna ki a tātou he tūmanako, he kaupapa oranga, he koa. Hei tā Ihu: “E mātau koutou ki te pono, ā mā te pono anō koutou ka rangatira ai.”—Hoani 8:32.