Setan ej ãinwõt baijin in kõnke jejjab maroñ loe, el̦ap an kauwõtata, im epen ad maroñ kile ñe epãd ilo juon jikin. Bõtab, Anij ej jipañ kõj bwe jen kõjparok kõj jãne. Kwõban aikuj mijak Setan ñe kwõj bõk jipañ jãn Anij. Erkein ej jet iaan men ko Anij ej jipañ kõj kaki.

Maroñ ñan kõm̦m̦an jokãlõt. Bokin Jemes 4:7 ej ba: “Kom̦win jum̦ae tepil̦, im enaaj ko jãn kom̦.” Meñe Setan ekajoor, ak ejjab maroñ iuuni eok bwe kwõn kõm̦m̦ani men ko kwõjjab kõn̦aan kõm̦m̦ani. Ewõr am̦ maroñ ñan kããlõt. Ilo 1 Piter 5:9 (UBS) ej ba: “Kom̦win pen ilo tõmak eo ami im jum̦ae e [Tepil̦ eo].” Keememej bwe Setan ear etal jãn Jijej ãlikin an kar Jijej jum̦ae e ke ear kajjioñ kapoe 3 kõttan. (Matu 4:11) Kwõmaroñ bar kããlõt ñan jum̦ae Setan ñe ej kajjioñ in kapo eok.

Jem̦jerã eo ad ippãn Anij. Bokin Jemes 4:8 ej rõjañ kõj bwe jen “ruwaakl̦o̦k ñan Anij.” Jeova ej make kũr eok bwe kwõn jino juon jem̦jerã epaak ippãn. Ewi wãween am̦ maroñ kõm̦m̦ane men in? Wãween eo em̦m̦antata ñan jinoe ej ilo am̦ kal̦apl̦o̦k am̦ jel̦ã kõn ta ko Baibõl̦ ej ba kõn E. (Jon 17:3) Men ko kwõj katak kõn Jeova renãj kõm̦akũt eok bwe kwõn yokwe E. Im yokwe in am̦ ñane enãj kõm̦akũt eok bwe kwõn kõm̦anm̦an ankilaan. (1 Jon 5:3) Ilo am̦ naaj epaakel̦o̦k wõt Jem̦am̦ ilañ, ta eo enaaj wal̦o̦k? Jemes ear wõnm̦aanl̦o̦k im ba: “[Anij] enaaj ruwaakwaj” ñan eok.

Anij ej kallim̦ur bwe enaaj kõjparok eok. Bokin Jabõn Kõnnaan 18:10 ej ba: “Etan Jeova juon em̦ utiej im pen; ruwãnõk ej ko ñan e innem ejjel̦o̦k an uwõta.” Ejjab mel̦el̦ein men in bwe etan Anij ej juon kein kõrwaan. Bõtab, mel̦el̦ein eoon in ej bwe ro me em̦ool aer kautiej etan Anij remaroñ kũr ñane bwe en kõjparok er jabdewõt iien.

 Juon waanjoñak ilo Baibõl̦. Bokin Jerbal 19:19 ej kwal̦o̦k juon men em̦m̦an kõn ro me rar oktak im Kũrjin ilo Epesõs. Ej ba: “Im elõñ iaan ro rar anijnij rej aini bok ko aer, im tile im̦aan mejãn armej otemjej; im rej bwini on̦ãer, im lo elemñoul to̦ujin m̦õttan jelba.” * (Lale kõmel̦el̦e eo itulal̦.) Kũrjin rein rar jol̦o̦k aolep men ko m̦weieer me ewõr m̦õttan kajjetõbtõb im anijnij ie, jekdo̦o̦n ñe rar lukkuun aorõk im l̦ap on̦ãer. Jemaroñ katak jãn waanjoñak in ilo raan kein. Elukkuun lõñ ro rej anijnij im kajjetõbtõb. Elõñ kain m̦anit im men ko me ewõr m̦õttan kajjetõbtõb ie, im jemaroñ l̦õmn̦ak bwe ejjel̦o̦k jorrããn ie ak ilo m̦ool remaroñ kaaltok jetõb ettoon. Kõn men in, elukkuun aorõk bwe jen kõjparok kõj jãn aolep men kein.​—Duteronomi 18:10-12.

Rogelio, eo me katak eo jinointata ear kwal̦o̦k kake, ear jab tõmak bwe ewõr Setan. Lemñoul iiõ in an jab tõmak men in. Bõtab tokãlik, ear bar lukkuun lale ñe ejim̦we l̦õmn̦ak in an. Etke? Ej ba, “Ej kab wõr aõ Baibõl̦. Im men ko ij katak jãn Baibõl̦ rar kõm̦m̦an aõ tõmak bwe ewõr Setan. Ejja men kein wõt me ij katak kaki rej kõjparok eõ bwe in jab po ilo menin kapo ko an Setan.”

Kokõn̦aan ke bwe en jako Setan? Eokwe, m̦õttan jidik enaaj wal̦o̦k men in. Baibõl̦ ej kanaan bwe juon iien Setan Tepil̦, eo im ej m̦on̦e elõñ armej, naaj “jol̦o̦ke n̦a ilo lom̦al̦o in kijeek im brimstone.” (Revelesõn 20:10) Kijeek im brimstone rejjab maroñ tile Setan kõnke ej juon jetõb im jejjab maroñ loe. Kõn men in, lom̦al̦o in kijeek in me eoon in ej kõnnaan kake ej kõkkar kõn jako indeeo. Mel̦el̦ein bwe Setan enaaj jako ñan indeeo. Iien in enaaj juon iien ekalañlõñ ñan armej ro rej yokwe Anij!

Bõtab ilo tõre in, kwõn kal̦apl̦o̦k wõt am̦ katak kõn Jeova im men ko ekõn̦aan bwe kwõn kõm̦m̦ani. * (Lale kõmel̦el̦e eo itulal̦.) Baj l̦õmn̦ake m̦õk kõn iien eo kwõnaaj mour ñan indeeo im kwõnaaj ba, “Ejako Setan!”